“Idi Kasakbayan Dagiti Bambantay”
“SIKA ti nagtataenganmi iti amin a kaputotan. Idi kasakbayan ti pannakapataud dagiti bambantay wenno idi pay la pinaltuadmo ti daga ken ti lubong, manipud kinaagnanayon agingga iti kinaagnanayon, sika ti Dios.” (Salmo 90:1, 2, New International Version) Naiturong dagitoy a sasao iti Namarsuatayo, ket anian a makaliwliwa dagitoy—nangnangruna ita, ta kasla awan mataginayon a banag!
Iti dumakdakes a kasasaad ti ekonomia, bassit laeng ti makapagtalek iti masanguanan. Ti nakaam-amak nga iyaadu ti krimen ken panangabuso ti droga pinagbalinna dagiti dadduma a siudad a paggugubatan. Uray ti kapautan nga institusion, ti pamilia, ket agir-irayen. Madamdamagtayo dagiti karkarna nga aramid kas dagiti homoseksual a pamilia. Umad-adu ti bilang dagiti pamilia nga addaan agsolsolo a naganak, a masansan a mangibakbaklay kadagiti dadakkel a problema. Nawarawara dagiti adu a pamilia gapu kadagiti makarimon nga ar-aramid a kas ti panangkabil ti asawa ken panangabuso kadagiti annak.
Sino ti mangidalan kadatayo kadagitoy narikut a panawen? Agpayso, nawadwad dagiti pammagbaga nga ipapaay dagiti sikologo, edukador, ken dadduma pay, ngem kaaduan kadagitoy ket agsusupadida. Iti intero a kaputotan iti Laud, ni Dr. Benjamin Spock ti kangrunaan a mammagbaga iti panangisuro kadagiti annak. Idi agangay inaminna a nagkamali ti balakadna!
Anian a nainsiriban ti kaadda ti Dios a kas ‘pagtaengantayo’! Iti daytoy nariribuk a panawen, isut’ bato a di maisin, nga adda “manipud kinaagnanayon agingga iti kinaagnanayon.” Kinunana maipapan iti bagina babaen ken mammadto Malakias: “Siak ni Jehova; diak agbaliw.” (Malakias 3:6) Naan-anay a mapangnamnamaan dagiti pagalagadan ti Dios a nailanad idiay Biblia. Isut’ addan “idi kasakbayan dagiti bambantay,” ket ti pammagbagana, a mabasa iti Nasantuan a Kasuratan, naibasar iti agnanayon a kinasiribna. Daytat’ apag-isu a kasapulantayo iti kinaragsak ken balligi.
Nainsiriban ngarud, nga agtalektayo iti Sao ti Dios, ti Biblia. Adalenyo daytoy tapno magunggonaankayo manipud sirib ti Dios. Agtalekkayo iti maadalyo, ket pagbalinenyo dayta a silaw a mangiwanwan kadakayo iti dana ti biag. (Salmo 119:105) Dagidiay laeng mangar-aramid iti kasta ti makapagtalek iti masanguanan ken addaan pudpudno a talna ti panunot.