Ti Biag ken Ministerio ni Jesus

Dagiti Kanayonan a Panagparang ni Jesus

MALADLADINGITAN pay laeng dagiti adalan ni Jesus. Dida maawatan ti kaipapanan ti awan naggianna a tanem, dida met patien ti impadamag dagiti babbai. Gapuna iti Domingo kalpasanna, ni Cleofas ken ti sabali pay nga adalan pinanawanda ti Jerusalem a mapan idiay Emmaus, a ti kaadayuna ket agarup sangapulo ket maysa a kilometro.

Iti dalanda, bayat a pagsarsaritaanda dagiti pasamak ti aldaw, nakikuyog kadakuada ti maysa nga estranghero. “Ania a sarsarita dagitoy a sasawenyo iti maysa ken maysa iti pampannagnayo?” inimtuodna.

Dagiti adalan nagsardengda, masmasnaayan dagiti rupada, ket simmungbat ni Cleofas: “Siksika laeng ti sangsangaili sadi Jerusalem, a dika ammo dagiti banag a naaramid sadiay kadagitoy nga aldaw?”

“Ania a bambanag?” sinaludsodna.

“Dagiti bambanag maipapan ken Jesus a Nazareno,” simmungbatda. “Dagiti papadi ken dagiti agturaytayo inyawatda tapno maipato a matay ken ti panangilansada kenkuana. Ngem ur-urayenmi idi nga isu koma ti manubbot iti Israel.”

Ni Cleofas ken ti kaduana inlawlawagda dagiti nakaskasdaaw a pasamak ti aldaw​—ti damag maipapan ti supernatural a buya dagiti anghel ken ti awan naggianna a tanem​—ngem kalpasana impudnoda a mariribukanda maipapan ti kaipapanan dagitoy a bambanag. Insungbat ti estranghero: “O nakuneng a tattao ken naladaw ti panagpuspusoyo a mamati kadagiti isuamin a sinao dagiti mammadto! Saan aya a masapul idi a ni Kristo lak-amenna dagitoy a banag ken sumrek iti gloriana?” Inlawlawagna ngarud kadakuada dagiti sasao manipud sagrado a teksto a mainaig ken Kristo.

Kamaudiananna dimtengda iti asideg ti Emmaus, ket ti estranghero impakitana a kasla mapan iti ad-adayo. Gaput’ tarigagayda a makangngeg ti ad-adu pay, dagiti adalan impakaasida: “Agbatika kadakami, ta rumabiin ket nalabes ti orasen.” Ket nagbati para iti pannangan. Bayat a nagkararag ken pinisina ti tinapay ket intedna kadakuada, nabigbigda nga isu a talaga ni Jesus iti nagmaterial a natauan a bagi. Ngem kalpasanna nagpukaw.

Ita maawatandan no kasano a ti estranghero nakaad-adut’ ammona! “Saan aya a rumayrayray ti pusota iti unegta,” inimtuodda, “itay madama nga agsasao iti dalan, ken itay ilawlawagna kadata dagiti Sursurat?” Awan panagtaktak, bimmangonda ket nagdardarasda a nagsubli idiay Jerusalem, a nakasarakanda kadagiti apostol ken dagidiay nakipaggian kadakuada. Sakbay a ni Cleofas ken ti kaduana makapagsaoda, dagiti dadduma siraragsak nga impadamagda: “Pudno a nagungar ti Apo ket nagparang ken Simon!” Kalpasanna dagiti dua sinaritada no kasano a nagparang met ni Jesus kadakuada. Daytoy pagbalinenna a mamimpat kabayatan ti aldaw nga isu nagparang iti nadumaduma kadagiti adalanna.

Nupay napunitan dagiti ridaw gaput’ buteng dagiti adalan kadagiti Judio, bigla a nangaramid ni Jesus ti maikalima a panagparang. Nagtakder iti mismo a nagtengngaanda ket kinunana: “Talna kadakayo.” Nakigtotda, ket impapanda a nakakitada ti maysa nga espiritu. Gapuna, inlawlawagna nga isut’ saan a maysa nga al-alia, kuna ni Jesus: “Apay-apay agkigtotkayo, ket apay-apay rumasok dagiti panagduadua iti pusoyo? Kitaenyo dagiti ima ken sakak, ta siak met laeng; arikapendak ket kitaenyo, ta ti espiritu awan ti lasag ken tulangna, a kas makitayo nga adda kaniak.” Kaskasdi, adda panagkedkedda a mamati agsipud ta kasla narigat a patien ti panagbalinna a sibibiag.

Tapno matulonganda a makaawat nga isu a talaga ni Jesus, inimtuodna: “Adda kadakay ditoy ti aniaman a makan?” Kalpasan panangawatna ti maysa nga iwa ti ikan a natuno ket nangan, inrugina nga insuro ida, a kunkunana: “Dagitoy dagiti sao nga insaok kadakayo idi addaak pay laeng kadakayo [sakbay ipapatayko], a masapul a matungpal dagiti isuamin a banag a naisurat maipapan kaniak iti Linteg ni Moises ken kadagiti mammadto ken kadagiti Salmo.”

Bayat nga itultuloyna ti kasla katupag ti maysa a panangyadal ti Biblia kadakuada, insuro ni Jesus: “Kasta ti adda a naisurat ken masapul a ti Kristo agsagaba ken agungar kadagiti natay iti maikatlo nga aldaw, ket gapu iti naganna ti panagbabawi maipaay ti pannakapakawan dagiti basbasol maikaskasabanto iti isuamin a nasion​—mangrugi idiay Jerusalem, dakayo ti makasaksi kadagitoy a banag.”

Gaput’ sumagmamano a rason awan ni Tomas iti daytoy napateg a taripnong iti rabii ti Domingo. Gapuna kadagiti aldaw a simmaruno, dagiti dadduma siraragsak nga imbagada kenkuana: “Nakitami ti Apo!”

“No diak makita kadagiti im-imana ti gapuanan ti lansa,” insungbat ni Tomas, “ken iserrekko toy ramayko iti naggapuan dagiti lansa ken iserrekkonto ti imak iti bakrangna, diakto mamati.”

Bueno, walo nga aldaw kalpasanna nagtataripnong manen dagiti adalan iti uneg. Adda met kadakuada ni Tomas. Nupay sipupunit dagiti ruangan, naminsan pay a nagtakder ni Jesus iti nagtengngaanda ket kinunana: “Talna koma kadakayo.” Kalpasanna, timmaliaw ken Tomas, ket inyawisna: “Igaw-atmo ta ramaymo ditoy, ket kitaem dagiti im-imak, ket iyegmo ditoy ta imam ket iserrekmo iti bakrangko, ket saanka a di mamati no di ket mamatika.”

“Apok ken Diosko!” inyebkas ni Tomas iti panagsiddaawna.

“Gapu ta nakitanak namatika?” inimtuod ni Jesus. “Naragsak dagiti saan a nakakita ket namatida.” Lucas 24:11, 13-48; Juan 20:19-29.

◆ Aniada a panagsaludsod ti inaramid ti estranghero kadagiti dua nga adalan iti dalan nga agturong idiay Emmaus?

◆ Aniat’ kinuna ti estranghero a namagrayray iti puspuso dagiti adalan?

◆ Kasano a naawatan dagiti adalan a ti estranghero isu ni Jesus?

◆ Idi nagsubli ni Cleofas ken ti kaduana idiay Jerusalem, ania a makaparagsak a damag ti nangngeganda?

◆ Ania a maikalima a panagparang ti inaramid ni Jesus kadagiti adalanna, ket aniat’ napasamak kabayatan dayta?

◆ Aniat’ napasamak walo nga aldaw kalpasan ti maikalima a panagparang ni Jesus, ket kasano a namati ni Tomas iti kamaudianan a sibibiag ni Jesus?