Ti Kaiyulogan dagiti Damdamag
Ti Gulis ti Zebra
“Ti minilion a tawtawen iti ebolusion” ti nangipaay iti zebra kadagiti gulisna, kuna ti Briton a magasin a World of Wildlife. Ti rason? Dadduma a sientista ti agkuna a dagiti gulis timmaudda a kas panglimo a mangsalaknib iti animal kadagiti mangkaan kadagiti padada nga animal. Ti kasla mangnayon iti panamati iti daytoy a panangmatmat isu ti kinapudno a dagiti gulisna ti pudno a mangipaay iti epekto a saan a nalawag a panagkita no dayta ti makita manipud iti adayu. Nupay kasta, saan nga amin a tattao iti siensia ket umanamong. Ni Dr. Gerrie de Graaff, sientipiko a manangbalakad a maipaay iti Sud Africa a magasin ti atap a biag a Custos, kunana: “Ditay mabalin a pagarupen a makita dagiti animal dagiti bambanag kas iti panagkitatayo.” Babaen iti panangilawlawag, intudo ni de Graaff a ti kababalin dagiti zebra dida padasen nga ilemmeng dagiti bagbagida a kas kadagiti animal nga agpannuray iti kolor a panglimlimo. Dagitoy ket naariwawada ken aktibo ket iparangda dagiti bagbagida babaen iti panagarabda iti napanayag a tantanap.
Dagiti ebolusionista kunaenda a ti naisangsangayan a nangisit ken puraw a gulis ti zebra pataudenna ti pannakaallilaw ti panagkita. Sigun ken ni de Graaff, ti maysa a pagarup ket dagiti “rumaut a leon saanda a maisina ti maysa nga indibidual agsipud ta makilaok dayta kadagiti dadduma iti pangen,” ket ti “sabali isingasingna a ti leon di umiso ti panangpattapattana iti pampanunotenna a maudi a panaglagtona.” Ngem kas kapaliiwanna, “dagitoy a teoria ket marbekda iti mapagtalkan a kapaliiwan a panangpapatay dagiti leon kadagiti zebra.”
Kas konklusion, impudno ni de Graaff nga, “agingga ita, pudno a ditay ammo no apay a ti zebra ket addaan kadagiti gulis.” Ti rason, nupay kasta, ket nalawag kadagiti estudiante iti Biblia. Idiay Genesis 1:20-25 naibaga kadatayo nga amin dagiti parparsua ditoy daga ket pinarsua ida ti Dios “sigun iti kakikitada.” Kas banagna, maysa a gagangay a pamay-an ti biolohia ti makimbiang iti gulis iti zebra. Dagita a gulis ket paset iti nakaskasdaaw a panagduduma iti disenio iti panamarsua ti Dios.
Agtartrabaho a Ministros?
Dadduma a klero inanamaenda a makita ti nakaro a panagbalbaliw iti propesionda iti asidegen a masanguanan. Daytoy ti pakaseknan nga inyebkas ti maysa a pastor a Luterano, ni Jean-Pierre Jornod, iti Reformiertes Forum, maysa a pagiwarnak a Luterano a naipablaak idiay Switzerland. Kinunana: “Mabalinko nga ipadto a ti pastor inton tawen 2000 ket iti kaaduan a kaso maaddaanton iti paset-tiempo a trabaho a mainayon iti parukona.” Apay? Innayonna: “Saan laeng a maipaay iti pinansial a rason, no di ket ti umuna ken kangrunaan ket gapu ta ti sosiedad ket umad-adu ti pakasapulanna kadagiti papastor a makilangen iti inaldaw-aldaw a panagbiag.”
Iti ad-adu pay a panangisalaysay iti daytoy a pakasapulan, kinuna ni Jornod: “Ti pastor iti tawen 2000 ket maysanto a lalaki wenno babai a makaammo a naimbag iti arte iti komunikasion. Diak kunaen a dagiti ig-iglesia awanto ti nagyanda, ngem dagiti tattao a tarigagayan a danonen ti maysa a pastor umadayudanto iti simbaan, a kas ti dadduma a mapaspasamaken itatta. Ti mensahena, ngarud, masapul a nalawlawagto, ad-adda a maawatan, ken ad-adda a direkta iti punto.”
Mapalpaliiw nga awan dagiti nabayadan a papastor idi umuna-siglo a Kinakristiano. Ti apostol a ni Pablo, kas pangarigan, impaayna ti pisikal a kasapulanna a bukodna babaen iti maysa a sekular a trabaho—ti panagaramid iti tolda. Ket saan la a dayta, dinanonna dagiti tattao iti epektibo unay a pamay-an, babaen ti panangisurona kadakuada iti “publiko ken iti balaybalay.” (Aramid 18:3; 20:20, 21, 33, 34) Maisupadi kadagiti mabayadan a ministros itatta, dagiti panglakayen, wenno papastor, kadagiti Saksi ni Jehova ti mangsursurot pay laeng iti daytoy a Nainkasuratan a padron dagiti umuna-siglo a Kristiano.