Panangiranud ti Pannakaawat Idiay Namibia
ITI mano a pagsasao ti nakangngeganyon iti balikas a ‘‘Diak ammo’’? “Hi nokuzuva,” kinuna ti maysa a babai a Herero, a sikakawes iti kadawyan a nagayad a bado ken natirad-sukogna nga abbong iti ulo. “Nghi udite ko,” siiisem nga insungbat ti maysa a balasitang a Kwanyama. “Kandi uvite ko,” simmungbat ti maysa a pumurok ti Ndonga. “Kapi na kuzuvha,” kinuna ti maysa a Kwangali nga agtartaraken iti kalding.
Amin dagitoy ti nagkuna iti ‘‘Diak ammo.’’ Anian a nagsayaat ti panangiladawan daytoy iti nakaipasanguan dagiti Saksi ni Jehova idiay Namibia a makapaupay a parikut iti pagsasao idi pinadasda a dinanon ti 1,370,000 nga agtataeng iti daytoy naglawaan a teritoria nga agarup 824,000 kilometro kuadrado!
Ket di pagsiddaawan! Saan laeng a dagiti Herero ken Nama a tattao ti Namibia no di ket dagiti pay Ovambo, Kavango, Tswana, Caprivian, Himba, Bushman, ken Damara ti addaan iti bukodda a pagsasao. Maisupadi iti dayta, nakabalan dagiti Saksi ni Jehova iti literatura ti Biblia iti Ingles ken Afrikaans laeng. Nalawag, tapno maipaawat ti kinapudno iti ad-adu a tattao, nasken ti trabaho a panangipatarus. Nangrugi daytoy iti nanumo a pamay-an adu a tawen ti napalabasen idiay Windhoek, ti kabisera a siudad ti maawagan idi a South-West Africa.
“Idiay Windhoek, adda idi nainget nga ibubusor manipud iti simbaan ken polisia iti trabahotayo a panangsaksi,” malagip ni Dick Waldron. Kaduana ti asawana a ni Coralie, isut’ immay iti daytoy a pagilian idi 1953 kas nagraduar iti Watchtower Bible School of Gilead. “Dikam napalubosan kadagiti pagtataengan dagiti nangisit, ket no maminsan mariribukkami no makitadakami a makisasao kadagiti nangisit a tattao. Idi agangay, nakasarakkam iti lugar a dikam masingsinga—ti nagmaga a Gammans River! Ruar daytoy ti ili. Nailinged manipud pannakapaliiw iti sirok dagiti kayo ti acacia, nangikonduktakami kadagiti panagadal ti Biblia sadiay.”
Ditoy met ti immuna a nakaipatarusan dagiti publikasion ti Watch Tower kadagiti lokal a pagsasao. Nairaman ti sumagmamano a tract iti Kwanyama ken ti bokleta a “This Good News of the Kingdom” iti Nama. Malagip ni Kabsat Waldron ti maysa a nakakatkatawa a kapadasan a mainaig itoy a bokleta, a naipatarus iti tulong ti maysa nga interesado. Awan ti maitutop a balikas iti Nama iti balikas a, “Ni Adan ket perpekto a tao idi.” Isu a kinuna ti interesado: “Basta isuratmo a naiyasping ni Adan iti naluom a peach. Maawatanton dagiti tattao iti Nama nga isut’ perpekto.” Daytoy ngarud, ti rugrugi ti panangiranud iti pannakaawat kadagiti Kasuratan iti adu a katutubo iti Namibia.—Idiligyo ti Daniel 11:33.
Panangragpat ti Maysa a Balligi
Naragpat ti balligi idi rugrugi ti 1970’s idi a naipatarus ti libro a Ti Kinapudno a Mangiturong iti Biag nga Awan Inggana iti Ndonga ken Kwanyama. Dagitoy ti kangrunaan a pagsasao dagiti umili ti Namibia idiay Ovamboland, agarup 700 a kilometro iti amianan ti Windhoek. Naipasdek ti maysa a pagtaengan dagiti payunir idiay Ondangwa, maysa a settlement ti Ovamboland. Tapno matulongan dagiti interesado a magunggonaan iti linawas a panagsasarita a naibatay iti Ti Pagwanawanan, natudingan dagiti espesyal payunir a mangipatarus iti sumario dagiti Ingles a maadal nga artikulo iti pagsasao a Ndonga ken Kwanyama.
Ti “opisina” iti trabaho a panangipatarus ket maysa a nadibisionan a suli ti maysa a garahe a sadiay dagiti kopia dagiti naipatarus a material ti Pagwanawanan ti maduplikado babaen ti maysa a daan a duplicating machine. Narigat ti panangipamaysa iti daytoy nasken a trabaho gapu kadagiti kadaanan a kasasaaad ken ti temperatura iti kalgaw nga agpromedio iti nagbaetan ti 38°-44° C. Nupay kasta, ditoy ti nakaipatarusan dagiti kabaruanan a broshur ken ti libro a Mabalinyo ti Agbiag nga Agnanayon iti Paraiso a Daga.
Bayat a nabuangay dagiti kongregasion idiay Ovamboland ken iti dadduma pay iti Namibia, ti sungbat isu’t pannakasapul iti daddadakkel ken nasaysayaat a lugar a pagtataripnongan. Mainayon pay, matarigagayan ti nasensentro a lugar tapno maipaay ti atension kadagiti kasapulan dagiti dadduma pay a paset ti pagilian. Kabayatanna, saanen a nakaro ti panagilem maibusor iti trabaho a panangasaba iti Pagarian. Isu a nagun-odan ti pammalubos iti pannakaibangon ti maysa a patakder iti maysa a dakkel a lote nga indonar ti maysa a Saksi ni Jehova idiay Windhoek. Idi agangayen, nasurok a 40 a boluntario a trabahador ti naawat idiay lugar a pagibangonan, ket idi Disiembre 1990, nairingpasen dagiti opisina a pakaaramidan ti panangipatarus.
Ita, kadagiti komportable nga opisina ken kukuarto iti daytoy a kabaruanan a patakder, rumangrang-ay ti trabaho a panangiranud ti pannakaawat iti adu. Agtultuloy ti pannakaipatarus ti kabaruanan a literatura iti Herero ken Kwangali. No iti Ndonga ken Kwanyama a pagsasao, aggiddan nga agparang itan iti maysa a de-kolor a binulan nga edision ti Ti Pagwanawanan. Daytat’ naglaon kadagiti amin a maadal nga artikulo ken dagiti dadduma pay a material. Pudno a naigiddiat unay daytoy iti daydi nanumo a nangrugian idiay maysa a nagmaga a karayan adu a tawen itan ti napalabas.
Manmanon a mangngegan ita ti “Diak ammo.” Imbes ketdi, nasurok nga 600 a Saksi ni Jehova idiay Namibia ti siyayaman unay iti nailangitan nga Amada, ket maikunada itan: “Ti pannakaipanayag dagiti saom mangted lawag, mangted iti pannakaawat kadagiti nakuneng.”—Salmo 119:130.
[Dagiti ladawan iti panid 25]
Pangiwaragawag ti naimbag a damag kadagiti Herero a tattao
Panangipatarus kadagiti Nakristianuan a publikasion a pakagunggonaan dagiti umili iti Namibia
Dagiti pagipatarusan nga opisina idiay Namibia