Ti Pannakarba ti Babilonia Naipablaak Idiay Japan

“NARBA! Narba ti Babilonia a Dakkel, isu a nangpainum kadagiti isuamin a pagpagarian iti arak ti pungtot gapu iti pannakikamalalana.!” Dayta a makatignay a pablaak ti anghel ket damdamo a nangngegan ni apostol Juan idi umuna a siglo ti Kadawyan a Panawentayo. Kabayatan ti tiempotayo, nupay kasta, iti “aldaw ti Apo,” daytat’ inkallangogan dagiti Kristiano a Saksi ni Jehova iti pannakangngeg ti sangatauan.​—Apocalipsis 1:10; 14:8.

Ti Babilonia a Dakkel ket isut’ sangalubongan a sistema ti ulbod a relihion, a ti Kakristianuan isut’ paset a mababalaw unay. Iti intero a “panawen ti panungpalan,” dagiti panangukom ni Jehova a maibusor kenkuana ket situtured nga impablaak dagiti Saksi ni Jehova iti intero a lubong. (Daniel 12:4) Kas pangarigan, dagiti ruar ti Pagwanawanan ti Abril ken Mayo idi napan a tawen inawitda dagiti napipigsa nga artikulo a nangibutaktak ti basol ti ulbod a relihion ken ti um-umayen a pannakadadaelna. Nasurok a 50 milion a kopia kadagidiay a ruar ti naiwaras iti intero a lubong​—maysa a napigsa a deklarasion ti pannakadadaelen ti Babilonia a Dakkel!

Ti Japan Nagsagana

Maysa a pangarigan ti kinarayray dagiti Saksi ni Jehova kadagidiay espesial a ruar ket nakita idiay Japan, sarikedked ti Shinto-Buddhista a sektor ti Babilonia a Dakkel. Idiay Japan ti Disiembre 1988 a ruar Ti Ministeriotayo iti Pagarian impakaammona kadagiti kongregasion maipapan ti espesial a kampania ti serbisio iti tay-ak a naiplano kadagiti bulan ti Abril ken Mayo 1989. Rimmuar ti awis a suportaran daytoy trabaho ti espesial a magasin kadagiti simmaruno a ruar Ti Ministeriotayo iti Pagarian, agraman sursurat kadagiti kongregasion ken kadagiti bagi ti panglakayen.

Ti sungbatda ket naisangsangayan. Babaen iti tulong ni Jehova, bayat dagidiay dua a bulan idi napan a tawen, immawat ti Japan ti pammaneknek nga ad-adda ngem idi.

Auxiliary Payunir a Serbisio

Ti Disiembre 1988 nga anunsio inramanna dagitoy a sasao: “Paregtaendakayo a maaddaan ti kalat a tagiragsaken ti panag-auxiliary payunir bayat ti Abril ken Mayo, nangnangruna iti Abril.” Daytoy a kapanunotan ket naulit iti Pebrero 1989 a ruar Ti Ministeriotayo iti Pagarian, a nangidagadag kadagiti kakabsat a ‘tarimnenda ti inaldaw nga iskediolda tapno ad-adu kadagiti dedikado a ministro inggat’ mabalin ti makapagpasalista kas auxiliary payunir inton Abril.’

Impapuso dagiti Saksi dagitoy a palagip. Ti resulta? Ti kangangatuan a peak iti bilang dagiti auxiliary payunir. Idi Marso 1989 ti bilang dagiti auxiliary payunir nakadanonen iti baro a peak a 24,115. Ngem idi Abril dayta a bilang ket ngangngani nadoble iti 41,055. Pudno a nakaskasdaaw a panagregget!

Kadagiti adu a kongregasion, amin wenno kaaduan kadagiti agibumbunannag ti nakiraman iti sumagmamano a paset ti amin-tiempo a serbisio bayat iti dua a bulan nga espesial a panagtrabaho. Masansan a daytoy kinasapulanna ti dakkel a panangorganisar. Maysa nga asawa a babai nagduaduaanna ti pannakiramanna, agsipud ta isut’ aggigian iti ngangngani 900 metros ti kangatona idiay bambantay a sadiay limitado ti maluganan. Nupay kasta, talaga a kayatna ti ag-auxiliary payunir. Gapuna inyurnos dagiti panglakayen a tulonganda iti mapaglugananna, ket ti asawa a babai, agraman amin a dadduma pay nga agibumbunannag iti kongregasion, tinagiragsakda ti makabulan a panagpayunirda.

Ti nagsayaat a panangidaulo dagiti panglakayen ket naiyulidan idiay Osaka Prefecture, Takatsuki City, Otsuka Kongregasion dagiti 77 nga agibumbunannag, a sadiay amin dagiti panglakayen ken ministerial nga ad-adipen nairamanda kadagiti 73 a nakiraman iti dadduma a porma ti payunir a serbisio. Dagidiay a payunir inramanna amin dagiti agtutubo a bautisado nga agibumbunannag nga ages-eskuela pay laeng. Ti espiritu ti panagpayunir nga impakita dagitoy agtutubo a Saksi ket gagangay kadagidiay makitkita iti adu a kongregasion. Kas pangarigan, kadagiti 23 a bautisado a tin-edyer iti Heiwadai Kongregasion idiay Tokyo Prefecture, 11 ti regular payunir, ken 11 ti nag-auxiliary payunir idi Abril. Iti dayta a kongregasion, ti dagup a 93 nga agibumbunannag ti nagpayunir iti dayta met laeng a bulan.

Maysa a Naisangsangayan nga Aldaw a Panagtrabaho

Ti Marso a ruar ti Hapones nga edision Ti Ministeriotayo iti Pagarian pinaregtana dagiti kakabsat kadagitoy a sasao: “Masupsuportaran ti panagiwaras ti magasin saan laeng nga iti maikadua ken maikapat a Sabado no di ket kada Sabado ti bulan. Ti regta nga ipakpakita dagiti kakabsat ket makomendaran. Iti Abril ti panagiwaras ti magasin ket naiyiskediol met iti kada Sabado, ngem pangngaasiyo ta mangaramidkayo ti naisangsangayan a panagregget nga ilasin ti Abril 8 a maipaay iti aldaw ti magasin tapno tunggal maysa mabalinna ti makiraman iti panagiwaras ti magasin iti dayta nga aldaw. Tapno maited ti pakdaar kadagiti isuamin a dumngeg, nasken a maiwaras a sisasaknap dagitoy naintiempuan a ruar.”​—Isaias 61:2; Apocalipsis 18:4, 5.

Iti Pebrero ti Hapones nga edision Ti Ministeriotayo iti Pagarian impaganetgetna manen daytoy nasken a trabaho. Kunana: “Iti maikadua a Sabado, Abril 8, bay-an a tunggal maysa kadagiti Saksi ni Jehova iti Japan​—nga adda bilangdan a 130,000​—ti makiraman iti panagiwaras ti magasin.” Naparegta dagiti panglakayen a mangiyiskediol ti nadumaduma a kita ti trabaho ti magasin a mangsaklaw ti intero nga aldaw tapno ad-adu ti mabalin a makiraman. Pagyamanan iti positibo a panagtignay dagiti panglakayen ken ti amin-puso a panangsuportar dagiti agibumbunannag, ti aldaw ket maysa a naaweng a panagballigi. Maikunatayo nga iti dayta nga aldaw maysa a kangatuan a timek ti nagtengan idiay Japan iti panangiwaragawag kadagiti panangukom ni Jehova iti Babilonia a Dakkel.

Kas pangarigan, iti Ushioda Kongregasion idiay Yokohama City, inyurnos dagiti panglakayen ti serbisio nga agtultuloy iti 13 nga oras, manipud alas 700 t.b. ingganat alas 8:00 t.r. Nairaman dagiti dua a periodo a panangaskasaba idiay lansangan, agraman dagiti oras a panangsarungkar kadagiti tattao nga awan kadagiti balbalayda iti napalabas ken maipaay iti regular a panagbalaybalay. Kaaduan kadagiti agibumbunannag nabalinanda ti nakiraman iti uray maysa laeng kadagiti naiyurnos a paset ti serbisio, ken adut’ nakiraman iti ngangngani tunggal paset ti naiplano a trabaho.

Ti tuloy-tuloy a serbisio naiplano met idiay Jonan Kongregasion, Fukuoka City. Idiay, naaramid dagiti urnos a saklawenna dagiti oras manipud alas 8:00 t.b. ingganat’ alas 9:00 t.r., nga adda laeng ababa nga inana iti tengngat’ aldaw. Nairaman ditoy isut’ panawen a panangaskasaba iti balay-balay, panagsarungkar kadagiti teritoria ti negosio ken titiendaan, ken panangsarungkar idiay awan matataona iti napalabas a panagsarungkarda. Dadduma kadagiti Saksi iti dayta a kongregasion ti nakaireport ti walo oras a panangaskasaba iti dayta nga aldaw!

Ti amin-puso a panagtignay dagiti kakabsat ket nakita met idiay Wakayama Prefecture, a sadiay amin dagiti 55 nga agibumbunannag iti Kainan Kongregasion nakiramanda iti espesial nga aldaw a panagtrabaho. Maysa a sister sadiay, a regular payunir, naganak idi Abril 7. Dayta aya ti nangpasardeng kenkuana a mangaskasaba idi Abril 8? Saan. Isut’ nagitukon kadagiti magasin idiay mismo nga ospital! Mangipakpakita ti umas-asping nga espiritu, maysa a kabsat a lalaki a taga Osaka Prefecture ti napilitan a mangtaming kadagiti bambanag idiay pangpanggedanna idi Abril 8. Kasano itan ti pannakiramanna iti espesial a trabaho? Pinagbalinna ti pagtrabahuanna a teritoriana ket nakagun-od ti lima a suskripsion.

Maysa a sister idiay Saitama Prefecture inil-iliwna ti makiraman iti espesial a trabaho iti dayta nga aldaw, ngem isut’ agdaliasat iti dandani 1,280 kilometro idiay Ashikawa City a kadua ti di mamati a lakayna. Ngem isut’ di simmuko. Idiay Asahikawa, isut’ napan a kadua dagiti dua a babassit nga annakna idiay estasion ti tren, ket sadiay, idiay ruar ti estasion, nasarakanna ti ninamnamana: maysa a bunggoy dagiti agibumbunannag manipud iti lokal a kongregasion a mangaskasaba iti tay-ak ti serbisio. Nabalinanna ti nakiraman a kaduada kadagiti ar-aramid iti dayta nga aldaw.

Panangasaba iti Lanlansangan

Ti Hapones a Ti Ministeriotayo iti Pagarian nangnangruna a pinaregtana dagiti panglakayen nga iyurnos ti panangaskasaba iti lansangan para iti Abril 8, ket daytoy ti nagbalin a prominente a paset dayta espesial nga aldaw. Kas iti napasamak, adda napigsa a tudo iti intero a pagilian, ngem daytat’ di nangpalamiis ti kinarayray dagiti kakabsat. Kaaduan ti nangipakita ti isu met laeng nga espiritu kas nakita kadagiti tallo nga addaan an-anayen a kakabsat idiay Minamata Kongregasion, Kumamoto Prefecture. Agpapan pay dagiti edadda​—65, 80, ken 85​—sinarakusokda ti dakes a panniempona ket nagbalin a nagsayaat a pammaregta kadagiti amin iti kongregasion; nangatrakarda met ti atension ti adu kadagiti aglabas.

Bayat a mangaskasaba iti lansangan, maysa a sister idiay Kashiwa City West Kongregasion ti nagsaludsod iti maysa a lalaki: “Nangnangngegamon aya ti Babilonia a Dakkel?” Idi intukonna dagiti Abril a ruar dagiti magasin, kuna ti lalaki, “Saanak nga interesado” ket pimmanawen. Nupay kasta, idi nakagteng idiay krosing ti riles ti tren ken nagsardeng, tumantanamitim iti bagina met laeng, “Ania ti Babilonia a Dakkel?” Maysa a kabsat a lalaki a mangaskasaba met iti lansangan iti asideg ti nakangngeg kenkuana ket nakigiddan a magna iti sibayna, nga inlawlawagna no ania ti Babilonia a Dakkel. Inawat ti lalaki dagiti magasin.

Dadduma a kongregasion ti di pay pulos nangar-aramid ti panangaskasaba iti lansangan iti napalabas. Ngem nanipud Abril 8, pinagbalindan a regular a paset ti trabahoda. Ket saanen a pagsiddaawan! Ti panangaskasaba iti lansangan ket naballigi unay a pamay-an a pangsarakan kadagiti tattao a di pulos mabalin a maasitgan iti dadduma a pamay-an. Maysa a sister idiay Naha City, Okinawa, ti nangaskasaba iti lansangan iti ruar ti pagopisinaan a sadiay di mapalubosan dagiti Saksi ni Jehova a sumrek agpaay iti panggep a panangasaba. Isut’ nakaipaima ti 12 a magasin iti maysa oras babaen ti iyaasidegna kadagidiay sumsumrek ken rumrummuar iti patakder.

Maysa a sister idiay Muroran City, Hokkaido, ti nangaskasaba iti lansangan iti ruar dagiti department stores idiay sentro ti siudad. Kinunana iti lalaki nga immawat kadagiti magasin: “No kayatmo ti makaadal pay ti ad-adu, sarungkarandakanto idiay balayyo.” Intedna ti direksionna iti sister, ti numero ti teleponona, mapa a mapan idiay balayda, ken dagiti oras a kaaddana iti pagtaenganda! Iti sumaruno a lawas, isu ken maysa a kabsat a lalaki ti simmarungkar kenkuana ket nakitada nga isut’ aggigian iti maysa nga apartment a serrado iti regular a ministerial a panagsarungkar dagiti Saksi ni Jehova. Kumbinsido ti baro babaen iti personal a panagbasbasana ti Biblia nga awan pabor ti Dios iti Kakristianuan. Isut’ mangsapsapul iti pudno a Kinakristiano ket isut’ maragsakan a mangirugi ti regular a panagadal ti Biblia iti pagtaenganda.

Maysa nga agibumbunannag idiay Kawasaki City nakiraman iti panangaskasaba iti lansangan iti malem ti Abril 8. Iti panagpatingga ti oras nga inkeddengna iti dayta, isut’ nakisao iti maudin a tao, maysa nga agtutubo a babai a nagkuna nga isut’ nakiad-adalen idi ti Biblia kadagiti Saksi ni Jehova. Ngem isut’ binusor dagiti dadakkelna ket kalpasanna simrek iti unibersidad ket itan immakar iti maysa a dormitorio. Gapuna insardengnan ti panagad-adalna. Nupay kasta, pagyamanan iti panangaskasaba iti lansangan, siraragsak a rinugianna manen ti panagadalna ti Biblia ket makigimgimong metten.

Panagiwaras ti Magasin

Kas resulta kadagiti adu a nangsuportar ti espesial a trabaho, ti panagipaima kadagiti magasin​—nangnangruna dagidiay nangipablaak ti mensahe a panangukom kontra iti Babilonia a Dakkel​—ket nakaskasdaaw. Maysa a manangibunannag ti kongregasion idiay Osaka Prefecture ti nakaipaima ti 205 a magasin idi Abril. Idiay Kagoshima City, East Kongregasion, 14 nga agibumbunannag ti nakaipaima ti nasursurok ngem sangagasut a magasin tunggal maysa, bayat a ti naiputputong a grupo dagiti 12 nga agibumbunannag idiay Ili ti Ogawa, Ibaraki Prefecture, nakaiwarasda ti dagup a 1,388 a magasin bayat iti Abril.

Pudno unay, iti intero a Japan, 3,293,266 a magasin ti naipaima idi Abril ti napan a tawen​—92 porsiento a nangatngato ngem ti Abril ti 1988! Anian a nagpigsa ti aweng ti mensahe a panangukom ni Jehova kontra iti Babilonia a Dakkel!

Pannakabalin a Dakdakkel Ngem Gagangay

Siempre, kas kadagiti amin a dadduma a paset ti lubong, dagiti Saksi ni Jehova idiay Japan ket positibo ken naregtada idi kalgaw ti 1989. Itden dagiti kapadasanda ti nalawag nga ebidensia a binendisionan ni Jehova ti regtada ket sinuportaranna ti panagreggetda a mangipablaak ti panangukomna maibusor iti ulbod a relihion. Iti dadduma, saan a nalaka ti pannakipasetda; nupay kasta, determinadoda, ket binendisionan ni Jehova ti regtada. Adut’ aggigian iti teritoria a masansan a matartrabaho, ngem nangipakitada ti isu met laeng nga espiritu ti kinaganat ken entusiasmo kas kadagiti kakabsatda iti dadduma a lugar. Iti amin a kaso, pimmudno ti sasao ni Isaias: “Isu ti mangpapigsa iti nakapuy; ken iti daydiay awan ti kabaelanna isu pawadwadenna iti pigsa.”​—Isaias 40:29.

Awan duadua dagiti kapadasanda ti nangipalagip kadakuada iti sasao ni apostol Pablo: “Ngem addaankami iti daytoy a gameng kadagiti damili a basehas, tapno ti naindaklan a pannakabalin a dakdakkel ngem gagangay biang koma ti Dios, a saan a kadakami.” (2 Corinto 4:7) Wen, no ti maysa a tao ikabilna ti Nakristianuan a ministerio, “daytoy a gameng,” nga umun-una iti biagna, mapasaranna ti inted-Dios a “pannakabalin a dakdakkel ngem gagangay.” Sapay koma ta itultuloy nga usaren ni Jehova dagiti ad-adipenna idiay Japan ken iti isuamin a dadduma pay a dagdaga a mangted ti naan-anay a pammaneknek sakbay a dumteng ti panungpalan.​—Mateo 24:14.

Iti daytoy a tawen, dagiti Abril ken Mayo a ruar Ti Pagwanawanan ti mangitampok kadagiti serie nga abbongna iti “Asinot’ Mangiturongto ti Sangatauan iti Talna?” “Sangalubongan a Talna​—Aniantot’ Talaga a Kaipapananna?” “Minilmilion a Natayen Agbiagdanto Manen,” ken “Armagedon​—Kaano?” Apay a dikay iplano ti panangiramanyo itoy nga impormasion kadagiti kaarrubayo? Siguraduenyo nga adu inggat’ mabalin ti makaammo iti nakaskasdaaw a naimbag a damag nga intalimeng ti Dios iti Biblia nga agpaay iti kaaldawantayo.