Dagiti Saksi ni Jehova iti Aglikmut ti Lubong​—Thailand

“TI DAGA dagiti agwayawaya.” Dayta ti kayat a sawen ti nagan a Thailand. Nadumaduma a narelihiusuan a kapanunotan ti ik-ikutan dagiti nasurok a 57,000,000 a naemma, nagaget nga umilina. Nupay nasaknap ti Budismo, maal-alagad met dagiti relihion ti Kakristianuan iti daytoy abagatan a daya a pagilian ti Asia. Masapul a mangngegan amin dagitoy a tattao ti naimbag a damag ti Pagarian ti Dios.​—Mateo 24:14.a

Nangngegan Dagiti Nagkamang ti Naimbag a Damag

Kadagiti kampo a naiwaras iti katurturodan ti Thailand iti asideg ti pagbeddengan ti Myanmar, maisaksaknap ti kinapudno iti Biblia kadagiti nasurok a 10,000 a nagkamang a Karen. Saksi ni Jehova dagiti kameng ti maysa a pamilia a Karen nga agnanaed iti dayta a lugar. Isaksaknapda ti naimbag a damag kadagiti nagkamang. Kasano a nangrugi ti trabahoda?

Sumagmamano a tawenen ti napalabas, immikkat ti maysa nga agtutubo a lalaki iti Iglesia Anglicana ket nagbalin a maysa kadagiti Saksi ni Jehova. Gaput’ panangguyugoy ti ministroda, isut’ binusor dagiti kakabagianna. Nupay kasta, siaanus a nagibtur, ket in-inut a nagsardeng ti ibubusor ti pamiliana. Intultuloy dagiti klero ti Iglesia Anglicana ti panangumsida agingga iti agarup dua a tawen ti napalabas idi naikkatda iti saadda gapu iti imoral nga aramid. Yantangay awan pastor idin ti iglesia, naupay ti pamiliana ken dagiti dadduma a kakabagian ti Saksi. Sangapulo ket maysa kadakuada ti naglusulos iti iglesia ket imbagada kadagiti Saksi a kayatda ti makipagadal iti Biblia kadakuada.

Nasayaat ti panagrang-ay daytoy a panagadal, a nakiramanan dagiti dadduma pay a nagkamang. Sipapardas a naisaknap ti kinapudno, a nagresulta iti pannakabautisar dagiti 17 a baro a Saksi iti karayan nga agay-ayus agingga iti refugee camp. Anian a makaparagsak a buyaen idi a ti 88-años nga apong a baket ket naitaneb a kaduada!

Mangtukay iti Interes ti Video

Mainanama ti dakkel a panagrang-ay kadagiti nagkamang. Idi 1993 adda 57 a timmabuno iti panangrambak ti Panglaglagip. Bayat ti ibibisita ti manangaywan sirkito idi Mayo iti dayta a tawen, 67 ti dimngeg iti maysa kadagiti palawagna. Ken agarup 250 ti naguummong tapno buyaen ti video ti Watchtower Society a Jehovah’s Witnesses​—The Organization Behind the Name.

Timmabuno ti asawa ti maysa a pastor ti Baptist idiay refugee camp iti maysa a palawag publiko a naibatay iti Biblia nga inyawis dagiti Saksi ket inimutektekanna ti pannakasalaysay dagiti teksto iti Biblia. Imbagana ken ni lakayna nga isu ket saan a mapnek kadagiti maulit-ulit a sermon a mangmangngegna idiay simbaanda. Bimmusor ni lakayna, a kunana a no mapan tumabuno kadagiti gimong dagiti Saksi ni Jehova, sumurot met no kuan dagiti amin a dadduma pay a parokiano. Idi timmabuno manen kadagiti gimong, pinagawid ti asawana a nagtagiimuko ket pinuoranna dagiti pagisursuratanna no gimong ken ti literatura ti Biblia. Nupay kasta, idi naipabuya ti video, napan manen. Kalpasanna imbaga daytoy a babai ken ni lakayna ti nabuyana. Buyogen ti naidumduma a kababalin, tinarigagayan ni lakayna a buyaen ti video ken agbabbabawi iti panangpuorna kadagiti nagisuratan ni baketna ken ti literatura ti Biblia.

Wen, mangmangngegan dagiti tattao ti naimbag a damag idiay Thailand. Magunggun-odanda no kasta ti naespirituan a wayawaya iti “daga dagiti agwayawaya.”​—Juan 8:32.

[Footnote]

[Kahon iti panid 24]

KASASAAD TI PAGILIAN 1993 a Tawen Serbisio

KANGATUAN A BILANG TI MANANGASKASABA: 1,434

RATIO: 1 a Saksi iti 40,299

TIMMABUNO ITI MEMORIAL: 3,342

PROMEDIO DAGITI AGIBUMBUNANNAG A PAYUNIR: 232

PROMEDIO TI PANAGADAL ITI BIBLIA: 1,489

BILANG TI NABAUTISARAN: 92

BILANG DAGITI KONGREGASION: 39

SANGA NGA OPISINA: BANGKOK

[Ladawan iti panid 25]

Sireregta nga ikaskasaba dagiti manangiwaragawag iti Pagarian ti naimbag a damag

[Ladawan iti panid 25]

Ti immuna a sanga nga opisina, 1947

[Ladawan iti panid 25]

Ti pamilia ti Bethel iti sango ti baro a sanga nga opisina idiay Bangkok, naidedikar idi Pebrero 8, 1992