Report dagiti Manangiwaragawag ti Pagarian
Nagunggonaan ti Panangsapul iti Kinapudno ti Biblia Idiay Israel
UMAD-ADU a tattao idiay Israel ken iti sadinoman ti makakitkita iti kinaubbaw ti panangikagumaan ti tao a mangiyeg iti agnanayon a talna ken mangipaay iti namnama iti masanguanan. Dagiti 370 a Saksi ni Jehova iti dayta napintas, historiko a daga ket mangip-ipanda iti makaited-biag a namnama kadagidiay agsapsapul iti Dios. (Isaias 55:2, 3) Dagiti sumaganad a report manipud iti sanga nga opisina ti Watch Tower Society idiay Tel Aviv ipakitada a gunggonaan ti Dios dagidiay agsapsapul iti kinapudno ti Biblia.
“Dagiti panangsingsinga dagiti dakes kababalinna a relihiuso a panatiko ket kimmapsuten ket dagiti dati a panangikagumaanda a makibiang kadagiti gimgimongtayo agtultuloy nga agbalandra. Kas pangarigan, maysa a lakayen/baketen nga agassawa a Russo ti makilanglangen kadagiti Adventista ngem naupayda iti masursuroda. Awan ti makitada a pammaneknek iti pannakaidadanes a naipadto a mangtanda iti pudno a Kinakristiano. Maysa nga aldaw kalpasanna nakasarakda ti daanen, naibellengen a pagsasao-Romano a pagiwarnak a nangireport maipapan iti panagderraaw idi 1985 iti patakder ti sanga nga opisina iti Sosiedad ken ti Kingdom Hall idiay Tel Aviv. Gaput’ natignay ti interesda, nagdaliasatda a napan idiay Tel Aviv ket nagnagnada iti uppat nga oras agingga a nasarakanda ti nadeskribir a patakder iti artikulo ti pagiwarnak. Tinagiragsakda ti immawat kadagiti sungbat dagiti dadduma a saludsodda ket nagtalinaedda iti gimong iti rabii, a sadiay siraragsakda a nakaam-ammo kadagiti sumagmamano a Ruso ti pagsasaona a Saksi. Nanipud idin, kanayonen a naaramid ti panangiyadal ti Biblia kadakuada. Mientras umad-adu ti masursuroda, ad-adda a makumbinsirda a nasarakandan ti sapsapulenda—ti kinapudno!
“Iti sabali nga okasion, maysa a kabsat a lalaki ti nangasaba iti agtutubo a de pamilia a lalaki a di umanamong kadagiti dadduma a puntos a pinadpadasna nga ilawlawag ket iti kasta dina intultuloy ti panangsukimat iti mensahe ti pagarian. Sumagmamano a tawen kalpasanna, ti anak a babai daytoy met laeng a lalaki nagsakit, ket imbaga dagiti managanito a gagayyemna a ti parikut ket mabalin a mainaig iti mezuzah a naikabit iti baotek ti ruangan. Inrekomendarda nga ipakitana iti rabbi. Inkeddengna nga aramiden daytoy. Maigiddato iti dayta, sipapasnek a nagkararag iti Dios a maipaay iti pannakaiwanwan iti panangsapul iti kinapudno.
“Iti dalanna a mapan iti balay ti rabbi, kellaat nga inkeddengna a dagasen ti reseta idiay klinika. Idi simmangpet, nasarakanna a nakatugaw sadiay ti Saksi a nangasaba kenkuana sumagmamano a tawenen sakbayna! Kuna ti kabsat a lalaki a dina plano ti mapan idiay klinika iti dayta a rabii agingga a kellaat a nalagipna ti maysa a banag a kasapulanna. Nagkatugaw ti kabsat ken ti lalaki ket nagsaritada iti dua nga oras iti dayta a rabii, ket naiyurnos ti panagadal iti Biblia iti agtutubo a lalaki. Rinugianna ti timmabuno kadagiti gimong, kanayon ti panagrang-ayna, ket nakiraman iti Teokratiko nga Eskuelaan ti Panagministro. Di nagbayag makikadkaduan iti tay-ak ti ministerio, ket itatta nabautisaranen a kabsat. Pulos a saan a nakagteng iti balay ti rabbi!”
Ti panagsapul dagitoy a tattao iti kinapudno iti Biblia ket sibabaknang a nagunggonaan, bayat ti pannakasarakda iti gameng a napatpateg ngem nasudi a balitok.—Proverbio 3:13-18.