Ispalento ni Jehova ti Daga

INALDAW a maserraan ti eropuerto iti maysa a puro ti Maldives iti adu nga oras iti tunggal aldaw. Apay? Gapu ta malayus ti runway no agatab ti danum, a mamagpeggad iti panagdisso dagiti eroplano. Pagamkan dagiti dadduma a sientista ti mabalin nga ingangato ti patas ti baybay kadagiti puro ti Maldives iti agarup 1 a metro iti sumaganad a siglo. Nupay kasla bassit laeng daytoy, mabalin a mapukaw a naan-anay dagiti pito a nasion a puro gapu iti kasta nga ingangato. Kinapudnona, sigun iti UN Chronicle, ti dua a metro nga ingangato mabalinna a palneden ti gistay intero nga arkipelago, a buklen ti agarup 1,200 a puro!

Aniat’ makagapu iti ngumatngato a patas ti baybay? Sigun iti UN Environment Program, ti polusion iti atmospera ti daga gapu iti “greenhouse gases” palawaenna dagiti baybay kadagiti nabarbara a rehion, runawenna dagiti niebe ken yelo, ket gapu iti dayta, pangatuenna ti patas ti baybay. Kuna ti Panos Institute idiay Londres a ti polusion “mabalin nga isut’ makagapu iti in-inut a pannakadadael ti globo a mamagbalbaliw kadagiti pagbeddengan ti daga ken baybay.”

Pagsusupiatan pay laeng dagiti sientista ti panagbara ti lubong. Nupay kasta, manamnamatayo a dagiti parikut iti aglawlaw saanna a lapdan ti panggep ti Dios. “Ti nabunga a daga natibker ti pannakaipasdekna,” kuna ti Biblia. “Saanto a pulos a magaraw.” (1 Cronicas 16:30) Tengngel ni Jehova ti intero nga aglawlaw ti daga, ket makapagrag-otayo ta iti saanen a mabayag ispalennanto agpadpada ti daga ken ti sangatauan manipud iti pannakadadael.​—Salmo 24:1, 2; 135:6; 2 Pedro 3:13.

[Picture Credit Line iti panid 31]

Drawing a naibasar iti ladawan ti NASA