Denggen ni Jehova Dagiti Pakpakaasitay ti Tulong

TI TULONG kasapulan unay. Daytat’ nalawag manipud naliday a rupa ti agay-aywan ti kopa ti ari. Napagsaludsodan no ania ti problema, ti agay-aywan ti kopa inyebkasna ti ladingitna iti langalang a kasasaad ti Jerusalem ken dagiti bakudna. Kalpasanna immay ti saludsod: ‘Ania ti dawatem?’ “Iti kasta nagkararagak iti Dios ti langit,” insurat kalpasanna ni Nehemias nga agay-aywan ti kopa ti ari. Daytat’ maysa a napardas, naulimek, pakpakaasi iti tulong ni Jehova. Ket ti resultana? Ay ket, ti Persiano nga ari Artaxerxes dagdagus nga inautorisaranna ni Nehemias a bangonen manen dagiti bakud ti Jerusalem!​—Nehemias 2:1-6.

Wen, denggen ti Dios dagiti pakpakaasi dagidiay agayat kenkuana. (Salmo 65:2) Gapuna no dagiti pakasuotan kasla dakdakkelda ngem ti kabaelanyo nga ibaklay, mabalin nga agkararagkayo kas ti inaramid ni salmista a David idiay Salmo 70, idi nga isut’ agkasapulan unay ti nadiosan a tulong. Ti superscription iti daytoy a salmo ipakitana a ti panggepna isu ti “panangipalagip.” Agraman babassit a panangbalbaliw, ulitenna ti Salmo 40:13-17. Ngem kasano a ti maika-70 a Salmo Sal 70 tulongannatayo kas ili ni Jehova?

Pakaasi iti Madagdagus a Pannakaispal

Mangrugi ni David iti pakaasi: “Darasem, O Dios, ti mangispal kaniak, darasem ti mangarayat kaniak, O Jehova.” (Salmo 70:1) No adda iti pakarigatan, mabalintay nga ikararag a tulongannatay a madaras ti Dios. Dinatay suoten ti Dios kadagiti dakes a bambanag, ket “ammona nga ispalen dagiti tattao ti nadiosan a debosion manipud pakasuotan.” (2 Pedro 2:9; Santiago 1:13) Ngem ania no ipalubosna nga agtultuloy ti suot, nalabit tapno isurona kadatayo ti maysa a banag? Ngarud agdawattay kenkuana maipaay ti sirib iti pannakibagay iti dayta. No agdawattayo buyogen pammati, ipaayannatayo ti sirib. (Santiago 1:5-8) Ipaayannatay met ti Dios ti kasapulan a pigsa tapno makapagibtur kadagiti pakasuotantayo. Kas pangarigan, isu ‘sumaranayto kadatayo iti idda a nakaidalitan.’​—Salmo 41:1-3; Hebreo 10:36.

Ti natawid a kinamanagbasoltayo, kasta met ti kankanayon a pannakaisarang iti pannulisog ken panagregget ti Diablo a mangdadael ti relasiontayo ken Jehova, dayta koma ti mangtignay kadatayo nga ikararag ti tulong ni Jehova iti tunggal aldaw. (Salmo 51:1-5; Roma 5:12; 12:12) Mabigbig met isu dagiti sasao iti modelo a kararag ni Jesus: “Dinakam iyeg iti pannakasulisog, ngem ispalennakami manipud managdakdakes.” (Mateo 6:13) Wen, mabalintay a dawaten iti Dios a dinatay palubosan a matnag no masulisogtayo a sumukir kenkuana ken lappedanna ni Satanas, “ti managdakdakes,” nga abakennatayo. Ngem inayontayo kadagiti pakpakaasitayo iti pannakaispal dagiti addang a mangliklik kadagiti kasasaad a mangiyawat kadatayo iti pannulisog ken silo ni Satanas.​—2 Corinto 2:11.

Dagidiay Agkunkuna, “Aha!”

Mabalin a sisasakit a masuottayo gapu ta uy-uyawendatayo dagiti kabusortayo iti pammati nga al-alagadentayo. No mapasamak dayta kadakayo, mennamennaenyo dagiti sasao ni David: “Mababainan ken mariribukda kadi dagiti mangbirbiruk itoy kararuak. Mapagsublida kadi ken maibabainda dagiti maayatan iti pakaranggasak. Mapatallikudda kadi gapu iti pannakabainda dagiti agkuna: ‘Aha, aha!’” (Salmo 70:2, 3) Dagiti kabusor ni David kayatda a makita nga isut’ natay; ‘birbirukenda ti kararuana,’ wenno biagna. Imbes a padpadasenna ti bumales, nupay kasta, inalagadna ti pammati a ti Dios ibabainnanto ida. Inkararag ni David a dagiti kabusorna “mababainan ken mariribukda” koma​—maibabain, mababalaw, mariribuk, mapaay iti panangitungpalda kadagiti dakes a panagemda. Wen, bay-an a dagidiay mangsapsapul iti pagdaksanna ken maayatan iti pannakaranggasna mariribukda koma ken mapasaranda ti pannakaibabain.

No addaantayo ti maawagan malisioso a rag-o no umapay ti ranggas iti kabusor, manungsungbattayo iti Dios gapu ti basoltayo. (Proverbio 17:5; 24:17, 18) Nupay kasta, no dagiti kabusor laisenda ti Dios ken ti ilina, maikararagtayo a maigapu ti nasantuan a naganna, ni Jehova ‘pagsublienna ida ket pagsagabaenna ida ti pannakaibabain’ iti imatang dagiti tattao a kadakuada sapsapulenda ti dayag. (Salmo 106:8) Kukua ti Dios ti pammales, ket kabaelanna a paayen ken ibabain dagiti kabusorna ken dagiti kabusortayo. (Deuteronomio 32:35) Kas pangarigan, ti pangulo ti Nazi a ni Adolf Hitler sinapulna ti pannakaikisap dagiti Saksi ni Jehova idiay Alemania. Anian a pannakapaayna, ta adu a ribo kadakuada ti mangikaskasaba itan ti mensahe ti Pagaraian sadiay!

Iti pananguy-uyaw, maikuna dagiti kabusortayo: “Aha, aha!” Yantangay lalaisenda ti Dios ken ti ilina, bay-an a dagidiay a managbasol “mapatallikudda koma gapu iti pannakabainda,” a sagabaenda ti pannakaibabain. Bayat nga ikarkararag daytoy, taginayonentayo ti kinatarnawtayo ken paragsakentay ti puso ni Jehova, tapno masungbatanna ni Satanas ken ti asinoman a mangumsi Kenkuana. (Proverbio 27:11) Ket ditay koma pulos kabuteng dagiti nakuspag a kabusortayo, ta “ti agtalek ken Jehova masalaknibanto.” (Proverbio 29:25) Ni nakuspag nga ari ti Babilonia a ni Nabucodonosor, a nangkautibo ti ili ti Dios, sinagabana ti bain ket inadmitirna a ‘ti Ari dagiti langlangit kabaelanna nga ipababa dagiti magmagna iti kinatangsit.’​—Daniel 4:37.

“Mapadayag Koma ti Dios!”

Nupay riribukennatay dagiti kabusor, ipadayagtay a kanayon ni Jehova a kadua dagiti pada a managdaydayaw. Imbes a pinalubosanna ti bagina nga alun-unen ti rigat a mapaay a mangpadayag iti Dios, kinuna ni David: “Dagiti agbiruk kenka agrag-o ken maragsakanda koma kenka, ket kunaenda koma a kanayon: ‘Mapadayag koma ti Dios!’​—dagidiay agayat ti panangisalakanmo.” (Salmo 70:4) Itultuloy ti ili ni Jehova ti agragrag-o agsipud ta “agrag-o ken maragsakanda” kenkuana. Kas dagiti dedikado, bautisado a Saksina, addaanda ti dakkel a rag-o nga imbunga ti nasinged a pannakirelasion kenkuana. (Salmo 25:14) Kaskasdi, mamatmatanda kas napakumbaba nga agsapsapul iti Dios. Kas manamati nga agtungtungpal kadagiti bilin ti Dios, itultuloyda a sapulen ti ad-adu pay a pannakaammo kenkuana ken ti Saona.​—Eclesiastes 3:11; 12:13, 14; Isaias 54:13.

Bayat nga iwaragawag dagiti Saksi ni Jehova ti naimbag a damag, kankanayon a maikunada: “Mapadayag koma ti Dios!” Ipadayagda ni Jehova, nga ipaayda ti kangatuan a panagraem. Sirarag-o, tulonganda dagiti agsapsapul ti kinapudno a mangadal maipapan ti Dios ken tapno ipadayagda met. Maisupadi kadagiti nailubongan a managayat ti ragragsak, dagiti tattao ni Jehova ‘ayatenda ti panangisalakanna.’ (2 Timoteo 3:1-5) Sipapanunot iti tawidda ti kinamanagbasol, nauneg panagyamanda kadagiti naayat a probision ni Jehova a Dios iti pannakaisalakan nga agturong ti agnanayon a biag, a nagbalin a posible babaen ti daton a subbot ti ay-ayatenna nga Anakna, ni Jesu-Kristo. (Juan 3:16; Roma 5:8; 1 Juan 2:1, 2) Ipadpadayagyo kadi ti Dios ken ipakpakitayo nga ‘ayatenyo ti panangisalakanna’ babaen panangalagad ti pudno a panagdayaw maipaay pakaidayawanna?​—Juan 4:23, 24.

Agtalek iti Manangispal

Idi inyebkas ni David ti bagina iti daytoy a salmo, nariknana ti kasta unay a panagkasapulan a kinunana: “Ngem napanglawak ken nanumo. O Dios, darasem ti umay kaniak. Sika ti badangko ken ti Manangispal kaniak. O Jehova, dika kadi agtantan.” (Salmo 70:5) Marigrigatan gapu kadagiti pakasuotan a mangliklikmut kadagiti manamati​—dagiti pammarigat kas ti panangidadanes, pannulisog, ken panangdangran ni Satanas​—kasla “napanglawtayo.” Nupay saantay a mabaybay-an, kasla awan gawgawaytayo maibusor kadagiti awan prinsipiona a kabusortayo. Nupay kasta, makapagtalektayo nga ispalennatayto ni Jehova kas matalek nga ad-adipenna.​—Salmo 9:17-20.

Ni Jehova “ti Manangispal” no kasapulantay dayta. Dagiti bukodtayo a pagkurangan mabalin nga inyegnatayo iti makasuot a kasasaad. Ngem no ‘ti kinamaagtayo karakarenna ti dalantayo,’ ditay palubosan ti pusotayo nga ‘agtanabutob a maikaniwas ken Jehova.’ (Proverbio 19:3) Isut’ di mapabasol, ken isut’ sisasagana a mangtulong kadatayo no agkararagtay kenkuana buyogen pammati. (Salmo 37:5) Ania no makidangdangadangtayo a mangliklik ti basol? Ngarud espesipikotay koma maipapan iti daytoy iti kararag, a dumawat ti nadiosan a tulong tapno maitultuloy a sapulen ti nalinteg a kurso. (Mateo 5:6; Roma 7:21-25) Sungbatan ti Dios ti naimpusuan a kararagtayo, ket rumang-aytayto iti naespirituan no agpasakoptayo iti panangidalan ti nasantuan nga espirituna.​—Salmo 51:17; Efeso 4:30.

No adda iti pannakidangadang iti suot ti pammati, mabalin a mariknatayo a ditayon makapagibtur iti napapaut pay. Yantangay nakapuy ti managbasol a lasagtayo, kalikagumanna ti napartak a pannakaispal. (Marcos 14:38) Gapuna maipakaasitayo: “O Jehova, dika kadi agtantan.” Nangnangruna no maseknantayo iti pannakaumsi ti nagan ti Dios, matignaytayo nga agkararag kas inaramid ni mammadto a Daniel: “O Jehova, denggem. O Jehova, pakawanem. O Jehova, ipangagmo ken aramidem. Dika agtaktak, gapu kenka met laeng, O Diosko, ta . . . dagiti tattaom managananda iti naganmo.” (Daniel 9:19) Maaddaantay ti pammati a ti nailangitan nga Amatayo dinto agtaktak, ta ni apostol Pablo impasigurona: “Umadanitayo . . . a sitatalged iti trono ti parabur, tapno awatentayo ti asi ken makasaraktayo ti parabur a tumulong iti umiso a tiempo.”​—Hebreo 4:16.

Diyo liplipatan a ni Jehova ket Manangispal. Kas dagiti ad-adipenna, pagimbagantayo no laglagipentayo daytoy ken ti nainkararagan a rikrikna ti Salmo 70. Kasapulantayo a kankanayon ti agkararag maipapan ti banag a pakaseknan unay. (1 Tesalonica 5:17) Mabalin a kasla awanen ti solusion iti partikular a problema, nga awan pakalapsutan iti kinarigat. Ngem ti naayat a nailangitan nga Amatayo papigsaennatayto ken dina ipalubos a masuottayo iti ditay kabaelan. Gapuna, dikay koma mabannog nga umadani iti trono ti Ari ti Agnanayon iti naimpusuan a panagkararag. (1 Corinto 10:13; Filipos 4:6, 7, 13; Apocalipsis 15:3) Agkararag buyogen pammati, agtalek kenkuana nga awan panagduadua, ta denggen ni Jehova dagiti pakpakaasitayo iti tulong.