Dagiti Misionero iti Micronesia
NUPAY pinagaaddayo ida dagiti puro a naiwaras iti kasla awan ungtona a Baybay Pacifico, mabalinan pay laeng dagiti misionero iti Micronesia ti agtataripnong kada tawen maipaay ti “panagtitipon ti pamilia.” Sadino ngay ti paguummongan dagitoy nga ebanghelisador a naggapu kadagiti adayo a puro? Maikanatad la unay, iti lugar nga inawagan ti lokal a gobierno kas Jehova Street—ti direksion ti sanga nga opisina iti Guam a mangimatmaton iti trabahoda.
Idi Hunio 1992, nagdadanon dagiti 56 a misionero iti sanga tapno tumabuno iti “Dagiti Managawit iti Lawag” a Kumbension Distrito. Katkatawa ken naragsak a panagpapatang ti nangpunno iti aglawlaw kabayatan ti panagiinniliw ken pannakiam-ammoda kadagiti kabbaro a gagayyem. Kas iti dati, inurnosda dagiti bagbagida iti agdan ti Kingdom Hall para iti grupo a panagparetrato sada simmango iti tallo nga atiddog a panganan a nangsagrap iti padaya a tinawen a maang-angay para kadagiti misionero, nga iti dayta a tawen tinampokan ti isasarungkar ni Albert Schroeder, maysa a kameng ti Bagi a Manarawidwid.
Daytoy tinawen a panagtitipon idiay Guam ti kakaisuna a gundaway dagiti adu a misionero tapno panawanda dagiti tropikal a pagtaenganda. Nagbabassit dagitoy. Ti puro ti Ebeye, maysa kadagiti Marshall Islands, ket buklen laeng ti 32 nga ektaria. Ti pagtaengan dagiti misionero iti puro ti Majuro idiay Marshall ken iti Kiribati idiay Gilbert Islands ket agpadpada a masarakan kadagiti atiddog, akikid nga atolls (nabato a puro) a 0.8 kilometro laeng ti kalawana. Gapuna ginundawayan dagiti misionero ti panagbiaheda idiay Guam.
Nupay makaallukoy ti panangasaba iti daytoy naiputputong a tropikal a puro, iti kinapudnona maysa a karit daytoy a mammano ti makasaranget. Makapainteres, 7 laeng kadagiti 56 a misionero ti naggapu iti Watchtower Bible School of Gilead. Kaaduanna ti naggapu iti Hawaii wenno iti Filipinas a no sadino dagitoy a payunir a ministro nairuamdan iti panagbiag iti napudot a lugar, ket dagus a napanda kadagiti teritoriada manipud iti pagilianda.
Gapu ta asideg iti equator ti puro ti Micronesia, ibturan dagitoy a misionero ti makasinit a pudot ken kinasalimuot tapno maidanon ti naimbag a damag kadagiti agnaed. Mabalin a dakdakkel pay a karit ti komunikasion. Addaan ti tunggal puro wenno grupo dagiti puro iti bukod a pagsasao—saan a pagaammo dagiti dadduma ken saan a masarakan uray iti diksionario—ket kadagiti agdadamo mabalin nga abutenna ti adu a tawen sakbay a makapagsaoda a nalaing. Tapno matulongan dagiti tattao kadagitoy a puro a makaadal ti Biblia, mangimalmaldit ti sanga ti Guam kadagiti literatura iti 11 a pagsasao, 9 kadagitoy ti talaga a pagsasao iti Micronesia.
Dadduma a puro ket talaga a naiputputong a madanon laeng babaen ti barangay. Masarakan iti kasta a puro ti pagtaengan dagiti misionero iti Chuuk (Truk), ket dagiti misionero sadiay agpampannurayda iti solar panel tapno maaddaanda iti elektrisidad iti sumagmamano laeng nga oras iti kada aldaw.
Addan 14 a pagtaengan dagiti misionero iti intero a Micronesia, a kas kalawa ti Estados Unidos. Kadagiti nasurok a 400,000 a tattao nga agnanaed iti daytoy a rehion, 1,000 ti agibumbunannag ti naimbag a damag, a naorganisar iti 20 a kongregasion ken 3 a naiputputong a grupo.
Nupay mannakigayyem unay dagiti tattao iti Micronesia, adu met dagiti di umawat iti kinapudno ti Pagarian ti Dios gapu kadagiti lokal a narelihiusuan a kaugalian ken panangsusuot dagiti kameng ti pamilia. Isu a nupay nakarangrang-ay ti trabaho a panangasaba (nasurok a 2,000 a panagadal iti Biblia ti idadauluan dagiti 1,000 nga agibumbunannag ti Pagarian), dadduma a kongregasion ken grupo ket nagtalinaed a bassit. Kas pangarigan, adda laeng 5 nga agibumbunannag iti puro ti Tinian, 7 laeng iti puro ti Nauru, ken awan pay 40 ti agibumbunannag iti kongregasion iti Yap, Kosrae, ken Rota. Nupay kasta, nagtalinaed dagiti dadduma a misionero kadagiti teritoriada iti nasurok a 20 a tawenen. Di kumurang a 12 a tawenen nga agserserbi dagiti amin nga 6 a misionero iti puro ti Belau.
Dakkel ti gunggona dagidiay agan-anus. Inaldaw nga adda gundawayda tapno pagsiddaawan dagiti napintas a gapuanan ni Jehova. Naiwaraswaras dagiti nabaknang a puro ti Micronesia a kas babassit a berde a gameng iti asul a Pacifico. Dagiti nalawa a kadaratan ken dagiti nakorales a baybay a napno kadagiti makaay-ayo ti marisda nga ikan awisenda dagiti managbatok ken dagiti managrayo ti scuba a mangpadas kadagiti kasayaatan a pagbatokan iti lubong. Tunggal agngudo ti aldaw, nagngayed ketdin ti buya ti lumlumnek nga init iti taaw.
Nupay kasta, ti kadakkelan a gunggona isu ti pribilehio nga agserbi ken Jehova babaen ti panangikasaba kadagiti dadduma maipapan iti nakaskasdaaw a panggepna iti masanguanan. Gapu ta itultuloy dagiti misionero iti Micronesia a gun-oden dayta a gunggona, tungtungpalenda dagiti sasao iti Isaias 42:12: “Mangtedda koma ti dayaw ken Jehova, ken ipablaakda ti dayawna kadagiti purpuro.”
[Mapa/Ladawan iti panid 31]
(Para iti aktual a pannakaurnosna, kitaem ti publikasion)
Barrigada, Guam
Santa Rita, Guam
Koror, Belau
Chuuk (Truk) Islands
Tarawa, Kiribati
Kosrae
Ebeye
Marshall Islands
Majuro
Kolonia, Pohnpei
Songsong, Rota
Saipan
Yap
MICRONESIA
MELANESIA
CAROLINE ISLANDS
PACIFIC OCEAN
PHILIPPINES
NEW GUINEA
EQUATOR
[Ladawan]
Nagtataripnong dagiti misionero idiay Guam, idi Hunio 1992