Naragsak a Panagibtur Idiay Makintengnga a Daya
Daytoy makatignay a report naggapu kadagiti Saksi ni Jehova idiay Lebanon
TI 1990 a tawen serbisiomi nangrugi kadagiti narungsot a panagbibinnomba idiay Beirut. Kalpasanna immapay ti kinakalma a pimmaut manipud tapus ti Setiembre 1989 ingganat’ Enero 1990.
Kabayatan dagidiay a bulan maysa a baro a kangatuan a bilang a 2,659 nga agibumbunannag ti naireport (idi Nobiembre), no iyar-arig iti 2,467 idi 1989 a tawen serbisio. Uppatapulo ket uppat a tattao ti nabautisaran, ket kada bulan adda promedio a 65 ti makiramraman iti serbisio kas auxiliary payunir. Iti damo unay, nasurok a 2,000 a panangyadal ti Biblia ti naireport, ket inrugimi a pasungaden ti mabalin a magapuanan pay iti masanguanan.
Ngem bimtak manen ti gubat idiay Akindaya a Beirut, a pakasarakan iti kaaduan a kongregasion, ket dinosdosena kadagiti kakabsattayo ti kasapulan nga agkamang iti dadduma a paset ti pagilian. Iti adu nga al-aldaw dikam makasao dagiti kongregasion kadagiti apektado a luglugar, ket saan a kumpleto dagiti report iti tay-ak ti serbisio. Nupay kasta, dagiti kakabsat a nawarawara timmiponda kadagiti kongregasion kadagiti luglugar a nagkamanganda, ket ti trabaho a panagbalaybalay nagtultuloy nga addaan nasayaat a bungbunga iti intero a pagilian. Kabayatanna, adu kadagiti balbalay dagiti kakabsattayo ti nadaddadael no di man nauram dagita gapu kadagiti panagbomba. Maysa a kabsat a babai ti natay.
Sitatalek kumitkitakami ken Jehova a maipaay ti tulong ken panangiwanwan. Dagiti natutured a payunir nagboluntarioda a mangipan kadagiti espiritual a taraon, agraman makan ken ti danum, kadagiti kakabsattayo kadagiti lugar a mararaut. Natignay gaput’ ayatda ken Jehova ken kadagiti kakabsat, irisgoda pay ti panangballasiw kadagiti kalsada a namulaan kadagiti mina. Maysa a nasayaat a pammaneknek ti naipaay bayat a makitkita dagiti tattao ti tulong nga um-umay kadagiti pamilia dagiti kakabsattayo. Makitkitada no aniat’ maaramidan ti pudno nga ayat inton amin ket mapagkaykaysan iti panagdaydayaw iti maymaysa a pudno a Dios, a ni Jehova.—Juan 13:34, 35; 15:13.
Bayat ti tawen serbisio, saan pulos a naikapis dagiti kakabsat uray iti maysa laeng a bilang dagiti magasintayo. Kas maar-aramiden iti magasin a Ti Pagwanawanan, ti Agriingkayo! a magasin iti Arabiko maipabpablaak metten a kagidgiddan ti Ingles, nangrugi iti bilang ti Enero 8, 1990. Dagiti Saksi ken tattao nga interesado maragsakanda unay. Makaay-ayo met a makita dagiti baro a ruar iti Arabiko, kas ti broshur a Rumbeng Aya a Patienyo ti Trinidad? ken dagiti libro a Ti Biblia—Saot’ Dios wenno iti Tao? ken Ti Librok dagiti Estoria ti Biblia.
Dagitoy naespirituan a sagsagut naitedda agpapan pay ti panagserra dagiti adu a pabrika ken dadduma nga establisimiento idiay Beirut. Ti kasasaad ti panagbiag ket nakadakdakes iti intero a pagilian. Adu a luglugar ti awan elektrisidadna, awan danum, awan serbisio ti telepono. Itan, palubosanyo ti sumagmamano kadagiti kakabsattayo a mangisalaysay no kasanoda a nasarakan ti rag-o uray no sarsarangtenda dagiti panangrabngis ti maysa a gubat a pimmauten iti 15 a tawen.
“Ti Positibo a Dasig”
Maysa a kabsat a lalaki idiay Beirut ti nagsurat: “Umuna, ipaayko ti naimpusuan a panagyamanko ken Jehova gapu ta sinalaknibannakami iti uneg ti organisasionna iti nadalus a panagdayaw agpapan pay amin dagiti narigat a kasasaad a sinangomi. Bayat dagiti nabiit pay a paspasamak, naaddaanak kadagiti kapadasan a nangyeg ragsak kaniak, ket ibilbilangko ida a positibo a dasig ti gubat.
“Bayat dagiti nakaro a panagbibinnomba, nakikatkatugawkami kadagiti kakaarrubami iti maysa nga agdan, ta daytat’ katatalgedan a lugar bayat dagiti panagbomba. Masansan nga isarsaritami kadakuada maipapan ti Pagarian ti Dios kas ti kakaisuna a solusion kadagiti parikut ti sangatauan, ket masansan nga agkarkararagkami iti Diostayo, a ni Jehova. Daytoy ti pagaammo dagiti isuaminen.
“No maminsan dagiti panagbomba agpautdat’ adu nga al-aldaw, ket saankam makapan makigimong. Gapuna itugtugotko ti magasinko a Pagwanawanan ket ad-adalek dayta bayat nga agtugtugaw idiay agdan. Daytat’ mangriing ti interes dagiti kakaarrubami. Dadduma kadakuada ti saan a makisasao kadakami gapu ta Saksi ni Jehova kami. Ngem idi natiruan ti bomba ti balaymi, nagsiddaawda iti ayat nga impakita dagiti kakabsattayo. Ita kayatdan ti makisasao kadakami. Gapuna nakaipaimakami kadakuada iti sumagmamano a suskripsion ti Agriingkayo!
“Dagitoy a kapadasan ti namagbalin kaniak a determinado nga agtultuloy a mangisasao ti kinapudno. Ni Jehova maikari iti amin a dayawtayo ken amin a panagraemtayo ken amin a dayag.”
“Ti Nagan ni Jehova Inispalna ti Biagko”
Maysa a kabsat a lalaki a taga Ras Beirut a Kongregasion insalaysayna: “Ni baketko, ti dua nga annakko a lallaki nga ub-ubbing pay, ken siak rinugianmi ti aldawmi iti ministerio a panagbalaybalay idiay akinlaud a paset ti Beirut. Iti malem, naaddaankam ti gimong iti pagsasao nga Ingles iti pagtaenganmi. Idi alas 6:30 t.m. nasipngeten. Dagiti kakaisuna a tattao kadagiti lansangan isuda dagiti armado a lallaki. Agtudtudo idi ti bomba. Kaaduan kadagiti agindeg kadagiti patakder a yanmi nagtataraydan. Awan uray danum wenno elektrisidad. Kalpasanna nakangngegkami ti panagtuktok iti ruangan.
“Gaput’ panangipatona a maysa kadagiti kaarrubami ti agkasapulan ti danum wenno tinapay, linuktan ni baketko ti ruangan. Sitatakder sadiay isuda dagiti uppat nga armado a lallaki. Impaturongda dagiti paltogda ken baketko ket sinaludsoddak nga inusardat’ naganko. Dayta a lawas siam a lallaki ti innal-aladan manipud pagtataenganda iti kastoy a pamay-an ket pinatayda ida a dagus. Idi nakitadakon dagiti armado a lallaki, impaturongda dagiti automatiko a ripleda iti ulok ket imbilinda a kumuyogak kadakuada. Kunak kadakuada: ‘Kumuyogak kadakayo. Ngem palubosandak nga agbado pay.’ Nagkararagak ken Jehova iti amin a pusok, a dawdawaten ti tulongna. Idi nalpasakon nga agkararag, nalag-anen ti riknak ket minatmatakon dagitoy armado ken nakabutbuteng a lallaki kas ordinario a tattao. Mabalinkon ti makisao kadakuada nga awanan buteng.
“Dinamagko kadakuada: ‘Aniat’ kayatyo kaniak? Agpapatangtay bassit ditoy balay sakbay a pumanawtayo.’ Idi addakam idiay sala, ti hepeda nagsaludsod kaniak: ‘Aniat’ kalinteganyo a sumrek iti balbalay dagiti tattao a mangaskasaba kadakuada?’ Insungbatko: ‘Agaw-awitkayo ti paltog a mangimpuersar ti kayatyo, ket awan ti manglaplapped kadakayo. Aw-awitek met ti naimbag a damag ti talna nga imbilin ni Jesus a maikaskasaba.’ Kalpasanna inlawlawagko ti pammati ken aramid dagiti Saksi ni Jehova. Apaman a nadakamatko ti nagan ni Jehova, kunada: ‘Mapnekkamin a mangpalutpot kenka ditoy. Saanen a kasapulan nga itugotdaka.’ Kaawatan, maysa kadakuada ti makaam-ammo iti maysa a kabsat. Kunana: ‘Daytoy ket kas ken Jarjoura.’
“Kinaskasabaanmi dagidiay nakapaltog a lallaki ket sinungsungbatanmi ti salsaludsodda iti maysa oras ket kagudua. Kalpasanna, imbes nga impanawdak idiay kargadera ti kotseda kas inar-aramidda kadagiti dadduma, nagpadispensarda, inagepandak, intukondat’ tulongda no kasapulak dayta, sada nagpakadan. Kabayatan amin dayta, nariknak ti pannalaknib ni Jehova. Ti pannakiraman iti panagbalaybalay iti dayta nga agsapa ken itatabuno iti gimong iti malem ti nangpabileg kaniak a nagtakder a sititibker. Pudno unay, ti nagan ni Jehova ti nangispal kaniak.”—Proverbio 18:10.
“Ti Panangaywan ni Jehova ti Nanglikmut Kadakami”
Sabali pay a kabsat ti nagsurat manipud Beirut: “Mierkoles idi, maika-31 ti Enero, 1990. Bayat nga agtartrabahoak a kadua ti kabsatko idiay balay ti maysa a kabsat a babai, nangrugi manen ti panaglalaban. Agbettak dagiti bomba iti uray sadino. Gapu iti narungsot a panagdadangadang, dikam makaawiden. Ti kabsat a babai ket managpadagus unay uray sumagmamano laeng a tinapay ti adda kenkuana.
“Aburidoak unay maipapan ken baketko ta isut’ maysa a Filipino ket saan a naruam kadagiti kinaranggas ti gubat. Iti maikadua nga aldaw, nupay kasta, nakapanawak met laeng a napan idiay balaymi. Binunton a muebles ti nangbangen kadagiti lansangan, ngem pagyamanan ken Jehova, natalged ti pamiliak. Kalpasan ti apagbiit a kinakalma, nangrugi manen ti nakaro a panagbomba. Naglemmengkami iti pagtaengan ti maysa a kabsat nga asideg idiay balaymi. Lima kami—ni baketko, ti dua ti tawenna nga anakko, siak, ti kabsatko, ken ti baketna. Dagiti bomba, kapsula, ken raketa agtinnagda iti aglawlawmi, ngem ti panangaywan ni Jehova ti nanglikmut kadakami. Dua nga aldaw a nakaro a panagbomba ti limmabas, bayat a nakaiddakami iti daga a dagiti asuk ti bomba sumsumrekda kadagiti agongmi.
“Bayat a dengdenggenmi dagiti panagbettak, malaglagipmi dagiti sasao ni David idiay Salmo 18:1-9, 16-22, 29, 30. Kadagidiay kangitingitan a kanito, ken agpapan pay amin a mapaspasamak, naragsakkami ket mabalinmi pay ti umisem. Nagkararagkami ken Jehova a no rebbeng a mataykami, mataykami koma a silalaka, a saanen nga agsagsagaba. Ti namnamami iti panagungar ket napigsa.
“Ti sumaganad nga aldaw ket saan a nakappapati. Agarup 25 a bomba ti nagtinnag iti arubayan ti balay a paglemlemmenganmi, ngem awan uray maysa ti nakadangran kadakami. Agasenyo ti riknami idi a mariknami ti pannalaknib ni Jehova? Iti sumaganad a bigat, dagus a naikeddengmi ti agtalawen. Ti kotsek ti kakaisuna nga adda idiay lansangan a saan a napuoran. Nagpatarayak iti nagbabaetan dagiti mina ken bomba, ket pagyamanan ken Jehova, nakatalawkami a napan iti disso a nakalkalma ngem ti naggapuanmi. Sadiay, dagiti kakabsattayo ti siaayat a nangted kadakami ti kawkawes, taraon, ken kuarta.
“Agpapan pay amin a rigat, maragsakankami ta ni Jehova adda kadakami. Arigna a nangibaon kadagiti anghelna tapno iyadayona dagiti bomba kadakami. (Salmo 34:7) Wen, dakkel ti rag-omi. Ngem ti rag-omi dakdakkelto pay inton mailasatmi ti Armagedon.”
Ti Insigida a Panangtulong Agtigtignay!
Dadduma a paset ti Beirut ti kasla dinuprak ti ginggined. Adu kadagiti balbalay dagiti kakabsattayo ti naperperdi wenno nadaddadael. Idi rimsua ti nabiit pay a pakarigatan, ti Komite ti Sanga nangorganisar ti insigida a mangtulong a komite a mangaywan kadagiti kasapulan ti kakabsat. Nangrugi a nagandar dayta idi Pebrero 16, 1990, agarup iti tiempo a mabalinmin ti umakar kadagiti nadangranan a luglugar. Ti panggep daytoy a komite ket nagkatlo: mangted ti naespirituan a pammaregta kadagiti kakabsat; mangaywan kadagidiay agkasapulan ti kuarta, taraon, ken danum; ken mangtulong kadakuada a mangtarimaan wenno mangbangon manen ti pagtaenganda.
Saanen a kasapulan ti panangawag kadagiti agboluntario. Tunggal aldaw adu ti agparang a nakasapsapa pay tapno tumulong. Adtoy ti sumagmamano a komento dagidiay natultulongan:
Maysa a kabsat a babai, a ti balayna ket madaldalusan ken naisubli iti dati, kunana: “Nangnangngegko ti tulong nga ipapaay dagiti kakabsat no dumteng dagiti didigra. Itan makitkitakon ken marikriknakon.” Uray ti kaarrubana, a babai a Muslim, kunana iti kabsat: “Talaga nga agayan-ayatkayo. Ti relihionyo ti pudno. Itan agsubliak idiay purokmi ket ibagak iti isuamin ti ar-aramidenyo ditoy.” Daytoy a kaarruba nangyeg ti sumagmamano a taraon kadagiti nagboluntario.
Maysa a bumaket a kabsat ti nagkomento: “Ninamnamak nga umaykayo a bumisita kaniak, ngem diak impagarup a ti Sosiedad mangibaon ti maysa a mangyeg ti danum kaniak.” Isut’ makasangit bayat nga ag-agkanna ti kabsat nga immay timmulong kenkuana.
Maysa a pamilia ti tallo—maysa nga asawa a lalaki ken babai a saanda pay nabautisaran nga agibumbunannag ken ti baritoda—nasarungkaranda ken naikkanda ti dakkel a kahon ti gatas, sumagmamano a tinapay, danum a mainum, ken kuarta. Idi naibaga kadakuada a dagiti Saksi ni Jehova ti nangiyurnos iti daytoy, kuna ti asawa a lalaki: “Addaakon iti Iglesia Evangelical iti 11 a tawen ken aktibo unay. Ngem kadagitoy a 15 a tawen ti gubat ditoy Lebanon, dida pulos napampanunot ti nangaramid iti banag a kastoy para kadagiti miembroda.” Intuloyna: “Daytoy a talaga ti maymaysa nga organisasion ti Dios.” Ti asawa a lalaki ken ti baketna nabautisaranda iti maysa nga asamblea idi Mayo 1990.
Maysa a panglakayen ti nagkomento: “Di umanay ti sasao a mangiyebkas ti panagyamanmi kadagiti ar-aramid ti ayat nga impaayyo kadagiti marigatan a kakabsat. Nagsiddaawak unay a makasangit pay idi makitak ti grupo dagiti agtutubo a kakabsat a lallaki, dagiti boluntario, a mangibangbangon manen iti balay dagiti dadakkelko. Uray dagiti kaarrubami a saan a Saksi inyebkasdat’ panangapresiarda. Pudno nga agyamyamankami ken Jehova ken ti organisasionna gapu iti praktikal a suporta a naipaay. Anian ti kinapudno dagiti sasao ti salmista idiay Salmo 144:15: ‘Naragsak ti umili a ti Diosna ni Jehova.’”
“Aniakay a Kita dagiti Tattao?”
Maysa a sister nga addaan pamilia ti nagsurat: “Kayatko nga iyebkas ti nauneg a panangipategko iti ayat ni Jehova ken ti organisasionna. Ti balaymi natatek iti bala ket napuoran. Adut’ nagkuna kadakami a daytat’ saanen a matarimaan. Nupay kasta, adtoy a daytat’ sitatakder a natarimaanen a kasla awan napaspasamak, a nalawlaw iti ginasgasut a balbalay iti kalyemi a naur-uram ken nadaddadael.
“Uray dagiti kaarrubami, a saanda a Saksi ni Jehova, agsalsaludsodda: ‘Sadinot’ paggapgapuan daytoy nga ayat? Aniakay a kita dagiti tattao? Asino dagitoy tattao nga agtartrabaho iti kasta karegta ken nakaul-ulimek ken nakasingsingpet? Bendito koma ti Dios a nangted kadakayo itoy nga ayat ken managsakripisio nga espiritu.’ Anian a maiyanatup dagiti sasao ti Salmo 84:11, 12: ‘Ta ni Jehova a Dios isu ti init ken kalasag; mangtedto iti parabur ken gloria. Awanto ti imbag a maikedked ni Jehova kadagiti magna a sililinteg. O Jehova dagiti buybuyot, naragsak ti tao nga agkammatalek kenka.’”
Maysa a lalaki a ti asawana ken annakna ket Saksida ni Jehova nagsurat: “Kayatko ti agyaman kadakayo gapu iti tulongyo a nangtarimaan ti balaymi. Ti aramidyo impakitanat’ napasnek a Nakristianuan nga ayat a nakataktakkon kadagitoyen nga al-aldaw. Bendisionan koma ti Dios dagiti ar-aramidyo.”
Kalpasan a natarimaan ti balay ti maysa a panglakayen, kunana: “Dimi maiyebkas ti adda kadagiti pusomi. Dikam makasarak ti sasao a mangibaga kadakayo ti panangapresiarmi ken Jehova ken ti organisasionna. Nariknami ti kinasinged ni Jehova kadagiti didigrami. Ti ayatyo pinaregtana amin a miembro ti pamiliak a makiraman iti panangtulong kadagiti dadduma nga agkasapulan met.”
Bayat ti Abril, 194 a tattao idiay Lebanon ti nangtagiragsak iti trabaho kas auxiliary payunir. Ti rabii ti Memorial ket naul-ulimek ngem kadagiti dadduma a rabii, ket ti Memorial naangay nga addaan dagup a timmabuno a 5,034. Amin dagiti asamblea a naiplano naangayda, ket ti dagup a bilang dagiti tattao a nabautisaran iti tawen ket 121, agpapan pay iti kinagulo ti pagilian. Adu a pamilia kadagiti kongregasion ti pimmanaw a naan-anayen iti pagilian. Ngem dagiti kabbaro nga interesado rumangrang-ayda metten nga agturturong iti bautismo, ket ti 2,726 nga agibumbunannag ti Pagarian agtultuloy nga umadu ti bilangda. Bayat ti 1990 a tawen serbisio, ti intero nga ili ni Jehova ditoy Lebanon naglak-am iti kinamatalek ni Jehova bayat ti panangay-aywanna ken panangiturturongna kadakami a makalasat kadagiti panawen a nariribuk.—Salmo 33:4, 5; 34:1-5.