Ti Biag ken Ministerio ni Jesus

Pannakatuok Idiay Kayo

KAGIDDAN ni Jesus dua a tulisan ti nairuar met a mapapatay. Di adayo manipud siudad, nagsardengen ti prusision idiay lugar a maaw-awagan Golgota, wenno Disso ti Bangabanga.

Dagiti balud inussobanda ida. Sa ti arak a nalaokan ti mirra inggay-atda. Mabalin a daytat’ insagana dagiti babbai ti Jerusalem, ket saan nga ipaidam dagiti Romano daytoy mangbibineg ti sakit nga agas kadagidiay mailansa. Nupay kasta, idi rinamanan ni Jesus, saanna nga ininum dayta. Apay? Kaawatan kayatna nga ikutan a naan-anay amin nga isipna bayat daytoy kangatuan a suot ti pammatina.

Itan naiyunnat ni Jesus iti kayo a dagiti imana naikabil iti ngato ti ulona. Ket dagiti soldado ti nangipalok kadagiti dadakkel a lansa iti im-ima ken saksakana. Isut’ agtirtiritir ti ut-ot idi a lussoken dagiti lansa ti lasagna ken pempennetna. Idi a ti kayo maipatakderen, ti ut-ot nakakarkaro unay, ta ti dagsen ti bagi ti mangpisang kadagiti sugsugat ti lansa. Kaskasdi, imbes a mangbutbuteng, ni Jesus ti nangikararag maipaay kadagiti soldado a Romano: “Ama, pakawanem ida, ta dida ammo ti ar-aramidenda.”

Impaskil ni Pilato ti maysa a karatula idiay kayo a mabasa: “Jesus a Nazareno Ari dagiti Judio.” Kaawatan, insuratna daytoy saan laeng a gapu ta pagraemanna ni Jesus no di ket kasimronna dagiti papadi a Judio gapu ta pinespesda ti sentensia a panangpapatay ken Jesus manipud kenkuana. Tapno mabasa dagiti isuamin ti karatula, impaisurat ni Pilato dayta iti tallo a pagsasao​—iti Hebreo, iti opisial a Latin, ken iti gagangay a Griego.

Dagiti pangulo a papadi, agraman da Caifas ken Annas, nadismayada. Daytoy positibo a proklamasion ti nangperdi ti oras ti panagballigida. Gapuna nagprotestada: “Dika isurat ‘Ti Ari dagiti Judio,’ no di ket isu kinunana, ‘Ariak dagiti Judio.’” Makaluksaw gaput’ pannakausarna kas peon babaen kadagiti papadi, simmungbat ni Pilato nga addaan natangken a pananglais: “Ti insuratko, insuratkon.”

Dagiti papadi, agraman umariwekwek, ti nagtataripnong itan idiay disso a pangpapatayan, ket pinadpadas a sinungbatan dagiti papadi ti pammaneknek ti karatula. Inulitda dagiti ulbod a pammaneknek a naited a nasapsapa kadagiti panangukom ti Sanhedrin. Gapuna, saanen a nakaskasdaaw, dagiti aglabas rinuggiandan a pinagsawsaw-an, nga ingilngilangilda ti ul-uloda a manglais ken kunkunada: “Sika a rebbaem ti templo ket ti tallo nga aldaw bangonem met laeng, isalakanmo ta bagim! No sika ti anak ti Dios, umulogka dita kayo a pagtutuokan!”

“Insalakanna dagiti sabali; ti bagina saanna a mabalin nga isalakan!” imballaet met dagiti pangulo a papadi ken dagiti relihiuso a kakaduada. “Isu ti Ari ti Israel; umulog ngarud ita iti kayo a pagtutuokan ket mamatikamto kenkuana. Manginanama iti Dios; Isu ti mangisalakan koma kenkuana ita no ayatenna, ta sinaona, ‘Siak ti Anak ti Dios.’”

Naalisan iti dayta nga espiritu, dagiti soldado rinabrabngisda met ni Jesus. Inang-angawda nga inggay-at kenkuana ti naalsem nga arak, nalabit idepdeppelda la bassit iti namagaanen a bibigna. “No sika ti ari dagiti Judio,” inum-umsida, “isalakanmo ta bagim.” Uray dagiti tulisan​—maysa nailansa iti kannawan ni Jesus, ken daydiay maysa iti kannigidna​—ti nanglalais kenkuana. Panunotenyo dayta! Ti naindaklan unay a tao a nagbiag pay laeng, wen, daydiay nakiraman ken Jehova a Dios iti panangparsua kadagiti isuamin a bambanag, disidido a nangsagaba amin daytoy a panangabuso!

Dagiti soldado innalada ti makinruar a pagan-anay ni Jesus ket pinagkapatda. Naggiginnasatanda tapno makita no asinot’ pagpaayan dagitoy. Ti makin-uneg a pagan-anay, nupay kasta, ket awan nagdaitanna, a daytat’ nangato ti kualidadna. Gapuna kuna dagiti soldado iti maysa ken maysa: “Saantayo a pigisen, no di ket paggiginnasatantayo no asinonto ti akinkua.” Gapuna, saanda nga am-ammo, tungtungpalenda ti kasuratan a nagkuna: “Biningayda dagiti pagan-anayko kadakuada ket naggiginnasatanda ti kawesko.”

Idi agangay, maysa kadagiti tulisan ti nangapresiar a ni Jesus pudno a maysa nga ari. Gapuna, tinubngarna ti kaduana, kinunana: “Uray sika dika pay kabuteng ti Dios idinto nga addaka ngaruden iti pannakadusa? Ket data, kinapudnuanna, a rebbengta nga awaten ti maitutop kadagiti ar-aramidta; ngem daytoy awan ti dakes nga inaramidna.” Idi kuan kinasaona ni Jesus, nga inyararaw: “Laglagipennak inton umayka iti pagariam.”

“Pudno kunak kenka ita nga aldaw,” insungbat ni Jesus, “Makipagiankanto kaniak idiay Paraiso.” Daytoy a kari ti matungpalto inton agturayen ni Jesus kas Ari idiay langit ken pagungarenna daytoy nagbabawi a managdakdakes iti biag ditoy daga sadiay Paraiso a pribilehionto dagiti makalasat ti Armagedon ken dagiti kakaduada a sukayan. Mateo 27:33-44; Marcos 15:22-32; Lucas 23:27, 32-43; Juan 19:17-24.

◆ Apay a madi inumen ni Jesus ti arak a nalaokan ti mirra?

◆ Apay, nalabit, naipaskil ti karatula idiay kayo a nakailansaan ni Jesus, ket ania a kanayonan a panagsinnungbat ti simmaruno ken Pilato ken dagiti papadi?

◆ Ania pay a panangrabngis ti inawat ni Jesus idiay kayo, ket aniat’ mabalin a nangtignay iti dayta?

◆ Kasano a natungpal ti padto iti naaramid kadagiti pagan-anay ni Jesus?

◆ Ania a panagbalbaliw ti inaramid ti maysa kadagiti tulisan, ken kasanonto a tungpalen ni Jesus ti kalikagumna?