Pannakaisalakan​—No Ania a Talaga ti Kayatna a Sawen

‘NAISALAKANKA kadin?’ Masansan, dagidiay mangisaludsod iti kastoy ipagarupda a naisalakandan gapu ta ‘inawatda ni Jesus kas personal a Manangisalakanda.’ Kaskasdi ipagarup ti dadduma nga adda nadumaduma a dana nga agturong iti pannakaisalakan ket no la ket ‘ni Jesus adda iti pusoyo,’ saan a nasken no ania ti patpatienyo wenno uray ania nga iglesia ti nakaikamenganyo.

Kuna ti Biblia a pagayatan ti Dios a “maisalakan koma dagiti amin a kita ti tattao.” (1 Timoteo 2:3, 4) Gapuna ti pannakaisalakan magun-odan ti amin nga umawat iti dayta. Ngem ania a talaga ti kayat a sawen ti pannakaisalakan? Daytoy kadi ket banag a basta mapasamak kadakayo nga awan rigrigatna?

Ti sao a “pannakaisalakan” kaipapananna “pannakaispal iti peggad wenno pannakadadael.” Gapuna saan la a kinatalinaay ti isip ti nairaman iti pudno a pannakaisalakan. Kaipapananna ti pannakaisalakan iti pannakadadael daytoy agdama a dakes a sistema ti bambanag ket kamaudiananna iti ipapatay a mismo! Ngem siasino ti isalakan ti Dios? Kas sungbat, sukimatentayo ti insuro ni Jesu-Kristo maipapan itoy a banag. Mabalin a masdaawkayo iti resulta ti panagsukimattayo.

Pannakaisalakan​—Masarakan iti Amin a Relihion?

Naminsan, nakisarita ni Jesus iti maysa a Samaritana. Nupay saan a Judio, umiso ti pammatina nga umay ti Mesias a “maawagan Kristo.” (Juan 4:25) Umdas kadin ti kasta a pammati tapno maisalakan? Saan, agsipud ta situtured nga imbaga ni Jesus iti babai: “Agdaydayawkayo iti dikay am-ammo.” Ammo ni Jesus a tapno maisalakan daytoy a babai, kasapulan a balbaliwanna ti wagas ti panagdaydayawna. Gapuna inlawlawag ni Jesus: “Nupay kasta, um-umayen ti oras, ket isu dayta itan, inton dagiti pudno a managdaydayaw agdaydayawdanton iti Ama buyogen ti espiritu ken kinapudno, ta, pudno unay, ti Ama sapsapulenna dagiti kakasta nga agdaydayaw kenkuana.”​—Juan 4:22, 23.

Ti maysa pay a gundaway a nangipalgakan ni Jesus iti panangmatmatna maipapan iti pannakaisalakan ket mainaig kadagiti Fariseo, maysa a prominente a narelihiosuan a sekta ti Judaismo. Nangipasdek dagiti Fariseo iti sistema ti panagdayaw ket namatida nga anamongan ti Dios dayta. Ngem imdenganyo ti kinuna ni Jesus kadagiti Fariseo: “Dakayo a managinsisingpet! Umiso ni Isaias idi nagipadto iti maipapan kadakayo: ‘Dagitoy a tattao dayawendak babaen kadagiti bibigda, ngem ti pusoda adayo kaniak. Barengbareng ti panagdaydayawda kaniak; isursuroda dagiti linteg nga inaramid ti tao.’”​—Mateo 15:7-9, New International Version.

Dagiti ngay adu a relihioso a grupo ita nga agkunkuna a mamati ken Kristo? Anamongan kadi ni Jesus amin dagitoy kas umiso a wagas tapno magun-od ti pannakaisalakan? Saan a kasapulan a pugtuantayo daytoy, ta silalawag a kinuna ni Jesus: “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit, no di ket daydiay mangar-aramid ti pagayatan ni Amak nga adda iti langlangit. Adunto ti agkuna kaniak iti dayta nga aldaw, ‘Apo, Apo, dikami aya nagipadto iti naganmo, ken nangparuar kadagiti sairo iti naganmo, ken nagaramid iti adu a mannakabalin nga ar-aramid iti naganmo?’ Ket kaskasdi iti dayta ipudnokto kadakuada: Saankay a pulos am-ammo! Umadayokayo kaniak, dakayo nga agar-aramid ti kinakillo.”​—Mateo 7:21-23.

Nasken iti Pannakaisalakan ti Umiso a Pannakaammo ken Jesus

Nabagas dagitoy a sasao ni Jesus. Ipakitada nga adu a debotado a tattao ti saan a ‘mangar-aramid iti pagayatan ti Ama.’ Kasano, no kasta, a magun-odan ti maysa ti pudno a pannakaisalakan? Sumungbat ti 1 Timoteo 2:3, 4: “Ti pagayatan [ti Dios] ket maisalakan koma dagiti amin a kita ti tattao ken dumtengda iti umiso a pannakaammo iti kinapudno.”​—Idiligyo ti Colosas 1:9, 10.

Napateg ti kasta a pannakaammo tapno magun-od ti pannakaisalakan. Idi inimtuod ti manangibalud a Romano ken ni apostol Pablo ken iti kaduana, a ni Silas, “Ania ti masapul nga aramidek tapno maisalakanak?” insungbatda: “Mamatika ken Apo Jesus ket maisalakankanto, sika ken ti sangakabbalayam.” (Aramid 16:30, 31) Kaipapanan kadi dayta a ti laeng aramiden ti manangibalud ken ti sangakabbalayanna ket maaddaan iti rikna iti pusoda? Saan, agsipud ta saanda a pudpudno a ‘mamati ken ni Apo Jesus’ malaksid no adda bassit a pannakaawatda no siasino ni Jesus, no ania ti inaramidna, ken no ania ti insurona.

Kas pagarigan, insuro ni Jesus ti pannakaipasdek ti nailangitan a pagarian​—“ti pagarian ti Dios.” (Lucas 4:43) Nangipaay met kadagiti prinsipio iti Nakristianuan a moralidad ken kababalin. (Mateo, kapitulo 5-7) Impakitana ti takder dagiti adalanna no maipapan kadagiti napolitikaan a banag. (Juan 15:19) Inyussuatna ti sangalubongan a programa a panangisuro ken binilinna dagiti pasurotna a makiraman iti dayta. (Mateo 24:14; Aramid 1:8) Wen, ti ‘panamati ken Jesus’ kaipapananna ti panangtarus iti adu a banag! Saan a pakasdaawan, no kasta, a ‘sinao [da Pablo ken Silas] ti sao ni Jehova [iti manangibalud] agraman amin dagidiay adda iti balayna’ sakbay a nabautisaran dagitoy kabbaro a manamati.​—Aramid 16:32, 33.

Nasken met ti Umiso a Pannakaammo iti Dios

Maysa a napateg a paset ti pudno a pammati ken Jesus ti panagdayaw iti Dios a daydayawen ni Jesus a mismo. Inkararag ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

Kabayatan ti ministeriona ditoy daga, kanayon nga inturong ti Anak ti Dios ti atension iti Amana a saan nga iti bagina. Dina pulos inakem nga isu ti Dios a Mannakabalin-amin. (Juan 12:49, 50) Namin-adu a pinagbatad ni Jesus ti takderna iti urnos ti Dios babaen ti panangibaga nga isu ket agpaspasakup ken Amana. (Lucas 22:41, 42; Juan 5:19) Kinapudnona, kinuna ni Jesus: “Ti Ama dakdakkel ngem siak.” (Juan 14:28) Insuro kadi kadakayo ti iglesiayo ti pudno a relasion ti Dios ken ni Kristo? Wenno impapatida kadakayo a ni Jesus a mismo ti Dios a Mannakabalin-amin? Ti pannakaisalakanyo agpannuray iti kaadda ti umiso a pannakaawat.

Iti Kararag ti Apo, indagadag ni Jesus kadagiti adalanna nga ikararagda: “Masantipikar koma ti naganmo.” (Mateo 6:9) Saan a pinaglatak ti adu kadagiti patarus ti Biblia ti nagan ti Dios, nga impatarusda dayta nga “Apo.” Ngem kadagiti nagkauna a kopia ti “Daan a Tulag,” nasurok nga innem a ribu a daras a nagparang ti nagan ti Dios! Gapuna kuna ti Salmo 83:18: “Bareng maammuanda koma a siksika laeng, nga agnagan Jehova, ti Kangatuan a ringbawam iti amin a daga.” Sinursuruandakayo kadi a mangaramat iti nagan ti Dios, a Jehova? No saan, agpegpeggad ti pannakaisalakanyo, agsipud ta “tunggal maysa nga umawag iti nagan ni Jehova maisalakanto”!​—Aramid 2:21; idiligyo ti Joel 2:32.

Buyogen ti Espiritu ken Kinapudno

Inturong met ni Jesu-Kristo ti atension iti Sao ti Dios, ti Biblia. Iti panangilawlawagna iti panangmatmat ti Dios kadagiti bambanag, masansan a kunaenna: “Adda a naisurat.” (Mateo 4:4, 7, 10; 11:10; 21:13) Iti rabii sakbay ti ipapatayna, nagkararag ni Jesus maipanggep kadagiti adalanna: “Santipikarem ida babaen iti kinapudno; ti saom ket kinapudno.”​—Juan 17:17.

Gapuna, nasken met iti pannakaisalakan ti pannakaawat kadagiti sursuro ti Sao ti Dios, ti Biblia. (2 Timoteo 3:16) Ti Biblia laeng ti makasungbat kadagiti saludsod kas iti: Ania ti kaipapanan ti biag? Apay a pinalubosan ti Dios ti kinadakes nga agtultuloy iti nakapapaut? Ania ti mapasamak iti tao no matay? Talaga kadi a parparigaten ti Dios dagiti tao iti umap-apuy nga impierno? Ania ti panggep ti Dios para iti daga?a Saan a makapagdaydayaw ti maysa a siuumiso iti Dios no awan husto a pannakaawatna kadagitoy a banag, ta kinuna ni Jesus: “Dagiti pudno a managdaydayaw agdaydayawdanton iti Ama buyogen ti espiritu ken kinapudno.”​—Juan 4:23.

Pammati a Mabuyogan iti Aramid

Saan laeng a basta pananggun-od iti impormasion ti ramanen ti pannakaisalakan. Iti maysa a silulukat a puso, ti umiso a pannakaammo iti Dios mangibunga iti pammati. (Roma 10:10, 17; Hebreo 11:6) Ti kasta a pammati gutugotenna ti maysa nga agtignay. Kas pagarigan, ibalakad ti Biblia: “Agbabawikayo, ngarud, ket agbaw-ingkayo tapno mapunas dagiti basolyo, tapno dagiti panawen ti pannakabang-ar umayda manipud iti persona ni Jehova.”​—Aramid 3:19.

Wen, ti pannakaisalakan ramanenna met ti panangannurot kadagiti pagalagadan ti Dios iti kondukta ken moralidad. Iti sidong ti mangbalbaliw nga impluensia ti Sao ti Dios, dagiti nabayagen a nakayugalian a panagulbod ken panagkusit masuktan iti kinamapagpiaran ken kinapudno. (Tito 2:10) Dagiti imoral nga aramid, kas ti homoseksualidad, pannakikamalala, ken pannakiabig, maidianen ken masuktan iti nadalus a moral a kababalin. (1 Corinto 6:9-11) Daytoy ket saan a temporario a panangisardeng maibatay iti emosion no di ket permanente a panagbalbaliw a bunga ti napasnek a panagadal ken panangyaplikar iti Sao ti Dios.​—Efeso 4:22-24.

Inton agangay, ti ayat ken panangipateg iti Dios tignayenna ti napudno ti panagpuspusona a tao a naan-anay nga agdedikar iti Dios ken isimbolo dayta babaen ti panagpabautisar iti danum. (Mateo 28:19, 20; Roma 12:1) Naisalakan iti imatang ti Dios dagiti nabautisaran a Kristiano. (1 Pedro 3:21) Kabayatan ti um-umay a pannakadadael daytoy dakes a lubong, naan-anay nga isalakanto ida ti Dios babaen ti panangitalimeng kadakuada kabayatan dayta a rigat.​—Apocalipsis 7:9, 14.

No Ania ti Mabalin a Kaipapanan Kadakayo ti Pannakaisalakan

Nalawag manipud iti daytoy ababa a panangsalaysay a saan la a ti ‘kaadda ni Apo Jesus iti pusoyo’ ti ramanen ti pananggun-od iti pannakaisalakan. Kaipapananna ti pananggun-od iti umiso a pannakaammo ken Jehova a Dios ken ni Jesu-Kristo ken panangaramid iti kasapulan a panagbalbaliw iti biag ti maysa. Mabalin a kasla narigat nga aramiden daytoy, ngem sitatallugod dagiti Saksi ni Jehova a tumulong kadakayo iti daytoy a panangikagumaan. Babaen ti libre a panangyadal iti Biblia iti pagtaengan, matulongandakayo a mangrugi a magna iti dana nga agturong iti pudno a pannakaisalakan.b

Tangay nakaas-asidegen ti iyaay ti aldaw ti panangukom ti Dios, nagangganat ita ti panangaramid iti daytoy! Itan ti tiempo a panangipangag iti sasao ti propeta: “Iti kasakbayan ti iyaay kadakayo ti aldaw ti pungtot ni Jehova, birokenyo ni Jehova, dakayo amin a naemma iti daga, a nagtungpal kadagiti bilbilinna; birokenyo ti kinalinteg, birokenyo ti kinaemma: nalabit a dakayo maitalimengkayto iti aldaw ti pungtot ni Jehova.”​—Sofonias 2:2, 3.

[Dagiti Footnote]

[Kahon iti panid 6]

Ti Pannakaisalakan ket Bunga Ti . . .

◻ Pananggun-od iti umiso a pannakaammo iti Dios ken ni Jesus.​—Juan 17:3.

◻ Panamati.​—Roma 10:17; Hebreo 11:6.

◻ Panagbabawi ken panagbaw-ing.​—Aramid 3:19; Efeso 4:22-24.

◻ Panagdedikar ken panagpabautisar.​—Mateo 16:24; 28:19, 20.

◻ Panagtultuloy a panangipaduyakyak iti publiko.​—Mateo 24:14; Roma 10:10.

[Dagiti Ladawan iti panid 7]

Ti panagadal iti Biblia, panangyaplikar iti nasursuro, panagdedikar, ken panagpabautisar ket addang a mangiturong iti pannakaisalakan