Ti Panangisalakan ni Jehova Ita
KASTOY ti kuna ti Biblia kadatayo maipapan ken ni Jehova: “Adu dagiti siksikor ti nasingpet, ngem ni Jehova ispalenna kadakuada amin” ken, “Ammo ni Jehova nga isalakan dagiti tattao nga addaan nadiosan a debosion manipud iti pakasuotan.”—Salmo 34:19; 2 Pedro 2:9.
Kasano a tulongan ni Jehova ti ilina no mapagtengda ti rigat? Saan a babaen ti milagro a panangsumra kadagiti natural a puersa wenno babaen ti datdatlag nga aramid, a kas ipagarup dagiti adu a tattao, no di ket babaen ti sabali a bileg a di naan-anay a maawatan ti kaaduan a tattao—ti ayat. Wen, ay-ayaten ni Jehova ti ilina, ken pinatanorna kadakuada ti ayat iti maysa ken maysa a kasta unay ti pigsana a kabaelanna nga aramiden maipaay kadakuada ti arigna milagro.—1 Juan 4:10-12, 21.
Mabalin nga irupir ti dadduma nga iti tiempo ti panagkasapulan, ti masapul ket taraon, agas, ken alikamen—saan nga ayat. Siempre, napateg ti taraon, agas, ken alikamen. Nupay kasta, kastoy ti kuna ni apostol Pablo: “Ket no kupikopak ti amin a pammati a mabalinko koma a garawen dagiti bambantay, ngem awan ti ayatko, awan met pategko. Ket no iwarasko koma dagiti isuamin a kukuak tapno maipakan kadagiti napanglaw, ket no iyawatko koma toy bagik, tapno makapagpannakkelak, ngem awan ti ayatko, awan koma ti magunggonak.”—1 Corinto 13:2, 3.
Masansan a makabasatayo ti maipapan kadagiti pangsaranay a taraon ken kasapulan a maperperdi kadagiti pier wenno kankanen dagiti utot bayat a dagiti tattao nga agkasapulan ket matmatayda gapu iti sakit ken bisin. Wenno nakarkaro pay, dagitoy a pangsaranay nga abasto agtinnag kadagiti ima dagiti naagum wenno kadagiti di mapagpiaran a tattao a mangusar kadagita nga agpaay iti bukodda a pagimbagan. Iti kasta, maysa a banag ti kaadda dagiti kasapulan, ngem sabali a banag ti panangsigurado a dagiti agrigrigat ti magunggonaan. Ditoy a kasapulan ti napudpudno nga ayat ken pannakaseknan.
Ti Ayat nga Agtigtignay
Idi Setiembre 1992, dinadael ni Bagyo nga Iniki ti isla ti Kauai idiay Hawaii, a 55,000 ti populasionna. Iti dayta a bagyo a 210 kilometro kada ora ti kapegges ken 260 kilometro kada ora ti kapigsa ti anginna, 2 a tao ti natay ken 98 ti nadunor, 75 porsiento kadagiti balbalay ti nadadael, 8,000 a tattao ti naawanan iti pagtaengan, ken napattapatta nga agpateg iti $1 billion dagiti nadadael a sanikua. Kadagiti agnanaed iti daytoy bassit nga isla, agarup 800 dagiti Saksi ni Jehova a naikameng iti innem a kongregasion. Kumustada ngay?
Sakbay a dimteng ni Iniki, dagiti panglakayen ti kongregasion, babaen ti panangiwanwan ti manangaywan ti sirkito, pinakaammuandan dagiti amin a kameng ti kongregasion nga ikagumaanda ti mapan kadagiti natalingengen ken natalged a lugar, a saganaan ti nadawel a bagyo. Ti kasta a naayat pannakataripato ti gapu ti pannakailisi dagiti Saksi iti nakaro a pannakadangran wenno ipapatay.—Idiligyo ti Isaias 32:1, 2.
Nupay napasardeng ti komunikasion ken transportasion, tallo a pannakabagi ti Watch Tower Bible and Tract Society iti sanga nga opisina ti Honolulu ti karaman kadagiti immuna a simmangpet sadiay kalpasan ti bagyo, gapu ta inikkan ida ti civil defense ti espesial a pammalubos a mapan iti Kauai. Dagus a sinapulda dagiti lokal a Saksi ket, iti sumaruno a bigat, nagmimitingda tapno iplano ti urnos a mangsaranay. Nabuangay ti relief committee tapno maammuan no ania dagiti masapul ken tapno mapasangpet dagiti kasapulan a materiales manipud iti sanga nga opisina idiay Honolulu. Agmalmalem ken agpatpatnag nga inwanwanda ti trabaho a panangibunong iti saranay kadagidiay makasapul ken panangdalus ken panangtarimaan kadagiti balay a nadadael.
Napartak met ti panagtignay dagiti Saksi kadagiti dadduma nga isla a maipaay kadagiti agkasapulan a kakabsatda. Apaman a naglukat ti eropuerto idiay Kauai, adda 70 a Saksi a napan tumulong. Naipatulod babaen ti barko ti abasto a pangsaranay nga agbalor iti $100,000, a pakairamanan dagiti generator, babassit a paglutuan, parol, ken taraon. Nausar ti maysa kadagiti Kingdom Hall iti isla a kas bodega; nupay kasta, nagamak ti dadduma di la ket ta serreken dagiti mannanakaw daytoy. Idi kuan adda trak ti Army a nagsardeng iti pagparadaan ti Kingdom Hall, ket inkalikagum dagiti drayber no mabalinda nga iparada ti trakda sadiay. Ginuardiaan dagiti soldado dagiti trak nga isu met ti nangikkat ti parikut a baka matakaw dagiti abasto a pangsaranay.
Napan imbalaybalay dagiti kakabsat dagiti generator, a pagandarenda iti kada balay iti dua wenno tallo nga oras tapno mausar dagiti tattao dagiti freezer-da. Naibaon dagiti grupo dagiti kakabsat a lallaki kadagiti nadumaduma a balay tapno tumulong nga agdalus ken agtarimaan kadagiti nadadael. Idi tinarimaanda ti balay ti sister a sirurungsot a binusor ni lakayna idi, natukay ti rikna ti lakayna nga awan inaramidna no di agbuya ken agsangit. Maysa a sangsangaili a naggapu iti mainland a nakakita iti sabali a grupo dagiti Saksi nga agtartrabaho ti nasdaaw unay iti kababalin ken urnos ket immasideg ken nagsaludsod kadakuada no apay naidumada unay. Idi inlawlawag ti kabsat a dayta ket gapu iti ayatda iti Dios ken iti padada a Kristiano, kinuna ti lalaki: “Kasanok a maam-ammo ti Dios?” (Mateo 22:37-40) Sana innayon: “Organisadokayo unay a tattao ket nalabit nangibaonkayon ti agur-uray kaniak inton agawidak idiay Florida!”
Adda 295 amin a balbalbay idiay Kauai nga inasikaso a dinalusan ken tinarimaan dagiti Saksi ni Jehova. Kadagitoy, adda 207 a bassit laeng ti perdina, ngem 54 ti nakaro ti pannakadadaelna, ken 19 ti di pulos agbalinen. Ramanen ti trabahoda ti panangsarungkar iti tunggal Saksi iti isla tapno masigurado a mataripatoda amin. Idi naipan ti abasto para iti maysa a sister, napaliiw ti kaarrubana a Budista nga uray maysa la koma a tea bag ket awan naawatna manipud kadagiti kapammatianna. Adda met babai a dinalusan ti grupo dagiti Saksi ti balayna, a nangikuna: “Nabayagen nga um-umaykayo idiay balayko, ket imbilangkayo a naimbag a kaarruba, ngem daytoy nga ebkas ti nainkaarrubaan nga ayat ipakitana kaniak no ania a talaga ti organisasionyo. Agyamanak iti kinagagetyo.”
Malaksid iti panangipaay kadagiti material a kasapulan dagiti padada a Kristiano, maseknan met dagidiay mangimatmaton iti panangtulong iti espiritualidadda. Nakurang a dua nga aldaw kalpasan ti bagyo, adda aggigimongen a kongregasion. Dagus a maang-angay metten dagiti babassit a grupo ti panagadal iti libro. Sangapulo a kualipikado a papanglakayen a naggapu kadagiti sabali nga isla ti immay tumulong kadagiti lokal a panglakayen a mangsarungkar iti tunggal Saksi idiay Kauai. Iti sumuno a Domingo, naangay ti panagadal iti Pagwanawanan kadagiti amin nga innem a kongregasion, sa adda 30 a minuto a palawag maipapan iti saranay nga impaay ti maysa a miembro ti Relief Committee, ken 30 a minuto a pangserra a palawag ti maysa a miembro ti Branch Committee a naggapu pay idiay Honolulu maipaay itoy a panggep. Inreport ti maysa a nakaimatang: “Naliwliwa dagiti amin babaen ti naited a nasayaat a panangiwanwan ken mamatida a nakasaganadan iti naespirituan a mangtaming kadagiti nabati a problemada. Ket idi maserraan ti programa, adu a lulua ti nagarubos kadagiti nagdengngeg, sa adda nabulos a panagpapalakpak.”
Sangalubongan a Panagkakabsat
Ti kasta nga ayat ken pannakaseknan isut’ mangipabigbig kadagiti tattao ni Jehova iti sangalubongan. Idi dinalapos ni Allawig a Val ti Western Samoa agarup maysa a tawen sakbayna, dakkel ti dinadaelna, ngem dagus a napan dagiti Saksi ni Jehova manipud kadagiti sabali a paset ti lubong a nangsaranay kadagiti kakabsatda sadiay. Idi agangay, nangted ti gobierno iti pundo a para kadagiti amin a relihion—agraman dagiti Saksi ni Jehova—a pagtarimaan kadagiti pagtaengan, insubli dagiti Saksi ti pundo a napakuyogan iti surat a mangibagbaga a nalpasen a natarimaan dagiti nadadael kadakuada, ket mabalin nga usarenda laengen ti pundo a pagtarimaan kadagiti sumagmamano a patakder ti gobierno. Naireport iti lokal a diario ti inaramidda. Idi naammuanna daytoy, maysa nga opisial ti gobierno ti nagkuna iti maysa a Saksi nga ibainna ti relihionna agsipud ta inawatda ti kuarta a naggapu iti gobierno uray no amin dagiti patakderda a dinadael ti allawig ket igastuan ti seguro.
Kasta met, idi Setiembre 1992, idi linayus ken dinadael ti Karayan Ouvèze idiay abagatan a daya ti Francia ti Vaison-la-Romaine ken 15 a komunidad iti aglawlaw, dagus a nagtignay dagiti Saksi. Inungaw ti layus ti 40 a biag iti agpatnag, rinakrakna ti 400 a balbalay, dinadaelna dagiti ginasut pay, ken rinibo a pamilia ti naawanan iti danum ken elektrisidad. Nariwet pay laeng iti sumuno a bigat, dagiti Saksi iti lokal a kongregasion ti immuna a simmangpet a mangsaranay kadagiti biktima ti layus. Dagidiay agkasapulan ti pagtaengan ket siaayat a pinadagus dagiti pamilia a Saksi iti rehion. Ginasut dagiti Saksi a naggapu iti asideg ken adayo a nangitukon iti tulong. Nabuangay ti maysa a relief committee iti siudad ti Orange iti di unay adayo a nangurnos iti trabaho ti uppat a grupo dagiti boluntario, a nangikkat kadagiti pitak ken nangdalus kadagiti balbalay, nanglaba kadagiti ginabsuon a pitakpitak a kawes, sa nagsagana ken nagiwaras kadagiti makan ken danum nga inumen kadagiti naapektaran a lugar. Nagbulontarioda pay a nangdalus iti maysa a lokal nga eskuelaan ken sumagmamano a munisipio. Inapresiar dagiti kakabsatda ken dagiti umili ti nasged a panagbannogda.
Kadagiti nadumaduma a luglugar, napasaran dagiti Saksi ni Jehova dagiti kalamidad, a kas kadagiti layus, bagyo, ken ginggined, a kas met kadagiti dadduma. Gapu ta maawatanda a dagitoy ket bunga ti di mapakpakadaan ken di malapdan a pasamak, saanda a pabasulen ti Dios wenno ti siasinoman. (Eclesiastes 9:11) Imbes ketdi, agtalekda a ti managsakripisio nga ayat dagiti kapammatianda isut’ madadaan a tumulong uray kasanot’ kakaro a kasasaad ti umapay kadakuada. Dagita a naayat a tignay isudat’ bunga ti pammati a kupkupikopanda. Inlawlawag ni adalan a Santiago: “No ti maysa a kabsat a lalaki wenno babai adda a lamolamo wenno awan taraonna nga inaldaw, ket ti maysa kadakayo kunaennanto: ‘Inkayo a sitatalna, aginudo ken agbussogkayo,’ ngem dikayto ited kadakauada dagiti masapul a maipaay iti bagi, ania ti magunggonada? Kasta met ti pammati, no awan dagiti aramidna, isu ti pammati a natay.”—Santiago 2:15-17.
Ti Gubuayan ti Pudno a Salaknib
Imbes a mangnamnamada kadagiti milagro nga aramiden ti Dios, mabigbig dagiti Saksi ni Jehova a ti salaknib ket masarakan iti sangalubongan a Nakristianuan a panagkakabsatda. Kinapudnona, ti kabaelan nga aramiden dayta a panagkakabsat iti panawen ti rigat ket maiyarig iti milagro. Malagipda ti sasao ni Jesus a masarakan idiay Mateo 17:20: “No adda koma pammatiyo a kas iti bukel ti mostaza, kunaenyo itoy a bantay, ‘Umaliska manipud ditoy agingga idiay a disso,’ ket umalisto, ket awanto ti di mabalin kadakayo.” Wen, mapukaw dagiti kasla bantay a lapped no ti pudno a Nakristianuan a pammati, a mabuyogan ti ayat, ket agtignay.
Marikna ti ili ni Jehova iti intero a lubong ti mannalaknib nga ima ti Diosda kadagitoy di natalged ken napeggad a panawen. Mariknada ti kas ti narikna ti salmista: “Sitatalnaak nga agpadpada iti panagiddakto ken iti pannaturogko, ta sika, O Jehova, siksika laeng ti mangisaad kaniak iti kinatalged.” (Salmo 4:8) Buyogen ti panagtalek, ipamaysada ti atensionda iti agdama a trabaho: “Daytoy naimbag a damag ti pagarian maikaskasabanto iti amin a mapagnaedan a daga a kas pammaneknek kadagiti amin a nasion; ket iti kasta umayton ti panungpalan.” (Mateo 24:14) Ket buyogen ti natibker a namnama kumitkitada iti pannakatungpal ti kari ni Jehova maipapan iti natalna, nalinteg a baro a lubong, a sadiay didanton mapasaran ti aniaman a didigra, gapuanan man ti tao wenno ti nakaparsuaan.—Mikias 4:4.
[Dagiti ladawan iti panid 12]
Naggapu dagiti Saksi iti asideg ken adayo a tumulong kadagiti biktima ti layus