Agtalekkayo ken Jehova ken iti Saona

“Dagiti makaammo iti naganmo agkammatalekdanto kenka.”​—SALMO 9:10.

1. Apay a makapagtalektay pay laeng ken Jehova ken iti Saona iti moderno a kaaldawantayo?

ITI daytoy moderno a lubong, kasla saan a praktikal ken realistiko ti awis nga agtalek iti Dios ken iti Saona, ti Biblia. Ngem, napaneknekan a napudno ken praktikal ti sirib ti Dios kabayatan ti naundayen a panawen. Ti Namarsua iti lalaki ken babai ti Namunganay iti panagasawa ken ti pamilia, ket ad-adda nga ammona dagiti kasapulantayo ngem ti asinoman. Kas iti saan a panagbalbaliw dagiti kangrunaan a kasapulan ti tao, kasta met a nagtalinaed pay laeng dagiti kangrunaan a pamay-an iti pananggun-od kadagidiay a kasapulan. Nupay sinigsiglon ti pannakaisuratna, mangipaay pay laeng ti nainsiriban a pammagbaga ti Biblia iti kasayaatan a panangiwanwan agpaay iti balligi ti panagbiag ken panangrisut kadagiti parikut. Mangibunga ti panangipangag iti dayta iti napalaus a kinaragsak​—uray pay iti narikut, sientipiko a lubong a pagbibiagantayo!

2. (a) Aniat’ nasayaat nga imbunga ti panagtulnog kadagiti bilin ti Dios iti biag dagiti tattao ni Jehova? (b) Ania pay ti ikari ni Jehova kadagidiay agtulnog kenkuana ken iti Saona?

² Mangyeg kadagiti praktikal a gunggona iti inaldaw ti panagtalek ken Jehova ken panangyaplikar kadagiti prinsipio ti Biblia. Mapaneknekan daytoy iti biag ti riniwriw a Saksi ni Jehova iti aglikmut ti lubong a naaddaan iti pammati ken tured a mangyaplikar iti pammagbaga ti Biblia. Para kadakuada, napaneknekan a nakasaysayaat ti agtalek iti Namarsua ken iti Saona. (Salmo 9:9, 10) Ti panagtulnog kadagiti bilin ti Dios isut’ namagbalin kadakuada a nasaysayaat a tattao no maipapan iti kinadalus, kinamapagtalkan, kinagaget, panagraem iti biag ken sanikua ti sabsabali, ken kinatimbeng iti taraon ken inumen. Nangiturong daytoy iti umiso nga ayat ken pannakasanay iti uneg ti pamilia​—panagbalin a managpadagus, naanus, manangngaasi, ken manangpakawan​—ken adu pay a bambanag. Nabaelanda unay a liklikan dagiti dakes a bunga ti pungtot, guranggura, panangpapatay, apal, buteng, kinasadut, kinatangsit, panagulbod, pammardaya, kinalulok, ken imoralidad. (Salmo 32:10) Ngem saan laeng a basta ikari ti Dios ti nasayaat a pagbanagan dagidiay mangsalimetmet kadagiti lintegna. Kinuna ni Jesus a dagidiay mangsurot iti Nakristianuan a dana umawatdanto iti “maminsangagasut ita iti daytoy a periodo ti tiempo, kadagiti . . . inna ken annak ken dagiti talon, agraman dagiti pannakaidadanes, ket iti um-umay a sistema ti bambanag agnanayon a biag.”​—Marcos 10:29, 30.

Liklikanyo ti Panagtalek iti Nailubongan a Sirib

3. Iti panagtultuloy nga agtalek ken Jehova ken iti Saona, ania dagiti parikut a pakaipasanguan no dadduma dagiti Kristiano?

³ Ti parikut kadagiti imperpekto a tattao isu ti panagannayasda a mangtagibassit wenno manglipat kadagiti kalikaguman ti Dios. Nakalaklakada a panunoten nga ad-adu ti ammoda wenno nasirsirib dagiti de-adal daytoy a lubong ngem iti Dios, a daytat’ ad-adda a moderno. Mapataud met dagiti adipen ti Dios daytoy a kababalin, nga agbibiagda a kasta iti tengnga daytoy a lubong. Gapuna, iti panangipaayna iti naayat nga awis a dumngeg iti pammagbagana, ti nailangitan nga Amatayo iramanna met ti maitutop a pakdaar: “Anakko, dika lipaten ti lintegko ngem salimetmetam koma dita pusom dagiti bilbilinko, ta inayondanto kenka ti kaatiddog dagiti aldaw, ken tawtawen ti panagbiag, ken ti talna. Agtalekka ken ni Jehova iti amin a pusom, ket dika agtalged iti pannakaawatmo met laeng. Kadagiti amin a dalanmo isu ti bigbigem, ket isu iturongnanto dagiti desdesmo. Saanka koma a masirib kadagiti matam met laeng. Agbutengka ken Jehova ket pagtalawam ti dakes.”​—Proverbio 3:1, 2, 5-7.

4. Kasanot’ kasaknap “ti sirib daytoy a lubong,” ken apay a “kinamaag [dayta] iti Dios”?

⁴ Nawadwad ti magun-odan a sirib daytoy a lubong ken aggapu iti adu a gubuayan. Nakaad-adu ti pagadalan, ken “iti panagaramid kadagiti adu a liblibro awan ti gibusna.” (Eclesiastes 12:12) Ti makunkuna ita nga information super highway iti lubong ti computer ikarina a mangipaay iti aglaplapusanan nga impormasion iti gistay aniaman a tema. Ngem ti kaadda amin daytoy a pannakaammo saanna a mapagsirib ti lubong wenno marisut dagiti parikutna. Imbes ketdi, inaldaw a kumaro ti kasasaad ti lubong. Nalawag a kunaen kadatayo ti Biblia a “ti sirib daytoy a lubong ket kinamaag iti Dios.”​—1 Corinto 3:19, 20.

5. Ania dagiti pakdaar nga ipaay ti Biblia no maipanggep iti “sirib daytoy a lubong”?

⁵ Kabayatan daytoy ngudo ti maudi nga al-aldaw, manamnama laeng a mangaramid daytoy kangrunaan a manangallilaw, ni Satanas a Diablo, iti adu a kinaulbod iti panangikagumaanna a mangpukaw iti panagtalek iti kinapudno ti Biblia. Nangpataud dagiti higher critics iti umad-adu a mapagduaduaan a libro a mangkarit iti kinaagpaypayso ken kinamapagtalkan ti Biblia. Pinakdaaran ni Pablo ti padana a Kristiano: “O Timoteo, saluadam ti naitalek kenka, nga adaywam dagiti awan kapapay-anna a panagsasao a sumalungasing iti nasantuan ken dagiti panagsusuppiat iti siuulbod a naawagan ‘pannakaammo.’ Ta iti panangiparammagda iti kasta a pannakaammo sumagmamano ti simiasi manipud iti pammati.” (1 Timoteo 6:20, 21) Namakdaar pay ti Biblia: “Agaluadkayo: amangan no adda asinoman a mangkayawto kadakayo kas naanupanna babaen iti pilosopia ken awan kapapay-anna a panangallilaw maitunos iti tradision dagiti tattao, maitunos kadagiti pagdamdamuan a bambanag ti lubong ket saan a maitunos ken Kristo.”​—Colosas 2:8.

Labananyo ti Pagannayasan nga Agduadua

6. Apay a napateg ti kinaridam a mangsaluad iti iraramut dagiti panagduadua iti puso?

⁶ Ti sabali pay a nasikap a taktika ti Diablo isut’ panangimulana kadagiti panagduadua iti panunot. Nakasigsiglat a mangkita iti sumagmamano a kinakapuy iti pammati ket gundawayanna dayta. Asinoman a makarikna kadagiti panagduadua laglagipenna koma a ti adda iti likudan dagiti kasta a panagduadua isu daydiay nangikuna ken Eva: “Pudno aya a kinuna ti Dios, saankay a mangan iti amin a kayo iti minuyongan?” Idi naimulan ti Mannulisog ti panagduadua iti panunotna, ti simmaganad nga addang isut’ panangulbodna kenkuana, a pinatina. (Genesis 3:1, 4, 5) Tapno maliklikan ti pannakadadael ti pammatitayo gapu iti panagduadua a kas ken Eva, kasapulan ti panagridamtayo. No nangrugin nga agtalinaed iti pusoyo ti aniaman a sangkabassit a panagduadua maipapan ken Jehova, iti Saona, wenno iti organisasionna, partakanyo nga ikkaten sakbay nga umukuok dayta iti banag a mabalin a mangdadael iti pammatiyo.​—Idiligyo ti 1 Corinto 10:12.

7. Aniat’ maaramidan a pangikkat kadagiti panagduadua?

⁷ Aniat’ maaramidan? Manen, ti sungbat isut’ panagtalek ken Jehova ken iti Saona. “No ti asinoman kadakayo agkurang iti sirib, agtultuloy koma nga agdawat iti Dios, ta isu mangted a sipaparabur kadagiti isuamin ket awanan panangumsi; ket maitedto dayta kenkuana. Ngem isu agtultuloy koma nga agdawat buyogen ti pammati, a saan a pulos nga agduadua, ta ti agduadua umasping iti dalluyon ti baybay nga iduron ti angin ket maipalpallayug.” (Santiago 1:5, 6; 2 Pedro 3:17, 18) Gapuna, ti umuna nga addang isu ti napasnek a panagkararag ken Jehova. (Salmo 62:8) Kalpasanna, dikay bumdeng nga agpatulong kadagiti naayat a manangaywan iti kongregasion. (Aramid 20:28; Santiago 5:14, 15; Judas 22) Matulongandakayo a mangtunton iti gubuayan dagiti panagduaduayo, a mabalin a maigapu iti kinatangsit wenno sumagmamano a biddut a kapanunotan.

8. Kasanot’ masansan a panangrugi ti apostata a panagpampanunot, ket ania ti pamuspusan?

⁸ Ti kadi panagbasa wenno panagdengngeg kadagiti apostata a kapanunotan wenno nailubongan a pilosopia ti nangiserrek kadagiti makasabidong a panagduadua? Sisisirib nga ibalakad ti Biblia: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna, nga aramatem a siuumiso ti sao ti kinapudno. Ngem adaywam dagiti awan kapapay-anna a panagsasao a sumalungasing iti nasantuan; ta rumang-aydanto iti ad-adda pay a di-kinanadiosan, ket ti saoda agsaknapto a kas gangrena.” (2 Timoteo 2:15-17) Makapainteres ta adu kadagiti nabiktima ti apostasia ti nangrugi iti di umiso a turong babaen ti panagrekreklamoda idi damo iti nariknada a pannakatratoda iti organisasion ni Jehova. (Judas 16) Simmaruno ti panagbirok kadagiti biddut iti pammati. Kas iti dagus a panangikkat ti siruhano iti gangrena, iwaksiyo a dagus ti aniaman a pagannayasan nga agreklamo, a di mapnek iti pamay-an ti pannakaaramid dagiti banag iti kongregasion Kristiano. (Colosas 3:13, 14) Ikkatenyo ti aniaman a mangpakaro kadagiti kasta a panagduadua.​—Marcos 9:43.

9. Kasano a matulongannatayo ti nasayaat a teokratiko a rutina nga agtalinaed a nasalun-at iti pammati?

⁹ Agtalinaedkayo a nasinged ken Jehova ken iti organisasionna. Sisusungdo a tuladenyo ni Pedro, a determinado a nangikuna: “Apo, iti siasino ti papananminto? Addaanka kadagiti sasao ti agnanayon a biag.” (Juan 6:52, 60, 66-68) Maaddaankay iti nasayaat a programa ti panagadal iti Sao ni Jehova tapno mapagtalinaedyo a nabileg ti pammatiyo, kas iti maysa a dakkel a kalasag, a makabalin ‘a mangdepdep iti amin a sumsumged a gayang daydiay nadangkes.’ (Efeso 6:16) Agtalinaedkayo nga aktibo iti Nakristianuan a ministerio, a siaayat nga iranudyo ti mensahe ti Pagarian iti sabsabali. Inaldaw a mennamennaenyo buyogen ti panangapresiar no kasanot’ panangbendision ni Jehova kadakayo. Agyamankayo ta ammoyo ti kinapudno. Ti panangaramid amin kadagitoy a banag iti nasayaat a Nakristianuan a rutina ti tumulongto kadakayo nga agbalin a naragsak, makapagibtur, ken agtalinaed nga awanan kadagiti panagduadua.​—Salmo 40:4; Filipos 3:15, 16; Hebreo 6:10-12.

Panangsurot iti Panangiwanwan ni Jehova iti Panagasawa

10. Apay a nangnangruna a napateg ti agpaiwanwan ken Jehova iti Nakristianuan a panagasawa?

¹⁰ Iti panangyurnosna iti lalaki ken babai nga agdenna kas agassawa, saan laeng a ti pannakapunno ti daga ti pinanggep ni Jehova no di pay ket tapno parayrayenna ti kinaragsakda. Nupay kasta, ti basol ken kinaimperpekto isut’ nangyeg kadagiti nakaro a parikut iti relasion ti panagasawa. Saan a makaliklik dagiti Kristiano kadagitoy, yantangay imperpektoda met ken makapasar kadagiti rigat ti moderno-aldaw a panagbiag. Kaskasdi, agingga nga agtalekda ken Jehova ken iti Saona, maaddaan dagiti Kristiano iti nasayaat a balligi iti panagasawa ken iti panangpatanor kadagiti annakda. Awan lugar dagiti nailubongan nga aramid ken panagtigtignay iti Nakristianuan a panagasawa. Igunamgunam kadatayo ti Sao ti Dios: “Ti panagasawa nadayaw koma iti tengnga dagiti isuamin, ket ti pagiddaan ti agassawa awan koma ti tulawna, ta ti Dios ukomennanto dagiti mannakiabig ken dagiti mannakikamalala.”​—Hebreo 13:4.

11. Iti panangrisut kadagiti parikut ti panagasawa, ania koma ti bigbigen nga agpadpada dagiti agassawa?

¹¹ Adda panaginnayat, panangbigbig iti pagrebbengan, ken kinatalged iti panagasawa a maibanag sigun iti balakad ti Biblia. Agpadpada a matarusan ken raemen ti asawa a lalaki ken asawa a babai ti prinsipio ti kinaulo. No rumsua dagiti pakarigatan, masansan a maigapu dagita iti sumagmamano a panagliway a mangyaplikar iti balakad ti Biblia. Iti panangrisut iti naundayen a parikut, nasken a sipupudno nga ipamaysa dagiti agassawa no ania a talaga ti parikut ket tamingenda dagiti makagapu imbes a dagiti sintomas. No narigat wenno saanda a makapagtunos kadagiti kallabes a panagsinnarita, mabalin nga agkiddaw dagiti agassawa iti awan idumdumana a tulong manipud iti naayat a manangaywan.

12. (a) Kadagiti ania a gagangay a parikut iti panagasawa a mangipaay ti Biblia iti balakad? (b) Apay a napateg iti biang agpadpada dagiti agassawa ti panangaramid kadagiti bambanag iti pamay-an ni Jehova?

¹² Ti kadi parikut iramanna ti komunikasion, panagraem iti rikrikna ti tunggal maysa, panagraem iti kinaulo, wenno ti pannakaaramid dagiti pangngeddeng? Adda kadi pakainaiganna iti panangpatanor kadagiti annak, wenno ti panagbalin a natimbeng kadagiti seksual a kasapulan? Wenno ti kadi badyet ti pamilia, panaglinglingay, panaglalangen, no rumbeng kadi nga agtrabaho ti asawa a babai, wenno no sadino ti pagnaedanyo? Aniaman ti parikut, mangipaay ti Biblia iti praktikal a balakad direkta man babaen kadagiti linteg wenno saan a direkta babaen kadagiti prinsipio. (Mateo 19:4, 5, 9; 1 Corinto 7:1-40; Efeso 5:21-23, 28-33; 6:1-4; Colosas 3:18-21; Tito 2:4, 5; 1 Pedro 3:1-7) No agpadpada a liklikan ti agassawa dagiti managimbubukodan a panagdawat ken naan-anay nga iyebkasda ti ayat iti panagasawada, agresulta iti ad-adda pay a kinaragsak. Adda koma nabara a tarigagay agpadpada iti biang dagiti agassawa a mangaramid kadagiti kasapulan a panagbalbaliw, nga aramidenda dagiti bambanag iti pamay-an ni Jehova. “Ti mangikankano iti sao masarakannanto ti imbag, ket siasinoman nga agkammatalek ken Jehova isu ti naragsak.”​—Proverbio 16:20.

Agtutubo​—Dumngegkayo iti Sao ti Dios

13. Apay a saan a nalaka kadagiti agtutubo a Kristiano ti dumakkel buyogen ti nabileg a pammati ken Jehova ken iti Saona?

¹³ Saan a nalaka kadagiti agtutubo a Kristiano a dumakkel a nabileg iti pammati bayat a napalikmutanda iti nadangkes a lubong. Ti maysa a makagapu isu ti ‘kaadda ti intero a lubong iti pannakabalin daydiay nadangkes,’ ni Satanas a Diablo. (1 Juan 5:19) Dagiti agtutubo ti rarauten daytoy nakadakdakes a kabusor a kabaelanna a pagparangen ti dakes a kasla nasayaat. Dagiti managimbubukodan a kababalin, naagum nga ambision, panagtarigagay iti imoral ken nadamsak, ken ti abnormal a pananggun-od iti kinaragsak​—adda pagpapadaan amin dagitoy, ti dominante a panagpampanunot a nailadawan iti Biblia kas “ti espiritu nga agtigtignay ita kadagiti annak ti kinasukir.” (Efeso 2:1-3) Sisisikap nga intandudo ni Satanas daytoy nga “espiritu” kadagiti libro ti eskuelaan, iti adu kadagiti magun-odan a musika, iti isport, ken iti dadduma pay a kita ti paglinglingayan. Masapul a nasiglat dagiti nagannak a mangsumra kadagiti kasta nga impluensia babaen ti panangtulongda iti annakda a dumakkel nga addaan panagtalek ken Jehova ken iti Saona.

14. Kasano a ‘makaadayo [dagiti agtutubo] kadagiti tarigagay a naikasigudan iti kina-agtutubo’?

¹⁴ Nangipaay ni Pablo iti naamaan a patigmaan iti agtutubo a kaduana a ni Timoteo: “Umadayoka kadagiti tarigagay a naikasigudan iti kina-agtutubo, ngem surotem ti kinalinteg, pammati, ayat, talna, a kadua dagidiay umawag iti Apo manipud iti nadalus a puso.” (2 Timoteo 2:22) Nupay saan nga amin a “tarigagay a naikasigudan iti kina-agtutubo” ti dakes a mismo, ‘adaywan’ koma ida dagiti agtutubo a saanda koma a palubosan dagitoy a banag nga agbalin a pakaseknanda unay, a bassit laengen, no adda man, ti panawenda kadagiti nadiosan a banag. Nupay saan met a dakes ti panagpabaked, isport, musika, paglinglingayan, pagduyosan, ken panagbiahe, nalabit agbalinda a silo no maipangpangrunada iti biag. Adaywanyo a naan-anay ti awan mamaayna a panagsasarita, panagpalpallailang, abnormal a panaginteres iti sekso, panagballog ken panagsikor, ken panagrekreklamo iti di pannakaawat kadakayo dagiti dadakkelyo.

15. Ania dagiti banag a mabalin a mapasamak iti mismo nga uneg ti pagtaengan a mangituggod iti doble kara a panagbiag ti agtutubo?

¹⁵ Uray pay iti mismo nga uneg ti pagtaengan, mabalin a sidadaan ti peggad kadagiti agtutubo. No agbuya kadagiti imoral wenno naranggas a pabuya ti TV ken video, maimula ti tarigagay nga agaramid kadagiti dakes a banag. (Santiago 1:14, 15) Ibalakad ti Biblia: “O dakayo nga agay-ayat ken Jehova, guraenyo ti dakes.” (Salmo 97:10; 115:11) Ammo ni Jehova no padpadasen ti asinoman ti agbiag a doble kara. (Proverbio 15:3) Agtutubo a Kristiano, kitaenyo ti aglikmut ti kuartoyo. Agipaspaskilkayo aya kadagiti ladawan dagiti imoral a bituen ti isport wenno lubong ti musika, wenno agipaskilkayo kadagiti makapasalun-at a banag a nasasayaat a palagip? (Salmo 101:3) Iti aparadoryo, addaankay kadi kadagiti natakneng a kawes, wenno iyanninaw kadi ti dadduma kadagiti aruatenyo dagiti nalabes nga estilo ti panagkawkawes daytoy a lubong? Kadagiti nasikap a pamay-an, masiluannakayo ti Diablo no tumulokkayo iti pannulisog a mangpadas iti dakes. Sisisirib nga ibalakad ti Biblia: “Agtalinaedkayo a sipupuot, managbantaykayo koma. Ti kabusoryo, ti Diablo, agsursursor a kasla leon a ngumerngernger, nga agsapsapul iti asinoman nga alun-onenna.”​—1 Pedro 5:8.

16. Kasano a ti pammagbaga ti Biblia tulonganna ti agtutubo nga agbalin a pagragsakan ti isuamin a maseknan?

¹⁶ Ibaga kadakayo ti Biblia nga annadanyo ti pannakitimpuyogyo. (1 Corinto 15:33) Rumbeng a dagidiay agbuteng ken Jehova ti kakaduayo. Dikay tumulok iti panangpilit dagiti kapatadan. (Salmo 56:11; Proverbio 29:25) Agtulnogkayo kadagiti managbuteng-Dios a dadakkelyo. (Proverbio 6:20-22; Efeso 6:1-3) Agkiddawkayo iti panangiwanwan ken pammaregta dagiti panglakayen. (Isaias 32:1, 2) Pagtalinaedenyo ti panunot ken matayo kadagiti naespirituan a kababalin ken kalat. Gundawayanyo ti rumang-ay iti naespirituan ken makiraman kadagiti aramid ti kongregasion. Sursuruenyo no kasano nga aramiden a mismo dagiti bambanag. Rumang-aykayo a nabileg ken nasalun-at iti pammati, ket kalpasanna mapaneknekanyonto a talaga a dakayo daydiay​—daydiay maikari iti biag idiay baro a lubong ni Jehova! Maay-ayonto kadakayo ti nailangitan nga Amatayo, maragsakanto kadakayo dagiti naindagaan a dadakkelyo, ket maparegtanto dagiti Nakristianuan a kakabsatyo. Napateg dayta!​—Proverbio 4:1, 2, 7, 8.

17. Ania dagiti gunggona a dumteng kadagidiay agtalek ken Jehova ken iti Saona?

¹⁷ Iti panangidaniw, napaltiingan ti salmista a mangisurat: “Ni Jehova a mismo saannanto nga ikedked ti aniaman a naimbag kadagidiay magna a sililinteg. O Jehova dagiti buybuyot, nagasat ti tao nga agkammatalek kenka.” (Salmo 84:11, 12) Wen, dumtengto ti kinaragsak ken balligi, saan a pannakaupay ken pannakapaay, kadagiti amin nga agtalek ken Jehova ken iti Saona, ti Biblia.​—2 Timoteo 3:14, 16, 17.

Kasanoyo a Sungbatan?

◻ Apay a saan a rumbeng nga agtalek dagiti Kristiano iti “sirib daytoy a lubong”?

◻ Aniat’ rumbeng a maaramid no adda panagduadua ti maysa?

◻ Kasano a mangyeg iti balligi ken kinaragsak iti panagasawa ti panangaramid kadagiti banag iti pamay-an ni Jehova?

◻ Kasano a tulongan ti Biblia dagiti agtutubo nga ‘umadayo kadagiti tarigagay a naikasigudan iti kina-agtutubo’?

[Ladawan iti panid 23]

Umadani dagiti Kristiano ken Jehova ken iti Saona, bayat nga iwaksida kas minamaag “ti sirib daytoy a lubong”

[Ladawan iti panid 25]

Adda nasayaat a balligi ken kinaragsak dagiti pamilia nga agtalek ken Jehova ken iti Saona