Dagiti Saludsod Manipud Kadagiti Managbasa

◼ Kaano a nangrugi ti panagpuyot ti pito a trumpeta dagiti anghel ti Apocalipsis?

Iti Apocalipsis kapitulo 8, 9, ken Apoc 11, mabasatayo ti pito nga anghel a nangpuyot iti pito a trumpeta, a nangirakurak kadagiti nakaro unay a saplit iti sumagmamano a paset ti sangatauan. Irepresentar dagitoy dagiti proklamasion dagiti panangukom ni Jehova nga impablaak ti ili ni Jehova bayat ti intero a tiempot’ panungpalan nga ad-adda a nangrugi idiay kumbension ti Cedar Point idi 1922.​—Kitaenyo ti Apocalipsis​—Ti Grande a Tampokna Asidegen!, kapitulo 21 inggat’ 23 ken kapitulo 26.

Ti umuna nga uppat a panagtrumpeta imbutaktakda ti naespirituan a natay a kasasaad “ti daga” ken “ti baybay” a paset ti Kakristianuan, agraman ti natnag a kasasaad dagiti klero ken ti naespirituan a kinasipnget ti Kakristianuan.​—Apocalipsis 8:7-12.

Ipakita ti historia a ti publiko a pannakaibutaktak dagitoy a kinapudno aktual a nangrugi sakbay ti 1922. Kas pangarigan, ti palawag a “Millions Now Living May Never Die,” a damo a naidiskurso idi 1918 ken naipablaak a kas pampleta idi 1920, nadakamatna ti pannakapaay ti Kakristianuan ken ti umas-asideg a panungpalan toy lubong. Ti The Golden Age ti Setiembre 29, 1920, nabatad nga imbutaktakna ti Kakristianuan a kas mannakiabig, managulbod a saur, ken mangiyaw-awan kadagiti umili.

Apay, ngarud, a kunaen ti libro nga Apocalipsis Tampokna a dagitoy uppat a trumpeta sada la nangrugi a nagpuyot idiay kumbension ti Cedar Point idi 1922? Ngamin iti daydit’ rimmuaran ti awag nga “ipablaak, ipablaak, ipablaak ti Ari ken ti Pagarian,” a daytat’ napalalo a nangdagdag iti trabaho a panangaskasaba. Ti Nobiembre 1, 1922, a ruar ti The Watch Tower, kunana: “Dagiti gagayyem . . . naawatanda dayta a kas sentral nga ideya ti kumbension, a ti talaga a pribilehio ken annongen dagiti nakonsagrar itan ditoy daga isut’ panangipablaakda iti kaadda ti Apo, ti dakkel nga Ari dagiti ari, a ti pagarianna addan, ken daytoy ti kaskenan a banag nga inda aramiden.”

Laglagipenyo pay koma nga idinto ta amin dagitoy uppat a mensahe ti panangukom ket impablaak dagiti Saksi ni Jehova nanipud 1922, nagsasagadsad dagitoy nga immawat iti nabileg a panangdagdag manipud pannakaanamong ti uppat a resolusion a naangay iti nagbaetan ti 1922 inggat’ 1925. Pinulpullo a milion a kopia dagitoy a resolusion ti naiwaras kalpasanna kas naiyimprenta a pagbasaan, a sieepektibo nga imbutaktakda ti naespirituan a natay a kasasaad ti Kakristianuan.​—Kitaenyo ti libro a Tampok ti Apocalipsis, panid 133, parapo 15.

Ti ultimo a tallo a panagtrumpeta inaigna dagiti “ay” (rigat). (Apocalipsis 8:13) Naidumada kadagidiay immuna nga uppat a panagtrumpeta yantangay nainaigda kadagiti espesipiko a pasken. Ti maikalima a panagtrumpeta nainaig iti pannakaluk-at ti ili ti Dios manipud “mangliwengliweng” idi 1919. Ti maikanem nainaig iti “kabalieria” ken ti reprep a kampaniat’ internasional a panangaskasaba a nangrugi idi 1922. Ti maikapito naisinggalut iti pannakaipasngay ti Pagarian ti Dios idi 1914.​—Apocalipsis 9:1-19; 11:15-19.

Tunggal maysa kadagitoy a pasken nangyegdat’ rigat ken Satanas ken iti lubongna. Ti pannakaluk-at dagiti napulotan idi 1919 manipud mangliwengliweng nga inaktibidad siniludna dagiti klero ti Kakristianuan ket imparangna ti interamente a panangilaksid ni Jehova kenkuana. Nanipud 1922 agingga itatta, ti reprep a kabalieria pinapataynat’ Kakristianuan, no iti naespirituan a panagsao, nga imbutaktakna ti natay a kasasaadna ken impakdaarna ti um-umayen a pannakadadaelna. Ket kalpasan ti pannakaipasngay ti Pagarian idi 1914, ni Satanas naigarangugongen manipud langit, ket kiniwkiwanna ti makadidigra a tuok ti sangatauan. Din agbayag ti Pagarian ikkatennanton daytoy kasla nakasimsimpa a natauan a sosiedad a pinatanor ni Satanas (ti daga), nga ikisapnanto ti rebeliuso a sangatauan (ti baybay) inton Armagedon.​—Apocalipsis 11:17–12:12; 21:1.

Iti daydi kumbension ti Cedar Point idi 1922, amin dagita a tallo nga “ay” nagbatadda iti lubong a sapasap. Ti kampania a panangasaba a naiyusuat idi imbatadna a “dagiti dudon” ket rimmuardan iti “mangliwengliweng” ket nangrugi ti idadarup ti “kabalieria.” Ket ti makagutugot nga awis nga ipablaak ti Ari ken ti Pagarian maitunos unay iti maikapito a panagtrumpeta. Ti Marso 1, 1925, a ruar ti The Watchtower inlawlawagna a dagiti pasamak idi 1914, 1919, ken 1922 naipadtoda idiay Apocalipsis 12. Naun-uneg daytoy a pannakatarus iti pannakaipasngay ti Pagarian, ket simamatalek nga impablaak dayta dagiti Saksi ni Jehova. Sa, ti pannakayanunsio daytoy makasaplit nga impormasion immawat ti naindaklan a panangdagdag idi naanamongan ken naiwaras dagiti nabileg a resolusion kadagidi kumbension manipud 1926 inggat’ 1928.​—Kitaenyo ti Apocalipsis​—Ti Grande a Tampokna Asidegen!, panid 147, 149, 172.

No kasta, ti pannakapuyot ti pito a trumpeta nangrugi idi 1922 ken nagtultuloy idi 1920’s. Nanipud idin, ti ili ni Jehova nakibinnadang a situtured kadagiti anghel a nangibaga iti amin a sangatauan a ti Kakristianuan ket natay no iti naespirituan, dagiti klerona natnagdan a lider, ket din agbayag, isu ken ti intero a sinasatanas a lubong madadaelton.