“Nararagsak a Managdaydayaw” a Kombension Addakayto Kadi Sadiay?

RAG-O! Karkarna kadi dayta a sao, a di pay ketdi maikanatad, iti daytoy nariribuk a tiempo? Awan duadua, saan a mangipaay dagiti warnakan iti adu a makagapu tapno agrag-o. Ti panagdadangadang dagiti pulí, nasaknap a bisin, kinaawan trabaho, napeggad a polusion, di mapangnamnamaan a politika, krimen​—saan a dagitoy ti bambanag a mamagrag-o iti puso, saan kadi?

Agawen ti kaaduan a tattao itatta ti aniaman a ragsak a magun-odda iti biag. Ngem ti rag-o? Nailadawan ti rag-o kas maysa a “kasasaad ti kinaragsak; panagdir-i.” Sumagmamano laeng ti makapaspasar iti pudpudno a rag-o, ken no mapasaranda dayta, masansan a temporario laeng.

Nupay kasta, iti panangtukoy iti kaaldawantayo, impadto ti Biblia: ‘Kastoy ti kuna ni Soberano nga Apo Jehova: “Adtoy! Dagiti adipenko agrag-odanto. Adtoy! Dagiti adipenko agkantadanto a gapu iti rag-o ti puso.”’ (Isaias 65:13, 14) Kasano nga agbalin a kasta?

Tapno masarakan ti sungbat, awisendakayo a tumabuno iti maysa kadagiti kombension distrito dagiti Saksi ni Jehova a maangay itoy 1995. Ti tema dagiti kombension ket “Nararagsak a Managdaydayaw,” ken awan bayad ti itatabuno. Ti programa iti tallo nga aldaw a kombension ket buklen dagiti naibatay-Biblia a palawag, demonstrasion, diskusion, ken adu pay. Iti intero a programa, maitampokto ti tema a rag-o.

Nangrugi ti serie dagitoy a kombension idi Hunio idiay Estados Unidos ken agtultuloy kadagiti siudad iti aglikmut ti lubong agingga iti rugrugi ti 1996. Nalabit, maangay ti maysa iti lugar nga asideg kadakayo. Apay a dikay agsaludsod kadagiti Saksi ni Jehova nga agnanaed iti lugaryo? Siraragsakkami a mangawis kadakayo a tumabuno.