“Agsublikayo Kaniak, ket Agsubliakto Kadakayo”

TAGTAGIRAGSAKEN ti pamilia ti makaliwliwa a panagpasiar iti kabakiran. Madamdama pay, ni Peter, ti inaudi, ket immikay, a simmalog iti turod a nangkamkamat iti maysa a squirrel. Pagamuan la a pimmuskol ti ulep iti langit, ket intudonan. Arbis laeng idi damo, ngem nagin-inut nga imbayakabaknan. Sidadaras a binagkat ti pamilia dagiti awitda ket nagtarayda a napan iti luganda. Madanagan ti tunggal maysa no sadino ti yan ni Peter.

Kabayatanna, agsublin ni Peter iti pamiliana. Narigatna a makita ti papananna, ken nagalis ti desdes a sumang-at iti turod gapu iti tudo. Isut’ kellaat a natnag iti nauneg, nalemmeng nga abut. Pinadasna ti sumagpat ngem nakagalgalis dagiti bakrang ti abut.

Nagkaruskos ti danum ti tudo iti turod ket makarkargaan ti abut iti pitak. Malmes la ketdi ni Peter. Ngem isut’ nabirukan ni tatangna ket inaonna babaen ti tali. Kamaudiananna, nakarot’ pannakadusa ni Peter gaput’ iyaadayona. Ngem idi isut’ inarakup ni nanangna iti ules, ti dusa ket nalaka la nga awaten.

Daytoy a kapadasan nasayaat panangiladawanna iti mapasamak kadagiti dadduma a sigud a paset ti ili ti Dios. Natnagda iti nauneg nga abut daytoy sistema dagiti banag ket ikagkagumaanda ti sumagpat ken agsubli iti taklin ti organisasion ni Jehova. Anian a makaay-ayo a maammuan a ni Jehova ket manangaasi ken sidadaan a ‘mangipuruak iti tali’ ken tulonganna ida a makasubli iti kinatalged!

Dagiti Naasi a Pannakilangen ni Jehova

Kadagiti kaaldawan ti Israel, idi nairingpasen ti templo, nangidatag ni Salomon iti kararag ti panagdaton a nagpakpakaasi ken Jehova nga ipangagna dagiti araraw maipaay iti templo. Sana kinuna: “No isuda [dagiti Israelitas] agbasolda iti maikaniwas kenka (ta awan tao a di makabasol), ket sika agluksawka kadakuada ket iyawatmo ida iti kabusor, . . . nupay kasta no isuda met laeng panunotenda idiay daga a pakaipananda a kinayawan, ket agsublida ket umararawda kenka idiay daga dagiti nangayaw kadakuada, . . . sika denggem ngarud ti kararagda ken ti ararawda sadi langit a pagnaedam, ket saranayem ti kalinteganda.”​—1 Ar-ari 8:46-49.

Natungpal ti kiddaw ni Salomon iti adu a gundaway bayat ti historia ti Israel. Namin-adu nga immikay ken timmallikud ti ili ti Dios kenkuana. Ket nabigbigda ti biddutda ken nagsublida, nga isut’ sinapsapulda. Ket pinakawan ida ni Jehova. (Deuteronomio 4:31; Isaias 44:21, 22; 2 Corinto 1:3; Santiago 5:11) Babaen ken Malakias, ginupgop ni Jehova ti sangaribo a tawen a pannakilangenna iti ilina idi kunana: “Nanipud kadagiti al-aldaw dagiti ammayo simminakayo kadagiti bilbilinko ket dikayo sinalimetmetan ida. Agsublikayo kaniak, ket agsubliakto kadakayo.”​—Malakias 3:7.

Dagiti Pakaitibkolan

Kas kadagiti Israelitas, adu a tattao ti Dios itatta ti umikay ken isinada ti bagbagida iti organisasion ni Jehova. Apay? Dagiti dadduma kamakamenda ti maysa a banag a kasla awan dakesna iti damo, kas ken Peter a nangkamkamat iti squirrel. Napasamak daytoy ken Ada. Ipadamagna: “Ugalimi nga agkakatrabahuan ti agkakadua a mangaldaw iti asideg a panganan. Isu nga idi inawisdak nga agkape iti malem, nagmayatak. Inkalintegak a saanko nga us-usaren ti tiempo a maipaay koma kadagiti gimong wenno panangasaba. Diak pinanunot a mabalin a panaglabsing daytoy iti prinsipio idiay 1 Corinto 15:33.

“Di nagbayag, nakikuykuyogak kadakuada a mapan agsakay iti kabalio kada Sabado. Sa simmursurotak kadakuada nga agbuya ti sine ken iti teatro. Nagtungpal dayta iti panagliwayko kadagiti dadduma a gimong. Kamaudiananna, diakon makigimgimong ken makiramraman iti trabaho a panangasaba. Idi nabigbigko ti mapaspasamak, saanakon a makitimtimpuyog iti organisasion.”

Kadagiti dadduma a kaso nalabit gapu iti maysa a serioso a nailemmeng a basol a mamagbalin iti maysa a tao a makarikna a di maikari nga agserbi iti Dios. (Salmo 32:3-5) Wenno mabalin a maitibkol ti maysa nga indibidual iti imbaga wenno inaramid dagiti padana a Kristiano, a dina maawatan, kas kuna ni Salomon, nga “awan tao a di makabasol.”​—1 Ar-ari 8:46; Santiago 3:2.

Kasta pay met dagiti dadduma maupayda no umawatdat’ disiplina. (Hebreo 12:7, 11) Ti panggargari ti materialistiko nga estilo ti panagbiag inturongna ti adu nga agsardeng nga agserbi iti Dios. Masansan nga iti pananggaw-atda iti nailubongan a balligi, maigamerda a naan-anay iti sekular a trabaho nga awanen ti lugar iti biagda ti serbisio ti Dios. (Mateo 13:4-9; 1 Timoteo 6:9, 10) Awan kadin namnama ti kasta a kasasaadda?

Ipangagyo Kadi ti Awis ni Jehova?

Naminsan adda imbaga ni Jesus a narigat a tarusan, ket daddumat’ naitibkol. Kunaen ti rekord: “Adu kadagiti adalanna nagsanudda ket saanda a nakikuyogen kenkuana.” Ngem saan nga amin ti naitibkol. Ituloy ti salaysay ti Biblia: “Kinuna ni Jesus kadagiti sangapulo ket dua: ‘Dakayo pumanawkayo met aya?’ Ket simmungbat kenkuana ni Simon Pedro: ‘Apo, asinonto ti papananmi? Sika addaanka kadagiti sao ti biag nga agnanayon.’” (Juan 6:66-68) Natimud a nalaing dagiti apostol ni Jesus a napeggad no panawanda ni Jesus.

Dagiti dadduma a pimmanaw inton agangay makagtengda iti umasping a konklusion. Mabigbigda a ti panangpanaw iti organisasion ti Dios ket maysa a napeggad nga addang ket da Jehova ken Kristo laeng ti pakasarakanda kadagiti sao a mangiturong iti biag. Iti kanito a maamirisda dayta, rumbeng a bigbigenda met a saan pay a naladaw unay tapno utobenda manen, dumawat ti pammakawan ken Jehova, ken agsubli kenkuana. Ni Jehova a mismo ti nangted iti awis nga: “Agsublikayo kaniak, ket agsubliakto kadakayo.”​—Malakias 3:7.

Ay ket, sadino ti pakasarakan ti maysa a napasnek a Kristiano iti kinaragsak no di iti panagserbi ken Jehova? No umikay ti maysa a tao kalpasan a nagbalin a paset ti organisasion ti Dios iti sumagmamano a tiempo, aniat’ agur-uray kenkuana iti lubong iti ruar? Mabigbignanto a dagus nga isut’ paseten ti lubong a rumanggas la a rumanggas. Makiramramanton iti maysa a sistema dagiti banag a napno iti kinamanaginsisingpet, panagulbod, panangallilaw, ken imoralidad, maysa a lubong a napeggad ken di makaay-ayo kas ti abut ti pitak a namagpeggad iti biag ni ubing a Peter. No agnakem ken maamirisna a ti agnanayon a biagna ket agpeggad, rumbeng a sumapul a dagus iti tulong tapno maalaw iti dayta a kasasaad. Kaskasdi, nalabit saan a nalaka ti panagsubli.

Maysakayo aya a nangpadas nga agsubli ken Jehova ngem narigatankayo? Ngarud bigbigenyo a kasapulanyo ti tulong. Ket patienyo koma a dagiti kakabsatyo a lallaki ken babbai iti organisasion ti Dios ket situtulokda a tumulong. Ngem masapul a pagreggetanyo nga ipakita ken Jehova ti tarigagayyo. Panawenen nga ‘agnakemkayo’ ken ‘pudpudno nga agsubli ken Jehova.’​—1 Ar-ari 8:47.

Natulongan nga Agsubli

Ilawlawag ni Ada no aniat’ timmulong kenkuana a nagsubli ken Jehova: “Iti apag-isu a kanito, inawisnak ti kabsat a babai a nangyadal kaniak a tumabuno iti maysa nga asamblea sirkito. Isut’ nakalalailo! Dinak pulos binabalaw! Pinakitaannak iti aglaplapusanan nga ayat. Makatawenen a diak nakigimong, ngem inut-utobko ti kinakawaw ti lubong ken ti kinapudno nga, iti likudan ti pammarang a pintas, adda laeng ti ladingit, pannakaupay, ken imoralidad. Gapuna inkeddengko ti makiasamblea. Idi simmangpetak iti teatro a nakaangayanna, napanak iti maudi a linia dagiti tugawan ken naglemmengak iti nasipnget a suli. Diak kayat a makitadak dagiti kakabsat ken saludsodandak.

“Nupay kasta, impaay ti programa ti balakad a kinasapulak unay. Idi nalpasen, determinadoak saan laeng nga agsubli iti ili ni Jehova no di ket agserbi pay kenkuana iti amin a pusok. Sibabara nga inabrasadak dagiti kakabsat ket nagsubli ti ‘bayanggudaw.’” (Lucas 15:11-24) Napasamak amin daytoy sumagmamano a tiempo ti napalabasen, ket adda itan ni Ada iti amin-tiempo a serbisio iti nasuroken a 25 a tawen.

Naragsak met ti nagbanagan ti kaso ti sabali pay nga indibidual a nayaw-awan. Ni José ket impaayan dagiti dadduma a panglakayen iti balakad nga ad-adda a nangiyanninaw iti bukodda a kapanunotan ngem kadagiti prinsipio ti Biblia. Gapu ta naupay ken nagpasugnod, naginaktibo ni José idi agangay. Isut’ naisina iti ili ti Dios iti las-ud ti walo a tawen, ket bayat dayta a tiempo nakiasawa iti di manamati ken nagbalin nga ama dagiti ubbing, a maysa kadakuadat’ pinalubosanna a mabuniagan iti Iglesia Katolika.

Kamaudiananna, isut’ natulongan idi nangaramid ti manangaywan ti sirkito iti panangipastor nga isasarungkar kenkuana ket pinaregtana dagiti panglakayen nga aramidenda met dayta. Isut’ naisubli ket naragsakan a nakakita iti asawana a naginteres iti kinapudno. Agserserbi itan ni José kas maysa a panglakayen iti kongregasion. Kas ipakita dagitoy dua a kapadasan, saan nga ipaidam ni Jehova dagiti bendision kadagidiay agipangag iti naayat nga awisna nga agsublida.

Nupay kasta, tapno tagiragsaken ti kakasta a bendision, ti maysa rumbeng nga apresiarenna nga umuna ti naitukon a tulong ken ipangagna dayta. Kadagiti kaaduan a kongregasion malagip dagiti kakabsat dagidiay inaktibo ket masansan a bisitaenda ida, nga ikagumaanda a tulongan ida. Ti panangipangag iti kasta a tulong ipakitana ti panangapresiar iti kinamanangaasi ni Jehova.​—Santiago 5:19, 20.

Kinapudnona, itan ti panawen nga ipangag ti awis ni Jehova nga: “Agsublikayo kaniak.” (Malakias 3:7; Isaias 1:18) Saankayon nga agtaktak pay. Nakaparpartak ti pannagna dagiti pasamak iti lubong. Ti kasayaatan a lugar a papanan bayat dagiti nadawel a tiempo a mapasungad ket iti uneg ti organisasion ni Jehova, natalged iti sidong ti pannalaknibna. Dagidiay laeng agkamang kenkuana ti addaan natibker a namnama a maitalimeng manipud pungtotna iti dakkel nga aldaw ti pungtotna.​—Sofonias 2:2, 3.

[Ladawan iti panid 30]

Ipangagyo kadi ti awis ni Jehova nga, “Agsublikayo kaniak”?