“Dayta Babai a Jezabel”

“ADDA kagurak kenka, ta ipalubosmo dayta babai a Jezabel, a nagnaganenna ti bagina a mammadto, ket mangisursuro ken manggargari kadagiti adipenko a makiabig ken manganda iti naidaton kadagiti idolo.” (Apocalipsis 2:20) Kastat’ kinunan Jesus kadagiti Kristiano a panglakayen ti Tiatira. Ti kongregasion ket aktibo unay ken imparangdat’ ayat, pammati, ken panagibtur. Ngem impalubosda ti makaperdi nga impluensia ni Jezabel. Apay? Ket mabalin kadi a mapasamak ti kasta itatta?​—Apocalipsis 2:19.

Nalabit, awan idiay Tiatira ti aktual nga agnagan iti Jezabel. Inusar ni Jesus dayta a nagan tapno ipalagipna kadatayo daydi nagdindinamag a Reyna Jezabel, nga asawa ni Ari Acab. Dayta maipapilitnat’ kayatna a babai pinerdina a naan-anay ti ili ti Dios idi inserrekna iti Israel ti imoral a panagrukbab ken Baal, nga inyusuatna ti determinado a pannakaikisap ti nasin-aw a panagdaydayaw.​—1 Ar-ari 16:31-33; 21:1-7.

Ti Jezabel idiay Tiatira​—maysa a babai wenno grupo dagiti babbai​—pinaregtana met ti imoralidad ken idolatria kadagiti umili ti Dios. Dadduma iti dayta a kongregasion ti immimdeng kenkuana, yantangay nadakamat ni Jesus “dagiti annak [ni Jezabel],” a masinunuo a dagidiay pasurotna. (Apocalipsis 2:22, 23) Ti impluensiana pinagpeggadna ti kongregasion ti Tiatira a maperdi a kas iti Israel idi tiempon Acab.

Apay a ni Jezabel ti Tiatira napalalot’ impluensiana? No subliantay ti nagpadaanda ken Jezabel idi ugma, impapan ti dadduma nga isu ket asawa ti nalatak a panglakayen ti Tiatira. Ngem, saan a kastat’ kuna ti Biblia. Nalabit, ti manangipapilit a personalidadna ken ti panangakona nga isu ket propetisa isut’ nangitan-ok kenkuana iti kongregasion.

Adda nangisingasing a dagiti dakes nga aramid nga insungsongna nainaig kadagiti asosasion dagiti negosiante. Sigun ken Dr. W. M. Ramsay, “ad-adu nga asosasion dagiti negosiante ti nalatak idiay Tiatira ngem kadagiti dadduma a siudad ti Asia.” Maipapan kadagitoy, kuna ti The Interpreter’s Dictionary of the Bible: “Tunggal kasta nga asosasion adda dios a patronna, piestana, sosial a paskenna a no dadduma agbalin nga imoral a panagragragsak. Ni ‘Jezabel’ mabalin nga inrasonna a . . . dagitoy a ragragsak saan koma a kondenaren yantangay tunggal trabahador, tapno adda mabirukanna, masapul a makimiembro iti asosasion.” Umanamong ti The Expositor’s Greek Testament iti daytoy, nga insingasingna a dagidiay simmurot ken Jezabel “intan-okdat’ bagida gaput’ nalawlawagan a liberalismoda.”

Kinapudnona, ti sursuro ni Jezabel idiay Tiatira pumada iti “sursuro ni Balaam” idiay Pergamo. (Apocalipsis 2:14) Ti kongregasion ti Pergamo inibturanna ti adu a pannakaidadanes, ngem adda dagidiay nangtultulad ken Balaam idi ugma a mangisungsong iti pannakiabig ken idolatria. Adda nangisingasing nga idiay Pergamo, ti impluensia ni Balaam pinaregtanat’ pannakikompromiso tapno maliklikan ti nakas-ang a pannakaidadanes, ket idiay Tiatira pinaregta ni Jezabel ti ikokompromiso gaput’ ekonomia. Ngem aniaman ti kaso, agpareho a ti sursuroda ket makapapatay nga apostasia.

Mabalin kadi nga adda met ti impluensia a Jezabel​—wenno Balaam​—itatta? Wen, adda. Adu a lider ti Kakristianuan tuladenda ni Jezabel a mangpanuynoy iti kongregasionda ti aktibo a homoseksualidad, pannakiabig, pannakikamalala, aborsion, ken dagiti banag nga umarngi kadagita a kondenaren ti Dios. Uray pay iti uneg ti Nakristianuan a kongregasion, adda dagiti indibidual nga insungsongda ti “panagbalin a liberal” ti pudno a panagdaydayaw, a paregtaenda dagiti Kristiano a saanda nga annuroten a siiinget dagiti pagalagadan ti Biblia ken iyadelantarda pay ti imoralidad.

Amin dagidiay mayat a mangay-ayo ken Jehova liklikanda koma dagiti kasta nga ideya, uray pay no ti mangidatag kadagita ket indibidual​—lallaki wenno babbai​—a nataer wenno nabileg ti personalidadda. Daytoy a kapanunotan delikado itatta a kas met la idi immuna a siglo.​—Apocalipsis 2:22, 23.