Report Dagiti Manangiwaragawag ti Pagarian
Naimbag a Damag Manipud Makindaya nga Europa
ADU a makapagagar a bambanag ti mapaspasamak idiay teokratiko a tay-ak idiay Makindaya nga Europa. Ti naidumduma isu ti internasional a kumbension idiay Zagreb, idi Agosto 16-18, idi a 7,300 a Saksi ti nangted naragsak a panangabrasa kadagiti kakabsatda manipud 15 a nasion. Amin-amin, 14,684 ti timmabuno. Daytat’ maysa a nakaskasdaaw a panangipakita ti ayat ken panagkaykaysa iti maysa a pagilian a ginunggon ti kinariribuk!
Dagiti Saksi idiay Makindaya nga Europa ket naagawada iti panangibaga kadagiti sabsabali iti naimbag a damag ti Pagarian ni Jehova, a mabigbigda nga isu laeng ti kakaisuna a namnama agpaay iti napaypayso a talna. Kadagiti dadduma a paset maysa a karit para kadakuada ti mangtaginayon iti neutral a takderda. Nupay kasta, dagiti tattao masansan nga agimdengda, ket dagiti Saksi ipadamagda ti adu a nasayaat a kapadasan.
Iti maysa nga ili maysa a 16 ti tawenna a babai ti nakangngeg iti naimbag a damag manipud babai nga agmaymaysa a Saksi ni Jehova iti dayta nga ili. Nairugi ti maysa a regular a panagadal ti Biblia, ket dimmakkel ti panangapresiarna iti kinapudno. Gapu ta addaan dakkel a tarigagay a mangibaga kadagiti sabsabali kadagiti nakaskasdaaw a bambanag a naadalna, pinadasna ti makisarita kadagiti kaeskuelana ngem isut’ naipasango iti panangbusor ken panangublag. Maysa a kaeskuelana ti nangnangruna a nangbusor kenkuana ngem isut’ nasdaaw ken nagrayuanna ti kinaanusna, ta ti agtutubo nga estudiante ti Biblia di nagpungtot agpapan pay amin dagiti pananginsulto. Idi agangay, naipaay ti ad-adda pay a panangsaksi iti daytoy a babai, ket nabigbigna a di umiso ti kababalinna. Maysa a panagadal ti Biblia ti nairugi kenkuana, ket kalpasanna ti immuna a maiyad-adalan ti Biblia ken ti kabbaro a kaduana ti nangpadas a mangiranud iti kinaragsakda kadagiti sabsabali, agpapan pay ibubusor manipud kadagiti nagannakda, mannursuroda, ken dagiti kaeskuelada.
Kas maysa a resulta ti panangasabada, sabali pay a kaeskuelada ti nangawat iti kinapudno. Ita tallodan idiay klaseda, ket isuda a tallo ket naimbag nga ulidan ti kinatulok a tumulong kadagiti sabsabali ken iti panangipakita iti ayat iti nagbabaetanda. Kalpasanna sabali pay a babai ti dimmanggay kadakuada.
Ita uppatdan idiay pagtutugawan iti paraangan ti eskuelaan a sadiay pagsasaritaanda a sangsangkamaysa ti Biblia. Ket iti pannakakellaat ti adu, immadu ti bilangda. Sabali pay a babai manipud iti klaseda, a napabara maipapan iti nasayaat a konduktada, ti nangikeddeng a makidanggay kadakuada iti panagadal ti Biblia. Aminda a lima nagtultuloyda a nangawis kadagiti sabsabali pay, estudiante ken mannursuro, a mangaramid met ti kasta. Nupay kasta, nagtultuloy a nakapasar dagiti agtutubo a babbai iti panangparigat manipud kadagiti nagannakda. Nagreggetan unay dagiti nagannakda a piliten dagitoy nga agtutubo a babbai a sumardeng iti panagadalda ti Biblia babaen panangdadaelda kadagiti literaturada ken babaen di-umiso a panangtratoda kadakuada.
Aniat’ resulta daytoy a panangasaba a nangrugi babaen maymaysa nga interesado nga agtutubo? Maysa kadagitoy a babbai ti nabautisaran idiay distrito a kumbension idi 1990, ket dagiti sabsabali nga uppat idiay maysa a sirkito nga asamblea idi primavera ti 1991. Daytoy ket pakaigapuan ti dakkel a rag-o! Ita, amin dagiti lima a babbai ti agserserbin kas regular payunir! Idiay ili a nakapasamakan daytoy, adda itan 11 nga agibumbunannag, 8 kadakuada ti adda iti payunir a serbisio.
Sarsaranayen ken bembendisionan ni Jehova dagiti Saksina idiay Makindaya nga Europa. Nalawag nga adda dakkel a panginanamaan ti iyaadu kadagiti nasingpet-panagpuspusona a tattao iti daytoy a paset ti lubong.