Agpipinnaregtatayo Bayat nga Umas-asideg ti Aldaw
“Agpipinnaregtatayo iti maysa ken maysa, ket nangnangruna gapu ta makitayo nga umas-asideg ti aldaw.”—HEBREO 10:25.
1, 2. Ania nga aldaw ti umasidegen, ket aniat’ rebbeng a kababalin koma ti ili ni Jehova?
DAGIDIAY makiramraman ita nga agkunkuna, ‘umayka ket awatem ti danum ti biag nga awan baybayadna,’ saanda nga iputputong ti bagbagida. Bayat nga umas-asideg ti dakkel nga aldaw ti panagballigi ni Jehova, iyap-aplikarda ti pammalakad ti Biblia: “Ket agpipinnanunottayo a maipaay iti pannakaparegtatayo iti ayat ken kadagiti naimbag nga ar-aramid, a ditay baybay-an dagiti panaggigimongtayo, kas iti kadawyan dagiti dadduma, no di ket agpipinnaregtatayo iti maysa ken maysa, ket nangnangruna gapu ta makitayo nga umas-asideg ti aldaw.”—Hebreo 10:24, 25.
2 Nagipadto ti Kasuratan maipapan iti dayta nga “aldaw” kas “aldaw ni Jehova.” (2 Pedro 3:10) Yantangay ni Jehova ti Kangatuan, ti Dios a mannakabalin-amin, awan aldaw a makabalin a manglab-aw iti aldawna. (Aramid 2:20) Kaipapanan dayta ti pannakaalangon ti kinasoberanona kas Dios iti intero nga uniberso. Dayta nga aldaw a di maartapan ti kinapategna umasidegen.
3. Kasano a ti aldaw ni Jehova umas-asidegen para kadagiti Kristiano idi umuna a siglo, ken kasano met kadatayo itatta?
3 Imbaga ni apostol Pablo kadagiti Kristiano idi umuna a siglo ti Kadawyan a Panawentayo a ti aldaw ni Jehova umas-asidegen. Sinegseggaanda ti iyaay dayta nga aldaw, ngem idi a tiempo, dayta nga aldaw nasurok ngem 1,900 a tawen pay ti kaadayona. (2 Tesalonica 2:1-3) Agpapan pay kasta, rebbeng a maparegtada ta dayta nga aldaw ket piho nga umay, ket no dagiti Kristiano agtultuloyda iti kasta a pammati, sumrekdanto iti dayta naragsak nga aldaw. (2 Timoteo 4:8) Uray idin, makitkitan dayta nga aldaw nga umas-asideg. No maipapan kadatayo itatta, talaga a ti aldaw ni Jehova immasidegen. Amin dagiti nakaskasdaaw a kaitungpalan ti padto ti Biblia paneknekanda daytoy makaparagsak a kinapudno. Din agbayag, ti nagan ti Diostayo, a ni Jehova, masantipikarton iti kina-agnanayon.—Lucas 11:2.
Naparegta Gapu ti Nasantuan a Nagan
4. Sigun iti Apocalipsis 19:6, asino ti agbalin nga Ari, ken kasano a ti naganna ket maawatan?
4 Ti nasantuan a nagan rebbeng a banag a paginteresan ti intero a natauan a pamilia. Kuna ti Today’s English Version: “Idaydayawyo ti Dios! Ta ti Apo, ti Mannakabalin-amin a Diostayo, ket Ari!” (Apocalipsis 19:6) Sigun iti dayta maika-20 siglo a patarus ti Biblia, isut’ Apo, ti mannakabalin-amin a Dios. Dayta a bersion, agraman dagiti adu pay a sabsabali a moderno a bersion, saanda nga itden ti nagan ti nasantuan a Persona a nangrugin nga agturay kas Ari. Nupay kasta, ti nasantuan a nagan nairaman iti panagdir-i nga “Hallelujah!” wenno “Aleluya!” (“Idaydayawyo ni Jah” wenno, “Idaydayawyo ni Jehova”) a masarakan idiay Revised Standard Version, ti New International Version, ken ti patarus ni Moffatt iti Apocalipsis 19:6. Iti kaaduan ti Kadawyan a Panawentayo, ti nasantuan a nagan ket nailemmeng kadagiti patpatarus ti Biblia. Kas ti intay makita, nupay kasta, dayta a nagan ket dakkel a pammaregta iti ili ti Dios, agpadpada idi ugma ken ti moderno a panawen.
5, 6. (a) Apay a ni Moises kasapulan a maammuanna ti nagan ti Dios nga ireprepresentarna? (b) Aniat’ mabalin nga epektona kadagiti Israelita idi impaganetget ni Moises ti nasantuan a nagan?
5 Malagiptayo nga idi a ni Moises ti imbaon ti Kangatuan a Dios iti ili ti Israel a naadipen idiay daga ti Egipto, ti saludsod a no asinot’ nangibaon kenkuana ti timmaud iti is-isip dagiti tattao a nakaibaonan ni Moises. Ninamnama ni Moises a ti agsagsagaba nga ili a Judio kayatdanto a maammuan ti nagan ti Dios nga ireprepresentarna. Gapu itoy mabasatayo idiay Exodo 3:15: “Ket ti Dios kinunana pay ken Moises: ‘Kastoy ti sawemto kadagiti annak ti Israel, “Ni Jehova a Dios dagiti ammayo, a Dios ni Abraham, a Dios ni Isaac, ken Dios ni Jacob, imbaonnak kadakayo.”’ Daytoy ti naganko nga agnanayon, ket daytoy ti pakalaglagipak kadagiti isuamin a kaputotan.
6 Idi naipaganetget daytoy nga impormasion kadakuada, awan duadua a narikna dagiti Israelita ti pannakaparegtada. Ti pannakaispalda ket impasiguro ti maymaysa a pudno a Dios, a ni Jehova. Ket anian a makaparegta kadakuada a maaddaan namnama a maam-ammo ti Dios inton idemostrana ti kaiyulogan ti personal a naganna—a di sitatangsit a mangisinsina iti bagina!—Exodo 3:13; 4:29-31.
7. (a) Kasanotay nga ammo a dagiti adalan ni Jesus ammoda ti nasantuan a nagan? (b) Kasano a naiwalin ti nagan ti Dios iti likudan?
7 Dagiti adalan ni Apo Jesu-Kristo naparegtada met unay babaen ti nasantuan a nagan, a Jehova, ken no aniat’ intakderanna. (Juan 17:6, 26) Bayat ti naindagaan a ministerio ni Jesus, nalawag a saanna nga inlemmeng ti nasantuan a nagan, ket saanna a pinanggep a ti bukodna a nagan, a Jesus, ti maipangpangruna. Idi laeng panangrugi ti naipadto nga apostasia manipud ti napudno a Nakristianuan a pammati a nailemmeng ti nasantuan a nagan, wen, aktual a napunas iti Nakristianuan a panagpapatang. (Aramid 20:29, 30) Apaman a ti nagan ti Anak ti Dios mangrugin a maikkan ti dakdakkel a pannakaitan-ok, a lablab-awannan ti Ama, masarakanton dagiti agkunkuna a Kristiano a ti panagdayawda iti Ama ad-adda metten nga agbalin a di personal, nga agkurangen ti kinasinged ti pamilia, ket ngarud saanen a makaparegta.
8. Ania ti nagtultuloy nga epektona iti ili ti Dios ti panangawatda iti nagan a Saksi ni Jehova?
8 Gapuna, maysa a rason a maipaay ti di maiyebkas unay a rag-o idi dagiti International Bible Students a naitimpuyog iti Watch Tower Society inadaptarda ti nagan a dagiti Saksi ni Jehova idi 1931. Saan laeng a daytat’ nangted rag-o no di ket daytat’ makaparegta unay. Gapu itoy, ti kabbarot’ pannakapanaganna a dagiti Estudiante ti Biblia makapagpipinnaregtada iti maysa ken maysa.—Idiligyo ti Isaias 43:12.
9. Kasanot’ panagrikna dagiti pudno a Kristiano maipapan iti Daydiay nagbalinanda a Saksi?
9 Gapu itoy, dagiti pudno a Kristiano itatta makitada a maiyanatup nga iyam-ammo Daydiay naipadto a pagbalinanda a Saksi, a kas iti inaramid ni Jesu-Kristo nga Apoda idi adda ditoy daga. (Apocalipsis 1:1, 2) Wen, isu laeng ti inyam-ammoda kas daydiay agnagan Jehova.—Salmo 83:18.
Napunno ti Rag-o ken Nasantuan nga Espiritu
10-12. (a) Anianto ti epekto ti aktibo a puersa kadagiti paspasurot ni Jesus? (b) Kasanot’ kayat dagiti naparagsak a Saksi ni Jehova a panangtrato iti maysa ken maysa?
10 Kuna ni Jesu-Kristo kadagiti sasao a panagpakadana kadagiti apostolna: “Inkayo ngarud ket agaramidkayo ti ad-adalan iti isuamin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada nga aywananda dagiti isuamin a banag nga imbilinko kadakayo. Ket, adtoy! addaak kadakayo nga agnanayon agingga iti panungpalan ti sistema dagiti bambanag.”—Mateo 28:19, 20.
11 Kitaenyo ta dagiti kabbaro a nasursuruan a Kristiano ket mabautisaranda iti nagan ti nasantuan nga espiritu. Daytoy nasantuan nga espiritu saan a maysa a persona no di ket aktibo a puersa ni Jehova a Dios, nga us-usarenna babaen ken Jesu-Kristo. Idi Pentecostes, ni Jehova a Dios, baeten ken Jesus, imparukpokna daytoy aktibo a puersa kadagiti dedikado a paspasurot ni Jesu-Kristo. (Aramid 2:33) Napunnoda iti daytoy nasantuan nga espiritu, ket ti maysa kadagiti ebkas, wenno bunga, ti nasantuan nga espiritu isu ti rag-o. (Galacia 5:22, 23; Efeso 5:18-20) Ti rag-o ket maysa a mamaregta a kualidad. Dagiti adalan mapunnodanto iti rag-o ti nasantuan nga espiritu. Ti kararag nga inyebkas ni apostol Pablo maiyanatup unay: “Ket ti Dios ti inanama punnuennakayo koma iti amin a ragsak ken kappia iti panamati, tapno umadu ti inanamayo gapu iti pannakabalin ti nasantuan nga espiritu.”—Roma 15:13.
12 Napunno iti daytoy makaparagsak nga espiritu, dagiti Saksi ni Jehova itatta, agraman ti “dakkel nga umariwekwek,” tarigagayanda, wen, matignayda, a mangparegta ti maysa ken maysa iti tengnga daytoy di mannakigayyem a sistema dagiti bambanag. Gapu itoy, nasao ni apostol Pablo ti “panagpipinnaregta” wenno “panaglilinniwanliwa.”—Apocalipsis 7:9, 10; Roma 1:12; 14:17.
Tunggal Rason a Maparegta
13. Ania dagiti adda kadatayo a rason a pakaparegtaan ken panangparegta iti maysa ken maysa?
13 Ti pannakakita ti bagbagida nga adda iti tengnga daytoy a sistema dagiti bambanag, a ti bumusbusor iti isuamin a nalinteg isut’ agturay ken diosna pay, tarigagayan dagiti Kristiano ti agpipinnaregta iti uneg ti sangalubongan a kongregasion Kristiano, a nalapunos iti nasantuan nga espiritu ni Jehova a Dios. (Hebreo 10:24, 25; Aramid 20:28) Addaantay iti tunggal rason a maparegta koma. Wen, anian ti panagyamantayo a maaddaan ti umiso a pannakaammo maipapan ken Jehova ken ti Anakna ken ti aktibo a puersa nga us-usarenda, awan sabali, ti nasantuan nga espiritu! Anian ti panagyamantayo iti namnama nga ipapaayda! Gapu itoy ti panagdayawtayo ket napunno iti ragsak. Imbaga ni apostol Pablo kadagiti Kristiano a nangituronganna ti suratna a rebbeng nga agpipinnaregtada ken agpipinnabilegda iti nasantuan unay a pammatida. Nga aramidenda daytoy ‘nangnangruna no makitkitadan a piguratibo nga umasidegen ti aldaw.’ Mainayon pay, inton dagiti napolitikaan a pannakabalin daytoy a daga talipuposendanton ti makunkuna a Kinakristiano, agraman amin dagiti dadduma pay nga ulbod a relihion, ti situasion sapulenna a rebbeng nga ad-adda pay nga agpipinnaregtatayo.
14. Asinot’ rebbeng a mangparegta iti maysa ken maysa, ken kasano?
14 Nupay dagiti panglakayen idauluandat’ panangparegta ti arban kadagiti indibidual a kongregasionda, amin dagiti Kristiano masapul nga agpipinnaregtada, kas ipatigmaan ti Hebreo 10:25. Kinapudnona, daytoy ket maysa a Nakristianuan a pagannurotan. No miembrokayo ti maysa a kongregasion, ipapaayyo met laeng aya daytoy a pammaregta? Mabalin a pampanunotenyo, ‘Kasano nga aramidek daytoy? Aniat’ maaramidak?’ Umuna, babaen laeng iti kaaddayo kadagiti gimong ken panangsuportaryo iti Nakristianuan nga urnos, saan aya nga amin dagiti dadduma a kakabsat a lallaki ken babbai maparegtadan, a kas met laeng ti pannakaparegtayo no makitayo dagiti dadduma a simamatalek a tumabtabuno kadagiti gimong ti kongregasion? Maparegtada met babaen iti ulidan ti matalek a panagibturyo. Babaen iti panagtultuloyyo iti Nakristianuan a kurso agpapan pay kadagiti problema ken rigrigat ti biag, a dikay sumuksuko, makaitedkayo iti makaparegta nga ulidan.
Parmeken dagiti Panangupay Manipud Diablo
15. Apay a ti Diablo addaan “dakkel a pungtot,” ken maibusor kadagiti siasino?
15 Saan laeng a datayo ti makaammo a ti aldaw ni Jehova asidegen. Ammo met dayta ni Satanas a Diablo. Ibaga ti Apocalipsis 12:12 kadatayo nga adda itan dagiti ay-ay iti daga “agsipud ta ti Diablo immulog kadakayo, nga addaan dakkel a pungtot, nga ammona a bassiten ti tiempona.” Kas ipamatmat ti Apocalipsis 12:17, ti dakkel a pungtotna ket naiturong kadagidiay “mangsalimetmet kadagiti bilbilin ti Dios ken addaan ti pammaneknek ni Jesus.” Awan duaduan iti dayta—kayat ti Diablo nga upayennatayo! Ken ammona no kasanot’ panangpadasna a mangaramid iti dayta. Ammona dagiti pagkapuyan ken parikuttayo, ket dagitoy ti gundawayanna.
16. Apay nga us-usaren ni Satanas ti panangupay kas igam?
16 Apay a ti Diablo ar-aramatenna ti panangupay kas igamna? Agsipud ta daytat’ agkurri. Uray ti tao a nakapagibtur kadagiti direkta nga ibubusor ken pannakaidadanes mabalin a matnag iti pannakaupay. Kayat ni Satanas nga umsien ni Jehova a Dios ken padpadasen a paneknekan a maitallikudna dagiti tattao iti panagserbi Kenkuana. (Proverbio 27:11; idiligyo ti Job 2:4, 5; Apocalipsis 12:10.) No maupaynakayo, mabalin a pabannayatennakayo iti serbisioyo iti Dios; mabalin pay ketdi a pasardengennakayo, tapno agbalinkayo nga inaktibo iti panangikaskasaba ti naimbag a damag ti Pagarian.—2 Corinto 2:10, 11; Efeso 6:11; 1 Pedro 5:8.
17. Kasano a nabatad dagiti negatibo nga epekto ti panangupay idi kaaldawan ni Moises?
17 Dagiti negatibo nga epekto ti pannakaupay ket makita iti kaso dagiti Israelita iti kadaanan nga Egipto. Kalpasan ti pannakisao ni Moises ken Faraon, dayta nauyong nga agturay pinadakkelna ti rigatda ken panangirurumenna kadakuada. Imbaga ti Dios ken Moises nga ipasigurona kadagiti Israelita nga ispalennanto ida, a pagbalinenna ida nga ilina, itdenna ti panaglisida, ken iyegna ida idiay naikari a daga. Ni Moises nagsao iti kastoy kadagiti annak ti Israel. Ngem kuna ti Exodo 6:9: “Ngem isuda saanda nga impangag idi ni Moises a maipanggep iti pagel ti nakemda ken iti napalalo a pannakaadipen.” Aginggat’ panangkumbinsir ni Jehova ken ni Moises ken panangparegtana kenkuana, daytoy a rikna ti nangupay pay ken Moises iti pannakisaona ken Faraon kas naibilin kenkuana.—Exodo 6:10-13.
18. Apay nga adda dakkel a pagkasapulan para iti ili ti Dios a parmeken ti pannakaupay a patpatauden ti Diablo?
18 Pagaammo unay ni Satanas a Diablo ti negatibo nga epekto a maipaay iti pannakaupay iti adipen ti Dios. Kas kunaen ti Proverbio 24:10: “Kimmapsutka aya iti aldaw ti pagpaglan? Ti pigsam bassit.” Idinto ta agbibiagtayo a nakabaybayagen iti panawen ti panungpalan, masapul nga agbalintayo koma a nabileg ken napigsa iti naespirituan. Dakes payen ta masapul a makidangadangtay kadagiti kinaimperpektotayo, dagiti pagkapuyan, ken kadagiti biddut a mabalin manglapped kadatayo; ngem gaput’ pananggunggundaway ni Satanas kadagitoy a biddut, kasapulantayo ti tulong.
Agpannuray a Sititibker iti Daton ni Kristo
19. Aniat’ makatulong kadatayo a mangparmek ti pannakaupay, ken kasano?
19 Ti dakkel a tulong iti daytoy a banag isut’ sagana ti subbot a pinagbalin a posible ni Jehova babaen ken Jesu-Kristo. Makapagballigitayo babaen ti panagpannuray a sititibker iti subbot. Napeggad unay no tagibassitentayo daytoy a sagana. Wen, kaskasdi nga agkamali, wenno agbasoltayo, kabayatan nga imperpektotayo. Ngem di kasapulan a maupaytayo ken agsardengen, a kunaen nga awanen namnama, ket gapu itoy matnagtayon iti silo ni Satanas. Ammotayo nga addaantay ti naan-anay a daton a maipaay iti basol. Ti subbot kabaelanna nga ikkaten ti basbasol. No kamengtay ti “dakkel nga umariwekwek,” masapul a maaddaantayo ti naan-anay a pammati ken panagtalek a mabalintay a bugguan dagiti pagan-anaytayo ken papudawen babaen iti dara ti Kordero.—Apocalipsis 7:9, 14.
20. Kasanot’ panangipamatmat ti Apocalipsis 12:11 a ti naindaklan a manangupay, nga isu ti Diablo, ket mabalin a maparmek?
20 Idiay Apocalipsis 12:10 nailadawan ni Satanas kas “ti mangidardarum kadagiti kakabsattayo . . . daydiay mangidardarum kadakuada iti sanguanan ti Diostayo bayat ti aldaw ken rabii.” Kasanotay a maparmek dayta a dakes a mangidardarum ken nakaam-amak a manangupay? Ti Apo 12 bersikulo 11 dayta a kapitulo mangted sungbat: “Ket isu inabakda gapu iti dara ti Kordero ken gapu iti sao ti pammaneknekda, ket dida kinailalaan dagiti biagda agingga ken patay.” Gapuna ti ili ni Jehova masapul nga salimetmetanda ti naan-anay a panagtalekda iti daton a subbot, ti dara ti Kordero. Salimetmetan a napigsa ti pammaregta nga ipapaay ti pammaneknek, a regular nga iranud ti naimbag a damag ti Pagarian ti Dios iti tunggal maysa a mabalinanyo a pangtedan.
21. Kasano a mabalin ditay mapupuotan makiramramantayo kadagiti ar-aramid ti Diablo a mangupay kadagiti kakabsattayo?
21 No maminsan, uray di inggaggagara, mabalin a makiramramantayo iti ar-aramid ti Diablo a mangupay kadagiti kakabsattayo. Kasano? Babaen ti panagbalintayo nga aglablabes a manangbabalaw, nga adu unay ti kalkalikagumantayo, wenno nalabes ti kinalintegtayo. (Eclesiastes 7:16) Addaantay amin kadagiti pagkurkurangan ken pagkapuyan. Ditay koma gunggundawayan ida kas ar-aramiden ti Diablo. Imbes ketdi, agsaotayo ti makaparegta kadagiti kakabsattayo ken iti ili ni Jehova kas organisado a grupo. Kayattayo a pabilgen ti maysa ken maysa ket iti kasta malisian ti panangupay iti maysa ken maysa.
Makaparegta Bayat nga Umasideg ti Aldaw
22, 23. (a) Apay a ditay ipabiang lattan kadagiti panglakayen ti paggubuayan ti pammaregta? (b) Kasano a maparegta met dagiti manangaywan iti kongregasion Kristiano?
22 Rebbeng a pagbalinentay a napinget a pangngeddeng ti kanayon makaparegta iti maysa ken maysa bayat nga umas-asidegen ti aldaw. Paregtaen dagiti dadduma babaen iti matalek nga ulidan ken makaliwliwa a sasaoyo. Tuladenyo ni Jehova ken ni Apo Jesu-Kristo iti daytoy a banag. Dikay koma ipalubos a dagiti laeng panglakayen ti kongregasion ti paggubuayan ti pammaregta. Ngamin, dagiti mismo a panglakayen kasapulanda met ti pammaregta. Addaanda met kadagiti pagkapuyan ken kinalap-it kas kadagiti dadduma iti arban, ken masapul a parmekenda dagiti isu met laeng a parikut iti panangipaay ti kasapulan ti pamiliada iti agrakrakayan a lubong. Mainayon pay iti dayta, addaanda ti kas nasao ni Pablo a panagagawa a maipaay kadagiti kongregasion. (2 Corinto 11:28, 29) Narigat ti trabahoda—kasapulanda met ti pammaregta.
23 Maparegtayo met a nalaing dagidiay adda kadagiti posision a manangaywan iti kongregasion Kristiano babaen ti pannakitunosyo kadakuada. Iti kasta sursurotenyo ti balakad idiay Hebreo 13:17: “Agtulnogkayo kadagiti mangidalan kadakayo ket paiturayankayo, ta igagada dagiti kararuayo a kasla isuda ti mangidatagto; tapno aramidenda daytoy a sirarag-o a saan a sililiday, ta no saan awan ti gunggonayo.”
24. Iti daytoy nga aldaw ti pannakaupay, aniat’ rebbeng nga ar-aramidentayo, ken apay?
24 Agbibiagtayo iti aldaw ti pannakaupay. Ti puspuso dagiti tattao pudno nga agkapuyda iti buteng ken danagda kadagiti maar-aramid nga umayto iti amin a mapagnaedan a daga, kas impadto ni Jesus. (Lucas 21:25, 26) Gapu kadagiti nakaad-adu a parikut a mangpaleddaang ken makapaupay, “agpipinnaregtakay koma iti maysa ken maysa, ket nangnangruna gapu ta makitayo nga umas-asideg ti aldaw.” Surotenyo ti nagsayaat a balakad ni apostol Pablo idiay 1 Tesalonica 5:11: “Gapuna aglilinniwanliwakayo iti maysa ken maysa ket agsisinnurokayo kas ar-aramidenyo met.”
Kasanot’ Panangsungbatyo?
◻ Apay a rebbeng a dagiti Kristiano agpipinnaregtada, a nangnangruna ngem iti dati?
◻ Kasano a ti pannakaammo iti nasantuan a nagan makaparegta iti ili ni Jehova?
◻ Kadagiti ania a pamay-an a sinaggaysa a makapagpipinnaregtatayo?
◻ Apay a masapul a lisiantayo ti makiraman kadagiti aramid ti Diablo a panangupay kadagiti kakabsattayo?
[Ladawan iti panid 17]
Idadaulo dagiti panglakayen ti panangparegta iti arban kadagiti kongregasionda