Report Dagiti Manangiwaragawag ti Pagarian
Kababalin a Mangarkos ti Nakristianuan a Ministeriotayo
NI APOSTOL Pedro binalakadanna dagiti Kristiano: “Taginayonenyo ti kababalinyo a naimbag iti tengnga dagiti nasnasion.” (1 Pedro 2:12) Ipakpakita ni apostol Pablo a babaen ti naimbag a kababalintayo, “arkosantayo ti sursuro ti Manangisalakantayo, ti Dios, iti isuamin a bambanag.” (Tito 2:10) Dagiti Saksi ni Jehova iti intero a lubong addaanda ti pakasarsaritaan iti naimbag a kababalin. Imutektekanyo ti sumagmamano a pangarigan.
Ti Impresion ti Manursuro iti Naimbag a Kababalin
◻ Ti sanga nga opisina ti Watch Tower Society idiay Costa Rica ipadamagna a dakkel a bilang dagiti agtutubo iti dayta a pagilian ti nangipasdek ti nasayaat nga ulidan. Maysa a kabsat a lalaki ibagana kadatayo no ania ti nangiturong kenkuana iti kinapudno. Isalaysayna: “Ti banag a kangrunaan a nangatrakar kaniak isut’ nagsayaat a kababalin agpadpada dagiti agtutubo ken natataengan ngem nangnangruna kadagiti agtutubo. Bayat panagtrabahok kas maysa a manursuro, naaddaanak ti gundaway a mangpaliiw a nasinged kadagiti Saksi idiay eskuelaak. Ket yantangay nagdagusak iti maysa a pamilia dagiti Saksi ni Jehova, napaliiwko met ti kababalin dagiti ubbing sadiay.
“Awan ti maaramidak ngem ti mangpaliiw ti pagdumaan iti nagbaetan dagiti estudiante a Saksi ken dagiti dadduma pay nga estudiante idiay eskuelaak. Dagiti Saksi kankanayon a natulnog ken nasingpetda, dida nagul-ulbod, ken kankanayon nga aramidenda dagiti asaynmenda. Napaliiwko met a napudnoda no agek-eksamenda, nupay dagiti dadduma nga estudiante kadawyan nga agkusitda. Mainayon pay, naemmada unay ken managraemda kaniak kas manursuroda. Napagsiddaaw babaen kadagiti agtutubo a Saksi idiay eskuelaan ken iti pagtaengan a nagdagusak, rinugiak a sinukimat daytoy a relihion ket idi agangay inawatkon ti kinapudno.”
Naimbag a Resulta Manipud Nakristianuan a Kababalin iti Kumbension
◻ Maysa kadagiti Saksi ni Jehova iti kongregasion idiay makinlaud a paset ti El Salvador tinarigagayanna nga iranud ti naimbag a damag ti Pagarian iti dua a kakabsatna iti lasag. Maysa ti dimngeg ket rinugianna ti agadal ti Biblia a kadua dagiti Saksi ni Jehova. Ti sabali a kabsat a lalaki ket kameng ti Ebanghelikal a simbaan a naawagan Prinsipe ti Kappia, ket kinunana iti kabsatna: “Dika makisasao kaniak; pagserserbiam dagiti intereses ti Diablo.”
Idi dimteng ti tiempo maipaay ti distrito a kumbension, daydiay agad-adal inawisna ti kabsatna a sumurot kenkuana idiay kumbension. Ti kabsat kinunana: “Ala wen, sumurotak; umayak tapno kitaek no sadino ti pangtiliwak kadagiti Saksi.” Ket dagiti dua nga agkabsat tinabunuanda ti kumbension. Ti dakkel a bilang dagiti timmabuno ken ti nasayaat nga urnos idiay kumbension ti namagsiddaaw iti Ebanghelikal, a nangikuna a di pay nakakitkita ti kasta sakbayna. Idi nakaawiden, kinunana iti kabsatna: “Iyawatmo ta imam kaniak.” “Aniat’ kayat a sawen amin daytoy?” inimtuod ti kabsatna. “Basta iyawatmo ta imam kaniak,” insungbatna. Naginnalamanoda, ket ti kabsat a kameng ti Ebanghelikal a simbaan kinunana: “Manipud itan agadalakon a kadua dagiti Saksi ni Jehova. Talaga, diak naammuan no ania ti pakaikapkapisak.” Itan maysa metten nga aktibo ken naregta a manangiwaragawag ti naimbag a damag ti Pagarian ti Dios.