Nausig Manen ti Panangyalison ti Dara

ITI daytoy nalidem a panawen ti AIDS, ti kadaklan a peggad iti salun-at ti maysa a pasiente iti ospital mabalin a nakalemmeng iti siled a pagoperaan. “Awan pamay-an a maaramidanmi tapno naan-anay a nadalus ti suplay a dara,” kuna ni Dr. Richard Spence, a nasurok a maysa a dekadan a mangay-aywan iti Center for Bloodless Surgery idiay Cooper Hospital-University Medical Center idiay Camden, New Jersey, E.U.A.

Saan ngarud a pakasdaawan nga adu kadagiti Saksi ni Jehova, a nalatak gapu iti naibatay-Biblia a panagkedkedda nga agpayalison iti dara, ti ag-agasan ti [nasao] nga ospital. (Levitico 17:11; Aramid 15:28, 29) Nupay kasta, adu met ti mapmapan a saan a Saksi a pasiente iti dayta nga ospital, a maseknan kadagiti mabalin a peggad ti panangyalison ti dara, a pakairamanan ti pannakaakar iti hepatitis, AIDS, ken dadduma pay a sakit. “Ti panagsaknap ti AIDS ipakitana a kasapulan ti panangsukimat iti dara,” kuna ti Courier-Post Weekly Report on Science and Medicine. “Ngem dadduma a kaso ti kaskasdi a mapalusotan pay laeng iti proseso ti panangsukimat ta mabalin nga addan virus ti maysa a tao sakbay a matakuatan daytoy iti panagsukimat.”

Gapu kadagiti kasta a peggad, ar-aramaten ti Center for Bloodless Surgery dagiti sandi ti panangyalison ti dara, a pakairamanan ti pannakaaramat manen ti mismo a dara ti pasiente​—maysa a pamay-an nga anamongan ti sumagmamano a Saksi iti sidong ti nagduduma a kasasaad.a Ti sabali pay a pamay-an isut’ panagaramat kadagiti droga a mangpapartak iti pannakapataud ti dara ti pasiente. Maysa pay, ti sintetiko a pangsandi ti dara ket mabalin nga aramaten no dadduma tapno mapasayaat ti pannakaiwaras ti oksiheno uray awan ti mayalison a dara. “Kayat dagiti Saksi ni Jehova ti kasayaatan a pannakaagas,” kuna ni Dr. Spence, “ngem kaykayatda dagiti sandi ngem ti panangyalison.”

Agyamyaman dagiti Saksi ni Jehova iti pannakitinnulong ken panangsuportar dagiti doktor a mangraem kadagiti natibker a narelihiosuan a pammatida. Kas banagna, pudno nga umaw-awatda iti “kasayaatan a pannakaagas” ken makapagtalinaedda nga addaan nadalus a konsiensia iti imatang ni Jehova a Dios.​—2 Timoteo 1:3.

[Footnote]