Report dagiti Manangiwaragawag ti Pagarian
Papigsaen ni Jehova dagiti Matalek nga Ad-adipenna
KUNA ni Jesus: “Saan a dakdakkel ti adipen ngem ti apona. No indadanesdak, idadanesdakayto met.” (Juan 15:20) Ngem maipaspasiguro kadagiti matalek nga ad-adipen ni Jehova nga isunto ti mangpabileg kadakuada. (Salmo 18:2; Nahum 1:7) Iti maysa a pagilian ti Africa a sadiay ti natalna a trabaho dagiti Saksi ni Jehova ket nakaro ti pannakalaplappedna, pinabileg ni Jehova dagiti ad-adipenna iti sango ti pannakakabkabil ken pannakaar-aresto, kas ipakita ti sumaganad a report:
“Maysa a manangaywan ti sirkito ken uppat a lokal a kakabsat ti di nainkalintegan a naaresto ken naipisok iti bassit a kuarto a normal a pagikulkulonganda laeng iti agalla-alla nga as-aso,” kuna ti report. “Naikulongda sadiay iti 123 nga al-aldaw a sikakawes laeng kadagiti karsonsilio ken kamisetada ket saanda pay a napalubosan a mapan iti kasilia.” Maysa a kameng ti Parliamento ti nakangngeg iti di natauan a kasasaadda ket nangrugi a nagprotesta, ket iti kamaudiananna, kalpasan ti 123 nga al-aldaw, nawayawayaan met laengen dagiti kakabsat. Pinabileg ni Jehova dagitoy matalek a kakabsat babaen iti espirituna.
Ti sabali pay a kapadasan manipud iti isu met laeng a pagilian ipakpakitana ti makagunggona nga epekto ti panangaskasabatayo. Kuna ti report: “Iti maysa a purok, dagiti tattao adda pakadamdamaganda iti kinaranggas ken iyaalsa. Nupay kasta, kalpasan a nangaskasaba dagiti Saksi ni Jehova sadiay, adun ti agraem kadagiti lokal nga agtuturay ket makiramramanda metten iti linawas a panagtrabaho ti purok kadagiti kalkalsada.” Maysa kadagiti lokal a pangulo tinarigagayanna a maammuan ti rason iti daytoy a panagbalbaliw ti kababalin dagiti tattao ket naibaga kenkuana: “Gapu iti pannursuro ti ‘pastor’ dagiti Saksi ni Jehova.” “Maysa nga aldaw daytoy a pangulo ti nangawis kaniak iti pagtaenganna,” kuna ti Saksi, “ket pinaregtanak a mangitultuloy iti daytoy naimbag a trabaho. Inikkannak ti nagdakkelan a manok a sidaenmi a sangapamiliaan.” Iti sabali pay nga okasion, ti lokal a mayor ti immay a bimmisita iti kabsat, ket ti kabsat ti nangpauneg kenkuana ket kinaskasabaanna. Ti mayor “dimmawat kadagiti magasin ket kinunana, ‘Ammomi a dikay agar-aramid ti dakes. Itultuloyyo ti agapelar. Awan ti bilin kadakami nga arestuendakayo. Pagarupek nga iti mabiiten ti Estado ti mangtamingto iti parparikutyo.’”
Maysa nga espesial payunir ti nagsurat: “Simmaruno iti darum manipud iti sekretario ti napolitikaan a partido, imbilin ti lokal a pangulo ti pannakaarestok ken pannakaibaludko iti nakarugrugit a selda a nakaang-angot gaput’ isbo ken ibleng ti an-animal. Naikabilak iti daytoy a kinasipnget iti lima nga aldaw. Iti dalan nga agturong idiay, nagkararagak ken Jehova ken nalagipko ti Salmo 50:15. Dagiti guardia idiay ti maas-asian kaniak ket saanda a rinikpan a naimbag ti ruangan tapno makaangesak ti nadalus nga angin. Kalpasan ti lima nga aldaw iti daytoy a pagbaludan, nasuotak idi inikkandak ti maysa a kalding nga ipan iti lokal a pangulo, nga awan ti guardiana. Gapu ta saanak a nagtaray, naikkanak ti wayawaya tunggal aldaw manipud alas 3:00 t.m. ingganat’ alas 7:00 t.r. Mabalinko ti makipagkita kadagiti kakabsat, ket mabalinmi ti agkukuyog a mangaskasaba. Nupay nagsakitak bayat daytoy nagrigat a tiempo ket pagarup dagiti kabusorko a matayakon, saannak a pinanawan ni Jehova. Daytoy a kapadasan ti nangiyeg kaniak a nasingsinged ken ni Jehova, ket siguradoak a ti panangidadanes nikaanoman dinakto isina manipud ili ni Jehova.”—Idiligyo ti Roma 8:35-39.
Apresiaren dagiti Saksi ni Jehova no kasanot’ panangpabileg ti Dios kadakuada kadagiti tiempo ti pakarigatan. Apresiarenda met dagidiay mangipakpakita ti asi kadakuada bayat nga itungtungpalda daytoy kapapatgan a makaispal-biag a trabaho ti panangaskasaba ti naimbag a damag. Saanto a lipaten ni Jehova ti kasta a kinamanangaasi.—Mateo 25:40.