Dagiti Saludsod Manipud Kadagiti Managbasa
◼ Mangusar kadi ni Jehova iti panangkusit wenno panangallilaw kadagiti tattao, agraman dagiti adipenna, kas ti kasla isingasing ti Jeremias 4:10 ken 20:7?
Saan, ti Namarsua saan a manangallilaw, nakusit, wenno nasikap iti pannakilangenna. Kabaelanna, nupay kasta, nga ibanag ti nalinteg a pagayatanna aniaman ti inanamaen dagiti tattao.
Makitatayo ti maysa a paset daytoy manipud iti Jeremias 4:10, a sadiay kinuna ti propeta: “Ay, Soberano nga Apo Jehova! Inallilawmo daytoy nga umili ken ti Jerusalem, a kinunam, ‘Addanto talnayo,’ idinto a ti kampilan abutenna ti biag.”
Inusar ni Jehova ni Jeremias a mangipadto iti umay a kalamidad iti managalsa a nasion a makunkuna nga agserserbi Kenkuana. (Jeremias 1:10, 15-19; 4:5-8; 5:20-30) Kaskasdi, addada dagiti dadduma nga agkunkuna a mammadtoda. (Jeremias 4:9) Ania ti nangngeg dagiti tattao manipud kadagita a makunkuna a mammadto? Inlasin ti Dios ida a kastoy: “Dagiti mammadto agipadtoda a siuulbod . . . ket ti ilik pagay-ayatanna a kasta.—Jeremias 5:31; 20:6.
Nupay saan nga imbaon ni Jehova dagidiay ulbod a mammadto, saanna met ida a pinaritan a mangiwaragawag kadagiti mensahe, a kas iti: “Addanto talnayo” ken, “Awan ti dakes nga umayto kadakayo.” (Jeremias 23:16, 17, 25-28, 32) Masapul nga agpili dagiti tattao—awatenda nasaem ngem pudno a padpadto nga impakaammo ni Jeremias wenno ipalubosda ti panangallilaw dagiti ulbod, nangaramid ti bagbagida a mammadto, kas kada Hananias ken Semaya. (Jeremias 28:1-4, 11; 29:30-32) Agsipud ta saan a pinasardeng ti Dios dagitoy a mangallilaw a mammadto, mabalin a maikuna kenkuana: “Inallilawmo daytoy nga umili ken ti Jerusalem, a kinunam, ‘Addanto talnayo.’”
Iti naiduma a kaipapanan, naallilaw ni Jeremias. “O Jehova, sika inuyotannak, ket naallilawak. Sika napigpigsaka ngem siak, ket nagballigika. Nagbalinak a maysa a pagkakatawaan iti amin nga aldaw, tunggal maysa rabakennak.”—Jeremias 20:7.
Ni Pasur, maysa a nalatak a padi, kinabilna ni Jeremias iti publiko ket kalpasanna inkabilna iti tul-ong. Manipud iti panangmatmat iti tao, mabalin a marikna ni Jeremias a nagtengannan ti pagpatingaan ti panagibturna, nga awanen ti bilegna a mangsaranget iti di panangikankano, di pannakaawat, pannakauy-uyaw, ken ti pisikal a kinaranggas. Ngem saan a kasta. Inusar ni Jehova ti bilegna a maibusor (wenno maisupadi) iti natauan a pagannayasan ni Jeremias. Inallilaw ti Dios ni Jeremias gapu ta inusarna daytoy imperpekto a tao a mangibanag iti mabalin a saan koma a naaramidan ti mammadto babaen iti bukodna a bileg. Gaput’ naallilaw wenno nasdaaw kas ti inaramid ni Jeremias iti daytoy, daytat’ nasayaat ti nagtungpalanna: Dagidiay a nangidadanes kenkuana naibabainda, ket naiwaragawag ti mensahe ti Dios.—Jeremias 20:11.
Ngarud, maawatan iti konteksto, ti Jeremias 4:10 ken 20:7 ket maitunos iti konklusion ni Eliu: “Ti Dios dinto agaramid a sidadangkok, uray ti Mannakabalin-amin dinanto met killuen ti kinahustisia.”—Job 34:12.