Agaluad Kadagiti Ulbod a Mammadto!
MAYSA a pagassawaan a taga Brazil ti nagiddan iti rabii idi nangngegda a simrek dagiti agtatakaw iti balayda. Nakapaglibas ti napakigtotan nga agassawa baeten iti tawa ti silidda ket inawaganda dagiti polis. Ngem kalpasanna napakigtotan unay ti babai gapu dayta a kapadasan nga isut’ di makaturog idiay balayda ket masapul a mapan idiay balay ni nanangna.
Asinoman a nastrek ti balayna wenno natakawan iti aniaman a pamay-an mabigbigna ti pannakadidigra. Ti kasta a kapadasan ket mabalin a makakigtot, ket makapaladingit, umad-adu nga umad-adu a tao ti agsagsagaba iti kastoy a pamay-an. Adda, nupay kasta, maysa a porma ti panagtakaw nga addaan adayo a nakarkaro a pagbanaganna.
Ania daytoy a nakarkaro a porma ti panagtakaw, ken siasino dagiti agtatakaw? Nangted kadatayo ni Jesu-Kristo iti nawadwad nga impormasion maipapan itoy idi, iti panagsaona maipapan iti kaaldawantayo, kunana: “Adunto dagiti tumaud nga ulbod a mammadto ket iyaw-awandanto dagiti adu.” (Mateo 24:11) Dagiti ulbod a mammadto ket mannanakawda. Iti ania a pamay-an? Ania ti taktakawenda? Ti panagtakawda ket naigalot iti panagipadtoda. Gapuna tapno maawatan a naan-anay dayta, kasapulantayo pay nga umuna nga ammuen no ania ti panagipadto sigun iti Biblia.
No Ania ti Kaipapanan ti Panagipadto
No panunotenyo ti panagipadto, nalabit ti umuna a sumrek iti panunotyo ket isu ti panangipadles iti masanguanan. Daytoy ket pudno a maysa nga aspeto ti trabaho dagiti mammadto ti Dios idi ugma, ngem daytat’ saan nga isu ti kangrunaan a trabahoda. Kas pangarigan, idi nga iti maysa a sirmata naibaga ken mammadto Ezequiel nga “agipadto iti angin,” kasapulanna laeng ti mangiruar iti maysa a bilin manipud iti Dios. (Ezequiel 37:9, 10) Idi a ni Jesus ket maus-usig iti sango dagiti papadi, isut’ natuptupraan ken nasipsipat, ken sirarabak a kinuna dagiti manangidadanesna: “Agipadtoka kadakami, sika a Kristo. Siasino daydiay nangkabil kenka?” Dida kidkiddawen ken Jesus nga ipadlesna ti masanguanan. Isut’ karkaritenda a mangilasin babaen pannakabalin ti Dios no asino dagidiay nangkabil kenkuana.—Mateo 26:67, 68.
Kinapudnona, ti kangrunaan a pannakaawat nga inawit dagiti sasao ti orihinal a pagsasao ti Biblia a naipatarus nga “agipadto” wenno “padto” ket kangrunaanna tapno ipakaammo ti kapanunotan ti Dios iti maysa a banag wenno, kas kuna ti libro dagiti Aramid, tapno ibaga “dagiti nakaskasdaaw a bambanag ti Dios.” (Aramid 2:11) Iti daytoy nga anag nga adu a tao ti taktakawan dagiti ulbod a mammadto.
Siasino, nupay kasta, dagiti ulbod a mammadto, ken ania ti taktakawenda? Tapno masungbatan daytoy a saludsod, tumaliawtayo iti historia ti nasion ti Israel idi panawen ni Jeremias.