Report Dagiti Manangiwaragawag ti Pagarian
“Nagtultuloyda nga Awan Sardayna”
SIPUD pay kadagidi kaaldawan ni Jesu-Kristo ken dagiti apostolna, inaramaten dagiti narelihiosuan a pangulo ti aniaman a pamay-an kadagiti panagreggetda a manglapped iti pannakaikaskasaba ti naimbag a damag ti Pagarian ti Dios. Maulit-ulit ken sipopositibo nga ‘imbilin’ dagiti lokal nga agtuturay idiay Jerusalem kadagiti apostol nga “agsardengda nga agsasao maibatay iti nagan ni Jesus.” (Aramid 5:27, 28, 40) Nupay kasta, kuna ti salaysay ti Biblia a “ti sao ti Dios nagtultuloy a rumang-ay, ket ti bilang dagiti adalan nagtultuloy nga umadu iti kasta unay idiay Jerusalem.”—Aramid 6:7.
Dua a milenio kalpasanna, masarakantay pay laeng dagiti narelihiosuan a pangulo iti Israel a mangim-impluensia kadagiti lokal nga agtuturay tapno lapdanda ti trabaho dagiti pudno a Kristiano iti dayta a pagilian. Iti sidong ti panangpilit dagiti radikal a relihionista, idi Nobiembre 1987, imbilin dagiti lokal nga agtuturay idiay Tel Aviv, Israel, nga isardeng dagiti Saksi ti kaadda dagiti Nakristianuan a gimong iti Kingdom Hall nga adda iti sanga nga opisina ti Watch Tower Society. Naipatungpal ti pammilin idi Oktubre 1989. Kas panagtulnog, naggigimong dagiti Saksi kadagiti naabangan a pasilidad iti dayta a lugar iti tallo a tawen bayat a nagtalinaed a gistay saanen a naaramat ti Kingdom Hall-da.
Kabayatanna, naidatag ti parikut iti Israeli High Court of Justice. Rinepaso ti opisina ti state attorney ti argumento nga imparang dagiti Saksi ket impakaammoda a mabalin nga agballigi ti panagapelarda gapu ta ti pammilin ket naibatay iti nakadidillaw a narelihiosuan a panagil-ilem. Gapuna, napilitan dagiti lokal nga agtuturay a mangbaliktad iti pangngeddengda, ket siraragsak dagiti Saksi ni Jehova a nagsubli iti Kingdom Hall-da.
Kimmapuy kadi ti trabaho a pannakaikaskasaba kadagiti kinapudno ti Biblia kadagidiay a tawen? Saan a pulos! Kabayatan ti pannakaipaserra ti Kingdom Hall, adda idi dua a kongregasion idiay Tel Aviv ken maysa a nagsina a grupo ti panagadal iti Biblia iti kabangibang nga ili ti Lod. Tallo a tawen kalpasanna, idi naluktan manen ti Kingdom Hall, immadu dagiti Saksi ni Jehova iti uppat a kongregasion, ket maysa a baro a grupo ti panagadal iti Biblia ti nagtataripnong idiay Beersheba.
Ti panagrang-ay idiay Israel ket saan laeng a nagpatingga iti bunggoy dagiti kangrunaan a pagsasao, Arabico ken Hebreo. Simmangpet ti nakaad-adu nga immakar manipud iti dati nga Union Soviet, isu nga okupado ita dagiti Saksi ni Jehova a Ruso-ti-pagsasaona iti panangiranud iti naimbag a damag kadakuada. Dadduma a gimong a Ruso-ti-pagsasaona ti maang-angay kadagiti tallo a kongregasion; nasurok a sangagasut a tattao ti nagtitipon itay nabiit maipaay iti asamblea a Ruso.
Di pagduaduaan, itultuloyto dagiti nailem a relihionista ti kampaniada maibusor iti pudno a panagdaydayaw. Ngem agtultuloy dagiti manangiwaragawag iti Pagarian a tumulad kadagiti immuna-a-siglo a Kristiano nga, iti laksid ti ibubusor, nagtultuloyda nga awan sardayna a mangisursuro ken mangidekdeklara iti naimbag a damag maipapan iti Kristo, a ni Jesus.”—Aramid 5:42.