Malagipyo Pay Aya?

Pinampanunotyo aya a siaannad dagiti nabiit pay a bilang Ti Pagwanawanan? No kasta, mabalin a malagipyo pay dagiti sumaganad:

◻ Makalasatto aya dagiti sumagmamano a napulotan a Kristiano iti “dakkel a rigat” ket agbiagda ditoy daga iti apagbiit a tiempo sakbay a maipanda idiay langit?​—Apocalipsis 7:14.

Ti Biblia saan a nalawag iti daytoy. Dadduma a salaysay ti Biblia kasla isingasingda a dagiti napulotan mabalin nga agbiagda nga agtultuloy idiay baro a lubong. Nupay kasta, minimilion kadagidiay mangnamnama nga agbiag nga agnanayon ditoy daga immawatdan ti kasapulan a panagsanay tapno mairugida ti baro a lubong. Gapuna, ti bassit a natda saandanton a kasapulan a maipaay iti daytoy a trabaho, ket mabalin a pilien ti Dios nga alaen idan idiay langit a maipaay “ti panagkasar ti Kordero” kalpasan ti panangikisapna iti narelihiusuan a balangkantis, ti “Babilonia a Dakkel.” (Apocalipsis 18:2, 10; 19:2, 7, 8)​—8/15, panid 31.

◻ Kadagiti ania a motibo ti pangiturongan ti maysa a lalaki iti pusona iti panagbalinna a manangaywan a Kristiano? (1 Timoteo 3:1)

Rebbeng a gaw-aten ti maysa a lalaki ti saad kas manangaywan, nga aramidenna dayta a sipapakumbaba agsipud ta kayatna ti agserbi kadagiti dadduma. No kastat’ pannakatignayna babaen kadagiti nalinteg a motibo, daytoy a tignay iti pasetna makaibunga ti naespirituan a bendision kadagiti isuamin a nairaman.​—9/1, panid 18.

◻ Apay a saan a naupay ni apostol Pablo agpapan pay amin dagiti kasapulan nga ibturanna?

Inlawlawag ni Pablo: “Mabalinak dagiti amin a bambanag gapu iti daydiay mamapigsa kaniak.” (Filipos 4:13) Di pulos pinadpadas ni Pablo nga imbaklay nga agbukbukod dagiti pakadagsenanna. Imbes ketdi, isut’ kimmita ken Jehova a mangsaranay kenkuana. (Salmo 55:22)​—9/1, panid 30.

◻ Aniat’ kaipapanan ti sasao ni Pablo idiay Efeso 4:26: “No agpungtotkayo, dikay agbasol”?

Bigbigen dagitoy a sasao a ti tao mabalin a nainkalintegan ti panagpungtotna, ngem no daytat’ mapasamak, saan koma a taginayonen ti tao ‘a sipupungtot pay agingga iti ilelennek ti init.’ (Efeso 4:26) Apay? Gapu ta daytoy ti mangted iti Diablo iti oportunidad a manggundaway iti dayta a tao, a mabalin nga allukoyenna nga agaramid ti banag a dakes, tapno lak-amenna ti di pananganamong ti Dios. (Salmo 37:8, 9)​—9/15, panid 21.

◻ Aniat’ dakkel a panaggiddiat iti panangisursuro dagiti Saksi ni Jehova ken iti panangisursuro dagiti klero ti Kakristianuan?

Dagiti Saksi ni Jehova mangisursuroda nga addaan autoridad ti Sao ti Dios, idinto a dagiti klero ti Kakristianuan ibatbatayda ti pannursuroda kadagiti pagano a narelihiusuan a tradision a natawid manipud Babilonia ken Egipto. 10/1, panid 25.

◻ Agpaay iti ania a kangrunaan a rason nga immay ti Anak ti Dios ditoy daga?

Ni Jesus immay ditoy daga kangrunaanna a maipaay iti panggep a panangibanag iti isyu a pinataud ni Satanas maipapan iti kinasoberano ni Jehova.​—10/15, panid 13.

◻ Iti panangawagna kadagiti nailubongan nga agtuturay a “nangatngato,” kiskissayantay aya ti dayaw a maiparbeng ken Jehova? (Roma 13:1)

Saan, ta ni Jehova ti ad-adda pay ngem basta “nangatngato” laeng. Isu “ti Soberano nga Apo,” “ti Katan-okan.” (Salmo 73:28; Daniel 7:18, 22) Dagiti nailubongan nga agtuturay nangatngatoda no maipapan laeng kadagiti dadduma a tattao ken iti bukodda nga ar-aramid. Responsableda a mangituray ken mangsalaknib kadagiti il-ili.​—11/1, panid 12.

◻ Apay a ti ayat ti kadadakkelan kadagiti siam a bungbunga ti espiritu ti Dios a nadakamat idiay Galacia 5:22, 23?

Dagiti dadduma a walo a bunga ti espiritu ti Dios ket panangiparangarang, wenno nadumaduma nga aspeto, ti ayat, daydiay immuna a nadakamat. Amin dagitoy a dadduma a bungbunga ti espiritu naskenda a kualidad, ngem saandatay a magunggonaan no agkurangtay ti ayat. (1 Corinto 13:3)​—11/15, panid 14.

◻ Aniada dagiti gunggona iti panangikarkararag kadagiti kapammatian?

No pagbalinentayo ti naespirituan a pagimbagan dagiti dadduma a pakaseknantayo iti kararag, maiyadanitayo kadakuada iti ayat a nainkabsatan. Maaddaantayo met ti simpatia kadakuada, a makiramraman kadagiti intereses ken dukdukotda. Gapuna, aniaman a kinapait ket maparut, a mangwaya ti lugar a maipaay kadagiti makapabileg a pampanunot a mamagbalin kadakayo a managayat ken naragsak.​—11/15, pinanid 21-2.

◻ Aniada dagiti mangpilit a rason iti panagdayaw ken Jehova a Dios?

Rebbeng a daydayawentayo ni Jehova gapu ta isut’ Namarsuatayo ken dagiti kualidadna iyadaninatayo kenkuana. (Deuteronomio 32:3, 4; 1 Juan 4:8; Apocalipsis 10:6) Kuna ti Biblia: “Ti nadiosan a debosion mangted ti gunggona iti isuamin, ta adda kari iti biag nga agdama ken iti mapasungad.” (1 Timoteo 4:8) Awan dios a naiduma ken Jehova a makaikari ti kasta a pagtungpalan sana tungpalen ti karina.​—12/1, pinanid 6-7.