Dagiti Ebanghelisador “Anienda ti Sangalubongan nga Apit”
“Bayat a ti relo agtiktiktik agingga iti Armagedon, parparang-ayen dagiti Saksi ni Jehova ti trabahoda a panangisalakan iti adu kadatayo aginggat’ kabaelanda manipud iti dayta nakabutbuteng a panangdadael.”—Editorial ni Ian Boyne iti “The Sunday Gleaner,” Marso 15, 1987, Kingston, Jamaica.
TI MANNURAT iti editorial a naadaw iti ngato ti umiso. Patien dagiti Saksi ni Jehova a ti Armagedon, inton dadaelen ti Dios ti managdakdakes, ti asidegen ket ti sangatauan agbibiagen iti tiempo ti nadiosan a panangukom. (Apocalipsis 14:6, 7) Gapuna, kasapulan ti panangipangag dagiti tattao ti mensahe iti naimbag a damag. Ni Jesu-Kristo, ti naindaklan pay laeng a natauan nga ebanghelisador, ti nangirugi ti panagandar ti maysa nga organisasion a nagebanghelio “agingga kadagiti ungto ti daga” idi umuna a siglo. (Aramid 1:8, New English Bible; Colosas 1:23) Impadtona ti maipapan iti umas-asping a trabaho a panagebanghelio iti kaaldawantayo. (Mateo 24:14) Ti organisasion ita a mangar-aramid iti dayta ket buklen dagiti Saksi ni Jehova, a mangikaskasaban iti naimbag a damag iti Pagarian ti Dios a sigaganat kadagiti 210 a pagpagilian ken teritoria.
Nupay kasta, dagiti Saksi ni Jehova, saanda laeng a maysa nga organisasion a manangaskasaba. Isuda met ti maysa nga organisasion a mannursuro. Imbaon ni Jesus dagiti paspasurotna nga “agaramid kadagiti ad-adalan dagiti tattao iti amin a nasion, . . . nga isursuro kadakuada nga aywananda dagiti isuamin a banag nga imbilinko kadakayo.” (Mateo 28:19, 20) Kayatdakay nga iyam-ammo iti sumagmamano kadagiti indibidual a nagunggonaan manipud iti trabahoda a panangaskasaba ken panangisuro.
Mexico
Adtoy ni Virginia. Isut’ 110 añosen ket kayatna a salaysayen kadakayo a “nikaanoman saan pay a naladaw ti panangammo ken panagserbi ken ni Jehova.” Kas maysa nga agtutubo a babai, isu ti debosionado unay nga iti uppat a tawen kinawesanna ti bagina iti naisangsangayan a narelihiusuan a pagan-anay. “Ngem adda maysa a banag nga agkurang,” kunana. Awan pakasarakanna kadagiti makapnek a sungbat kadagiti salsaludsodna. Kas pangarigan, idi nagsaludsodanna dagiti mannursuro idiay simbaanda, “Ania ti nagan ti Dios?” kunada, “Ti nagan ti Dios ket isut’ Dios.”
Ngem nagbalbaliw dagiti bambanag idi 1983 idi a ti apokona a babai nangrugi a makipagadal ti Biblia kadagiti Saksi ni Jehova. Ti apokona a babai ti nangsungbat ti saludsod ni Virginia babaen ti panagkunana a Jehova ti nagan ti Dios. (Salmo 83:18) Daytoy ti nanggutugot ken ni Virginia a maaddaan iti kabukbukodan a panagadal ti Biblia a kadua dagiti Saksi. Dua a tawen kamaudiananna, idi Hunio 2, 1985, isut’ nabautisaran idi agtawen ti 108 años.
“Malaglagipko dayta a petsa nga addaan ti panagayat,” kunana, “agsipud ta iti dayta nga aldaw nangrugi ti panagbiagko. Iti edadko, mangaskasabaak iti lima wenno innem nga oras iti binulan ket agsarsarukodak a mangsuportar iti pannagnak. Kaykayatko ti magmagna ngem ti aglugan ti kotse. Iti daytoy a pamay-an masalimetmetak ti nasayaat a pisikal a kasasaadko.”
India
“Siak ti maton ken ti awan kaes-eskanna a tao iti ilimi,” kuna ti maysa a lalaki a maysa met a pabagbag-en kadagiti adu a bisio. “Agipuspuslitak kadagiti droga, agay-ayam iti mutka (sugal), ken agsigarilio kadagiti libre a sigarilio nga ipapaay dagiti nalimed a klientek. Adda met ti ugalik a managinum ti arak—amin dagitoy agpapan pay kinapudnona a maysaak nga aktibo a miembro ti simbaan.” Ngem idi simmarungkar ti maysa kadagiti Saksi ni Jehova iti balayna ket inrugina ti panagadal iti Biblia ken inyaplikar dagiti balbalakadna, nagbalbaliw ti biagna. (Proverbio 2:1-22; 2 Timoteo 3:16) Itan isu, ni baketna, ken dua kadagiti annakna a babbai ti mangtultulongen kadagiti dadduma a lumapsut met kadagita a bisio.
Belgium
Maysa nga agtutubo a pagassawaan ti makapungtot la unay iti Dios. Apay? Ti umuna nga anakda, maysa a babai, natay sangapulo nga aldaw kalpasan ti pannakaipasngayna. Ti maikadua nga anakda naiyanak a baldado. Ket ti maikatlo, a kasla met napigsa ken nasalun-at, natay kalpasan laeng ti lima a bulan. Ti ina saanna a mabalin a patien a ti maysa a naayat a Dios palubosanna dagita a trahedia a mapasamak kadakuada idinto a nagadu met a tattao nga agbibiag iti kinamanaglablabes ket addaanda kadagiti nasalun-at nga annak.
Di nagbayag kalpasanna, maysa kadagiti Saksi ni Jehova ti mangaskasaba iti binalay-balay iti sangakaarrubaan ket simmarungkarda iti pagtaenganna. Idi agsasao ti Saksi maipapan kadagiti karkari ti Dios a maipaay iti naragsak a masanguanan ti sangatauan, makasimron pay ti babai a maibusor iti kapanunotan maipapan iti maysa a Dios a maysa a naayat a nainlangitan nga Ama. (Salmo 37:10, 11) Ngem immanamong a nangawat iti sumagmamano a pagbasaan ti Biblia. Nagin-inut, kalpasan ti maulit-ulit a panangsarsarungkar ti Saksi, ti mensahe ti naimbag a damag ti Biblia ti nangpalukneng ti pusona ken nangpapigsa ti panagtalekna iti Dios. Itan isu ken ni lakayna ti addaanen ti napigsa a namnama saan laeng a ti panangagas ni Jehova iti baldado nga anakda a lalaki iti masanguanan a Paraiso a daga no di ket pagungarennanto met dagiti dua a dadduma pay nga annakda.—Juan 5:28, 29; Apocalipsis 21:1-4.
Portugal
Maysa nga agsapa iti Domingo, maysa a babai nga agaw-awit iti maysa a supot a napunno iti groceria ti nagsardeng a makisarita iti maysa a pagassawaan. Isu daytoy ti damdamona ngem saan nga isut’ kaudian a pannagsarakda. Ti pagassawaan, nga isuda ti Saksi ni Jehova, ket addada iti trabahoda a panagebanghelio. Kinomendaranda ti napan naggatang iti inna panangay-aywan iti namaterialan a kasapulan ti pamiliana. Ngem asino, insaludsodda, ti makaipaay ti kasapulan iti sangatauan? Sinungbatanda a mismo ti saludsodda babaen ti panagkuna a ti Dios ti makaipaay iti dayta. (Salmo 107:8, 9; Isaias 33:24) “Adda met aya remediona maipaay iti parikutko?” kinunana ti babai a sipipigsa. Simmungbat dagiti Saksi iti wen ket isudat’ naawis iti pagtaenganna, a sadiay narugian ti panagadal iti Biblia. Ni lakayna, idi madlawna ti nasayaat a panagbalbaliw ti kababalin ni baketna, ti nakikadua iti panagadal ket iti di nagbayag nakapagaramid met ti panagbalbaliw iti estilo ti panagbiagna.
Kamaudiananna, kuna ti babai kadagiti Saksi a sakbay ti pannakisaona kadakuada iti dayta nga agsapa ti Domingo, naminduan nga inrantana ti panagbekkelna. Isu ti mariribukan unay agsipud ta isu ken ni lakayna naikeddengda ti panagsinada. Itan, nupay kasta, isu, ni lakayna, ken dagiti annakda ti sangsangkamaysan a rumangrang-ay iti panagad-adalda maipapan iti naimbag a damag.
Thailand
Iti kaaduan iti panagbiagna, maysa a babai nga agtataeng iti umamianan a paset daytoy a pagilian ti rirriribuken dagiti demonio. Idi isut’ naiyam-ammo iti maysa kadagiti Saksi ni Jehova iti trabaho a panagebanghelio, isut’ nangala ti sumagmamano a pagbasaan ti Biblia ket immanamong iti panagadal iti Biblia iti pagtaenganda. Kalpasan ti dua a bulan a panagad-adal, inapresiarna dagiti Nainkasuratan a rason iti panangdalus iti balayda kadagiti isuamin nga alikamen iti ulbod a panagdayaw, kas kadagiti ladladawan, ken ti panangdadael ti patpatgenna unay a pagtaengan ti espiritu a naibangon a mangsalaknib ti pamiliana manipud kadagiti dakes nga espiritu. (Aramid 19:19; 1 Corinto 10:21; 1 Juan 5:21) Itan awanen dagiti panangraraut ti demonio kenkuana ket maipamaysanan ti panangtulongna met kadagiti dadduma a mangammo iti dayta maymaysa a pudno a Dios, ni Jehova.
Kenya
Idi naibaga iti maysa a lider dagiti kriminal nga isut’ maibilbilang a kapeggadan a dagiti polis nabilinda a mangpapatay kenkuana apaman a makitada, kinatkatawaanna laeng dayta. Nupay kasta, di nagbayag kalpasan dayta maysa kadagiti iraraut ti bunggoyda ti di nagballigi sigun iti plano. Nasarakanna ti bagina nga agmaymaysa, a nalikmut iti makapungtot unay a bunggoy dagiti tattao a sisasagana a mangipakat ti kabukbukodanda a kinahustisia. Iti dayta a kanito, immay ti polis a nangispal kenkuana, isu ti impanawda, ket sinerraanda idiay pagbaludan nga agur-uray ti pannakabistana iti korte.
Ti abogadona ti nangisuro kenkuana kadagiti nadumaduma a taktika a panangilibak ti basolna. Ngem kabayatan ti kaaddana idiay selda iti pagbaludan, nalagipna ti isasarungkar ti maysa kadagiti Saksi ni Jehova adu a tawenen ti napalabas. Isu ti nangrugin a nagbabawi kadagiti kinadakesna ket nagkararag iti Dios a maipaay iti tulongna. Kinapudnona, isut’ nagkararag iti nagan ni Jehova. (Idiligyo iti Aramid 10:1, 2.) Iti pannakakellaat ti hues, inamin daytoy a kriminal ti basolna iti korte. Gapuna isu ti pinatawan ti hues iti nalag-an laeng a sentensia; imbes nga ipapatay, ti sentensiana ket sangapulo a tawen iti maguguardiaan unay a pagbaludan.
Kabayatan ti kaaddana idiay pagbaludan, sipapasnek a binasana dagiti pagbasaan ti Biblia ket maulit-ulit ti panagkararagna iti Dios, nga idawdawat a, no mabalin, makissayan koma ti panawenna idiay pagbaludan tapno isut’ makapagserbi Kenkuana. Iti di namnamaen a pamay-an, naibaga a ti sentensiana ket nagudua. Gapuna, kalpasan ti pannakaibaludna iti lima a tawen, isut’ nawayawayaan ket insigida a rinugianna ti panagadal ti Biblia a kadua dagiti Saksi ni Jehova. Di nagbayag kalpasanna isut’ nabautisaran, ket itan ti kalatna isut’ amin-tiempo a panagebanghelio.
Ti adda iti ngato ket sumagmamano laeng a pangarigan iti no kasano a tungtungpalen dagiti Saksi ni Jehova ti nakaibaonanda ken obligasionda nga agebanghelio “kadagiti ungto ti daga.” Dagitoy a kapadasan ti mabalin a maulit iti maminribo a daras. Pagduaduaanyo pay aya, a dagiti Saksi ni Jehova isuda dagiti pudno nga ebanghelisador itatta?