“Masapul a Kunaem Kadakuada Daytoy a Sao”

1. (a) Ania ti pagpadaan da Jesus ken Jeremias? (b) Iti ministeriotayo, apay a tuladentayo ni Jeremias?

NI Jesu-Kristo ti kangrunaan nga ulidan a tuladentayo no iti panangikasaba iti naimbag a damag. Ngem ni propeta Jeremias no dadduma ti adda iti panunot dagiti tattao idi umuna a siglo a nakapaliiw kadagiti inaramid ni Jesus. (Mat. 16:13, 14) Kas ken Jesus, ni Jeremias ket binilin met ti Dios a mangasaba. Kas pagarigan, naminsan kinuna ti Dios kenkuana: “Masapul a kunaem kadakuada daytoy a sao, ‘Daytoy ti kinuna ni Jehova.’” (Jer. 13:12, 13; Juan 12:49) Iti ministeriona, imparangarang met ni Jeremias dagiti galad a kas iti impakita ni Jesus.

2. Kas kadagiti Judio idi kaaldawan ni Jeremias, ania ti nasken nga aramiden dagiti tattao ita?

² Nupay kasta, mabalin a kuna dagiti dadduma a Saksi: ‘Ti trabahotayo a panangasaba ket saan a kas iti inaramid ni Jeremias. Isu ket pannakangiwat ti Dios iti nasion a dedikado Kenkuana, idinto ta ti kaaduan kadagiti kaskasabaantayo, saanda nga am-ammo ni Jehova.’ Pudno dayta, ngem idi kaaldawan ni Jeremias, nagbalin a “nakuneng” ti kaaduan a Judio ken tinallikudanda ti pudno a Dios. (Basaen ti Jeremias 5:20-22.) Nasken nga agbalbaliwda tapno awaten ni Jehova ti panagdaydayawda. Kasta met ita, dagiti tattao—ibilangda man ti bagbagida a Kristiano wenno saan—nasken a sursuruenda ti agbuteng ken ni Jehova ken agdaydayawda kenkuana iti umiso a wagas. Kitaentayo no kasano a makapagserbitayo iti pudno a Dios ken no kasano a matulongantayo dagiti tattao a mangtulad ken Jeremias.

‘SINAGID NI JEHOVA TI NGIWATKO’

3. Iti rugrugi ti panagserbi ni Jeremias kas mammadto, ania ti inaramid ti Dios kenkuana, ken ania ti epekto dayta iti propeta?

³ Iti rugrugi ti panagserbi ni Jeremias kas mammadto, naibilin kenkuana: “Kadagidiay amin a pangibaonakto kenka, rebbeng a mapanka; ket ti isuamin nga ibilinkonto kenka, rebbeng a sawem. Dika agbuteng gapu kadagiti langada, ta ‘addaak kenka tapno ispalenka,’ kuna ni Jehova.” (Jer. 1:7, 8) Kalpasanna, adda inaramid ti Dios a di ninamnama ni Jeremias. Kinuna ni Jeremias: “Inyunnat ni Jehova ti imana ket insagidna iti ngiwatko. Kalpasanna kinuna kaniak ni Jehova: ‘Adtoy inkabilko dagiti saok ita ngiwatmo. Kitaem, iti daytoy nga aldaw pinarebbenganka.’” (Jer. 1:9, 10) Manipud idin, ammo ni Jeremias nga isu ket agserbi a pannakangiwat ti Mannakabalin-amin a Dios.a Rimmayray ti regtana nga agserbi kas mammadto gapu iti naan-anay a panangsuporta ni Jehova kenkuana.—Isa. 6:5-8.

4. Mangtedka kadagiti pagarigan dagiti kakabsat a naisangsangayan ti kinaregtada a mangasaba.

⁴ Saan a literal a sagiden ni Jehova ti asinoman kadagiti adipenna ita. Ngem babaen ti espirituna, ikkanna ida iti nasged a tarigagay a mangikasaba iti naimbag a damag. Naisangsangayan ti kinaregta ti adu kadakuada. Alaentayo a pagarigan ni Maruja a taga-Espania. Nasurok nga 40 a tawenen a paralisado dagiti ima ken sakana. Gapu ta saanna a kabaelan ti mangasaba kadagiti balbalay, nangbirok iti sabali pay a pamay-an ti panangasaba, kas iti panagsurat. Idiktar ken paisuratna iti balasangna ti ibagana. Iti las-ud ti maysa a bulan, nasurok a 150 a surat nga adda karagpinna a tract ti naibusonda. Iti panagsursuratda, nakadanon ti naimbag a damag iti kaaduan a pagtaengan iti kabangibangda a purok. Kinuna ni Maruja iti balasangna, “No ti maysa kadagiti suratta ket mabasa ti tao a nalinteg ti panagpuspusona, maaddaanta iti iyadalan iti Biblia iti tulong ni Jehova.” Insurat ti maysa a panglakayen iti kongregasionda, “Agyamanak ken Jehova gapu kadagiti kakabsat a kas ken Maruja, a mangisursuro kadagiti sabsabali a mangipangpangruna kadagiti banag a pudno a napateg.”

5. (a) Kasano a nataginayon ni Jeremias ti regtana iti laksid ti panangyaleng-aleng dagiti tattao iti mensahena? (b) Kasanom a mataginayon ti regtam a mangikasaba iti naimbag a damag?

⁵ Idi kaaldawan ni Jeremias, ‘saan a naragsakan’ ti kaaduan nga umili iti Jerusalem iti mensahe ti Dios. Simmardeng kadi a mangasaba ti propeta gapu ta nagadu ti nangyaleng-aleng iti mensahena? Saan! Kinuna ni Jeremias: “Napnoak iti pungtot ni Jehova. Napakilak nga agmedmedmed.” (Jer. 6:10, 11) Kasanom a mataginayon ti kasta a regta? Ti maysa a pamay-an, utobem ti awan kaaspingna a pribilehiom nga agserbi kas pannakabagi ti pudno a Dios. Ammom a dagiti prominente a tattao ditoy lubong um-umsienda ti nagan ti pudno a Dios. Panunotem met no kasano a dagiti panguluen ti relihion al-allilawenda dagiti tattao iti teritoriayo, kas iti inaramid dagiti papadi idi kaaldawan ni Jeremias. (Basaen ti Jeremias 2:8, 26, 27.) Maisupadi iti dayta, ti iwarwaragawagmo a naimbag a damag maipapan iti Pagarian ti Dios ket ebkas ti pannakaseknan ti Dios kadagiti tattao. (Un. 3:31, 32) Wen, no utobem dagita a kinapudno, mataginayonmo ti kinaregtam a mangiwaragawag iti naimbag a damag ken mangtulong kadagiti marakarnero a tattao.

6. Ania dagiti narigat a kasasaad a nakaipasanguan ni Jeremias?

⁶ Nalabit umanamongka a saan a nalaka ti agtalinaed a naregta iti ministeriotayo kas Kristiano. Iti panagserbi ni Jeremias ken ni Jehova, adda met dagiti narigat a kasasaad a nakaipasanguanna, a pakairamanan dagiti saan a pudno a mammadto. Ti maysa kadagita ket mabasam iti Jeremias kapitulo 28. Saan nga inkankano ti kaaduan a tattao ti mensahena, ket adda dagiti tiempo a nariknana nga isu ket agmaymaysa. (Jer. 6:16, 17; 15:17) Malaksid iti dayta, adda gundaway nga indawat dagiti bumusbusor ti pannakapapatayna.—Jer. 26:11.

“SINIKAPANNAK, O JEHOVA”

7, 8. Iti ania a makagunggona a pamay-an a ti Dios ‘sinikapanna’ ni Jeremias?

⁷ Idi nauy-uyaw ken narabrabak ni Jeremias, inyebkasna iti Dios ti riknana. Iti ania nga anag a ‘sinikapan’ ni Jehova ti matalek a mammadtona, kas nadakamat iti Jeremias 20:7, 8?—Basaen.

⁸ Nalawag a saan nga inallilaw ni Jehova ni Jeremias no di ket sinikapanna iti positibo, makagunggona a pamay-an. Iti panagrikna ni Jeremias, nakaro unayen ti panangbusorda kenkuana ket saannan a kabaelan nga itungpal a bukbukod ti annongen nga inted kenkuana ti Dios. Ngem iti tulong ti Mannakabalin-amin, naitungpalna dayta. Gapuna, maikunatayo a ni Jehova pinarmekna ni Jeremias, a pinaneknekanna nga isu ket napigpigsa nga amang ngem iti mammadtona ken kadagiti natauan a pagannayasanna. Idi narikna ni Jeremias a nagpatinggan ti kabaelanna ken saanen a makapagtuloy pay, ni Jehova ginuyugoyna ni Jeremias, a kas man la sinikapanna ti mammadtona. Napigpigsa ti Dios ngem kadagiti pagkapuyan ni Jeremias. Naitultuloy ni Jeremias ti mangasaba uray no isu ket inyaleng-aleng, binusor, ken pinarigatda.

9. Apay a makapabileg dagiti sasao a nailanad iti Jeremias 20:11?

⁹ Ni Jeremias ket tinulongan ni Jehova, a nagbalin a kasla “maysa a nakaam-ames a mannakabalin” iti sibayna. (Jer. 20:11) Mapabilegnaka met ti Dios a mangsalimetmet iti regtam nga agdaydayaw kenkuana ken agtultuloy iti laksid dagiti nakaro a parikut. Mabalinmo nga iyarig ni Jehova iti “maingel a soldado,” kas kuna ti sabali a patarus, a sitatakder iti sibaymo.—Contemporary English Version.

10. Ania ti determinado nga aramidem no maipasangoka iti ibubusor?

¹⁰ Impaganetget ni apostol Pablo dayta a punto idi pinaregtana dagiti mabusbusor a Kristiano. Insuratna: “Agtignaykayo iti pamay-an a maikari iti naimbag a damag maipapan iti Kristo, tapno iti kasta, . . . mangngegko . . . nga agtaktakderkayo a sititibker iti maymaysa nga espiritu, agraman iti maymaysa a kararua nga umag-agawa nga agdadanggay a maipaay iti pammati iti naimbag a damag, ket iti aniaman a pamay-an saan a mabutbuteng kadagiti kabusoryo.” (Fil. 1:27, 28) Kas ken ni Jeremias ken dagiti Kristiano idi umuna a siglo, mapagpannurayam ti Mannakabalin-amin a Dios ken rumbeng nga agpannurayka Kenkuana bayat nga itungtungpalmo ti ministeriom. No laisen wenno busorendaka dagiti dadduma, laglagipem nga adda ni Jehova iti sibaymo a mangpabileg kenka. Kasta ti inaramidna ken ni Jeremias ken iti adu kadagiti kapammatiam, ket mabalinna met nga aramiden dayta kenka. Agkararagka a dumawat iti tulongna, ket agtalekka nga ipangagnaka. Mabalin a makunamto met a ‘sinikapannaka’ ti Dios babaen ti panangpabilegna kenka a mangparmek a situtured kadagiti tubeng imbes a malapunoska iti buteng. Wen, mabalin a maaramidmo ti banag a pulos a dimo impagarup a kabaelam.—Basaen ti Aramid 4:29-31.

11, 12. (a) Ania a panagbalbaliw ti mabalinmo nga aramiden tapno ad-adu ti makasabaam? (b) Kas ipakita ti ladawan iti panid 39, siasino dagiti mabalinmo a kasabaan iti lugaryo?

¹¹ Dagiti mabasatayo maipapan iti panagserbi ni Jeremias matulongannatayo iti nadumaduma a pamay-an nga agbalin a mas epektibo a ministro ti naimbag a damag. Kalpasan ti panagserbina kas mammadto ni Jehova iti nasurok a 20 a tawen, naikunana: “Nagsasaoak kadakayo, a bimmangonak a nasapa ket nagsaoak, ngem saankayo nga immimdeng.” (Jer. 25:3) Wen, managsapsapa ni Jeremias, saan a managladladaw. Adda kadi masursurotayo iti dayta? Iti adu a kongregasion, adda dagiti agibumbunannag a nasapa a mapan mangasaba kadagiti tattao kadagiti pagurayan iti bus ken kadagiti estasion ti tren. Kadagiti away, adu a Saksi ti rummuar iti bigbigat tapno kasabaanda dagiti mannalon ken dagiti dadduma pay a nasapa a bumangbangon. Adda kadi mapanunotmo a dadduma pay a pamay-an a matuladmo ti kinamanagsapsapa ni Jeremias bayat ti simamatalek a panagserbina? Ti ngay panagriing a nasapa tapno addakan no mangrugi ti nayeskediul a taripnong sakbay ti panangasaba?

¹² Kasta met, iti adu a lugar masansan a nasayaat ti resulta ti panangasaba kadagiti balbalay iti malem ken sardam. Dagiti dadduma nga agibumbunannag mangasabada pay ketdi iti rabii, a sarungkaranda dagiti agtartrabaho kadagiti paggasolinaan, restawran, ken dadduma pay nga establisimiento a silulukat iti 24 nga oras. Mabalinmo kadi a baliwan ti eskediulmo tapno makasabaam dagiti tattao iti oras nga addada iti pagtaenganda wenno iti dadduma pay a lugar?

13, 14. (a) Kasano a ti inaramid ni Jeremias ket adda pakainaiganna iti panagsarungkar? (b) Apay a nasken a tungpalem ti karim no imbagam iti bumalay nga agsublika?

¹³ Adda dagiti gundaway a binilin ni Jehova ni Jeremias a mapan agtakder iti ruangan ti templo wenno ti Jerusalem tapno iwaragawagna dagiti naimpadtuan a mensahe. (Jer. 7:2; 17:19, 20) Iti panagtakderna iti ruangan, ad-adu ti mapakaammuan ni Jeremias maipapan iti sao ni Jehova. Ket yantangay adu dagiti masansan nga adda sadiay, a pakairamanan dagiti prominente a lallaki iti siudad, komersiante, ken negosiante, mabalin a namin-adu a nakasaritana ti dadduma kadakuada iti panangikagumaanna a tumulong kadakuada a mangtarus kadagiti nangnangngegda idin. Ania ti masursurotayo iti daytoy maipapan iti panangsarungkar kadagidiay nangipakita iti interes?

¹⁴ Ammo ni Jeremias a ti biag dagiti kailianna ket agpannuray iti trabahona kas mammadto ti Dios. Idi saanna a maaramid ti imbilin ti Dios kenkuana, ni Baruc a gayyemna ti imbaonna a mangaramid iti dayta. (Basaen ti Jeremias 36:5-8.) Kasanotay a matulad ni Jeremias? Tungtungpalentay met laeng kadi ti karitayo no imbagatayo iti bumalay nga agsublitayo? No saantayo a makapan iti sarungkaran wenno iyadalantayo iti Biblia, mabalintay a kiddawen iti maysa a kabsat nga isu pay laeng ti mapan sumarungkar wenno mangyadal. Kinuna ni Jesus: “Ti koma latta saoyo a Wen kaipapananna ti Wen.” (Mat. 5:37) Nasken a tungpalentayo ti karitayo, ta datayo dagiti pannakabagi ti Dios ti kinapudno ken urnos.—1 Cor. 14:33, 40.

15, 16. (a) Tapno lumawa ti ministerioda, ania ti ar-aramiden dagiti adu nga agibumbunannag kas panangtuladda ken Jeremias? (b) Iti ladawan iti panid 40, ania ti masursurom iti kapadasan ti maysa a kabsat idiay Chile?

¹⁵ Tapno maliwliwa dagiti Judio nga adda idiay Babilonia, sinuratan ida ni Jeremias maipapan iti ‘naimbag a sao’ ni Jehova maipanggep iti pannakaisubli dagiti Judio iti dagada. (Jer. 29:1-4, 10) Iti kaaldawantayo, ti ‘naimbag a sao’ maipapan iti mabiiten nga aramiden ni Jehova ket mabalintay met nga isaknap babaen ti surat ken telepono. Mabalinmo kadi nga usaren dagita a pamay-an tapno matulongam dagiti kabagiam wenno dadduma pay nga agnanaed kadagiti adayo a lugar wenno dagidiay narigat a danonen?

¹⁶ Masansan a nasayaat ti resulta ti panangtulad dagiti agibumbunannag iti Pagarian iti ulidan ni Jeremias iti naan-anay a panangitungpalna iti ministeriona. Idiay Chile, inasitgan ti maysa a Saksi ti maysa a babai a rumrummuar iti subway station. Naragsakan ti babai a nakangngeg iti mensahe ti Biblia ket immanamong a masarungkaran iti pagtaenganna ta kayatna ti makasursuro pay. Ngem saan a naala ti Saksi ti adres ti babai. Gapu ta ammo ti kabsat ti kinapateg ti panangsukay iti interes ti babai iti kinapudno, nagkararag a dimmawat iti tulong ni Jehova. Kabigatanna, nagsubli iti estasion iti isu met laeng nga oras. Nagsarakda manen iti babai. Iti dayta a gundaway, innalana ti adres ti babai ket sinarungkaranna iti pagtaenganna tapno pagsaritaanda ti Biblia. Asidegen a dadaelen ti Dios ti lubong ni Satanas. Ngem adda namnama dagidiay agbabawi ken mamati iti naimbag a damag. (Basaen ti Un-unnoy 3:31-33.) Ganetgetantayo ngarud a wanasen ti teritoriatayo.

“BARENG UMIMDENGDANTO KET AGSUBLIDA, TUNGGAL MAYSA”

17. Iti teritoriayo, kasanom a matulad ni Jeremias?

¹⁷ Saan a kayat ni Jehova a mapukaw ti biag dagiti tattao. Agarup sangapulo a tawen sakbay ti pannakadadael ti Jerusalem, inusarna ni Jeremias a mangipaay iti namnama kadagiti naidestiero idiay Babilonia. Mabasatayo: “Ikitakto ti matak kadakuada iti naimbag a pamay-an, ket pudno unay a pagsubliekto ida iti daytoy a daga. Ket bangonekto ida, ket saanko a rebbaen; ket imulakto ida, ket saanko a paruten.” Maikuna ni Jeremias kadakuada: “Adda namnama maipaay iti masanguanam.” (Jer. 24:6; 26:3; 31:17) Kas iti Dios ti panangmatmat ni Jeremias kadagiti tattao. Pudpudno a maseknan kadagiti tattao a nakaibaonanna, a kas ken Jehova a nangidagadag iti kastoy: “Agbaw-ingkayo, pangngaasiyo, tunggal maysa manipud dakes a dalanna, ket pasayaatenyo dagiti pannakilangenyo.” (Jer. 35:15) Adda kadi mapanunotmo a dadduma pay a pamay-an a maipakitam ti naimpusuan a pannakaseknan kadagiti tattao iti teritoriayo?

18, 19. (a) Ania a panangmatmat ti nasken nga iwaksitayo bayat nga ikaskasabatayo ti naimbag a damag? (b) Ania a kababalin ti rumbeng a tuladentayo ken Jeremias?

¹⁸ Pulos a saan a bimmaaw ti nasged a panagayat ni Jeremias kadagiti tattao. Naasian kadakuada uray idi nadadael ti Jerusalem. (Basaen ti Un-unnoy 2:11.) Dagiti met laeng Judio ti mapabasol iti napagtengda. Ngem saan ida a binabalaw ni Jeremias, no di ket naladingitan iti kasta unay gapu iti napasamak kadakuada. Kas ken Jeremias, mangaskasabatayo saan laeng a gapu ta obligasiontayo dayta no di ket gapu ta ay-ayatentayo unay ti nagsayaat a Diostayo ken kasta met dagiti tattao, a naparsua a kaladladawanna.

¹⁹ Awanen ti pribilehio wenno saad ditoy lubong a makaartap iti pribilehio nga agbalin a pannakabagi ti pudno a Dios babaen ti panangasaba. Kasta ti panagrikna ni Jeremias, a nangisurat iti kastoy: “Ti sasaom nasarakan, ket kinnanko ida; ket ti saom agbalin kaniak a panagragsak ken panagrag-o ti pusok; ta ti naganmo naipanagan kaniak, O Jehova.” (Jer. 15:16) Bayat nga ikaskasabatayo ti naimbag a damag, mabalin nga adu pay ti makaam-ammo ken mangayat iti Daydiay nakautangantayo iti biagtayo. Makatulongtayo a mangibanag iti dayta no tuladentayo ni Jeremias, a sireregta a nagserbi gapu iti ayat.