Dagiti Gunggona ti Kinapinget
ISUT’ maysa a Griego a babai nga agnanaed idiay Fenicia idi tawen 32 K.P. Nakaro idi ti sakit ti balasangna, ket magagaran unay ti babai nga agsapul iti mangngagas. Idi nadamagna nga adda maysa a tao a di am-ammo a sumarsarungkar iti rehionna—maysa a ganggannaet a nagdinamag nga addaan pannakabalin a mangpaimbag kadagiti masakit—isut’ determinado a mangsarak kenkuana ken agpakaasi maipaay iti tulongna.
Idi nasarakannan [ti lalaki], isut’ nagparintumeng, a nagpakpakaasi: “Maasianka kaniak, Apo, Anak ni David. Ti anakko a babai nakaro unay ti pannakasairona.” Iti kasta a pamay-an, impakpakaasi ti Griego a babai ken Jesus a paimbagenna ti balasangna.
Mailadawanyo kadi ti kinatured ken kinapakumbaba a kasapulanna tapno maaramidna daytoy? Ni Jesus ket natan-ok a tao nga addaan pannakabalin ken nasayaat a pakasarsaritaan, ken impakaammonan a nasaksakbay a dina kayat nga adda makaammo iti ayanna. Inkuyogna dagiti apostolna idiay Fenicia tapno makapaginanada, saan a tapno agtrabaho iti tengnga dagiti di manamati a Gentil. Maysa pay, ni Jesus ket maysa a Judio idinto ta isu [ti babai] ket maysa a Gentil, ken awan duadua nga ammona a di kayat dagiti Judio ti makilangen kadagiti mauy-uyaw a tattao dagiti nasion. Nupay kasta, isut’ natibker iti pangngeddengna a makagun-od iti mangpaimbag iti anakna.
Ginandat ni Jesus ken dagiti apostolna nga upayen ti babai iti panagpatulongna iti daydi a panawen. Idi damo, saan a simmungbat ni Jesus kenkuana. Kalpasanna, gapu iti maulit-ulit, napinget a panagpakpakaasina, nasuron dagiti apostol ket imbagada ken Jesus: “Papanawem; agsipud ta agtultuloy nga agik-ikkis a sumursurot kadatayo.”
Ngem di simmardeng [ti babai] agingga a di napatgan ti kiddawna. Imbes ketdi, nagruknoy iti sakaanan ni Jesus, a kunkunana: “Apo, tulongannak!”
Iti panangdakamatna iti kangrunaan a pagrebbenganna kadagiti annak ti Israel ken, kagiddan dayta, ti panangsubokna iti pammati ken determinasionna [ti babai], siaasi nga inlawlawag ni Jesus kenkuana: “Di umiso nga alaen ti tinapay dagiti annak [ti Israel] ket ipurruak dayta kadagiti uken [dagiti Gentil].”
Imbes a masair iti panangipababa iti pulína, sipapakumbaba nga impingetna ti nagpakpakaasi babaen ti isusungbatna: “Wen, Apo; ngem pudno a dagiti uken manganda kadagiti murkat nga agtintinnag manipud iti lamisaan dagiti appoda.”
Ginunggonaan ni Jesus ti kinapinget ti Griego a babai babaen ti panangpadayaw iti pammatina ken pananganamong kadagiti ararawna. Panunotenyo laengen ti rag-ona apaman a nakaawid idi nadatnganna nga immimbagen a naan-anay ti balasangna!—Mateo 15:21-28; Marcos 7:24-30.
Kas iti daydiay a babai idi umuna a siglo, kasapulan a napingettayo iti panagreggettayo a mangparagsak ken Jehova ken manggun-od iti anamongna. Kas iti Griego a babai, ipasigurado kadatayo ti Biblia a magunggonaanto a naan-anay ti kinapingettayo “iti panangaramid iti nasayaat.”—Galacia 6:9.
Ania ti kinapinget? Apay a kasapulan dayta? Ania dagiti mabalin a pakaigapuan ti pannakapukawtayo iti daytoy a kababalin, a sumardeng wenno sumuko? Aniada a gunggona ti namnamaentayo nga awaten no pingetantay ita ti agserbi iti Namarsua ken Amatayo, ni Jehova?
Depinaren ti maysa a diksionario ti verbo nga “ipinget” kas “panangpetpet a siiirut ken sititibker iti maysa a panggep, kasasaad, wenno aramid, iti laksid dagiti tubeng, pakdaar, wenno lapped. . . . agtultuloy nga agbiag; agtalinaed.”
Maulit-ulit a bagbagaan ti Biblia dagiti adipen ni Jehova a pingetanda ti panagaramid iti pagayatanna. Kas pagarigan, naibaga kadatayo nga ‘itultuloytay, ngarud, a sapulen nga umuna ti pagarian,’ a ‘kumpet a siiirut iti nasayaat,’ a “reggetan ti panagkararag,” ken saan a “mabannog” iti panagaramid iti nasayaat.—Mateo 6:33; 1 Tesalonica 5:21; Roma 12:12; Galacia 6:9.
Iti inaldaw a panagbiag, ti kinapinget ket maysa a kualidad a masapul nga ikutan ken patanorentay amin tapno makapagtalinaed a sibibiag. No awan daytoy, saantay a makagun-od iti aniaman a banag a pudno, manayon ti pategna. Usigenyo ti ehemplo ti maysa nga ubing a mangikagumaan a tumakder ken mangaramid ti umuna nga agibar-ibar a panagaddangna. Manmano ti ubing a makasursuro a tumakder ken nadaras a makapagna iti las-ud laeng ti maysa nga aldaw. Idi maladagatayo pay, nalabit datay amin ket nangikagumaan ken napaay iti adu a daras sakbay a kabaelantayon ti magna. Ania ngata ti napasamak no kalpasan a natuang iti umuna a gundaway, inkeddengtayo a ditay padpadasenen? Mabalin nga agkarkaradaptay pay laeng! Kasapulan ti kinapinget iti panangragpat kadagiti makagunggona a kalat ken pananggun-od iti maitutop a panagrang-ay kadagiti paglaingan ken panagraem iti bagi. Kas kuna ti maysa a nalatak a pagsasao, “Dagiti mangabak saanda a pulos a sumuko, ket dagiti sumuko saanda a pulos a mangabak.”
Mabigbig dagiti nabayagen a payunir a ti balligi saan a maipasigurado gapu kadagiti naisangsangayan a kabaelan wenno talento. Kalikagumanna ti kinapinget, ti determinasion a mangaramid a naan-anay iti pagayatan ni Jehova, ken kinatured iti sanguanan dagiti temporario a lapped, uray pay panagleddaang. Ti kalat nga awan patinggana a pannakiraman kadagiti bendision ti Dios masapul nga agtalinaed a nalawag iti panunot.
Wen, datay amin nga agtarigagay a gumun-od iti anamong ni Jehova ken agtarigagay nga agballigi iti lumba ti biag kasapulantayo ti kinapinget, panagregget, ken kinaandur. No awan dagitoy a kababalin, mabalin a mapukawtayo ti anamong ni Jehova ken ti gunggona a pudpudno a biag.—Salmo 18:20; Mateo 24:13; 1 Timoteo 6:18, 19.
Masansan a narigrigat para iti maysa a Kristiano nga agbalin a napinget kadagiti naespirituan nga aramidna ngem iti sabsabali a rebbengenna. Ti maysa a lalaki mabalin nga itultuloyna nga igaed ti agtrabaho tapno mapaaddana dagiti pisikal a kasapulan ti pamiliana, ngem mabalin nga isut’ ‘nabannog unayen’ a mangidaulo iti regular a panagadal iti Biblia a kadua ti asawa ken dagiti annakna. Ania dagiti makagapu a narigat unay para iti adu nga agpinget kadagiti Nakristianuan nga aramid?
Ti maysa a makagapu isut’ pannakaupay, nga agtaud kadagiti bukodtayo a pagkapuyan. No kanayontay a pampanunoten dagiti bidduttayo, mabalin a maladingitan ken sumukotayon, a mariknatayo a pulos a dinatay pakawanen ni Jehova iti amin a basoltayo.
Ti sabali pay a makagapu isut’ imoralidad, kinadakes, ken guranggura a kadawyan iti lubong. (1 Juan 2:15, 16) Ti maysa kadagiti “makagunggona nga ug-ugali” a mabalin a perdien wenno dadaelen ti nailubongan nga impluensia isut’ Nakristianuan a kinapinget.—1 Corinto 15:33.
Ti kinapingettayo iti trabaho a panangasaba mabalin a kumapsut gapu iti ibubusor ti publiko wenno di panangikankano iti sagrado a panagserbitayo. Gapu iti pannakaupay, mabalin nga ipapantayo a di kayat dagiti tao iti teritoriatayo ti kinapudno. Daytoy ti mamagpanunot kadatayo, ‘Ania komat’ serbina?’ ket baybay-antayon ti naisangsangayan a pribilehio a panagserbi iti ministerio.
Maimpluensiaannatay met ti nailubongan nga espiritu ti aglablabes a panangparagsak iti bagi. Apay nga agpinget ken agsakripisiotay unay idinto ta amin ket kasla agragragsak wenno aglanglang-ay laeng?—Idiligyo ti Mateo 16:23, 24.
Tapno napinget nga agaramid iti pagayatan ni Jehova, kasapulan nga ikawestayo ti Nakristianuan a personalidad ken agbiag a maitunos iti espiritu, saan nga iti lasag. (Roma 8:4-8; Colosas 3:10, 12, 14) Ti pannakaammo iti panangmatmat ni Jehova iti bambanag tumulong kadatayo nga agtultuloy kadagiti napateg a naespirituan nga aramidtayo.—1 Corinto 16:13.
Dagiti Ulidan iti Kinapinget
Impaayannatay ni Jehova iti adu a makaparegta nga ulidan dagiti adipen a nagtalinaed a nasungdo ken matalek kenkuana iti laksid ti adu a nakaro a suot. Babaen ti panangusig kadakuada, makitatayo no kasano a mapatanor ken maalagadtayo ti Nakristianuan a kinapinget ken no apay a nakapatpateg daytoy.
Ti katan-okan nga ulidan isu ni Jesus, a nagsagaba iti kasta unay tapno maipadayag ti nagan ni Jehova. Paregtaennatay ti Biblia a sipapasnek a mangadal kadagiti aramid [a pakakitaan] ti napinget a debosion: “No kasta, ngarud, gapu ta addaantayo iti kastoy kadakkel nga ulep dagiti saksi a nanglikmut kadatayo, ikkatentayo met koma ti tunggal dadagsen ken ti basol a silalaka a mangsagud kadatayo, ket buyogen ti panagibtur tarayentayo koma ti lumba a naikabil iti sanguanantayo, bayat a kumitatayo a sipapasnek iti Kangrunaan nga Ahente ken Manangan-anay iti pammatitayo, ni Jesus. Gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain, ket nagtugaw iti makannawan ti trono ti Dios. Kinapudnona, imutektekanyo a sisisinged daydiay nakapagibtur iti kasta a mangbusor a panagsao dagiti managbasol maibusor kadagiti bukodda a pagimbagan, tapno dikay koma mabannog ket agkapuy dagiti kararuayo.”—Hebreo 12:1-3.
Ti lumba maipaay iti biag ket attiddog, saan a maysa a napartak a panagtaray iti asideg a distansia. Gapuna, kasapulantay ti kinapinget a kas ken Kristo. Ti kalat, ti pagpatinggaan, mabalin a di masaripatpatan iti kadaklan a paset ti lumba. Ti kalat rumbeng a nalawag iti isiptayo tapno mapanunottay a ragpaten daytoy agingga a malpas ti narigat a panagtaray. Sipapanunot ni Jesus iti kasta a kalat, “ti rag-o a naikabil iti sanguananna.”
Aniat’ nairaman iti daytoy a rag-o para kadagiti Kristiano itatta? Maysa ditoyen ti gunggona nga imortal a biag idiay langit para iti sumagmamano ken biag nga agnanayon ditoy daga para iti adu. Maysa pay, isut’ pannakarikna iti pannakapnek nga agtaud iti pannakaammo a ti maysa parparagsakenna ti puso ni Jehova ken naaddaan iti paset iti panangsantipikar iti nagan ti Dios.—Proverbio 27:11; Juan 17:4.
Nairaman iti daytoy a rag-o ti nadekket, makaay-ayo a pannakirelasion ken Jehova. (Salmo 40:8; Juan 4:34) Ti kasta a relasion ket makapasalibukag ken makaited-biag, nga ikkanna ti maysa iti bileg a makilumba nga addaan panagibtur ken saan a sumuko. Maysa pay, bendisionan ni Jehova dayta a relasion babaen ti panangiparukpokna iti nasantuan nga espirituna kadagiti adipenna, nga agresulta iti ad-adda pay a rag-o ken makaparagsak a trabaho.—Roma 12:11; Galacia 5:22.
Ti panangusig iti ulidan ni Job iti napinget a pammati ket makagunggona. Isut’ imperpekto ken addaan limitado a pannakaammo iti kasasaadna. Gapuna, adda idi dagiti kanito a natnag iti panangpalintegna iti bagina ken panagladingit. Nupay kasta, intultuloyna nga impakita ti natibker a determinasion a mangsalimetmet ti kinatarnawna ken Jehova ken pulos a di timmallikud Kenkuana. (Job 1:20-22; 2:9, 10; 27:2-6) Ginunggonaan ni Jehova ni Job iti napinget a debosionna, nga impaayanna kadagiti naespirituan ken material a bendision ken ti namnama a biag nga agnanayon. (Job 42:10-17; Santiago 5:10, 11) Kas ken Job, mabalin a mapasarantayo ti nakaro a panagsagaba ken pukaw kabayatan ti panagbiagtay ita, ngem manamnamatay met ti bendision ni Jehova iti matalek a panagibturtayo.—Hebreo 6:10-12.
Iti moderno a panawen, dagiti Saksi ni Jehova iti pakabuklan ipakpakitada ti Nakristianuan a kinapinget iti panangaramid iti pagayatan ni Jehova. Kas pagarigan, ti napinget a trabahoda a panagbalaybalay ken dadduma pay a panangasaba iti publiko ti namagbalin kadakuada ken iti mensaheda a nalatak iti sangalubongan. Namin-adu a dinakamat ti warnakan ti regta ken determinasionda a mangikasaba ti naimbag a damag iti laksid ti ibubusor ken suot. Maysa kadagitoy ti naitampok pay kadagiti sao nga “Awan makaliklik kadagiti Saksi ni Jehova!”—Mateo 5:16.
Bembendisionan ni Jehova ti napinget a panagregget dagiti Saksina iti nabunga a ministerio. Usigenyo ti kapadasan ti sumagmamano a manangipamuspusan a Saksi idiay Italia idi 1960’s idi adda agarup 10,000 a Saksi a mangaskasaba iti maysa a nasion nga addaan iti nasurok a 53,000,000 a tattao. Awan Saksi idi iti maysa nga ili nga addaan 6,000 nga agnanaed. Napasaran dagiti sumarsarungkar a kakabsat ti ibubusor iti ministerioda.
Tunggal mapan sadiay dagiti kakabsat tapno mangasaba, urnongen ti adu kadagiti babbai, ken uray dagiti lallaki iti ili dagiti ubbing a lallaki, paregtaenda ida a sumurot kadagiti Saksi ken sagawisiwanda ida ken agariwawada unay. Kalpasan ti sumagmamano a minuto, mapilitan dagiti kakabsat a pumanaw ken mapan iti sabali nga ili. Iti panangikagumaan a mangipaay iti uray maminsan man laeng a naan-anay a pammaneknek iti amin nga agnanaed iti daytoy nga ili, inkeddeng dagiti kakabsat a mangasabada laeng sadiay no kasta a matutudo, a namnamaenda a saan idan a singaen dagiti ubbing. Nadlawda a saan a kayat dagiti tao iti ili ti mabasá tapno mariribuk laeng dagiti agibumbunannag. Iti kastoy a pamay-an naipaay ti nasayaat a pammaneknek. Nakasarakda kadagiti interesado a tattao. Nakairugida kadagiti baro a panangyadal iti Biblia. Kas banagna, saan laeng a naipasdek ti maysa a rumangrang-ay a kongregasion iti dayta bassit nga ili no di pay ket narugian ti trabaho a panangasaba uray no nasayaat ti panniempona. Nagtultuloy a bembendisionan ni Jehova ti kinapinget dagiti Saksina iti dayta a lugar ken iti intero nga Italia. Adda itan nasurok a 200,000 a Saksi ni Jehova iti dayta a pagilian.
Dakkel dagiti gunggona iti napinget a panagaramid iti umiso. Babaen ti bileg ti espiritu ti Dios, maitungtungpal dagiti Saksi ni Jehova ti maysa a trabaho a pulos a di pay napasamak iti intero a pakasaritaan ti tao, ti panangikasaba iti naimbag a damag ti Pagarian, kadagiti ruangan ken iti dadduma pay a pamay-an, iti minilion a tattao. (Zacarias 4:6) Sirarag-o a makitkitadan ti kaitungpalan ti padto ti Biblia iti nakaskasdaaw nga irarang-ay ken kinaregta ti naindagaan nga organisasion ni Jehova. (Isaias 54:2; 60:22) Addaanda iti nadalus a konsiensia iti sanguanan ti Dios, ken maragsakanda iti namnama a biag nga agnanayon. Kangrunaan iti amin, tagtagiragsakenda ti nadekket a relasion iti Namarsua, ni Jehova a Dios.—Salmo 11:7.
[Dagiti Ladawan iti panid 24]
Ginunggonaan ni Jesus ti napakumbaba a kinapinget daytoy Griego a babai
[Ladawan iti panid 26]
Ti biag iti Paraiso ket nairaman iti rag-o nga agur-uray kadagiti Kristiano itatta