“Lulua ti Panangipateg”

“AGAR-ARUBOS iti lulua ti panangipateg, kalkalpasko a binasa ti artikulo a ‘No Kasano a Tulongan dagiti Malidliday a Mapasubli ti Rag-oda.’” (Ti Pagwanawanan, Marso 15, 1990, pinanid 26-30) Kastat’ panangrugi ti maysa kadagiti adu a sursurat ti panangipateg nga inawat ti Sosiedad gapu kadagiti artikulo maipapan ti panagleddaang a nagparang iti Marso 1 ken Marso 15, 1990, a bilang. Daytoy partikular nga ebkas, nupay kasta, naggapu iti maysa a kabsat a babai idiay Japan a ti agtutubo nga anakna a lalaki nabiit pay a nakaptan ti schizophrenia. Inlawlawagna:

“Iti panangliwliwa ken panangparparegta ti lumlumdaang a kararua iti tunggal aldaw, no dadduma mariknak a nabannogak unayen nga agpatuloy. No sumipngeten, ti anakko makaptanen ti panagbutbuteng ken panagdandanag. Gapuna isut’ ikkak kadagiti pampaturog a pildoras ken agtugawak iti igid ti katrena nga ap-aprusan dagiti im-imana ken ikabilko ti imak iti mugingna agingga nga isut’ makaturog. Arig daytat’ panangpatpaturog ti maysa a maladaga, ket kalpasan ti maysa nga oras, nargaanton iti pannaturogna. Iti daytanto metten a mabang-aranak, ngem maigiddato iti dayta, kunkunak iti bagik nga inton bigat mangyegto manen ti maysa nga aldaw a lasaten.

“Kuna ti anakko, ‘Awan mamaayko. Awanen ti panginanamaan kaniak.’ Tunggal aldaw silaladingit nga isalsaludsodna, ‘Maagasanak pay aya iti sakitko? Kaanonto a makaaonak iti ag-agas? Kasano kabayag nga agtultuloy ti kastoy a biag?’ Kadagita a kanito agusarak met ti salsaludsod a mangbalbaliw ti panunotna kas insingasing dagiti magasin, ket daytoy ti nakatulong kenkuana a sumayaat bassit. Ngem ulit-ulitenmi dagiti isu met laeng a bambanag iti inaldaw-aldaw.

“Addada met tiempo a ti anakko ayabanna dagiti panglakayen [manipud ti lokal a kongregasion] iti tengngat’ rabii no mariknana nga isut’ madanagan unay ken idawatna ti panangikararagda kenkuana. Kasla daytoy ti dakkel a liwliwa kenkuana ken mangpatalna ti isipna. . . . Masansan, ti kasasaad ti anakko ket kumaro no ti asawak (a di mammati) ket pumanaw gaput’ negosio. No dumawatak ti tulong babaen iti telepono, adu a kakabsat a lallaki ti aggarasugas iti balaymi.

“Agyamanak kadakayo, kakabsat, manipud kaunggan ti pusok iti panangipabpablaakyo a kanayon kadagiti kastoy a kita ti artikulo ken panangipakpakita a maseknankayo kadagiti kasapulan dagiti nakapuy.”

[Pirma] H. H.