Report Dagiti Manangiwaragawag ti Pagarian
“Agsilsilnag kas Silsilaw iti Lubong”
AGPARANG a naidumduma dagiti Saksi ni Jehova ken masansan a makaawat iti dakes a publisidad gapu iti saanda a panagpayalison ti dara. Nupay kasta, sititibker a naibatay iti Biblia daytoy a takder. Ipakpakitana a kondenaren ti Dios ti di umiso a panangusar ti dara, yantangay nakapatpateg ti dara iti imatangna. (Genesis 9:3, 4; Levitico 17:14) Kas resulta ti panangsukimat iti Kasuratan iti daytoy a tema, inkeddeng dagiti Saksi ni Jehova a ti bilin ti Biblia nga ‘umadayo iti dara’ nalawag nga iramanna ti moderno a panangyalison ti dara.—Aramid 15:19, 20, 28, 29.
Kadagiti kallabes a tawen, dagiti kameng ti komunidad dagiti mangngagas, kasta met dagiti korte iti dadduma a nasion, sinuportaranda dagiti Saksi ni Jehova iti daytoy nga isyu. Kas pagarigan, idiay Denmark, natay ti maysa nga agkabannuag nga ina nga ammonan ti panangmatmat ti Biblia maipanggep iti dara gapu iti maysa nga aksidente iti lugan. Gapu iti panagkedkedna nga agpayalison ti dara, rinubroban dagiti doktorna ti nabara a kampania ti media maibusor kadagiti Saksi ni Jehova a nagpaut iti makabulan.
Nagkiddaw dagiti nagannak ti agkabannuag a babai iti imbestigasion, ket idi Abril 1994 maysa a pangngeddeng ti impakaammo ti Commission of Patients’ Complaints ti Denmark. Kinunana a natay ti pasiente, saan a gapu ta nagkedked nga agpayalison ti dara, no di ket gapu iti kinaliway dagiti mangngagas. Naibatay ti pangngeddeng kadagiti imbestigasion nga inaramid ti Board of Forensic Medicine ken dagiti autoridad iti salun-at. Iti maysa a surat a naiturong iti amin a pasilidad iti panangsaluad ti salun-at idiay Denmark, imbaga ti National Board of Health a rebbengen dagiti doktor nga ipaayan dagiti Saksi ni Jehova iti kasasayaatan a mausar a sandi a pangagas, nga ikonsiderar ti panagkedkedda nga umawat ti dara.
Maysa pay a kaso mainaig ken ni Dan, maysa a 15-tawenna a Saksi a natay gapu iti leukemia. Iti daytoy a kaso rinaem dagiti doktor ti natibker a pangngeddeng ni Dan a saan nga agpayalison ti dara. Nagresulta daytoy iti maysa a nasaknap a kampania dagiti periodista nga iti dayta pinabasol ti media dagiti doktor gapu iti ipapatay ni Dan. Ngem adu ti saan nga immanamong iti negatibo a propaganda.
Kas pagarigan, timmabuno ti prinsipal iti eskuelaan a pagad-adalan idi ni Dan idiay Kingdom Hall para iti palawag iti pumpon. Naklaat iti di nainkalintegan a damag iti warnakan maipapan iti ipapatay ni Dan. Kalpasan ti panagsalsaludsodna iti maysa a katrabahuanna a Saksi maipapan kadagiti Saksi ni Jehova, inawatna ti maysa a kopia ti video a Jehovah’s Witnesses—The Organization Behind the Name. Nasdaaw unay iti video ta inyurnosna pay a buyaen dayta ti amin a mannursuro iti eskuelaan. Kalpasanna, naipabuya ti video iti amin nga estudiante, saggaysa a klase iti tunggal pabuya.
Saan met nga immanamong ti ministro ti salun-at idiay Denmark iti di umiso a publisidad nga inawat dagiti doktor ni Dan. Kinunana nga umiso ti inaramid dagiti doktor idi rinaemda ti nataengan a pangngeddeng ken natibker a pammati ni Dan.
Adda riniwriw a manangiwaragawag ti Pagarian nga agtultulnog kadagiti linteg ti Dios. Gapu iti panagtulnogda, naisalsaluminada nga ‘agsilsilnag kas silsilaw iti lubong.’—Filipos 2:12, 15.