Report Dagiti Manangiwaragawag ti Pagarian
“Dagiti Karnero Denggenda ti Timekna”
◻ KUNA ni Jesus: “Dagiti karnero denggenda ti timekna [ti pastor], ket ayabanna dagiti karnerona kadagiti nagnaganda ket iruarna ida.” (Juan 10:3) Sana pay innayon: “Ammok dagiti karnerok ket dagiti karnerok ammodak.” (Juan 10:14) Dagiti kasla karnero denggenda ti timek ni Jesus bayat nga agsasao kadakuada babaen ti Biblia. Kitaenyo no kasano a dua a nasingpet panagpuspusona a tattao idiay Italia sinurotda daytoy a kurso.
Iti Kamaudianan Isut’ Dimngeg
◻ Ni Alberto nagsurat: “Agtawenak ti 16 idi mangrugiak nga agsigarilio ti marihuana ken agtomar ti LSD, ket iti 18 nagtultuloyak ti panagus-usar ti heroin. Tapno makaalaak kadagiti droga, inaramidko amin a mabalin a mapanunot. Nagtakawak, nagilakoak ti droga, nagsuitikak, inlakok amin a sanikuak. Talaga a diak makasardeng. Ti panagbakasion iti ballasiw-taaw, ti nakabaybayag a tiempo iti aw-away, wenno ti pannakiraman iti politika kadua dagiti managlablabes a grupo a determinado a mangparmek ti kinaawan-hustisia—awan kadagitoy a bambanag ti nakatulong. Pinadpadasko ti panagasawa, ngem kalpasan ti apagbiit nagsubliak manen idiay nangrugiak. Uray ti isasangpet ti anak a babai saan a nakapasardeng kaniak manipud panagtomar ti droga. Kinapudnona, kimmaro ketdi dagiti bambanag, ta itatta kasapulak ti ad-adu a kuarta. Kalpasanna pinanawannak ni baketko, ket iti dua a tawen a panagbukbukodko, namnamindua a nakitak ti anakko a babai. Itartarayak a kanayon dagiti aglaklako ti droga a nakautangak ti kuarta, ket adu a daras a nagsagsagabaak manipud iti panagbakbakkuar.
“Kalpasanna nalagipko ti libro nga inted kaniak dagiti Saksi ni Jehova sumagmamano a tawen pay la idi. Kaskasdi a daytat’ adda kaniak ket rinugiak a binasa dayta a kadua ti Biblia. Iti daytoy a pamay-an naam-ammok ti pudno a Dios, nga isu ni Jehova, ket nagkararagak kenkuana maipaay iti tulong. Kabayatan ti agin-inut a panangiyaplikarko kadagiti bambanag a maad-adalko, bumassit met a bumassit ti rigat ti panagbakbakkuarko. Nakasapulak ti trabaho, ket babaen iti tulong ni Jehova napasublik met laeng ti pamiliak. Napanak idiay Kingdom Hall, ket sadiay nabigbigko a ti kinapudno adda kadagiti Saksi ni Jehova. Itan ta nagtiponkam manen, siak ken ni baketko ti nagadal ti Biblia kadua dagiti Saksi ket idi agangay nabautisaran. Itan, anian a ragsak ti panangiranranud ti namnamami kadagiti sabsabali kas regular payunir!”
Nasungbatan ti Kararag ti Napeklan a Babai
◻ Insalaysay ti maysa a babai: “Idi 1958, aktiboak a makiramraman kadagiti ar-aramid iti paroko, nangnangruna iti panagperegrino idiay Santuario ti Madonna ti Nadiosan nga Ayat sadi Roma. Idi agangay nagbalinak a nasinged a gayyem ti kardinal nga isu met ti bikario ti Roma, ken naaddaanak ti adu a pannakipatpatang a pribado kada Papa Paulo VI ken Juan Paulo II. Kalpasan ti 25 tawen a panangor-organisar kadagiti panagperegrino, nakaawatak ti maysa a diploma ti merito. Nupay kasta, idi agangay ti pammati kas napeklan a Katoliko nangrugi a kumapuy. Nakitak ti adu a panagtakaw, panagkusit, nepotismo, ken karkarna a panagilaklako. Nangrugi a makitak ti simbaan iti nadumaduma a panangmatmat ket nabigbigko a ti linteg ti Dios masansan a maipayatpayat. Dagita a bambanag ti nangriribuk kaniak, ket dimmawatak iti Dios a tulongannak gapu ta mapukpukawkon ti pammatik. Masansan a nagsangsangitak.
“Kalpasanna, uppat a tawen ti napalabasen, inyawidannak ti anakko a lalaki ti sumagmamano a kopia a Ti Pagwanawanan ken Agriingkayo! a naalana kadagiti Saksi ni Jehova. Makapainteres unay dagiti magasina nga indawatko kenkuana nga iyalaannak ti ad-adu pay. Di nagbayag kalpasan dayta nasarakak ti Kingdom Hall dagiti Saksi ni Jehova ket nangibatiak ti bassit a nota idiay ruangan a mangikalkalikagum ti maysa nga umay bumisita kaniak. Immay dagiti Saksi uppat nga aldaw kalpasanna. Rinugiak ti panagadal ti Biblia ket rimmang-ayak agingga iti punto ti bautismo. Itan makasiguroak a nasarakakon ti kanayon a birbirokek—ti kinapudno!”
Dagitoy a tattao nangngegda ti timek ti Naimbag a Pastor, ni Jesu-Kristo, ket ‘ti kinapudno ti nangluk-at kadakuada.’—Juan 8:32.
[Picture Credit Line iti panid 14]
Garo Nalbandian