Sadino ti Pakasarakanyo iti Mapagtalkan a Giya?

“AMMOK, O Jehova, a ti dalan ti naindagaan a tao saan nga agtaud kenkuana met laeng. Saan nga agtaud iti tao a magna ti panangiturong iti addangna. Aturennak, O Jehova.”​—Jeremias 10:23, 24.

Ag-25 a siglon ti napalabas idi nga insurat ti mannurat ti Biblia a ni Jeremias dagita a sasao. Ti nakaay-ay-ay a kasasaad ti sangatauan kalpasan ti rinibu a tawen a panangiwanwan ti tao paneknekanna ti di mabalusingsing a kinapudno dagitoy a sasao. Ngem mabalin a maisaludsodyo, ‘Sadino ti pakasarakan iti mapagtalkan a giya?’

Itudo ti kasuratan a naadaw ti gubuayan ti mapagtalkan a giya ken panangiturong a natantan-ok nga adayo ngem iti tao​—ti Namarsua iti tao, ni Jehova a Dios. Sigurado nga awan ti makaammo iti pakabuklan ti tao ken kadagiti kasapulanna a nasaysayaat ngem iti Namarsua kadatayo. Nupay kasta, interesado aya ti Dios a mangiwanwan ken mangiturong kadatayo? Kasano ti panangaramidna iti dayta? Praktikal aya dayta iti panawentayo?

Nairanta a Paiwanwan iti Dios

Pagaammo unay a ti kangrunaan a nakaidumaan ti tao kadagiti ayup ket naisentro iti pannakabukel, kabaelan, ken panagandar ti utek ti tao. Kadagiti ayup, naiprograma ti dandani amin a panagandar ti utek iti maaw-awagan nainkasigudan a sirib. Saan a kasta kadagiti tattao.​—Proverbio 30:24-28.

Saan a kas iti utek dagiti ayup, awanan ti kadakkelan a paset ti utek ti tao kadagiti naisigud a programa. Inikkan ti Dios ti tao iti nakem, a babaen daytoy, kabaelanna ti mangaramid kadagiti nasaririt a pangngeddeng ken mangiparangarang kadagiti natatan-ok a kababalin, kas iti ayat, kinamanagparabur, di panagimbubukodan, kinahustisia, ken sirib.

Nainkalintegan aya a panunoten a mangparsua ti Dios iti tao nga addaan iti kasta a mental a kabaelan a dina isuro no kasano ti kasayaatan a panangaramatna iti dayta? Direkta nga inwardas ti Dios dagiti immuna a tao. (Genesis 2:15-17, 19; 3:8, 9) Uray kalpasan ti panagbasol ti tao, intultuloy ni Jehova nga inwanwan dagiti matalek a lallaki ken babbai, kangrunaanna babaen ti naipaltiing a Saona, ti Biblia. (Salmo 119:105) Daytoy ti nangipalubos kadagiti tattao a mangsango a sibaballigi kadagiti inaldaw a parikut iti biag bayat nga aramatenda ti nakemda iti nainsiriban a pamay-an.

Ti Dios ti Autor ti Biblia

Ania ti mamagbalin iti Biblia a mapagtalkan a gubuayan ti giya? Mangipaay dayta iti impormasion a ti laeng Namarsua ti makaipaay. Salaysayenna dagiti bambanag a napasamak nabayag sakbay a namunganay ti natauan a biag. Kas pangarigan, saritaenna no kasano ti pannakaisagana ti daga iti agsasaganad a tukad agingga iti mabalinen nga agbiag ti tao. (Genesis, kapitulo 1, 2) Nupay nailanad daytoy iti Biblia nasurok a 3,000 a tawenen ti napalabas, maitunos dayta kadagiti moderno a sientipiko a kapanunotan.

Nabayag sakbay nga inakseptar ti sangatauan iti pangkaaduan a ti daga ket nagtimbukel, kuna ti Biblia: ‘Yukrad [ti Dios] ti amianan iti rabaw ti awan nagyan, nga ibitinna ti daga iti rabaw ti awan.’ (Job 26:7) Mainayon pay, ipakita ti Biblia nga “adda Daydiay nga agtugtugaw iti ngatuen ti nagtimbukel a daga, ket dagiti agtaeng kenkuana kasda la dudon.” (Isaias 40:22) Ti laeng Dios a Namarsua ti makaipaay iti daytoy a detalye.

Saan a naparaburan ti tao iti kabaelan a mangammo iti masakbayan. Ngem ketdi, impakauna ti Namarsua ti masakbayan babaen kadagiti binulong ti Biblia. Pinaltiingan ti Dios ni mammadto Isaias a nangisurat maipapan Kenkuana: “Siak Daydiay Nasantuan ket awan ti sabali a Dios, wenno asinoman a kas kaniak; Daydiay mangibaga ti panungpalan manipud idi punganay, ken dagiti bambanag a saan pay a naaramid manipud idi un-unana.”​—Isaias 46:9, 10.

Pinaneknekan ti Biblia a maipadtona ti panungpalan manipud punganay a buyogen ti nakaskasdaaw a kinaumiso. Kas pangarigan, impadtona ti panagballigi, ti pannakatnag, ken dagiti pakaidumaan dagiti kangrunaan a pannakabalin ti lubong bayat ti rinibu a tawen a pakasaritaan ti tao. Naisurat dagitoy naisangsangayan a padto ginasut a tawen sakbay ti pannakatungpalda, dagiti dadduma rinibu a tawen sakbayna. Kas pangarigan, siuumiso nga impadto ti Biblia dagiti pasamak iti agdama a panawen, kasta met ti pagtungpalanda. Naidumduma met ti Biblia agsipud ta ipakitana no kasanotay a makalasat bayat ti pannakadadael dagiti imperpekto a gobierno ti tao inton Armagedon, “ti gubat ti naindaklan nga aldaw ti Dios a Mannakabalin-amin.” Ti Pagarian ti Dios iti ima ti Anakna, ni Jesu-Kristo, ti mangibanagto iti dayta naindaklan nga aramid.​—Apocalipsis 16:14, 16; 17:9-18; Daniel, kapitulo 2, 8.

Kanayon a Makagunggona​—Pulos a Di Makadangran

Adda pagkurangan ti natauan a sirib; gapuna, saan a kanayon a makagunggona ti balakad ti tao, uray pay no maipaay dayta a buyogen ti nasayaat a panggep. Saan a kasta ti balakad ti Biblia. Kinuna a mismo ti Dios: “Siak, ni Jehova, . . . a mangisuro kenka a maipaay iti pagimbagam, a mangiturong kenka iti dalan a rumbeng a pagnaam. O no ipangagmo la koma dagiti bilinko! Iti kasta ti talnam kasla koma iti maysa a karayan, ken ti kinalintegmo kasla koma kadagiti dalluyon ti baybay.”​—Isaias 48:17, 18.

Tulongannatayo ti nadibinuan a panangiwanwan a mangikeddeng kadagiti banag nga ipangpangruna ken mangsurot kadagiti natantan-ok a pagannurotan iti biag. Nupay ipagpaganetget ti moderno a kagimongan dagiti material a gapuanan ken kalat, iyunay-unay ti Biblia no kasano kapateg kadatayo ti ‘panamagtalinaed iti matatayo, saan a kadagiti bambanag a makita, no di ket kadagiti bambanag a di makita. Ta dagiti bambanag a makita temporarioda, ngem dagiti bambanag a di makita agnanayonda.’ (2 Corinto 4:18) Iti kastoy a pamay-an, maparegtatayo a mangragpat kadagiti kasayaatan a kalat iti biag, nga isu dagiti naespirituan a kalat mainaig iti panangaramid iti pagayatan ti Dios, ket ti kamaudianan a kalat isu ti biag nga agnanayon iti nalinteg a baro a sistema.

Bayat nga ikagumaan ti maysa a Kristiano a tun-oyen dagitoy natan-ok a kalat, ti balakad ti Biblia ti tumulong kenkuana a maaddaan iti kasayaatan a kita ti panagbiag a posible iti daytoy dakes a sistema ti bambanag. Iparparegta ti moderno a natauan a sirib ti pilosopia a bassit a trabaho ngem dakkel a sueldo. Iti sabali a bangir, kunaen ti Biblia kadatayo a “pumanglaw ti agtrabaho a naliway ti imana, ngem ti ima ti nasalukag mamabaknang.” Insurat ni apostol Pablo kadagiti Hebreo a Kristiano: “Agtalekkami nga adda napudno a konsiensiami, yantangay kayatmi ti agbiag a mapagtalkan iti isuamin a bambanag.”​—Proverbio 10:4; Hebreo 13:18.

Mangipaay met ti Biblia iti praktikal a pammagbaga maipapan iti urnos ti pamilia. Espesipiko nga impasdekna ti akem ti asawa a lalaki ken ti asawa a babai iti urnos ti panagasawa, kasta met ti umiso a wagas a panangpadakkel ken panangisuro kadagiti annak. Kunana: “Rebbeng a dagiti lallaki ayatenda dagiti assawada a kas kadagiti bukodda a bagi. . . . Iti sabali a bangir, ti babai addaan koma iti nauneg a panagraem iti asawana. Annak, agtulnogkayo kadagiti nagannak kadakayo . . . Dakayo, nga amma, dikay rurruroden dagiti annakyo, no di ket itultuloyyo a padakkelen ida iti disiplina ken panangiturong-panunot ni Jehova.” Ti panangsurot iti natan-ok a balakad ti Namarsua dakkel ti maitulongna iti kinatibker ken kinaragsak dagiti pamilia.​—Efeso 5:21–6:4.

Natalged a Masakbayan Agpaay Kadagidiay Paiwanwan iti Dios

Ipakita ti naisurat a Sao ti Dios ti solusion ti Dios kadagiti amin a parikut ti sangatauan. Iti saanen a mabayag ikkatento ni Jehova a Dios ti agdama a sistema ti bambanag, agraman ti amin nga ut-ot, kinaawan hustisia ken panagsagsagaba, ken sukatannanto dayta iti nalinteg a baro a sistemana. Dakamaten ti Biblia daytoy idiay 2 Pedro 3:7-10, sana inayon idiay 2Pe 3 bersikulo 13: “Adda baro a langlangit ken maysa a baro a daga nga ur-urayentayo sigun iti karina, ket kadagitoy nga agtaeng ti kinalinteg.” Daytoy ti kasayaatan pay laeng a naimbag a damag a mabalin nga ipakaammo iti sangatauan. Isu dayta ti mensahe nga ipaay ti Biblia ken ikaskasaba dagiti Saksi ni Jehova iti nasurok a 200 a dagdaga ken purpuro iti taaw.

Inton maaramid ti pagayatan ti Dios iti intero a daga, magunggonaanto ti sangatauan babaen ti panangsurotda iti nagsayaat a panangiwanwan ti Namarsua kadakuada, ni Jehova. Awanton dagiti parikut a mainaig iti kinapanglaw, krimen, ken droga. Saanton a sagabaen ti sangatauan ti sakit, panaglakay, ken ipapatay. Mapagbalinto a perpekto ti sangatauan a kas kadagiti immuna a nagannaktayo idi sakbay a linaksidda ti panangiwanwan ti Dios.

Anian a nagsayaat ti pananggupgop ti maudi a libro ti Biblia iti naragsak a kasasaad dagidiay agtalek iti panangiwanwan ti Dios! Kuna ti Apocalipsis 21:4, 5: ‘Punasento [ti Dios] ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.’ Isu dayta ti impanamnama ti Namarsua kadatayo, a kunana: “Adtoy! Pagbalbalinek a baro ti isuamin a bambanag.” Innayonna: “Dagitoy a sasao matalek ken napudnoda.”

Tapno masagraptayo dagitoy a bendision, ania ti namnamaen ti Dios kadatayo? Inlawlawag ni apostol Pablo a pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:4) Sipapasnek nga awisendakayo dagiti Saksi ni Jehova a gumun-od iti dayta umiso a pannakaammo iti kinapudno babaen ti naan-anay a panangadal iti Biblia. No sipipinget a sursuruenyo ti pagayatan ti Dios, masarakanyonto met babaen ti kapadasan a ti nadibinuan a sirib ti kakaisuna a mapagtalkan a giya kadagitoy napeggad a panawen. Ti kinaganat ti panawen ti mamagbalin iti panangsurot iti dayta a napateg unay!