Ti Watchtower Educational Center Mangibaon Kadagiti Misionero
NANGANGAY ti Watchtower Bible School of Gilead kadagiti klase iti nagduduma a lugar. Iti nagbaetan ti 1943 ken 1960, kadagiti pasilidad idiay South Lansing, Nueva York, E.U.A., immawat iti naisangsangayan a pannakasanay ti 35 a klase, a buklen dagiti estudiante a naggapu iti 95 a dagdaga. Kalpasanna, nayakar ti eskuelaan iti sangalubongan a hedkuarter idiay Brooklyn, Nueva York, a sadiay nagandar iti gistay 28 a tawen. Manipud 1988 agingga iti rugrugi ti 1995, inangay ti Gilead School dagiti klase idiay Wallkill, Nueva York.
Kabayatan dagitoy a tawen, pinalawa ti eskuelaan ti kasaknap ti panagandarna. Iti sidong ti panangiwanwanna naipaay ti sangapulo a lawas a kurso a panagsursuro kadagiti tallo a klase idiay Mexico; nabuangay ti lima a kakasta a klase idiay Alemania; dua idiay India. Sipud pay idi 1987, nangangay iti klase ti katulonganna nga eskuelaan a pagaammo kas ti Ministerial Training School iti 34 a dagdaga, a nangipaay iti naisangsangayan a walo a lawas a kurso a panangsanay kadagiti kualipikado nga agkabannuag a lallaki. Nupay kasta, ti instruksion a naipaay iti maika-99 a klase ti Gilead, iti kaibangbangon a Watchtower Educational Center idiay Patterson, Nueva York, ket 20-lawas a kurso, nga iramanna ti naan-anay a panangadal iti intero a Biblia, panangusig iti moderno-aldaw a pakasaritaan ken organisasion dagiti Saksi ni Jehova, kasta met ti nawadwad a pammagbaga maipapan iti trabaho a panagmisionero iti sabali a pagilian.
Idi Setiembre 2, nagturpos dayta a maika-99 a klase. Naangay ti tallo-oras a programa ti panagturpos iti baro nga auditorio idiay Watchtower Educational Center. Napunno daytoy agingga iti malaonna. Nakipagimdeng dagiti sabsabali pay kadagiti pasilidad ti Bethel idiay Patterson, Wallkill, ken Brooklyn babaen ti elektroniko a panangikonekta. Makaparagsak daytoy nga aldaw saan laeng nga iti agturpos a klase agraman kadagiti kabagian ken nasinged a gagayyemda no di pay ket kadagiti ginasut a nakiraman kas boluntario iti panangibangon iti nagsayaat a baro a pasilidad ti eskuelaan.
Iti panglukat a sasaona, impamaysa ni Carey Barber iti Bagi a Manarawidwid ti atension iti kinapateg ti agdama idi a mapaspasamak. Kinunana: “Daytoy ti sentro ti kadaklan pay laeng a trabaho ti nadiosan nga edukasion a naisayangkat ditoy daga.” Inlawlawagna nga umad-adanitayon iti tampok ti dangadang iti nagbaetan ti bin-i ti babai ken ti bin-i ti uleg. (Genesis 3:15) Impakitana a ti laeng makalasatto iti nakaam-amak a dangadang kabayatan ti sumungsungad a dakkel a rigat, ket dagidiay addaan iti umiso a pannakaammo iti Sao ti Dios ken agtulnog iti dayta.
“Ti agdama nga edukasional a programatayo,” kinunana, “ket nairanta a mangidalan kadagiti amin a tattao ni Jehova iti sadinoman nga agturong iti nagsayaat a kasasaad ti kinanataengan a nailadawan iti Proverbio 1:1-4—ti panangammo iti sirib ken disiplina, pannakabael a mangtarus iti pannakaawat, panangawat iti disiplina a mangipaay iti kinasaririt, kinalinteg, kinatimbeng, kinatakneng, ken abilidad nga agpanunot.” Anian a salaknib ti maaddaan kadagiti kasta a naespirituan a kinabaknang!
Pammagbaga iti Agturpos a Klase
Dagidiay a panglukat a sasao ket sinaruno dagiti serie ti lima nga ababa a palawag a naiturong iti agturpos a klase. Ni Harold Jackson, dati nga instruktor ti Gilead ken kameng itan ti staff ti hedkuarter idiay Brooklyn, indagadagna iti klase, “Salimetmetanyo a Sititibker ti Nadiosan a Pannakapnekyo.” Nagsarita ni Lloyd Barry, nabayagen a misionero ken kameng itan ti Bagi a Manarawidwid, maipapan iti “Panagserbi ken Jehova Buyogen ti Kinapakumbaba.” Inlawlawagna a napateg daytoy a kualidad kadagiti agturpos iti pannakibagayda kadagiti baro a kasasaad kasta met iti relasionda kadagiti padada a misionero, kadagiti kongregasion a pagserbiandanto, ken kadagiti lokal nga umili.
Ni Karl Adams, agdama nga agserserbi kas mannursuro ti Gilead, inlawlawagna iti klase ti saludsod nga “Ania nga Aramid ti Pangiturongan Kadakayo ti Pammati?” Pinaregtana ida a saanda a tultuladen dagidi Israelita a nagreklamo kadagiti kasasaad idiay let-ang ken tinarigagayanda ti agsubli idiay Egipto, ngem ketdi, tuladenda ni Abraham, a kimmita iti Pagarian ti Dios imbes nga agsubli idiay Ur kadagiti Caldeo kas solusion dagiti parikut. (Exodo 16:2, 3; Hebreo 11:10, 15, 16) Ni Ulysses Glass, ti registrar ti eskuelaan, inaramatna ti kapadasan ni Asaf kas nailanad iti Salmo 73 tapno bagbagaanna ti agturpos a klase, “Bilangenyo Dagiti Bendision a Sagsagrapenyo.” Sa nagsarita ni Albert Schroeder, kameng ti Teaching Committee ti Bagi a Manarawidwid, maipapan iti tema a “Mangipaay ni Jehova.” Kas pammaneknek iti kasta a probision, intudona a mismo ti Gilead School ken ti akem daytoy iti panangibanag iti naindaklan a trabaho a panangasaba ken panangaramid adalan.
Kalpasanna, nagimdeng ti tallaong buyogen ti napasnek nga interes idi nagsarita ni Milton Henschel, ti presidente ti Watch Tower Society, maipapan iti “Kamkameng a Nasinged iti Maysa ken Maysa.” Binasa ken kinomentuanna a naan-anay ti Roma kapitulo 12. Karaman kadagiti sabsabali pay a bambanag, kinunana: “Masapul a pampanunotentayo nga addaantayo iti nakasingsinged a relasion kadagiti padatayo nga adipen iti kongregasion.” Innayonna: “Nasayaat no kanayon a pampanunotentayo ti maysa ken maysa kas sanikua ni Jehova, ken imbes nga agbalin a manangbabalaw, imbes nga agbirbirok iti biddut, kankanayon koma nga agbalintay a mannakitinnulong. Tultulongantay ti bagbagitayo no taginayonentayo ti naespirituan a panagkaykaysa ti kongregasion Kristiano.” Impakitana no kasano a maiparangarang ti kasta a kinamannakitinnulong iti pannakaisagana ti taraon kadagiti pagtaengan dagiti misionero, a sipapanunot iti kinapudno a mabalin a saan nga amin ket kabaelanda a kanen ti isu met laeng a banag. Imparegtana met ti panangtulong imbes a panangbabalaw no makiramraman iti tay-ak ti serbisio a kadua dagiti pada a Kristiano a napanglaw. No pudno a mannakitinnulong, makapabileg, ken makaparegtatayo iti maysa ken maysa, kinuna ni Kabsat Henschel, “ayatennatayo ni Jehova gapu iti daytoy.” Anian a nakasaysayaat a pammagbaga para kadagiti misionero nga agserbi kadagiti daga a naiduma unay kadagidiay a pinanawanda!
Panangammo a Naimbag iti Klase
Iti promedio, dagiti 48 nga estudiante ti maika-99 a klase ket agtawen iti 32 ken nasurok a 11 a tawendan iti amin-tiempo a ministerio.
Nangipaay dagiti interbiu a paset ti programa ti panagturpos iti gundaway iti tallaong a mangam-ammo a naimbag iti sumagmamano kadakuada. Da Nikki Liebl, manipud iti Estados Unidos, ken Simon Bolton, manipud Inglaterra, insalaysayda dagiti pasamak a nangsubok iti pammatida nga ipaay ni Jehova dagiti pisikal a kasapulanda. Napasaranda ti panangaywan ni Jehova bayat nga intultuloyda nga inyun-una ti amin-tiempo a ministerio.
Kinuna ni Isabelle Kazan, a Pranses ti katutubo a pagsasaona, a nagadal iti Arabe tapno makasabaanna dagiti Arabe ti pagsasaona a tattao iti pagilianna. Idi nangrugi idi 1987, ti maysa a bassit a bunggoy idiay Paris ket addaan laeng iti uppat a kakabsat nga Arabe ti pagsasaona, a kaduana ken ti sabali pay a sister a mangad-adal idi iti pagsasao. (Saan a nalaka dayta. Mangbusbosda iti walo nga oras iti panagsagana iti adalenda a Pagwanawanan iti kada lawas tapno makapagkomentoda.) Makagunggona kadi ti kasta a panagregget? Bueno, adda itan dagiti Arabe ti pagsasaona a Saksi a naorganisar iti lima a sirkito iti intero a Francia. Insalaysay ti sabali pay nga estudiante, ni Miko Puro, no kasano a nakatulong kenkuana ti Pranses a nasursurona idiay eskuelaan a mangasaba kadagiti nagkamang a taga-Africa iti nakayanakanna a Finland, ken napategto met dayta iti pakaitudinganna kas misionero idiay Benin. Malaglagip ni Bonny Bowes ti panangikagumaanna nga agsao a sitatalabit iti Pranses tapno makapagserbi a sieepektibo idiay Quebec, Canada. Sa insalaysay ni Bjarki Rasmussen, manipud Denmark, ti napasaranna ken ti asawana kabayatan ti tawtawen a panagserbida idiay Faeroe Islands. Wen, dagitoy kabbaro a misionero ket amin-tiempo a ministro nga aduan iti kapadasan.
Naidestino dagiti nagturpos iti 19 a dagdaga—idiay Africa, Central ken Sud America, Makindaya nga Europa, ken ti Oriente. Dagiti immuna a klase a nagturpos ket nakapagserbidan iti nasurok a 200 a dagdaga. Adu kadagidiay a nagturpos ti okupadoda pay laeng kadagiti nakaitudinganda. Tumiptipon itan kadakuada dagitoy a kabbaro a misionero iti nalawlawa pay a panangisaknap iti pannakaikaskasaba ti Pagarian agingga kadagiti pungto ti daga.—Aramid 1:8.
[Dagiti Ladawan iti panid 25]
Dagiti ladawan a naala iti siled a pagadalan iti Watchtower Educational Center
[Ladawan iti panid 26]
Ti Maika-99 a Nagturpos a Klase ti Watchtower Bible School of Gilead
Iti listaan ditoy baba, dagiti intar nanumeruanda manipud sango nga agpalikud, ket dagiti nagan nailistada manipud kannigid nga agpakannawan iti kada intar.
(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Scewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd M.; Bowes, R.; Siimes, T.; Poole, E.; Olsson, J.
[Dagiti Ladawan iti panid 27]
Adda pay laeng kadagiti destinoda: (iti kannigid) ni Charles Leathco a kaduana ti baketna, a ni Fern, idiay Brazil, nagturposda iti umuna ken maikanem a klase ti Gilead; (iti baba) ni Martha Hess, idiay Japan, nagturpos iti maikapito a klase ti Gilead