Nagunggonaan iti “Balangat ti Biag”
ITI anghel iti kongregasion sadi Smirna, naibilin ken apostol Juan nga isuratna daytoy: “Agtalinaedka a matalek uray agingga ken patay, ket itdekto kenka ti balangat ti biag.” (Apocalipsis 2:8, 10) Gapuna, agpadpada a makapaladingit ken makaparagsak ti pakaammo ditoy a ni Frederick William Franz, presidente ti Watch Tower Bible and Tract Society of Pennsylvania ken ti Watchtower Bible and Tract Society of New York, Inc., kasta met ti sumagmamano a dadduma pay a teokratiko a bagi, naturposnan ti naindagaan a kursona idi agsapa ti Disiembre 22, 1992.
Makapaladingit nga anunsio daytoy agsipud ta ipakpakaammona ti panagpatingga dagiti aramid ti ingungoten unay ken naisalsalumina a matalek nga adipen ni Jehova ditoy daga. Ngem, makaparagsak met nga anunsio daytoy gapu ta agaplikar itan ken ni patpatgentayo a Kabsat Franz dagiti sao ti Apocalipsis 14:13: “Naragsak dagidiay natay a naikaykaysa a matay iti Apo mangrugi ita. Wen, kuna ti espiritu, tapno aginanada koma kadagiti bannogda, ta dagiti banag nga inaramidna kumuykuyogda kadakuada.” Ni Kabsat Franz ket nanumo ken napakumbaba, nagaget ken nabunga unay a ministro a sibibileg nga inusar ni Jehova a Dios kas kameng “ti matalek ken naannad nga adipen” a tumulong iti panangipaay ti naespirituan a taraon iti “sangakabbalayan” ken kadagiti kakaduada.—Mateo 24:45-47.
Nayanak ni Kabsat Franz idi Setiembre 12, 1893, idiay Covington, Kentucky. Nangngeganna ti kinapudno babaen ken manongna. Iti daydi a tiempo, agbasbasa idiay University of Cincinnati, nga agsagsagana nga agbalin a ministro a Presbiteriano. Ngem, naglusulos iti Iglesia Presbiteriana ket nakitimpuyog kadagiti Estudiante ti Biblia, kas pangawag kadagiti Saksi ni Jehova idi. Nabautisaran idi Nobiembre 30, 1913, ket iti sumuno a tawen pinanawanna ti unibersidad ket nagbalin a colporteur (payunir). Idi Hunio 1, 1920, nagbalin a kameng ti pamilia ti Bethel idiay Brooklyn. Di nagbayag, natudingan kas manangaywan iti colporteur desk, ket idi 1926 naiyalis iti editorial department, a sigagaget a nagserbianna. Idi 1945 nagbalin a bise presidente ti Watch Tower Society ken iti dadduma pay a mainaig a bagi. Iti ipapatay ti presidente idi a ni Nathan H. Knorr idi 1977, isu ti nagbalin a presidente ti Watch Tower Society. Nagserbi iti dayta a saad agingga iti ipapatayna. Iti unos ti panagbiagna, nakita ni Kabsat Franz ti yaadu ti bilang dagiti Saksi ni Jehova manipud sumagmamano a ribo agingga iti agarup uppat ket kagudua a milion. Adu a pribilehio ti serbisio ti tinagiragsakna, kas ti panagpalawag kadagiti internasional a kumbension ken panagbisita kadagiti sanga ken pagtaengan dagiti misionero iti adu a paset ti lubong. Agparang ti pakasaritaan ti biagna iti Mayo 1, 1987, a ruar Ti Pagwanawanan.
Iti rabii ti Lunes, Disiembre 28, 1992, naangay ti serbisio ti panglaglagip iti Kingdom Hall ti Bethel idiay Brooklyn. Maysa a nabara unay ken makapabileg a palawag ti impaay ni Kabsat Albert D. Schroeder a kameng ti Bagi a Manarawidwid. Naipangngeg dayta babaen ti telepono kadagiti pamilia ti Bethel idiay Watchtower Farms, Patterson, Mountain Farm, ken Kingdom Farm, agraman iti pamilia ti Bethel iti sanga ti Canada.
Adu la ketdi ti maikawa, aglalo dagidiay nasinged a nakipagtrabaho kenkuana, iti kaawan ni Kabsat Franz. Mannakaawat, makaparegta, ken naanus iti tunggal maysa a kaduana a nagserbi ken nagdaliasat. Pudno unay, impangag dagiti kapammatianna ti Hebreo 13:7: “Laglagipenyo dagidiay mangidadaulo kadakayo, isuda a nangipakaammo kadakayo ti sao ti Dios, ket tuladenyo ti pammatida, a pampanunotenyo no ania ti nagtungpalan ti panagbiagda.”
Idi Disiembre 30, 1992, napili ni Kabsat Milton G. Henschel kas ti maikalima a presidente ti Sosiedad, a kasukat ni Kabsat Franz.
[Dagiti ladawan iti panid 31, 32]
Ni Frederick W. Franz idi 1913
Iti Myrtle Avenue idi 1920 iti paktoria ti Sosiedad
Kaduana ni Nathan H. Knorr idiay Yankee Stadium idi 1953