Naisalakankayo Kadin?

SANGAPULO ti tawen ni Johnny idi immasideg kenkuana ti maysa a lalaki iti peria ket nagsaludsod: “Bumarito, awatem kadi ni Jesu-Kristo kas Apo ken Manangisalakanmo?” Kasla karkarna ken Johnny dayta a saludsod, tangay kanayon a namati ken Jesus. Gapuna simmungbat, “Siempre mamatiak.” “Madaydayaw ti Apo!” impukkaw ti lalaki tapno mangngeg ti amin. “Maysa pay a kararua ti naisalakan para ken Kristo!”

Kasta kadit’ kasimple ti pannakaisalakan? “Naisalakan” kadin ni Johnny iti daydi kanito a panangisaona kadagidiay a sasao, aniaman ti aramidenna kadagiti nabatbati a paset ti panagbiagna? Adu a napasnek a tattao ti sumungbat iti wen. Kuna ti sumagmamano a narelihiosuan a tract nga isuratmo ti petsa a ‘pannakaisalakanmo’ tapno malagipmo dayta.

Nagsurat ti maysa a klero nga “iti kanito a mamatika ken Kristo . . . permanente a naikeddengen ti tungpal ti maysa.” Impapatina a ti Biblia ti agkuna a ti pannakaisalakan agpannuray iti maysa ken mamimpinsan nga “aramid ti pammati, saan nga iti panagtultuloy ti pammati.” Maysa pay a mannurat iti relihion ti nagsurat: “Maysa daytoy a nalpasen nga aramid. Nagun-odyon daytoy . . . ‘Nalpasen ti pannakidangadangyo.’ ‘Napunasen ti basolyo.’” Ngem uray dagiti tao a naan-anay a kombinsido a pudno daytoy ti makakita iti parikut ditoy. Nabatad nga adu a tao a naibaga [kadakuada] a “naisalakandan” ti saan nga agbibiag maitunos iti wagas nga ibagbaga ti Biblia. Maysa a kadawyan a panangilawlawag nalabit saanda a talaga nga “inawat” ni Kristo.

Gapuna, ania a talaga ti kaipapanan ti “panangawat” ken Jesus? Dayta kadi ti mamimpinsan nga aramid ti pammati, wenno maysa kadi dayta nga agtultuloy a wagas ti panagbiag? Masapul kadi a natibker ti pammatitayo tapno gutugotennatay nga agtignay? Talaga kadi a maawattayo dagiti gunggona ti daton ni Jesus nga awan kakuyogna a pagrebbengan a sumurot kenkuana?

Adu a tattao ti agtarigagay kadagiti bendision ngem saanda a kayat ti pagrebbengan a panangsurot ken panagtulnog ken Jesus. Kinapudnona, ti sao nga “agtulnog” masansan a mangburibor kadakuada. Ngem kinuna ni Jesus: “Umayka agbalinka a pasurotko.” (Lucas 18:18-23) Ken kuna ti Biblia: “Kadagidiay di agtulnog iti naimbag a damag maipapan ken Apotayo a Jesus . . . agpasardanto iti pannakaukom a dusa nga agnanayon a pannakadadael.”​—2 Tesalonica 1:8, 9; Mateo 10:38; 16:24.

Adu ti dakamaten ti Biblia a mangibangon kadagiti napateg a saludsod mainaig iti naisuron maipapan iti pannakaisalakan. No kayatyo a patalgedan ti talaga a kuna ti Biblia maipapan iti daytoy a tema, masarakanyo a makapainteres dagiti sumaganad a panid. Lukibenyo ti Bibliayo, ket basaenyo dagiti nadakamat a teksto tapno makitayo no ania ti insuro ni Jesus ken dagiti apostolna maipapan iti daytoy nagpateg a banag.