Dagiti Saludsod Manipud Kadagiti Managbasa

◼ Apay a ti pannakaipaulog ti 2 Pedro 1:19 idiay New World Translation of the Holy Scriptures naigiddiat manipud kadagiti dadduma a Biblia?

Iti panangipaganetgetna ti pateg ti naipaltiing a sao ti Dios, insurat ni apostol Pedro: “Gapuna naaddaankami ti natibtibker a sao ti padto; ket nasayaat ti aramidenyo no agimdengkay a naimbag iti dayta kas maysa a silaw a manglawag iti maysa a disso a nasipnget, agingga iti agbannawag ket ti baggak lumtuad, kadagiti puspusoyo.”​—2 Pedro 1:19.

Kitaenyo ta ti sasao nga “agingga iti agbannawag ket ti baggak lumtuad” ket naikeddeng babaen kadagiti comma. Kaaduan a patarus ti Biblia saanda nga ar-aramiden daytoy.

Kas pangarigan, impaulog ni Dr. James Moffatt ti maudi a paset ti bersikulo 2Pe 1:19: “. . . manglawag dayta kas silaw iti nasipnget a disso; agingga nga agbannawag ti Aldaw ken ti baggak lumtuad iti puspusoyo.” Dagiti patarus kas iti daytoy ti mangiturong iti maysa a mangmatmat a ti ilulutuad ti baggak mapasamak iti uneg ti puspuso dagiti manamati, kas daydiay panaglak-amda ti maysa a kita ti naespirituan a pannakalawlawag.

Nupay kasta, uray pay idi kaaldawan ni Moises, adda panangipamatmat a ‘ken Jacob rumuarto ti maysa a bituen.’ (Numeros 24:17; idiligyo ti Salmo 89:34-37.) Impabigbig ni Jesus a silalawag ti bagina kas dayta a “kaputotan ni David, ken ti baggak ti agsapa.”​—Apocalipsis 22:16.

Daytoy a panangipabigbig iti “bituen,” wenno “baggak ti agsapa,” maibagay iti konteksto iti salsalaysayen ni apostol Pedro. Kalkalpasna a tinukoy ti sirmata ti panagbalbaliw ti langa a nakitana agarup 30 a tawen a nasapsapa. (Mateo 16:28–17:9) Dayta naraniag a sirmata ti mangitudtudo iti tiempo inton ni Jesus ‘umay iti pagarianna,’ wenno maipadayag iti pannakabalin ti Pagarian. Ti nakita ni Pedro ket nangipaganetget ti pateg ti sao ti Dios; kasta met, dagiti Kristiano itatta kasapulan nga agimdengda iti dayta a sao ti padto.

Nupay ti puspuso ti sangatauan iti kaaduan ket​—ken kaskasdi pay​—nga adda iti kinasipnget, saan koma a kastan kadagiti pudno a Kristiano. Arigna a kasla addaandan ti silaw a manglawag iti daydiay koma nasipnget, ti puspusoda. Ammo ni Pedro a babaen ti panagimdeng iti makalawlawag a naimpadtuan a sao ti Dios, dagiti Kristiano agtalinaedda a siririing ken malawlawagan iti panagbannawag ti baro nga aldaw. Daytanto ti tiempo inton ti “bituen,” wenno ti “naraniag a baggak ti agsapa,” ti aktual nga agturayen iti pannakabalin ti Pagarian.

Makapainteres nga insurat ni E. W. Bullinger maipapan ti 2 Pedro 1:19: “Ditoy, nalawag nga adda koma ti parenthesis, ta daytat’ padto ti silaw nga aglawag, ket ni Kristo ken ti panagparang isuda ti Bituen ti aldaw ken Bannawag ti aldaw. Pudno unay, ti kaiyuloganna ket saan a mabalin a mabagbagaantayo a mangipangag iti sao ti padto agingga a maipalgak ni Kristo iti puspusotayo! Saan; no di ket ipangagtayo iti puspusotayo daytoy sao ti padto, agingga ti kaitungpalan umay iti panagparang ni Kristo​—a ti ilulutuadna a maaw-awagan ‘ti Baggak ti Agsapa.’”​—Figures of Speech Used in the Bible, 1898.

Gapu itoy, sumagmamano a patarus ti Biblia us-usarenda dagiti parentheses idiay 2 Pedro 1:19.a Tagtaginayonen ti New World Translation of the Holy Scriptures ti kangrunaan nga urnos ti presentasion a masarakan iti orihinal a Griego. Ngem us-usarenna dagiti comma a mangbalanse ti sao nga “agingga iti agbannawag ket ti baggak lumtuad” manipud iti pammagbaga nga agimdeng iti sao ‘kas iti maysa a silaw a manglawag iti maysa a disso a nasipnget, kadagiti puspusoyo.’

[Footnote]