Report Dagiti Manangiwaragawag ti Pagarian

Nagbunga ti Di Pormal a Panangasaba

NI Jesus nangilukat ti panagpatpatang a nangiturong iti di pormal ngem epektibo unay a pammaneknek idi kinunana iti babai a taga Samaria iti maysa a bubon: “Ikkanak ti inumen.” (Juan 4:7) Uray datayo met itatta agbalintayo nga epektibo unay no alertotayo kadagiti amin a gundaway a maipaay iti di pormal a panangasaba. Maysa a kabsat idiay Australia ti nangirugi ti di pormal a pannakipatpatang babaen iti panagbasbasana ti inaldaw a teksto iti maysa a pagtugawan iti maysa a parke. Maysa a managusiuso a lalaki ti nakakita iti publikasion ket kunana nga isut’ interesado kadagiti Kasuratan. Isut’ maysa a Katoliko a di makatungtungpal a nasursuruan ti ebolusion iti eskuelaan a Katoliko ket itan dina ammo no aniat’ patiennan. Inyurnos ti kabsat a lalaki ti panangala ti libro a Life​—How Did It Get Here? By Evolution or by Creation? para kenkuana.a Dua nga aldaw kamaudiananna inyegna ti libro idiay pagtrabahuan daytoy a lalaki, ngem awan idiay ti lalaki. Ti sekretariana ti aktual a nangagaw iti libro, a kunkunana: “Nabayagmin nga ur-urayen daytoy a libro.”

Dua nga oras kalpasanna ti kabsat a lalaki immawat ti awag iti telepono manipud iti lalaki a mangkidkiddaw ti dua pay a kopia ti libro a Creation ket indawatna iti Saksi a bumisita idiay opisinana. Idi napan ti kabsat iti dayta nga opisina, nasarakanna ti lalaki ken dua pay a sabsabali. Narugian ti panagadal ti libro kadakuada, agraman ti sekretaria, ket naiyurnos a ti kabsat sumarungkar a mamindua ti makalawas. Kadagiti sumaganad a lawlawas, ti nobia daydiay a lalaki, maysa a ‘born-again a Kristiano,’ ti kanayon nga agipatpatulod ti surat nga adut’ salsaludsodna iti Biblia. Kamaudiananna, timmipon ti babai iti panagadal, a kas met ti kasusio ti lalaki ken ti gayyemna, a maysa nga ebolusionista.

Intultuloyda ti panagad-adalda ti Biblia a regular iti uneg ti lima a bulan, a ti maikadua a panagadal kada lawas ket maikonkondukta idiay parke. Kalpasanna ti nobio ti sekretaria ti timmipon met iti grupo nga agad-adal. Di nagbayag, ti kasusio daydiay immuna a lalaki ken ti gayyemna immakarda idiay Idaho sadi Estados Unidos, a nangitultuloyandat’ panagadalda. Sumagmamano a lawas kalpasanna, ti immuna a lalaki ti inasitgan ti maysa nga estranghero, a nagimtuod no aniat’ napasamaken iti diskusion ti Biblia idiay parke. Agparang, nga isut’ agdengdengngeg iti panagad-adalda. Naiyurnos met ti inna pannakipagadal.

Aniat’ resulta amin daytoy? Sangapulo ket walo a bulan manipud orihinal a panagsarak idiay parke, ti umuna a lalaki ken ti nobiana, daydiay dati a ‘born-again a Kristiano,’ nagkasardan ken nabautisarandan. Ti sekretaria ken ti nobiona nagkasarda metten ken nabautisarandan. Ti kasusio ken ti nobiana a napan idiay Estados Unidos nabautisarandan ken maysa kadakuada ti agserserbin a regular kas auxiliary payunir. Daydiay agdengdengngeg iti diskusion ti Biblia idiay parke intultuloyna met ti panagad-adalna. Isu met ti immakar idiay Ireland, ket ur-urayenna metten ti pannakabautisarna!

Amin daytoy napasamak gapu ta ti maysa a kabsat ginundawayanna ti oras-panangaldawna a mangaramid ti di pormal a panangaskasaba, ket binendisionan ni Jehova dagiti panagreggetna. Sapay koma ta kastatay met a manggundaway ti tunggal oportunidad a mangisaknap ti naimbag a damag kadagidiay mabisbisin iti mensahe ti Pagarian ni Jehova!

[Dagiti Footnote]