Ti Parlamento Dagiti Relihion ti Lubong—Agballiginto Aya?
GINASUT a panguluen ti relihion ti nagtataripnong iti maikadua a Parlamento dagiti Relihion ti Lubong a naangay idiay Chicago, Illinois, E.U.A., idi kalgaw ti 1993. Adda nangibagi iti Budismo, Kakristianuan, Hinduismo, Judaismo, ken Islam. Adda met sadiay dagiti managanito ken managdaydayaw kadagiti diosa. Pinagsasaritaanda ti akemda iti panangpasardeng iti gubat. Binigbig ti nangipangulo iti parlamento a “dua a kakatlo dagiti kangrunaan a panagdadangadang iti lubong ita ti nainaig iti relihion.”
Sangagasut a Tawenen ti Napalabas
Naballigi aya ti parlamento? Usigenyo ti napasamak iti umuna a Parlamento dagiti Relihion ti Lubong sangagasut a tawenen ti napalabas. Idiay met laeng Chicago a naangay, idi kalgaw ti 1893, ket nasurok a 40 a relihion ti nairepresentar. Annugoten ti Konsilio ti Parlamento dagiti Relihion ti Lubong a “patien [dagidiay dimmar-ay idi 1893] a dayta ti umuna iti agsasaruno nga internasional a panagtataripnong dagiti nadumaduma a relihion a makatulong iti panagkikinnaawatan, talna ken idudur-as. Ngem saan a kasta ti nagtungpalanna. Nainaig ti kinapanatiko ken kinaranggas gapu iti relihion kadagiti gubat iti napalabas a 100 a tawen, ket agtultuloy a kasta agingga ita.” Apay a napaay? Gapu ta saan a pulos nga anamongan ti Dios ti panaglalaok ti pammati. Kuna ti Biblia: “Dikay agbalin a di agkaasmang a naisangol kadagiti di manamati.”—2 Corinto 6:14-17
Mayanatup la unay, pinagminar ti Setiembre 1893 a ruar ti Zion’s Watch Tower a saan a Nainkasuratan ti Parlamento dagiti Relihion ti Lubong idi sirarabak a kinunana: “Nakakabakab dagiti arkeologo iti adu a nakaskasdaaw a silindro a damili kadagiti reggaay ti Babilonia ken dadduma pay a kadaanan a siudad, ngem adda sumagmamano a saanda pay a nasarakan. . . . Awan nasarakanda a nangdakamat iti panangangay da Moises ken Josue iti ‘Parlamento dagiti Relihion,’ dagiti Moabita ken Ammonita, ken Edomita . . . Awan nasarakanda a nangdakamat iti pannakaibaon ni natibker a lakay Samuel idiay Gat ken Accaron tapno awisenna dagiti papadi ni Dagon a sumang-at idiay Silo ken makitaripnong kadagiti papadi ni Jehova . . . Awan nasarakanda a nangdakamat iti panangigakat ni sibabarikes iti lalat a lakay Elias iti ‘pannakitaripnong’ kadagiti papadi ni Baal ken Moloc tapno pagsasaritaanda iti makalawas dagiti prinsipio ti pammatida, iti kasta maitandudo ti panangraem iti relihion ti tunggal maysa.”
Pagarian ti Dios—Ti Kakaisuna a Namnama
Saan nga agballigi ti Parlamento dagiti Relihion ti Lubong. Inaramat dagiti pagiwarnak ken delegado dagiti sao kas iti “gusoguso,” “riribuk,” ken “nakaro a pannakariro” mainaig iti parlamento. Sigun iti maysa a report, nairaman uray dagiti polis a nangpatalna iti dua a riribuk gapu iti politikal a panagsusubang. Iti maysa a dokumento idi 1952, inlista ti parlamento ti maysa kadagiti panggepna: “Tapno mangipasdek iti manayon a Sangalubongan a Parlamento dagiti Relihion a tumulong iti NACIONES UNIDAS a mangtun-oy iti sangalubongan a talna ken panagkikinnaawatan dagiti amin a tao.” Maigidiat iti dayta, kinuna ni Jesus a saan a paset daytoy a lubong ti Pagarianna. Ipakita ti Biblia a ti Pagarian ti Dios ti kakaisuna a solusion kadagiti parikut ti sangatauan.—Daniel 2:44; Juan 18:36.