Kapitulo 20

Agtitimpuyog a Panagbangon iti Intero a Lubong

TI RIKNA ti pudno a panagkakabsat kadagiti Saksi ni Jehova maiparangarang iti adu a wagas. Dagidiay tumabuno kadagiti gimongda makitadat’ ebidensia. Kadagiti kumbensionda ad-adda a maidemostra dayta. Nabatad pay dayta no agtitimpuyogda nga agaramid kadagiti maikanatad a lugar a pagtataripnongan dagiti kongregasionda.

Idi nangrugi ti dekada ti 1990’s, addan nasurok 60,000 a kongregasion dagiti Saksi ni Jehova iti intero a lubong. Daydi dekada sakbayna, 1,759 dagiti kabbaro a kongregasion a nainayon, no iti promedio, ti kada tawen. Idi karrugi ti 1990’s, ngimmatot’ promedio iti nasurok a 3,000 kada tawen. Ti panangparnuay kadagiti maikanatad a lugar a pagdadagupanda nakadakdakkel a ganuat.

Dagiti Kingdom Hall

Kas kadagiti Kristiano idi immuna a siglo, adu a kongregasion dagiti Saksi ni Jehova ti nagusar idi damo kadagiti pribada a balay a paggigimongan. Idiay Stockholm, Sweden, dagidi sumagmamano a regular a naggigimong inusarda ti puesto ti maysa a karpintero, nga inabanganda dayta apaman a mangrikepen iti malem. Gaput’ pannakaidadanes, adda bassit a grupo idiay probinsia ti La Coruña, España, a ti damo a naggigimonganda isut’ maysa a bassit a bodega, wenno kamalig.

No nalawlawat’ masapuldan, kadagiti daga a siwayawaya, agabangen dagiti lokal a kongregasion dagiti Saksi ni Jehova iti lugar a paggigimongan. Nupay kasta, no ti abanganda ket us-usaren met dagiti sabali nga organisasion, masapul nga ipan-iyawid dagiti alikamen kada gimong, sa kadarato agassigarilio ti malanglang-ab. No mabalbalin, abangan dagiti kakabsat ti di maus-usar a puesto wenno siled iti ngato a dagiti laeng kongregasion ti mangusar. Ngem, no dadduma, kadagiti adu a lugar ti kinanginat’ abang ken kinaawan ti maikanatad a lugar isut’ nanggapuanda nga agaramid ti sabali nga urnos. No dadduma gumatangdan iti patakder sada ritubaren.

Sakbay ti Gubat Sangalubongan II, addada sumagmamano a kongregasion a nangbangon iti paggigimongan a nairanta a kastat’ usarna. Idi pay la 1890, adda grupo dagiti Estudiante ti Biblia sadi Estados Unidos idiay Mount Lookout, West Virginia, a nangbangon iti pagigimonganda.a Ngem, sa la nangrugi ti adu a panagbangon kadagiti Kingdom Hall idi 1950’s.

Insingasing ni J. F. Rutherford, a presidente idit’ Watch Tower Society, ti nagan a Kingdom Hall idi 1935. Nainaig kadagiti pasilidad ti sanga ti Sosiedad sadi Honolulu, Hawaii, inyurnosnat’ panangbangon dagiti kakabsat iti lugar a paggigimongan. Idi dinamag ni James Harrub ken Kabsat Rutherford no aniat’ iyawagna iti dayta a patakder, insungbatna: “Saan kadi a nasayaat no awagantay ti ‘Kingdom Hall,’ yantangay daytat’ ar-aramidentayo, ikaskasabatay ti naimbag a damag ti Pagarian?” Nanipud idin, no mabalbalin, dagidi patakder a regular nga us-usaren dagiti Saksi nagin-inut a naikkandat’ karatula a “Kingdom Hall.” Gapuna, idi naritubar ti London Tabernacle idi 1937-38, pinanaganandat’ Kingdom Hall. Idi agangay, ti kangrunaan a lokal a paggigimongan dagiti kongregasion iti intero a lubong naawagandan Kingdom Hall of Jehovah’s Witnesses.

Saan a Maymaysa La a Wagas ti Pannakaaramidda

Desisionan a lokal dagiti indibidual a kongregasion no agabang wenno agbangondat’ Kingdom Hall. Ibaklayda met ti gastos ti panangbangon ken panangmantinir. Tapno makalakada, kaaduan a kongregasion isudan ti mangtrabaho no kabaelanda imbes a patrabahoda dayta kadagiti komersial a kontratista.

Mabalin a mabangon ti patakder iti ladrilio, bato, tabla, wenno dadduma a materiales, agdepende iti presio ken no aniat’ maala dita a lugar. Idiay Katima Mulilo, Namibia, nausar dagiti pan-aw kas atep, ket ti pitak manipud bunton ti anay (a natangken no madamili) nausar a diding ken suelo. Dagiti Saksi sadi Segovia, Colombia, isudat’ nangaramid iti bukodda a sementado a bloke a mausar iti patakder. Dagiti nakabakab a lava manipud Mount Lassen isut’ nausar sadi Colfax, California.

Gapu ta masansan a nasurok a 200 ti tumabtabunon idi 1972, ti kongregasion ti Maseru, Lesotho, nabigbigna a masapul nga agbangondan ti nalawa a Kingdom Hall. Timmulongda amin iti proyekto. Dagiti lallakay pinagpagnada ti ag-32 kilometro tapno makiramanda. Ub-ubbing ti nagitulid kadagiti bariles ti danum idiay pagbangonan. Kakabsat a babbai ti naglutot’ makan. Sakadat’ inusarda a nangsedsed iti daga, kas panangisaganada sakbay a masemento, a kabayatanna nagkankansiondat’ kanta ti Pagarian sada igiddan ti baddekda iti musika. Dagiti darat, a naalada a libre idiay bantay no isuda la ket ti agkali, nausar kadagiti diding. Idi nalpas nagbalin a Kingdom Hall a makalaon ti agarup 250.

No dadduma, dagiti Saksi kadagiti kabangibang a kongregasion tumulongda nga agbangon. Isu nga, idi 1985, idi a dagiti Saksi ni Jehova sadi Imbali, nga ili dagiti nangisit sadi Sud Africa, nagbangondat’ patakder a nawaya a makalaon 400, immay bimmadang dagiti padada a Saksi iti kabangibang a Pietermaritzburg ken Durban. Mapattapattayo kadit’ siddaaw dagiti sangakaarrubaan ta, kadagidi nga aldaw nga agguguloda gaput’ rasa sadi Sud Africa, nakitada dagiti pinulpullo a Saksi a puraw, Mestiso, ken Indian a nagaaripunoda iti dayta nga ili sada nakitinnulong kadagiti nangisit nga Africano a kakabsatda? Kas imbaga ti lokal a mayor: “Sa la maaramid ti kasta no adda ayat.”

Nupay kasanot’ ayatda, natakuatan dagiti kongregasion a dagiti lokal a sirkumstansia ti nangeddeng iti kabaelan nga aramiden dagiti kakabsat. Dagiti lallaki iti kongregasion adda pamilia a suportaranda ket makatulongda laeng iti kasta a proyekto no ngudot’ lawas ken nalabit sangkabassit iti rabii. Adu dagiti kongregasion a mammano, no adda, ti nasigo iti konstruksion. Kaskasdi, ti medio simple, siwawangwang a patakder a maikanatad iti tropiko mabalin a bangonen iti mano la nga aldaw wenno nalabit sumagmamano a lawas. No bumadang dagiti Saksi kadagiti aglawlaw a kongregasion, mabalin a makompleto ti natibtibker a patakder iti lima wenno innem a bulan. No dadduma masapul ti maysa wenno dua a tawen.

Kaskasdi, idi immallatiwdat’ 1970’s, umad-adun dagiti Saksi ni Jehova iti intero a lubong iti kapartak a dua wenno tallo a kabbaro a kongregasion kada aldaw. Idi rugrugi ti 1990’s, pimmartak dayta agingga iti siam a kongregasion kada aldaw. Makaaguanta pay ngatat’ pannakabangon dagiti baro a kasapulan unay a Kingdom Hall?

Panangpatanor Kadagiti Teknik ti Napartak a Panagbangon

Idi rugrugi ti 1970’s, sadi Estados Unidos, nasurok 50 a Saksi kadagiti kabangibang a kongregasion ti timmulong a nangbangon iti baro a Kingdom Hall sadi Carterville, Missouri, para iti grupo nga aggigimong sadi Webb City. Iti maysa la a ngudot’ lawas napatakderda ti kangrunaan a balabalana ken nawadwad a paset ti atep. Adu pay kurangna, ken sumagmamano a bulan ti nabusbos sa nalpas; ngem apagbiitda la nga inringpas ti kangrunaan a partena.

Iti simmaruno a dekada, idi nagtitinnulong dagiti kakabsat kadagiti agarup 60 a patakder, naparmekda dagiti tuben ket napatanorda dagiti mas epektibo a metodo. Idi agangay, nabigbigda a no malpas la ketdin ti pundasion, gistay kabaelandan nga iringpas ti intero a Kingdom Hall iti maysa la a ngudot’ lawas.

Sumagmamano a manangaywan ti kongregasion​—a taga makintengnga a laud ti Estados Unidos​—inrugida a ragpaten dayta a kalat. No agpatulong dagiti kongregasion a mangbangon iti Kingdom Hallda, maysa wenno ad-adu kadagitoy a kakabsat ti makisarita kadakuada maipapan iti proyekto ken mangted kadagiti detalye ti panagisagana nga asikasuen ti lokal sakbay a mangrugi ti trabaho. Malaksid kadagita, masapul a maala dagiti permiso ti panagbangon, masemento ti pundasion ken ti suelo, adda mausar a linea ti koriente, maikalin dagiti tubo, ken mayurnos ti maitutop a pagibodegaan kadagiti materiales a sumangpet. Sa maiyiskediolen ti mismo nga itatakder ti Kingdom Hall. Saan a mangusar ti patakder iti nalpasen a material; mairugi dayta manipud daga agpangato ket mabangon a mismo dita a lugar.

Siasinoda ti aktual nga agtrabaho? No mabalbalin, boluntario, di masuelduan a trabahador dagiti mangbangon. Masansan a makiraman dagiti intero a pamilia. Dagidiay nangorganisa iti proyekto agbirukda kadagiti Saksi a nasigo iti konstruksion ken situtulokda a makiraman kadagita a proyekto. Adu kadakuada ti sireregget a mangsegsegga iti tunggal baro a proyekto. Dagiti dadduma a Saksi a nakadamag kadagiti proyekto kayatdat’ bumadang; ginasut manipud kabangibang a lugar​—ken kadagiti ad-adayo pay a disso​—agaaripunoda kadagiti lugar a pagbangonan, a sidadaanda a mangitukon iti serbisioda iti uray ania a kabaelanda. Kaaduan kadakuada saan a propesional a konstruktor, ngem talaga a pinaneknekanda a maikaridat’ deskripsion dagidiay mangsuportanto iti Mesianiko nga Ari ni Jehova sigun ti nailanad iti Salmo 110:3, a kunana: “Ti ilim itulnogdanto a situtulok dagiti bagida.”

Iti rabii ti Huebes sakbay a mangrugi ti dakkel a trabaho, pagmimitingan dagidiay mangimatmaton iti proyekto dagiti ultimo a detalye. Iti sumuno a rabii, naipabuya ti slide presentation kadagiti trabahador tapno matarusanda no kasanot’ pannakairingpas ti trabaho. Naigunamgunam ti kinapateg dagiti nadiosan a kababalin. Naparegta dagiti kakabsat nga agtutunosda nga agtrabaho buyogen ti ayat, manangaasida, ipakatdat’ anus ken konsiderasion. Naparegtada amin a tuloy-tuloy ti panagtrabahoda ngem dida agap-apura ken dida agkedked a mangiranud iti sumagmamano a minuto kadagiti makapabileg a kapadasanda. Iti agsapa ti sumaganad nga aldaw, nangrugin ti konstruksion.

No dumteng ti naituding a tiempo iti agsapa ti Sabado, sumardengda amin iti ar-aramidenda tapno imdenganda ti pannakausig ti teksto ti Kasuratan iti dayta nga aldaw. Santo maitukon ti kararag, yantangay pagaammoda amin a ti panagballigi ti intero a proyekto agdepende iti bendision ni Jehova.​—Sal. 127:1.

Apaman a nangrugi ti trabaho, napartak ti panagandarna. Kalpasan ti maysa nga oras timmakderen dagiti paragpag ti diding. Sumarunon dagiti bayakan (trusses) ti atep. Mailansan dagiti plywood a paset ti diding. Nangrugin dagiti electrician nga agikonektar kadagiti waya. Maikapeten dagiti tubo a para iti air-conditioning ken heating. Sangalendan dagiti kabinet sada ikapet. No dadduma agtudo iti intero a ngudot’ lawas, wenno nakalamlam-ek unay wenno nakadagdagaang, ngem agtultuloy lattat’ trabaho. Awan kompetision, awan sinnalisal kadagiti konstruktor.

Masansan, sakbay a lumnek ti init iti maikadua nga aldaw, nalpasen ti Kingdom Hall​—nadekorasionanen ti uneg, nalabit namulaanen ti aglawlaw. No nesesita, mayurnos ti trabaho iti las-ud ti tallo nga aldaw, wenno nalabit dua a ngudot’ lawas. No maturposen ti proyekto, adu kadagiti nagtrabaho ti agbati, a nabannog ngem nakaragragsakda, tapno nanamenda ti umuna a regular a miting ti kongregasion, ti panagadal iti Pagwanawanan.

Gapu ta agduaduada di la ket ta saan a nasayaat ti kalidad ti kastat’ kapartakna a patakder, adda dagiti sumagmamano nga umili sadi Guymon, Oklahoma, E.U.A., a nangayab iti city inspector. “Imbagak kadakuada a no kayatdat’ makakita iti hushusto a trabaho, sarungkaranda koma ti Kingdom Hall!” kinunat’ inspector idi nasaritana dayta nga insidente kadagiti Saksi. “Dakayo a tattao nasaysayaat pay ti panangtrabahoyo kadagiti nailemmeng ken di makitkita a parte!”

Bayat nga immadut’ kasapulan a Kingdom Hall, dagiti kakabsat a nangputar iti metodo ti napartak a panagbangon sinanayda dagiti dadduma. Nagsaknap ti damag kadagiti dadduma a daga. Di ngata mabalin a maipakat met kadagita dagiti kasta a metodo ti panagbangon?

Ti Napartak a Panagbangon Nagbalin nga Internasional

Ti panagbangon idi kadagiti Kingdom Hall sadi Canada atrasadon no idilig iti kasapulan dagiti kongregasion. Dagiti Saksi sadi Canada inimbitaranda dagidiay organisador kadagiti proyekto ti napartak a panagbangon sadi Estados Unidos tapno ilawlawagda ti metododa. Idi damo, dagiti taga Canada agduaduada no agballigi dayta sadi Canada, ngem impadasda. Ti damo a Kingdom Hall a kastoy ti pannakabangonna sadi Canada timmakder sadi Elmira, Ontario, idi 1982. Idi 1992, addan 306 a Kingdom Hall ti Canada a kastoy ti pannakapatakderda.

Dagiti Saksi sadi Northampton, Inglaterra, impapanda a mabalin met dayta sadiay. Ti proyektoda, idi 1983, isut’ damo iti Europa. Dagiti kakabsat a batikan (eksperto) iti kastoy a tipo ti konstruksion nagbiaheda manipud Estados Unidos ken Canada tapno imatonanda ti proyekto ken tulonganda dagiti lokal a Saksi a makaadal no kasano dayta. Presente met dagiti dadduma a boluntario nga adayo ti naggapuanda kas iti Japan, India, Francia, ken Alemania. Napanda sadiay kas boluntario, saan a pasuelduan. Kasano a posible dayta? Kas kinunat’ manangaywan ti grupo dagiti Saksi nga Irish a timmulong iti kasta a proyekto, ‘Agballigi agsipud ta agbibinnadang dagiti kakabsat babaen iti impluensia ti espiritu ni Jehova.’

Uray pay no kasla imposible dagita a proyekto gapu kadagiti lokal nga ordinansa iti panagbangon, masansan a natakkuatan dagiti Saksi, a no la ket mailawlawag dagiti detalye kadagiti opisial ti siudad, siraragsakda no kuan a makibinnadang.

Idi nalpas ti proyekto a napartak a panagbangon sadi Norway, amianan ti Arctic Circle, kinuna ti diario a Finnmarken: “Talaga a nakaskasdaaw. Dayta lat’ sao a masarakanmi a mangdeskribir iti gapuanan dagiti Saksi ni Jehova itay ngudot’ lawas.” Umarngi met, idi binangon dagiti Saksi idiay North Island ti New Zealand ti napintas a Kingdom Hall iti las-ud ti dua ket kagudua nga aldaw, impaulo ti lokal a diario iti umuna a panidna: “Proyekto a Gistay Milagro.” Innayon ti artikulo: “Nalabit ti karkarna nga aspeto ti proyekto isut’ kina-organisado ken kinalinak ti trabaho.”

Ti kinasulinek ti lugar a makasapul iti Kingdom Hall saan nga arig-bantay a tuben. Sadiay Belize naangay ti proyekto a napartak a panagbangon, nupay kasapulan nga idanon amin a materiales idiay isla nga 60 kilometro manipud Siudad ti Belize. Idi binangonda ti air-conditioned a Kingdom Hall sadi Port Hedland, Makinlaud nga Australia, iti maysa a ngudot’ lawas, gistay amin a materiales ken trabahador naggapudat’ 1,600 a kilometro a kaadayo. Kukua dagiti trabahador dagiti pasaheda. Kaaduan kadagiti nagtrabaho dida personal nga am-ammo dagiti Saksi iti Kongregasion ti Port Hedland, ket mammano la kadakuada ti makigimongto dita. Ngem saan a dayta ti nangtiped kadakuada a mangiyebkas iti ayatda iti kasta a wagas.

Uray pay no ti dagup dagiti Saksi ket bassit, saan a daytat’ nangpawil ti pannakausar dagiti kasta a metodo ti panagbangon. Agarup 800 a Saksi sadi Trinidad ti nagboluntario a napan sadi Tobago a timmulong kadagiti 84 a Kristiano a kakabsatda a nangbangon iti hall idiay Scarborough idi 1985. Dagidiay 17 a Saksi (kaaduanna babbai ken ubbing) sadi Goose Bay, Labrador, talaga a kasapulanda unay ti badang tapno makaaramiddat’ bukodda a Kingdom Hall. Idi 1985, dagiti Saksi manipud nadumaduma a paset ti Canada nangarkilada iti tallo nga eroplano para kadagiti 450 a napan nagtrabaho idiay Goose Bay. Kalpasan ti dua nga aldaw a panagbannog, naangay ti programa a pannakaidedikar dayta nalpas a hall idi rabii ti Domingo.

Dina kaiyulogan nga amin a Kingdom Hall itan ket mapatakder babaen iti napartak a panagbangon, ngem umad-adun ti kasta.

Dagiti Komite ti Panagbangon ti Rehion

Idi ngalay ti 1986 pimmardas unay ti pannakasapul kadagiti baro a Kingdom Hall. Iti tawen sakbayna, 2,461 dagiti naporma a baro a kongregasion iti intero a lubong; 207 kadagita sadi Estados Unidos. Dadduma a Kingdom Hall us-usaren dagiti tallo, uppat, wenno lima pay ketdi a kongregasion. Kas impadtot’ Kasuratan, talaga a pappapartaken ni Jehova ti trabaho a panagummong.​—Isa. 60:22.

Tapno masierto ti kasayaatan a pannakaaramat dagiti trabahador ken tapno mabenepisiaran amin nga agbangbangon iti Kingdom Hall kadagiti eksperiensia a nagupgopen, inrugi nga inyurnos ti Sosiedad ti aktibidad dagita. Kas pangrugian, idi 1987 nabingbingay ti Estados Unidos kadagiti 60 a Komite ti Panagbangon ti Rehion. Nakaad-adut’ asikasuenda; di nagbayag makatawen wenno nasursurok pay ti nailinea a trabahuen ti dadduma kadakuada. Dagidi nadutokan nga agserbi kadagita a komite lallakida nga, umuna amin, kualipikadoda ti naespirituan, papanglakayen ti kongregasion, mapagulidanan no iti panangipakatda kadagiti bunga ti espiritu. (Gal. 5:22, 23) Adu met kadakuadat’ batikan a realtor, iti inhinieria, konstruksion, panangipagnat’ negosio, kina-awan aksidente, ken dagiti umarngi a bambanag.

Dagiti kongregasion naparegtada a makiuman iti Komite ti Panagbangon ti Region sakbay a pilienda ti pakaipatakderan ti baro a Kingdom Hall. No adda nasursurok ngem maysa a kongregasion iti siudad, maparegtada a makiuman kadagiti manangaywan ti sirkito, ti manangaywan ti siudad, ken dagiti panglakayen nga adda iti aglawlaw a kongregasion. Dagiti kongregasion nga agpalplano iti dakkel a panagretubar wenno mangbangon iti baro a Kingdom Hall ket nabalakadan nga agsursuro manipud kapadasan dagiti kakabsat iti Regional Building Committee dita lugarda ken kadagiti giya nga inted ti Sosiedad kadakuada. Baeten dagita a komite, maiyurnos ti panagbibinnadang a mangummong kadagiti kasapulan a nasigo a trabahador a kakabsat nga aggapu kadagiti agarup 65 a linea ti trabaho a datin a boluntario kadagita a proyekto.

Bayat a simmayaat dagiti metodo, mabalinen a kissayan ti dagup dagiti trabahador iti kada proyekto. Imbes a rinibo dagiti mapan iti disso a pagbangonan nga agbuybuya wenno mangitukon iti serbisioda, mammano nga aggigiddan ti 200 iti maysa a disso iti mamimpinsan. Imbes nga agtalinaedda sadiay iti intero a ngudot’ lawas, sa la mapan dagidiay trabahador iti oras a kasapulan daydiay lineada. Iti kasta ad-adut’ tiempo a mabusbosda kadagiti pamiliada ken kadagiti aktibidad ti bukodda a kongregasion. No kabaelan dagiti lokal a kakabsat nga aramiden ti maysa a klase ti trabaho a di unay nabayag, masansan a natakkuatanda a mas praktikal no sada la awagan ti grupo ti napartak a panagbangon no kadagidiay aspeto ti trabaho a pakasapulan unay kadakuada.

Nupay ti intero a panagandar dayta ket karkarnat’ kapartakna, saan a daytat’ kangrunaan a punto. Napatpateg ti panangipaayda iti de kalidad a panagbangon kadagiti kalalaingannat’ kadakkelna a Kingdom Hall a nadisenio para iti lokal a kasapulan. Naaramid ti naannad a panagplano tapno maragpat daytoy bayat a salsalimetmetan met ti magastos. Siniguradoda met nga inikkan ti importansia ti kinatalged​—kinatalged dagiti trabahador, kaarruba, dagiti lumabas, ken dagidiay mangusarto iti Kingdom Hall.

Idi a nakagteng kadagiti dadduma a daga ti damag maipapan itoy nga urnos ti panagbangon kadagiti Kingdom Hall, dagiti sanga nga opisina ti Sosiedad a namati a makapalaing kadagiti lugarda daytoy naikkanda kadagiti kasapulan a detalye. Idi 1990, dagiti Komite ti Panagbangon ti Rehion a dinutokan ti Sosiedad tumultulongdan nga agbangon ti Kingdom Hall kadagiti pagilian kas ti Alemania, Argentina, Australia, Britania, Canada, España, Francia, Japan, Mexico, ken Sud Africa. Naisurot dagiti metodo ti panagbangon iti lokal a kasasaad. No masapul ti tulong manipud kadagiti sabali a sanga maipaay iti panagbangon ti Kingdom Hall, naiyurnos daytoy babaen iti opisina ti hedkuarter ti Sosiedad. Kadagiti dadduma a paset toy lubong, mabangbangonen dagiti baro a hall iti mano la nga aldaw; kadagiti dadduma a lugar, sumagmamano a lawas wenno nalabit bulbulan. Buyogen ti naannad a panagplano ken agbibinnadang a tignay, ti tiempo a masapul a mangbangon iti baro a Kingdom Hall talaga nga immababan.

Ti panagbangon nga aktibidad dagiti Saksi ni Jehova saan a limitado laeng kadagiti Kingdom Hall. Masapul pay dagiti daddadakkel a pasilidad no agtataripnong dagiti grupo ti kongregasion para iti tinawen nga asamblea sirkito ken espesial nga aldaw ti asamblea.

Panangparnuay Kadagiti Kasapulan nga Assembly Hall

Iti unos dagiti tawtawen, dagiti nagduduma a kita dagiti pasilidad isudat’ nausar kadagiti asamblea sirkito. Inabangan dagiti Saksi ni Jehova dagiti lugar a kas kadagiti civic auditorium, eskuelaan, teatro, armory, pagaayaman, ken karnabalan. Kadagiti sumagmamano a lokalidad, adda dagiti napintas a pasilidad a nababat’ abangda. Ngem masansan, mabusbos ti adu a tiempo ken bannog a mangdalus iti lugar, mangisimpa kadagiti alikamen, mangbangon iti plataporma, ken agbunag kadagiti tugaw. No dadduma makanselar pay dayta a lugar iti ultimo minuto. Bayat nga immadut’ bilang dagiti kongregasion, ad-adda met a rimmikut ti panagbiruk kadagiti umdas kalawada a lugar. Aniat’ remedio daytoy?

Manen, ti solusion isut’ panangbangon dagiti Saksi ni Jehova iti bukodda. Kayulogan daytoy ti panangritubar iti maikanatad a patakder ken panangbangon kadagiti baro. Ti immuna kadagita nga Assembly Hall sadi Estados Unidos isut’ maysa a teatro sadi Long Island City, Nueva York, a rinitubar ken inaramat dagiti Saksi ni Jehova idi arinunos ti 1965.

Naigiddato met, dagiti Saksi idiay Guadeloupe nga isla ti Caribbean agdisdiseniodat’ Assembly Hall para iti kasapulanda. Ammoda a nasaysayaat no angayenda dagiti asamblea sirkito kadagiti nagduduma a lugar. Ngem kaaduan nga ili awanandat’ nalawa a pasilidad. Isu a nangaramid dagiti Saksi iti mayakar-akar a pavilion a suer ti tubona ken aluminum ti atepna, a nalawa para iti 700 a tattao ken mabalin nga ipatakder basta adda nalawa ken patag a lote. Namin-adu a pinalawada dayta a pavilion, agingga a nakalaon ti 5,000. Agasenyo ti panangilugan, panangipatakder, ken panangwarwar iti 30 tonelada a materiales kada asamblea! Dayta nga Assembly Hall namin-adu a naipatakder ken nawarwar kada tawen iti unos ti 13 a tawen, agingga a dimteng ti tiempo a narigaten ti agbiruk iti lote a pangipatakderan iti dayta gapuna nesesitan a gumatangdat’ daga ket binangondan ti permanente nga Assembly Hall, nga ita usarendan kadagiti asamblea sirkito ken kumbension distritoda.

Kadagiti adu a lugar, dagiti agdama a patakder nagbalinda a proyekto nga Assembly Hall. Idiay Inglaterra, sadi Hays Bridge, Surrey, ginatangda ti 50-añosen nga eskuelaan sada rinitubar. Naisaad dayta iti las-ud ti 11 ektaria a napintas nga away. Dagiti dati a pagsinean ken maysa a bodega ti industria ti naritubar ken us-usarenda sadi España; adda di naus-usar a paktoria ti tela sadi Australia; salon a pagsasalaan sadi Quebec, Canada; bolingan sadi Japan; bodega sadi Republika ti Korea. Isuamin dagitoy ti naritubar a nagbalin a napipintas nga Assembly Hall nga apagpag-isu unay nga agserbi kas nalawa a sentro para iti edukasion ti Biblia.

Dagiti dadduma nga Assembly Hall interamente a kabbaro, a napatakder manipud baba aginggat’ tuktok. Ti nagpaiduma a walo ti sulina a disenio ti pagasambleaan sadi Hellaby, South Yorkshire, Inglaterra, sa gapu ta kaaduan a nagtrabaho ket boluntario isut’ nakaputaran ti artikulo a naipablaak iti magasin ti Institution of Structural Engineers. Ti Assembly Hall sadi Saskatoon, Saskatchewan, idiay Canada, nadisensio a manglaon ti 1,200; ngem no maisubli dagiti makin-uneg a dibisionna, agserbi daytoy kas uppat nga agkakadinna a Kingdom Hall. Ti Assembly Hall ti Haiti (nalpasen a material ken naipaktora manipud Estados Unidos) silulukat dagiti dua a bakrangna gapuna kankanayon a mapariiran dagiti adda iti uneg gapu iti naynay a pul-oy ti angin​—a mangpabang-ar kadakuada gaput’ nadagaang nga init ti Haiti. Ti pagasambleaan ti Port Moresby, Papua New Guinea, nadisenio a maluktan dagiti dadduma a didingna a kasla ridaw tapno makabuya ti ad-adu pay a tattao ngem ti malaon iti uneg.

Ti desision a mangbangon iti Assembly Hall saan nga ikeddeng ti bassit a grupo dagiti manangaywan sadanto ekspektaren a suportaran dayta dagiti amin a kakabsat. Sakbay a mabangon ti uray ania a baro nga Assembly Hall, siguraduen ti Sosiedad a nausig a siaannad a dayta ket kasapulan agraman kasansan ti pannakaaramatna. Saan la a maamiris ti kinaganetget dagiti kakabsat iti proyekto no di pay ket ti sapasap a kasapulan ti tay-ak. Mapagsasaritaan dayta kadagiti amin a kongregasion a maapektaran, tapno masierto ti tarigagay ken abilidad dagiti kakabsat a mangsuporta iti dayta.

Iti kasta, inton mangrugin ti trabaho, naimpusuanto a suportaran dayta dagiti Saksi ni Jehova dita a lugar. Dagiti Saksi ni Jehova a mismo ti mangparuar ti pundo iti kada proyekto. Mailawlawag ti pinansial a kasapulan, ngem dagiti kontribusion ket boluntario ken di maipakpakaammot’ naggapuanda. Nasakbay a maaramid ti naannad a panagplano, ket ti proyekto makaadal kadagiti eksperiensia a nagun-oden iti panagbangon kadagiti Kingdom Hall ken, masansan, kadagiti proyekto nga Assembly Hall kadagiti dadduma a lugar. No nesesita, adda dagiti aspeto ti trabaho a mayawat kadagiti komersial a kontratista, ngem kaaduan a trabaho ti asikasuen dagiti naganetget a Saksi. Mabalin a kaguduat’ gastos ti masalbar.

Gapu ta dagiti agtrabaho ket buklen dagiti nalaing a propesional agraman dagiti dadduma a mangiboluntario ti tiempo ken talentoda, masansan a napartak ti panagtignay ti intero a proyekto. Adda dagiti proyekto a maalanat’ nasurok a makatawen. Ngem sadiay Vancouver Island ti Canada, idi 1985, agarup 4,500 a boluntario dagiti nangkompleto iti 2,300 a metro kuadrado nga Assembly Hall iti siam nga aldaw laeng. Linaonna pay ti Kingdom Hall para 200 nga usaren dagiti lokal a kongregasion. Idiay New Caledonia, inyulog ti gobierno ti curfew idi 1984 gaput’ napolitikaan a panaggugulo, kaskasdi dumanon pay ti 400 kada gundaway ti boluntario a nagtrabaho iti Assembly Hall, ket nairingpas dayta iti uppat a bulan laeng. Idiay asideg ti Stockholm, Sweden, adda napintas, praktikal nga Assembly Hall, a naglaon ti 900 a de kudson a tugtugaw a roble, a nabangon iti las-ud ti pito a bulan.

No dadduma masapul ti regget a dumatag kadagiti korte tapno maalat’ permiso a mangbangon kadagitoy nga Assembly Hall. Kastat’ napasamak idiay Canada sadi Surrey, British Columbia. Idi ginatangda ti lote, ti ordinansa ti sona ipalubosna pay laeng ti panagbangon iti kasta a lugar a pagdaydayawan. Ngem kalpasan a naisubmite ti plano a panagbangon, idi 1974, ti Konseho ti Distrito ti Surrey nangiruar iti reglamento nga idiay Zone P-3 laeng ti mabalin a pakaibangonan dagiti simbaan ken pagasambleaan​—idinto ta awan met kasta a sona! Ngem, 79 simbaan dagiti immun-una a napatakder iti dayta a munisipio nga awan rimsua a problema. Nakagteng dayta idiay korte. Naulit-ulit a nangabak dagiti Saksi ni Jehova. Idi naiwalinen ti tuben a pinataud dagiti agil-ilem nga opisial, intuloyen dagiti boluntario a trabahador dayta a proyekto a buyogen ti kinaganetget ket agpito a bulan laeng nalpasen. Kas met la iti kasasaad idi ni Nehemias nga impamuspusannat’ pannakabangon manen dagiti pader ti kadaanan a Jerusalem, nariknada a ‘ti ima ti Dios indalanna ida’ tapno mairingpas ti trabaho.​—Neh. 2:18.

Idi ginatang dagiti Saksi ni Jehova idiay Estados Unidos ti Stanley Theater sadi Jersey City, New Jersey, ti patakder inlista ti estado kas historiko a lugar. Nupay ti teatro ket kasapulanna unayen ti pannakatarimaan, dakkel ti potensialna kas Assembly Hall. Kaskasdi, idi tarigagayanen dagiti Saksi a tarimaanen, nagkitakit dagiti opisial ti siudad a mangted ti permiso. Ti mayor dina kayat nga adda koma dagiti Saksi ni Jehova dita a lugar; sabali ti planona para iti teatro. Napan ti kaso idiay korte tapno malapdan koma dagiti opisial a mangusar a sikikillo iti autoridadda. Ti korte pinangabakna dagiti Saksi. Di nagbayag kalpasanna, saanen nga imbutos dagiti umili dayta a mayor. Napartaken ti panagandar ti trabaho iti pagasambleaan. Ti resultana isut’ kaadda ti napintas nga Assembly Hall a makalaon iti nasurok nga 4,000. Lugar dayta nga ipadpadayaw nga agpada dagiti negosiante ken dagiti agnanaed iti dayta a siudad.

Kadagiti kallabes a 27 a tawen, iti adu a paset ti globo, binangon dagiti Saksi ni Jehova dagiti makaatrakar ken praktikal nga Assembly Hall a kas sentro ti edukasion iti Biblia. Dagita a pagasambleaan umad-adun ti dagupda sadi Norte ken Sud America, Europa, Africa, ken ti Oriente, agraman kadagiti adu nga isla. Kadagiti dadduma a daga​—kas koma sadi Nigeria, Italia, ken Denmark​—nangpatakder dagiti Saksi ni Jehova kadagiti daddadakkel pay, permanente, awan linongna a pasilidad a mausar kadagiti asamblea distritoda.

Kaskasdi, saan nga Assembly Hall ken Kingdom Hall laeng dagiti proyekto a bangbangonen dagiti Saksi ni Jehova tapno umabante ti pannakaiwaragawag ti Pagarian ti Dios.

Dagiti Opisina, Pagimprentaan, ken Bethel iti Intero a Lubong

Iti intero a globo idi 1992, addan ti 99 a sanga nga opisina ti Watch Tower Society, a tunggal maysa urnosenna ti aktibidad dagiti Saksi ni Jehova iti dayta a deppaar ti tay-ak ti lubong. Nasurok a kaguddua kadagitoy a sanga ti agim-imprentat’ nadumaduma a kita a mangiyabante iti trabaho a panangisuro iti Biblia. Dagiti trabahador kadagiti sanga agdagusda, kaaduanna, kas dakkel a pamilia kadagiti pagtaengan a maaw-awagan Bethel, kayatna a sawen “Balay ti Dios.” Gapu ta immadun ti dagup dagiti Saksi ni Jehova sa rimmang-ay ti trabahoda a panangaskasaba, nesesita a palawaen dagitoy a pasilidad ken nabangon dagiti kabbaro.

Gaput’ kapartak ti irarang-ay ti organisasion kadarato 20 inggat’ 40 a kakasta a programa a panagpalawa ti aggigiddan. Kinalikaguman daytoy ti dakkel a programa ti internasional a panagbangon.

Gapu iti kaadut’ konstruksion a maang-angay iti intero a lubong, ti Watch Tower Society addaanen iti bukodna nga Engineering and Drafting Department sadi hedkuarter ti Nueva York. Dagiti batikan nga inhiniero ti adu a tawenen pinanawanda dagiti panggedanda ket nagboluntarioda a tumulong iti amin a tiempo kadagiti proyekto ti panagbangon a direktamente a nainaig iti aktibidad ti Pagarian. Sa, dagidiay addaan kapadasan sinanayda dagiti sabali pay a lallaki ken babbai iti trabaho ti inhinieria, panagdisenio, ken drafting. Gapu ta daytoy a departamento ti mangurnos kadagiti trabaho, ti kapadasanda iti panagbangon kadagiti sanga iti aniaman a paset toy lubong mabenepisiaranna dagiti agtartrabaho kadagiti proyekto iti sabsabali a daga.

Idi agangay, ti kawadwad ti trabaho a maas-asikaso isut’ nakagapu iti pannakalukat ti Regional Engineering Office sadi Japan a tumulong kadagiti plano ti konstruksion para kadagiti proyekto iti Oriente. Dadduma a Regional Engineering Offices ti agan-andar sadi Europa ken Australia, nga addaan kadagiti personnel a naggapu kadagiti nagduduma a daga. Dagitoy makibinnadangda a siinget iti opisina ti hedkuarter, ket ti serbisioda, agraman panagusar ti computer technology, kissayanna ti dagup dagiti drafting personnel a kasapulan iti uray adino a pakaangayan ti konstruksion.

Adda dagiti proyekto a di unay panakkelen. Kastat’ kasasaad ti opisina a nabangon sadi Tahiti idi 1983. Linaon daytoy dagiti opisina, pagbodegaan, ken pagdagusan dagiti walo a boluntario a trabahador. Kasta met ti kasasaad ti uppat a grado a sanga nga opisina a napatakder idiay Martinique nga isla ti Caribbean idi 1982 inggat’ 1984. Nupay dagitoy a patakder ket saanda a karkarna kadagiti taga dadakkel a siudad kadagiti sabali a daga, inatrakarda ti atension ti publiko. Imbaga ti diario a France-Antilles a ti sanga a patakder ti Martinique “maysa nga obra maestra ti arkitektura” a pakakitaan ti “dakkel a panagayat iti trabaho a pulidot’ pannakaaramidna.”

No maidilig iti kadakkel, kadagiti nalpasen a patakder idiay Canada idi 1981 inramanna ti pagimprentaan, wenno paktoria, a nasurok 9,300 metro kuadrado nga espasio ti suelo ken ti patakder a pagtaengan para 250 a boluntario. Idiay Cesario Lange, idiay Brazil, ti Watch Tower complex a nalpas iti daydi met la a tawen ramanennat’ walo a patakder, gistay 46,000 metro kuadrado ti espasio a saknapanna. Nakausardat’ 10,000 a karga ti trak a semento, bato, ken darat, agraman konkreto nga adigi a dobliendat’ kangato ti Mount Everest no pagtutuonen! Idi 1991, nakompleto ti dakkel a baro a pagimprentaan idiay Filipinas, nasken met iti pannakaibangon ti 11-grado a patakder a pagtaengan.

Tapno masupusopan ti kasapulan dagiti umad-adu a manangiwaragawag iti Pagarian idiay Nigeria, adda nairugi a dakkel a proyekto sadi Igieduma idi 1984. Iraman daytoy ti paktoria, nalawa a patakder a pagopisinaan, uppat a konektado a patakder a pagtaengan, ken dadduma pay a kasapulan a pasilidad. Naiplano a ti paktoria buklen ti puro nalpasen a material sadanto ipaktora manipud Estados Unidos. Ngem bassit lat’ tiempo dagiti kakabsat maipaay iti importasion. Idi ngarud ta naragpatda dagitoy sa simmangpeten a sitatalged dagita idiay lugar a pagbangonan, saan nga inako dagiti Saksi ti balligi no di ket nagyamandat’ pamendision ni Jehova.

Napartak nga Ilalawa iti Intero a Globo

Ti kapartak ti irarang-ay ti trabaho a pannakaiwaragawag ti Pagarian, kasta la unay, ta uray kalkalpas a napalawa dagiti pasilidad ti sanga iti maysa a pagilian, nesesita nga irugi manen ti panagbangon di unay agbayag kalpasanna. Amirisenyo ti sumagmamano nga ehemplo.

Idiay Peru ti napintas a baro a sanga​—nga adda opisinana, 22 a kuarto a pagturogan agraman dadduma a kangrunaan a pasilidad para kadagiti miembro ti pamilia ti Bethel, ken maysa a Kingdom Hall​—nalpas idi arinunos ti 1984. Ngem ti reaksionda iti mensahe ti Pagarian dita a daga ti Sud America dakdakkel ngem ti sineggaanda. Uppat a tawen kalpasanna nesesitat’ panangdobleda iti agdama a complex, ngem itan dinisenioda a kabaelanna a lasaten dagiti napigsa a ginggined.

Adda nalawa a complex ti sanga a nairingpas idiay Colombia idi 1979. Kasla umdasen daydi para kadagiti adu a tawen nga umay. Nupay kasta, iti las-ud ti pito a tawen gistay nagdoble ti dagup dagiti Saksi idiay Colombia, ket ti sanga iyim-imprentanan dagiti magasin a La Atalaya ken ¡Despertad! (Pagwanawanan ken Agriingkayo!) saan la a para Colombia no di pay ket para kadagiti uppat a kabangibangna a pagilian. Kasapulan nga agbangonda manen idi 1987​—itan iti lote nga adda paglawaanna.

Idi 1980, dagiti Saksi ni Jehova idiay Brazil binusbosdat’ 14,000,000 nga oras iti publiko a panangikasaba iti mensahe ti Pagarian. Limmagto ti numero iti gistay 50,000,000 idi 1989. Ad-adu a tattao ti mangipakpakita ti tarigagayda a mangpennek iti naespirituan a panagbisinda. Dagiti agkakalawa a pasilidad a naidedikar idi 1981 saanen nga umdas. Idi Setiembre 1988, inrugidan ti nagkali para iti baro a paktoria. Daytoyto ti mangipaay ti 80 porsiento nga ad-adu nga espasio ngem iti agdama a paktoria, ket siempre, masapul pay dagiti pasilidad para iti nanayonan a pamilia ti Bethel.

Idiay Selters/Taunus, Alemania, ti maikadua a kadakkelan a complex a pagimprentaan ti Watch Tower Society naidedikar idi 1984. Lima a tawen kalpasanna, gaput’ panagrang-ay ti Alemania agraman gundaway a mangpalawat’ trabaho a panangasaba kadagiti daga nga iyim-imprentaan ti sanga kadagiti literatura, inrugidat’ nagplano a mangpalawa iti paktoria iti nasurok 85 porsiento sadanto iraman dagiti dadduma pay a pasilidad a mangsuporta kadagiti personnel.

Ti sanga ti Japan manipud Tokyo naiyalis kadagiti dakdakkel a baro a pasilidad sadi Numazu idi 1972. Napalawa manen idi 1975. Idi 1978 nakagatangdat’ sabali a lote, sadi Ebina; ket rinugianda a sidadaras a binangon ti maysa a paktoria a mamitlo a dakdakkel ngem ti adda sadiay Numazu. Nairingpas daytoy idi 1982. Kaskasdi a dipay umdas daydi; ad-adu pay a patakder ti nainayon idi 1989. Saan koma kadi a nasaysayaat no namimpinsanda laengen a nangaramid iti nakadakdakkel? Saan. Ti bilang dagiti manangiwaragawag iti Pagarian idiay Japan namin-adun a nagdoble-doble iti wagas a di ninamnama ti asinoman. Nanipud 14,199 idi 1972, limmagtot’ dagupda iti 137,941 idi 1989, ket dakkel a dagupda ti naipamaysa iti amin a tiempo a ministerio.

Ti umarngi a padron isut’ maim-imatangan kadagiti dadduma a paset ti globo. Kalpasan ti maysa a dekada​—ket no dadduma las-ud lat’ sumagmamano a tawen​—kalpasan a mabangon dagiti dadakkel a sanga nga addaan pagimprentaan, nesesita manen ti dakkel nga ilalawa. Kastat’ napasamak idiay Mexico, Canada, Sud Africa, ken ti Republika ti Korea, malaksid pay kadagiti dadduma.

Asinoda ti aktual a mangbangon? Kasano a mairingpas amin dagita?

Rinibribo Dagiti Sigagagar a Tumulong

Idiay Sweden, kadagidi 17,000 a Saksi iti pagilian idi mabangon ti sangada sadi Arboga, ag-5,000 ti boluntario a timmulong iti trabaho. Kaaduan kadakuada ket basta situtulokda a kas peon, ngem addada met umdas a nasisigo a propesional a nangsigurado nga umisot’ pannakatrabahona. Aniat’ nangtignay kadakuada? Ayat ken Jehova.

Idi nadamag ti maysa nga opisial iti opisina dagiti surveyor idiay Denmark a Saksi ti mangaramid iti baro a sanga sadi Holbæk, isut’ nagpangadua. Nupay kasta, kadagiti Saksi a nagboluntario a tumulong, umdas ti dagup dagidiay nalaing. Kaskasdi, saan aya a nasaysayaat koma no nanangdanda laengen kadagiti komersial a kontratista? Kalpasan ti proyekto, dagiti eksperto a naggaput’ departamento ti panagbangon iti dayta nga ili sinursorda dagiti napatakder ket kinomentuanda ti pulido a pannakaaramidna​—banag a mammanoda a makita kadagiti komersial pannakatrabahona kadagitoy a tiempo. Daydi met opisial a nagpangadua, immisem sana kinuna: “Ammoyo, diak idi ngamin ammo ti klase ti organisasionyo.”

Agaaddayo unay dagiti il-ili idiay Australia; gapuna, kaaduan kadagiti 3,000 a nagboluntario a tumulong kadagiti pasilidad ti sanga sadi Ingleburn idi 1978 inggat’ 1983 nagbiaheda iti di kumurang 1,600 a kilometro. Nupay kasta, naiyurnos dagiti bus a pagluganan dagiti boluntario, ket dagiti kongregasion a malabsan ti lugan siaayatda a nangidiaya kadagiti makan ken asosasion dagiti kakabsat bayat nga agsardengda nga aginana. Adda dagiti kakabsat nga inlakodat’ balayda, insardengdat’ negosioda, nagbakasionda, ken dadduma pay a sakripisio ti inaramidda tapno makiramanda iti proyekto. Adu a grupo dagiti eksperiensiado a trabahador ti immay​—dadduma saan la a namimpinsan​—tapno agsementoda, agikabil kadagiti bobeda, agpatakder kadagiti bakud. Dadduma ti nagidonar kadagiti materiales.

Kaaduan a nagboluntario kadagitoy a proyekto saanda a nasigo, ngem babaen iti sangkabassit a pannakasanay, dadduma kadakuada ti nangibaklay kadagiti nadagsen a responsabilidad ket ekselente ti gapuananda. Nasursuroda ti mangbukel kadagiti tawa, mangpaandar kadagiti traktora, agsemento, ken agmason. Adda piho a paglalainganda no idilig kadagidiay komersial ti panangaramidda iti kasta met la a trabaho. Kasano a kasta? Dagidiay addaanen kapadasan situtulokda a mangiranud iti pannakaammoda. Awan kadakuadat’ nagamak di la ket ta adda mangala iti puestoda; adut’ trabaho nga umdas para kadagiti isuamin. Ket adda nabileg a manggutugot iti panangaramiddat’ de kalidad a trabaho, ngamin inaramidda daytoy kas ebkas ti ayatda iti Dios.

Kadagiti amin a lugar ti konstruksion, adda dagiti Saksi a mangbukel iti bugas ti “pamilia” dagiti agbangbangon. Idi naangay ti trabaho sadi Selters/Taunus, Alemania, nanipud 1979 inggat’ 1984, sumagmamano a gasut ti kaaduan a nangbukel iti bugas dagiti trabahador. Rinibribo dagiti nakitimpuyog kadakuada iti nagduduma a periodo ti panawen, kaaduanna iti ngudot’ lawas. Naannad a naiplano daytoy tapno no agsangpeten dagiti boluntario, ket adda umdas a trabahuenda.

Mientras imperpekto dagiti tattao, addanto latta problema, ngem dagitoy agtrabaho kadagitoy a proyekto risutenda dagita sigun kadagiti prinsipio ti Biblia. Pagaammoda a ti panangaramid kadagiti banag sigun iti Nakristianuan a wagas ket napatpateg ngem ti kina-episiente. Kas pammalagip, idiay pagtrabahuan sadi Ebina, Japan, adda dagiti dadakkel a karatula a nakaretrato dagiti trabahador nga addaan kadagiti limmandok a kallugong, ket iti tunggal kallugong adda bungat’ espiritu a naisurat iti letrat’ Hapon nga: ayat, rag-o, talna, mabayag a panagitured, kinamanangaasi, kinaimbag, pammati, kinaemma, panagteppel. (Gal. 5:22, 23) Dagidiay bumisita iti pagtrabahuan makita ken mangngegda ti naggidiatan. Kas panangiyebkasnat’ paliiwna, kinuna ti maysa a reporter a nangsursor iti matartrabaho idiay Brazil: “Awan ti gulo wenno kurang a kooperasion . . . Daytoy Nakristianuan nga atmospera isut’ mangigidiat ditoy kadagiti gagangay a makitkita a komersial a konstruksion ti Brazil.”

Patinayon nga Irarang-ay Idiay Sangalubongan a Hedkuarter

Bayat ti irarang-ay dagiti sanga ti Watch Tower Society, nesesita met a palawaen dagiti pasilidad ti sangalubongan a hedkuarter. Naaramid dagiti dadakkel a kanayonan ti paktoria ken pagopisinaan sadi Brooklyn ken kadagiti dadduma a disso ti Estado ti Nueva York iti nasurok a naminsangapulon a daras nanipud Gubat Sangalubongan II. Tapno adda pagdagusan dagiti personnel, nesesitat’ pannakabangon wenno igagatang ken panangritubar kadagiti nadumaduma a patakder, dakkel ken bassit. Adda manen kanayonan nga ilalawa sadi Brooklyn a naiyanunsio idi Agosto 1990 ken idi Enero 1991​—idinto ta madama pay laeng ti nagdakkel a proyekto a Watchtower Educational Center iti amianan ti Siudad ti Nueva York a nairugi idi 1989, a naidisenio a makalaon ti 1,200 a tattao, agraman dagiti agnanaed a personnel ken dagiti estudiante.

Nanipud 1972, awan ressatnan ti trabaho a panagbangon idiay sangalubongan a hedkuarter sadi Brooklyn ken dagiti nasinged pannakainaigda a pasilidad kadagiti dadduma a paset ti Nueva York ken sadi New Jersey. Idi agangay, bimmatad nga uray pay ginasgasut ti bilangda, dagiti regular a trabahador iti konstruksion dida magebgebanen ti trabaho. Gapuna, idi 1984 naiyusuat ti agtultuloy a programa ti temporario a trabahador. Naipatulod ti surat kadagiti nasurok idi a 8,000 a kongregasion idiay Estados Unidos tapno maawis dagiti kualipikado a kakabsat nga umay tumulong iti makalawas wenno nasursurok pay. (Ti kasta met la a programa mayat ti andarna kadagiti dadduma a sanga, agraman Australia, a sadiay dagidiay makatulong iti dua a lawas naawisda nga agboluntario.) Dagiti trabahador maikkandat’ pagturogan ken taraon ngem isudat’ agbayad iti pasaheda ken awan awatenda a sueldo. Asino ngata ti mayat?

Idi 1992, nasuroken a 24,000 nga aplikasion ti naasikaso! Di kumurang a 3,900 kadagitoy ket aplikasion dagiti maika-2 wenno maika-3, wenno uray pay maika-10 wenno maika-20 a darasdan ti umay. Kaaduan kadakuadat’ panglakayen, ministerial nga adipen, wenno payunir​—tattao a nagsayaat ti naespirituan a kualipikasionda. Isuda amin agboluntarioda a mangaramid iti aniaman a kasapulan, mausarda man ti lineada wenno saan. Masansan a nadagsen ken narugit ti trabaho. Ngem imbilangda a pribilehio ti tumulong iti kastoy tapno maiyabante dagiti interes ti Pagarian. Impapan dagiti dadduma a daytat’ timmulong kadakuada tapno ad-addada nga apresiaren ti espiritu ti panagsakripisio a nakamimminar iti trabaho a maar-aramid idiay sangalubongan a hedkuarter. Nariknada a nagunggunaanda amin gaput’ itatabunoda iti panagdaydayaw iti agsapa a programa para iti pamilia ti Bethel ken ti linawas a panagadal ti pamilia iti Pagwanawanan.

Dagiti Boluntario Internasional

Bayat nga immad-addat’ pannakasapul ti napartak nga ilalawa, naiyusuat idi 1985 ti urnos para kadagiti boluntario internasional. Saan a pulos a daydi ti rugi ti internasional a panagbibinnadang no iti panagbangon, ngem ti urnos naannad idin a maasikaso manipud hedkuarter. Isuamin dagiti makiraman ket Saksida nga agboluntario iti konstruksion iti ruar ti pagilianda. Nasigoda a trabahador, agraman dagiti assawa a kumuyog kadagiti lallakayda a tumulong iti aniaman a kabaelanda. Kaaduan kadakuada bukoddat’ pasaheda; awan kadakuadat’ masuelduan iti aniaman nga aramidenda. Dadduma kadakuadat’ apagbiit laeng, a gagangay dua a lawas laeng wenno tallo a bulan. Dagiti dadduma ket agboluntario iti naunday, nga agtalinaeddat’ makatawen wenno ad-adu pay, nalabit agingga a mairingpas ti proyekto. Nasurok a 3,000 a Saksi ni Jehova manipud 30 a nagduduma a daga ti nakiraman itoy bayat ti immuna a lima a tawen, ket ad-adu pay dagiti sidadaan a nakiraman basta kasapulan ti kinasigoda. Ibilangda a pribilehio ti panangidiaya iti bagida ken dagiti ik-ikutanda tapno maiyabanteda dagiti interes ti Pagarian ti Dios babaen iti kastoy a wagas.

Adda pagdagusan ken taraon a maipaay kadagiti boluntario internasional. Masansan a simple laeng dagiti maidiaya kadakuada kas pagnam-ayan. Dagiti lokal a Saksi apresiarenda unay ti maitultulong dagiti bumisbisita a kakabsatda, ket no mabalbalin, pasangbayenda ida kadagiti balayda, uray pay no kasanot’ kanumo ti pagtaenganda. Masansan a ti pannangan maangayen a mismo idiay lugar ti proyekto.

Dagiti kakabsat a baniaga saan nga isudat’ rumbeng a mangibaklay nga interamente iti trabaho. Ti gandatda isut’ pannakibinnadangda iti lokal a grupo dagiti trabahador. Ket ginasgasut, rinibribo pay ketdi, a taga dita a pagilian ti umay met tumulong no iti ngudot’ lawas wenno iti makalawas wenno naun-unday pay. Idiay Argentina, 259 a boluntario a naggaput’ baniaga a pagilian ti nakibinnadang kadagiti adu a ribo a lokal a kakabsat, a dadduma kadakuada ti naginaldaw a nagtrabaho, dadduma dagiti sumagmamano a lawas, ket adu pay no iti ngudot’ lawas. Idiay Colombia, nasurok a 830 a boluntario internasional ti timmulong iti nadumaduma a tiempo. Addada met ag-200 a lokal a boluntario a nakiraman iti proyekto iti amin a tiempo ken sabali pay iti kada ngudo ti lawas a 250 wenno nasursurok a timmulong. Nagdagup iti nasurok a 3,600 a nagduduma nga indibidual ti nakiraman.

Ti panaggigiddiat ti pagsasao agbalin a problema, ngem saan a daytat’ manglapped kadagiti internasional a grupo nga agbibinnadang. Ti panagsenias, dagiti ebkas ti rupa, ti pannakikinnatawa, ken tarigagay a mangiringpas iti trabaho a mangidayaw ken Jehova isudat’ makatulong tapno malpas ti trabaho.

Ti naisangsangayan nga irarang-ay ti organisasion​—nga isut’ pakasapulan kadagiti daddadakkel a pasilidad ti sanga​—no dadduma mapasaran kadagiti daga a mammano laeng dagiti nasigo no iti linea a panagbangon. Ngem saan a daytoy ti makatuben kadagiti Saksi ni Jehova, a siaayat a tumulong iti maysa ken maysa. Agbibinnadangda a kas paset ti sangalubongan a pamilia a di nabingbingay gapu iti nasionalidad, kolor ti kudil, wenno pagsasao.

Idiay Papua New Guinea, dagiti boluntario a naggaput’ Australia ken New Zealand nangsanayda tunggal maysa iti taga Papua New Guinea iti linea ti trabahoda, kas maitunos iti kiddaw ti Government Labour Department. Iti kastoy a wagas, bayat nga indiayadat’ bagbagida, dagiti lokal a Saksi nakaadalda kadagiti trabaho a makatulong kadakuada a mangged para iti bagbagida ken kadagiti pamiliada.

Idi masapul ti El Salvador ti baro a sanga, dagiti lokal a kakabsat ket tinulongan dagiti 326 a boluntario a baniaga. Para iti proyekto sadi Ecuador, 270 a Saksi a naggaput’ 14 a daga ti nakibinnadang kadagiti kakabsatda a taga Ecuador. Dadduma a boluntario internasional timmulongda kadagiti nadumaduma a proyekto a naggigiddan. Nagririnnikosda kadagiti lugar a pagbangonan sadi Europa ken Africa, a mayataday iti kasapulan a linea ti trabahoda.

Idi 1992, naibaon dagiti boluntario internasional kadagiti 49 a sanga tapno tumulongda kadagiti lokal a grupo dagiti managbangon. No dadduma dagidiay nalpasen a natulongan gapu itoy a programa, nabaelanda met, ti timmulong kadagiti sabali. Gapuna, idi batidodan gaput’ itutulong ti agarup 60 a naunday panaggianda nga internasional nga adipen a timmulong iti proyekto ti sanga ti Filipinas, agraman nasurok 230 a boluntario a baniaga a timmulong iti nabiit laeng a periodo, sumagmamano a Filipino ti nangidiayat’ bagbagida a timmulong a nangbangon kadagiti pasilidad kadagiti sabali a parte ti Abagatan a Daya nga Asia.

Agbangbangon dagiti Saksi ni Jehova gapu kadagiti agdama a kasapulan a mainaig iti pannakaikasabat’ naimbag a damag. Buyogen iti tulong ti espiritu ni Jehova, kayatda nga ipaay ti kadakkelan a panangsaksi bayat ti nabati a tiempo sakbay ti Armagedon. Kumbinsidoda a nakaas-asidegen ti baro a lubong ti Dios, ket mamatida a makalasatdanto kas organisado nga ili a sumrek iti dayta baro a lubong, iti sidong ti turay ti Mesianiko a Pagarian ti Dios. Mangnamnamada pay a nalabit adu kadagiti nagpipintas a pasilidad a binangonda ken indedikarda ken Jehova ket agtultuloyto a mausar kalpasan ti Armagedon kas sentro a dita ti pannakaammo iti maymaysa a pudno a Dios agwarasto agingga a talaga a pinunnonan ti daga.​—Isa. 11:9.

[Footnote]

[Blurb iti panid 322]

Dagiti Saksi iti kabangibang a kongregasion timmulongdat’ trabaho

[Blurb iti panid 323]

Ti trabaho a panagbangon impaay dagiti boluntario, awanan sueldo

[Blurb iti panid 324]

Naipaganetget ti panangpatanor kadagiti naespirituan a kalidad

[Blurb iti panid 326]

De kalidad a panagbangon, natalged, saan a nagastos, napartak

[Blurb iti panid 328]

Maiyakar-akar nga Assembly Hall!

[Blurb iti panid 331]

Dimmanon kadagiti korte

[Blurb iti panid 332]

Nalawat’ saklawenna nga internasional a panagpalawa

[Blurb iti panid 333]

Ited dagiti trabahador ti dayaw ken Jehova, saan a kadagiti bagbagida

[Blurb iti panid 334]

Nakaparpartak unay nga iyaadu a di pulos ninamnama ti tao

[Blurb iti panid 336]

Imbilangda a pribilehio ti itutulong iti panagbangon idiay hedkuarter

[Blurb iti panid 339]

Agbibinnadangda kas sangalubongan a pamilia a di nabingaybingay gapu iti nasionalidad, kolor ti kudil, wenno pagsasao

[Kahon/Dagiti ladawan iti panid 320, 321]

Agtitimpuyog a Mangbangon a Sipapartak Kadagiti Kingdom Hall

Rinibo a baro a kongregasion ti maporma kada tawen. Kaaduanna, dagiti baro a Kingdom Hall bangonen a mismo dagiti Saksi. Naala dagitoy a ladawan idi nabangon ti Kingdom Hall sadi Connecticut, E.U.A., idi 1991

Biernes, alas 7:40 t.b.

Biernes, alas 12 ti aldaw

Sabado, alas 7:41 t.r.

Naturpos ti kadakkelan a trabaho, Domingo, alas 6:10 t.r.

Agpannurayda iti bendision ni Jehova, ket adda tiempoda a mangusig iti balakad ti Saona

Amin a boluntario awan sueldoda, a pagraguanda ti agtitinnulong

[Kahon/Dagiti ladawan iti panid 327]

Dagiti Kingdom Hall Kadagiti Nadumaduma a Daga

Ti paggigimongan dagiti Saksi ni Jehova kaaduanna ket simple. Nadalusda, komportable, napintas ti arubayanda

Peru

Filipinas

Francia

Republika ti Korea

Japan

Papua New Guinea

Ireland

Colombia

Norway

Lesotho

[Kahon/Dagiti ladawan iti panid 330]

Dagiti Assembly Hall Dagiti Saksi ni Jehova

Tapno maangayda dagiti kadarato a panagaasambleada, nausig dagiti Saksi ni Jehova kadagiti dadduma a deppaar a mas praktikal no bangonenda ti bukodda nga Assembly Hall. Kaaduan kadagiti agtrabaho ket lokal a Saksi. Adtoy ti sumagmamano kadagitoy a hall a nausar idi rugrugi ti 1990’s

Britania

Venezuela

Italia

Alemania

Canada

Japan

[Kahon/Dagiti ladawan iti panid 338]

Programa ti Internasional a Panagbangon Punnuannat’ Dakkel a Kasapulan

Ti paspas nga irarang-ay ti organisasion kinalikagumannat’ agtultuloy a panangpalawa kadagiti opisina, paktoria, ken pagtaengan ti Bethel iti intero a globo

Dagiti boluntario internasional badanganda dagiti lokal a Saksi

España

Dagiti metodo ti panagbangon isut’ tumulong kadagiti boluntario a mangiringpas ti napateg a trabaho nupay limitadot’ kapadasanda

Puerto Rico

Dagiti nasigo a trabahador siraragsakda nga agserbi

New Zealand

Grecia

Brazil

Ti panangusar kadagiti nalagda a material kissayanna ti gastos iti kasapulanto a panangmantener

Britania

Ti de kalidad a trabaho isut’ resulta ti personal a panaginteres dagidiay agtartrabaho; ebkas daytoy ti ayatda ken Jehova

Canada

Naragsak nga okasion dagitoy a proyekto; mabukel dagiti napaut a panaggagayyem

Colombia

Karatula sadi Japan a nangipalagip kadagiti trabahador iti pannakaiyadayo iti aksidente, agraman iti kinapateg ti panangipakat kadagiti bunga ti espiritu ti Dios

[Ladawan iti panid 318]

Ti damo a patakder a naawagan Kingdom Hall, sadi Hawaii

[Dagiti ladawan iti panid 319]

Adut’ nagkauna a Kingdom Hall ket naabangan a patakder wenno basta kuarto iti ngatot’ paglakuan; sumagmamanot’ binangon dagiti Saksi

[Dagiti ladawan iti panid 329]

Dua kadagiti immuna nga Assembly Hall

Siudad ti Nueva York

Guadeloupe

[Dagiti ladawan iti panid 337]

Dagiti kassangpet a temporario a trabahador iti panagbangon sadiay sangalubongan a hedkuarter ti Nueva York

Tunggal grupo mapalagipan a ti naespirituan a katatao ken de kalidad a trabaho napatpateg ngem ti napartak a panangiringpas iti trabaho