Idaydayawyo Kadi ni Jehova?

“KAS iti naganmo, O Dios, kasta ti pannakadaydayawmo agingga kadagiti pungto ti daga.” Dagitoy ti sasao iti maysa a naimpadtuan a kanta dagiti annak ni Core. (Salmo 48:10) Itatta, maysa a nabileg a koro dagiti minilmilion a Saksi ni Jehova ti mangidaydayaw iti Dios ken mangipadpaduyakyak iti naganna babaen ti panangikaskasaba iti naimbag a damag ti Pagarianna. Iti panangaramidda iti daytoy iti 232 a daga ken purpuro iti taaw ken iti nasurok a 300 a pagsasao, literal a makadandanonda “kadagiti pungto ti daga.”

Aniat’ manggutgutugot kadagiti tao manipud iti nadumaduma a kultura, kagimongan, ken pagsasao a mangidaydayaw ken Jehova? Ti maysa a kangrunaan a makagapu isut’ panangipategda iti umiso a pannakaammo iti Sao ti Dios, ti Biblia. Winayawayaan ida ti naespirituan a kinapudno manipud kadagiti an-anito ken iti mangad-adipen a narelihiusuan a pammati kas ti agnanayon a pannakatutuok. (Juan 8:32) Tumultulong met kadakuada ti kinapudno a mangipateg kadagiti nakaskasdaaw a galad ti Dios, kas ti ayat, pannakabalin, sirib, ken kinahustisiana, a nabuyogan iti asi. Ti pannakaawat iti panangipaay ti Dios iti bugbugtong nga Anakna, ni Jesu-Kristo, kas maysa a daton a subbot para iti sangatauan gutugotenna dagiti nalinteg a tattao a mangidaydayaw ken agserbi ken Jehova.

Sigun iti libro ti Biblia nga Apocalipsis, sipipigsa a kuna ti maysa a nailangitan a koro: “Maikarika, Jehova, a mismo a Diosmi, nga umawat ti dayag ken ti dayaw ken ti pannakabalin, agsipud ta pinarsuam dagiti isuamin a bambanag, ket gapu iti pagayatam napaaddada ken naparsuada.” (Apocalipsis 4:11) Ti kasta a panangidaydayaw ket saan la a bunga ti pannakarikna iti sungsungbatan. Imbes ketdi, agtaud dayta iti panagraem ken Jehova.

Idaydayawyo ti Dios Babaen ti Panangiwaragawag iti Naimbag a Damag

Iti panangidaydayaw ken Jehova, tultuladen ti maysa a tao ti nagsayaat nga ulidan ni Jesu-Kristo, ti kangrunaan a manangidaydayaw iti Dios. Karaman iti panangsurot iti addang ni Jesus ti pannakipaset iti trabaho a panangikaskasaba iti naimbag a damag ti Pagarian ti Dios. (Mateo 4:17, 23; 24:14) Nagbalin daytoy a trabaho a panangaskasaba a kadakkelan a sangalubongan a panangikagumaan iti panangidaydayaw ken Jehova.

Nagpateg daytoy trabaho a panangasaba ta silalawag nga inaig daytoy ti Biblia iti pannakaisalakan. Kastoy ti mabasa iti Roma 10:13-15: “‘Tunggal maysa nga umawag iti nagan ni Jehova maisalakanto.’ Nupay kasta, kasano ti panangawagdanto iti daydiay a kenkuana saanda a naaddaan iti pammati? Kalpasanna, kasano a maaddaandanto iti pammati iti daydiay dida nangngeg? Kalpasanna, kasano a mangngegdanto no awan ti mangasaba? Kalpasanna, kasano ti panangasabadanto malaksid no naibaonda? Kas adda a naisurat: ‘Anian a nagimnas ti saksaka dagidiay mangideklara ti naimbag a damag dagiti naimbag a bambanag!’”

Idi napalabas a tawen laeng, nangbusbos dagiti Saksi ni Jehova iti nasurok a maysa a bilion nga oras iti trabaho a panangasaba. Ket anian a nagsayaat ti imbunga daytoy a panangidaydayaw iti Dios! Ag-314,000 ti timmipon iti koro dagiti managdaydayaw babaen ti panagpabautisarda iti danum kas simbolo ti dedikasionda ken Jehova.

Ngem, ania met ti maikuna iti 12,288,917 a timmabuno iti Panglaglagip iti ipapatay ni Kristo idi 1994? Nasurok a 7,000,000 kadakuada ti saan pay a mangidaydayaw ken Jehova kas manangaskasaba iti naimbag a damag. Ngem ti kaaddada iti daytoy nagpateg nga okasion mabalin nga iti kamaudiananna agbanagto iti ititipon ti riniwriw pay iti koro dagiti managdaydayaw. Aniat’ maaramidan tapno matulongan dagitoy nga interesado a tattao nga agbalin a managdaydayaw ken Jehova?

Magun-odan a Tulong

Mabalin nga addaan dagiti adu nga interesado a tattao iti tarigagay a mangidayaw ken Jehova ngem mariknada a saanda a masabet dagiti [banag a] makalikaguman. Nasayaat no lagipenda dagiti sasao ti salmista: “Itangadkonto dagiti matak kadagiti bantay. Siasino ti paggapuanto ti tulongko? Ti tulongko aggapu ken Jehova, ti Nangaramid iti langit ken daga.” (Salmo 121:1, 2) Nalawag, intangad ti salmista dagiti matana kadagiti bantay ti Jerusalem a nakaisaadan ti templo ni Jehova ken ti naindagaan a trono ti teokratiko a gobiernona. Manipud iti daytoy siuumiso a maikunatayo a ti tulong a kasapulan tapno maidaydayaw ti Dios ken maiwaragawag ti mensahe ti Pagarian ket agtaud laeng ken ni Jehova ken iti organisasionna.​—Salmo 3:4; Daniel 6:10.

Ita, manamnama dagidiay agtarigagay a mangidaydayaw ken Jehova ti naayat a tulong manipud iti naindagaan nga organisasionna. Kas pagarigan, tumultulong dagiti Saksi ni Jehova babaen ti panangidaulo kadagiti libre a panagadal ti Biblia iti pagtaengan dagiti interesado a tattao. Ad-adu pay ti ramanen daytoy a programa a panangisuro ngem ti basta pannakasursuro laeng kadagiti doktrina ti Biblia. Tumulong daytoy iti estudiante a mangipateg iti maad-adalna ken iti organisasion nga us-usaren ni Jehova.

Maitunos iti daytoy, ikagkagumaan ti Saksi a mangidadaulo ti panagadal iti Biblia a siguraduen a dagiti baro a naammuan a kinapudno ket mayukuok saan laeng nga iti panunot no di pay ket iti puso. Ket di rumbeng a bumdeng ti mannursuro a mangipakita iti estudiante no kasano nga us-usaren ni Jehova ti organisasionna tapno maibanag ti panggepna ditoy daga. Ti broshur a Dagiti Saksi ni Jehova​—Agkaykaysa a Mangar-aramid ti Pagayatan ti Dios iti Sangalubongan ken ti videotape a Jehovah’s Witnesses​—The Organization Behind the Name ket masansan a mapampaneknekan a makatulong iti panangaramid iti daytoy.

Nagpateg met ti paset dagiti Nakristianuan a gimong iti panangtulong kadagiti manamnama nga agbalin a managdaydayaw ken Jehova. Iti rugrugi pay laeng ti panagadal iti Biblia, mabalin nga awisen ti estudiante a tumabuno kadagiti Nakristianuan a gimong. Inton agangay, masursuronanto ti kinapateg ti regular nga itatabuno ken pannakipaset kadagiti amin a gimong iti kongregasion. (Hebreo 10:24, 25) Makaipaay dagiti manangaywan iti napateg a tulong kadagiti kapammatian ken dagiti manamnama nga agbalin a managdaydayaw ken Jehova babaen ti panangisagana kadagiti gimong a makapabileg iti naespirituan ken praktikal.

Tulonganyo Dagiti Ubbing a Mangidaydayaw ken Jehova

Karaman dagiti ubbing iti adu nga agbalin nga agibumbunannag ti naimbag a damag iti masanguanan. Nangnangruna nga addaan dagiti amma iti Naimbibliaan a responsabilidad a mangpadakkel kadagiti annakda “iti disiplina ken panangiturong-panunot ni Jehova.” (Efeso 6:4) No siuumiso ti panangsanay dagiti nadiosan a nagannak, mapatanor uray dagiti ubbing pay nga annak ti tarigagay a mangidaydayaw ken Jehova.

Maysa nga ubing a babai idiay Argentina ti maulit-ulit nga immasideg kadagiti panglakayen ti kongregasion iti sumagmamano a bulan, nga agpatpatulong tapno makakualipikar kas maysa nga agibumbunannag ti Pagarian. Di nagbayag, immanamong ti nagannakna ken dagiti panglakayen a mangpalubos kenkuana nga agbalin a maysa a di bautisado nga agibumbunannag. Kabaelannan nga iparang a siiepektibo ti mensahe ti Pagarian kadagiti ruangan. Nupay agtawen laeng iti lima daytoy nga ubing ken saan pay a makabasa, kabesadona ti pakasarakan iti sumagmamano a teksto iti Biblia. Kalpasan a masarakanna ti maysa a kasuratan, ipabasana dayta iti bumalay, ket kalpasanna ilawlawagna.

Nalawag a dakkel ti maaramidan agpadpada dagiti panglakayen ken nagannak iti panangparegta ken panangtulong kadagidiay rumangrang-ay iti panagbalin a managdaydayaw ken Jehova.​—Proverbio 3:27.

Maysa nga Awan Inggana a Pannakirelasion ken Jehova

Ngem, kasanon no nabayag met bassiten a makitimtimpuyogkayo kadagiti Saksi ni Jehova ngem saankay pay a makiramraman iti trabahoda a panangasaba? Makagunggona no isaludsodyo iti bagbagiyo ti sumaganad a salsaludsod, ‘Mamatiak kadi a nasarakakon ti kinapudno, a ni Jehova laeng ti pudno a Dios? Kumbinsidoak kadi a ti Pagarian ti Dios ti kakaisuna a solusion dagiti parikut ti sangatauan? Inidiak kadin ti amin nga ulbod a relihion ken dagiti nailubongan a kababalin ken ar-aramid a karimon ni Jehova? Adda kadi nauneg a panagayatko iti Dios ken kadagiti nalinteg a pagannurotanna?’ (Salmo 97:10) No sipupudno a wen ti sungbatyo kadagitoy a saludsod, aniat’ mangtiped kadakayo a mangidaydayaw ken Jehova?​—Idiligyo ti Aramid 8:36.

Saan laeng a ti panangikaskasaba iti naimbag a damag ti ramanen ti panangidaydayaw ken Jehova. No nagun-odyon ti umiso a pannakaammo, addaan iti pudno a pammati, ken ituntunosyon ti panagbiagyo kadagiti pagannurotan ti Dios, masapul a patibkerenyo ti personal a pannakirelasionyo iti Dios. Kasano? Babaen ti panagdedikaryo kenkuana iti kararag ket kalpasanna isimboloyo daytoy babaen ti panagpabautisar iti danum. Agur-uray ti biag nga agnanayon. Gapuna, agtignaykay itan a maitunos iti balakad ni Jesus: “Sumrekkayo iti akikid a ruangan; agsipud ta akaba ken nalawa ti dalan nga agturong iti pannakadadael, ket adu dagidiay sumrek iti dayta; idinto ta akikid ti ruangan ken nailet ti dalan nga agturong iti biag, ket bassit dagidiay makasarak iti dayta.”​—Mateo 7:13, 14.

Tangay umas-asidegen ti nakaam-amak a panungpalan ti agdama a sistema ti bambanag, saan daytoy a panawen ti panangitungtungkua. Agtignaykay a dagus maipaay iti awan inggana a pannakirelasion ken Jehova. Wen, itan ti tiempo a panangsungbat a sipopositibo iti saludsod nga, Idaydayawyo kadi ni Jehova?