Ilalawa a Buyogen ti Bendision ni Jehova

IMPAGANETGET ti programa iti dedikasion idi rabii ti Setiembre 18, 1995, a pudno a binendisionan ni Jehova a Dios ti iyaadu dagiti Saksina iti ayan ti sangalubongan a hedkuartersda idiay Brooklyn, New York.

Nasurok nga 6,000 ti dimngeg iti programa ti dedikasion. Nagtataripnongda idiay Brooklyn, a sadiay nangrugi ti programa, kasta met kadagiti sabali a lokasion, a pakairamanan dagiti dadakkel a pasilidad dagiti Saksi ni Jehova iti asideg ti Patterson ken Wallkill, New York, ken iti sangada iti asideg ti Toronto, Canada. Malaksid iti Brooklyn, nakangngeg dagidiay adda kadagidiay a lugar kadagiti programa babaen ti hookup ti telepono.

Maysa a Makapabileg a Programa

Dagiti Bethelite, kas pangawag kadagiti boluntario a trabahador, a nagimdeng iti programa buklen ti dakkel a paset ti sangalubongan a pamilia ti Bethel nga addaan iti nasurok a 16,400 a kameng. Agserserbi ti kakasta a kameng kadagiti agarup sangagasut a pagilian, a sadiay agimalmalditda iti literatura ti Biblia ken mangipapaay kadagiti tulong a serbisio maipaay iti nasurok a 78,600 a kongregasion dagiti Saksi ni Jehova iti lubong.

Nakaro ti panaggagar idi nangrugi ti programa ti dedikasion iti alas 6:30 t.m. buyogen ti kanta, a sinaruno ti kararag ni Karl Klein. Amin ti sibabara nga inawat ti tserman iti programa, a ni Lloyd Barry, babaen kadagiti ababa a komento iti kinapateg ti okasion. Rinepaso ni Albert Schroeder ti adalen a Pagwanawanan iti dayta a lawas, sa kalpasanna nagsarita ni Daniel Sydlik iti tema a “Ti Sagrado a Panagserbitayo iti Bethel.” Kameng amin ti Bagi a Manarawidwid dagiti Saksi ni Jehova dagitoy nga immuna iti programa.

Ti simmaganad a dua a paset ti programa​—“Panangrisut iti Dumakdakkel a Panagkasapulan iti Pagtaengan, 1974-1995,” ken “Dagiti Tampok ti Pannakapasayaat ti Bethel ken Panagpatakder Idiay Brooklyn”​—inladawanna dagiti tampok iti panagpatakder wenno panaggatang ken panangpasayaat kadagiti pasdek a naidedikar. Nagpaiduma nga atension ti naipamaysa kadagiti palawag iti kalkalpas a pasdek a pagnanaedan itan ti agsangaribu a Bethelite. Daytoy 115-metro-kangatona a pagtaengan iti 90 Sands Street ti dumna iti factory complex a pagimprentaan.

Intampok ti programa ti palawag iti dedikasion nga impaay ni Milton Henschel, ti presidente ti Watch Tower Bible and Tract Society. Impaganetgetna dagiti Naimbibliaan a pagibatayan iti panangidedikar kadagiti pasdek a mausar iti panagserbi ken Jehova. Kalpasan ti maysa a kanta, naingudo ti programa babaen ti kararag ni Carey Barber, maysa met a kameng ti Bagi a Manarawidwid. Ngem ania ti sumagmamano kadagiti tampok ti programa?

Dagiti Pasdek a Naidedikar

Inlawlawag ti manangaywan ti Bethel Home, ni George Couch, a 17 a pagtaengan ti nainayon nanipud iti naudi a pannakaidedikar ti maysa a pagtaengan iti Bethel idiay Brooklyn idi Mayo 2, 1969.a Dagitoy man ti kaipatpatakder a pagtaengan idi wenno patakder a nagatang ken tinarimaan. Agpaay ti dedikasion kadagitoy 17 a pagtaengan, iti dua a babassit a pasdek​—a nagatang idi dekada ti 1940 ngem nabalbaliwan kas pagtaengan iti Bethel​—kasta met dagiti pasilidad iti factory ken opisina a naipatakder wenno nagatang sipud idi naidedikar dagiti ragup a patakder a pagopisinaan dagiti Saksi ni Jehova idi Marso 15, 1982.b

Ti kadakkelan kadagiti pasdek a naidedikar isu daydiay adda iti 360 Furman Street. Damo a naipatakder idi 1928, ginatang dayta dagiti Saksi ni Jehova idi Marso 15, 1983, ken naan-anay a natarimaan. Addaan iti 93,000 metro kuadrado a kalawana, wenno agarup 9 nga ektaria. Ti sabali pay a pasdek a nairaman iti dedikasion isut’ factory iti 175 Pearl Street ken ti dadakkel a garahe a naipatakder kadagiti napalabas a tawen.

No Apay a Masapul ti Ad-adu Pay a Pagtaengan

Idi 1969, idi naidedikar ti maudi a pasdek a pagtaengan idiay Brooklyn Bethel, adda kangatuan a bilang a 1,336,112 a Saksi a mangikaskasaba iti naimbag a damag ti Pagarian ti Dios iti intero a lubong. Ngem idi 1995 adda 5,199,895 a mangar-aramid ti kasta, immadu iti nasurok a tallo ket kagudua a daras! Gapuna, tapno madanggayan ti umad-adu a panagkasapulan iti literatura ti Biblia, dimmakkel ti pamilia ti Brooklyn Bethel manipud 1,042 a regular a kameng idi 1969 a nagbalin a nasurok a 3,360, nga agnanaeddan iti 22 a pagtaengan!

Insalaysay ni George Couch no kasano a narisut ti panagkasapulan iti kanayonan a pagtaengan manipud idi 1974 aginggat’ 1995. Iti nasapa a paset ti dekada ti 1970, inabangan dagiti Saksi ni Jehova ti sumagmamano a kadsaaran iti kabangibang a Towers Hotel tapno pagnaedan ti dumakdakkel a pamilia ti Bethel. Idi Disiembre 1973, ni Nathan Knorr, a presidente idi ti Watch Tower Society, nagsurat agpadpada iti Bethel Office ken iti management ti Towers, a kinunana a panggep ti Sosiedad ti ‘pumanaw iti Towers Hotel iti Oktubre 1, 1974.’

Kinuna ni Kabsat Couch nga isut’ naklaat gapu ta awan umakaran dagiti Bethelite nga agnanaed iti Towers. Naklaat met ti management ti Towers, tangay agpampannurayda iti kuarta nga abang ti Sosiedad tapno makabayadda kadagiti paggastosan. Ti nagbanaganna indagadag ti management ti Towers kadagiti Saksi ni Jehova a gatangendan ti hotel. “Immadukayon sipud pay idi addakam ditoy,” kinunada, “ket kasapulanyo ti pasdek.”

“Napno dayta kadagiti agab-abang,” insungbat dagiti pannakabagi ti Sosiedad. “No gatangenmi dayta, kayatmi nga ikabil dagiti tattaomi dita.”

“Bakanteanmi ti pasdek para kadakayo,” inkari ti management ti Towers. Bueno, di nagbayag kalpasanna ginatang dagiti Saksi ni Jehova ti pasdek ti Towers iti maitutop a gatad. “Apay nga inaramid ni Kabsat Knorr daydiay a surat?” insaludsod ni Couch kadagiti maragragsakan nga agdengdengngeg kenkuana. “Nalabit isu a mismo dina ammo, ngem kasta ti naaramid a nagatang ti Watch Tower Society ti Towers Hotel.”

Insalaysay met ti nagpalawag no kasano a nagatang dagiti Saksi ni Jehova ti 97 Columbia Heights, ti dati a lugar ti nalatak a Margaret Hotel, iti ballasiw laeng ti kalsada manipud iti orihinal a Bethel Home. Nasayaat ti lokasion, tangay nalaka laeng a maisilpo iti Bethel complex babaen ti maysa nga usok iti sirok ti kalsada. Idi Pebrero 1980, idi mapaspasayaat pay laeng ti pasdek, daytat’ nauram. Kalpasanna, gapu ta marigatan ti akinkukua a mangipatakder iti baro a pasdek iti dayta a lugar, inlakona ti sanikua kadagiti Saksi ni Jehova.

Kinuna ni Kabsat Couch: “Gistay amin dagitoy a pasdek addaan nakaay-ayat a pakaestoriaan a mangisuro iti maysa a banag​—a ni Jehova a Dios ti mangiturturong iti makitkita nga organisasion tapno magatang dayta a partikular a pasdek.”

Ti Estoria Maipapan iti 90 Sands

Ti kabaruan ken ti kadakkelan a pagtaengan isut’ 90 Sands Street. Idi ginatang dagiti Saksi ni Jehova daytoy a sanikua idi Disiembre 1986, linaonna ti maysa a dakkel a factory iti 160 Jay Street.c Narebba ti factory, ket idi Agosto 30, 1990, naibaga iti pamilia ti Bethel a naited ti pammalubos tapno agpatakder iti maysa a 30-kadsaaran a pasilidad a pagtaengan iti dayta a lugar.

Iti maysa nga interbiu nga indauluan ti kameng ti Bagi a Manarawidwid a ni Theodore Jaracz, inladawan ti factory overseer ti Sosiedad iti Brooklyn, ni Max Larson, no kasano a naipaay ti pammalubos agpaay iti panagipatakder iti pagtaengan iti 90 Sands Street. Inlawlawag ni Kabsat Larson a nagpateg ti napasamak idi 1965.

Kayat idi ti Sosiedad ti agpatakder iti maysa a sangapulo-kadsaaran a factory iti maysa a bloke a kaabay ti dadduma a factory daytoy, ngem ti panangsona iti dayta a bloke impalubosna laeng ti panangipatakder iti dua a kadsaaran. Immanamong ti arkitekto a mangisagana kadagiti plano ti patakder agpaay iti kaisingsingasing a factory, ngem kinunana: “Diak kayat ti maibabain gapu iti panangidatagko kadagita iti board.” Kombinsido a saan a balbaliwan ti Board of Standards and Appeals dagiti regulasionda iti panagsona iti dayta a bloke. Idi naanamongan dagiti plano ti patakder, kinunana: “Kasanoyo nga inaramid dayta!”

Ti makagapu, intultuloy ni Larson, idi naaramid manen ti panagsona iti bloke agpaay iti sangapulo-kadsaaran a factory-tayo, naaramid met ti panangsona manen kadagiti kabangibang a bloke, a pakairamananen daydiay pasdek iti 160 Jay Street. Ket, makapasiddaaw, ti maikadua a panagsona impalubosna ti hotel. Ngem, kinuna ni Larson, awan nakadlaw iti dayta a banag​—uray kaskasano agingga a 25 a tawen ti napalabas, idi nangrugitayo nga agsapul iti lugar a pangipatakderan iti baro a pagtaengan a Bethel. Iti kasta natakuatan manen ti regulasion iti panagsona!

Inlawlawag ni Kabsat Larson ti napasamak: “Idi insaganami dagiti plano para iti 30-kadsaaran a pagtaengantayo ket impanmi dayta iti departamento agpaay kadagiti pasdek, kinunada kadakami: ‘Dikay mabalin ti mangipatakder iti pagtaengan sadiay. Agpaay daydiay kadagiti factory, ket saanda a balbaliwan ti sona para kadakayo.’

“‘Saanda a kasapulan a baliwan dayta,’ impakaammomi kadagiti opisial. ‘Nasona daytan para iti hotel.’ Idi kinitada dagiti rekord, nasdaawda unay! Bueno, kasta ti pannakaipatakder ti 30-kadsaaran a pasdektayo,” ingngudo ni Larson.

Nabatad ti Bendision ni Jehova

Insurat ti maysa a salmista ti Biblia: “No saan a ni Jehova ti mangbangon iti balay, agbannogda a bareng-bareng dagiti manangbangon.” (Salmo 127:1) Nalawag, binendisionan ni Jehova ti trabaho a panagipatakder dagiti Saksi ni Jehova tapno mapalaka ti sangalubongan a panangasaba ken panangisuro a trabaho nga imbilin ni Jesus nga aramiden dagiti pasurotna.​—Mateo 24:14; 28:19, 20.

Naragsakan dagidiay naaddaan iti pribilehio a dumngeg iti programa idi Setiembre 18, 1995, iti pammaneknek ti kasta a bendision iti ilalawa ti sangalubongan a hedkuarters dagiti adipen ni Jehova. Mangnamnama ti ili ni Jehova iti agtultuloy a bendisionna bayat nga itultuloyda nga aramiden dagiti bilinna.

[Dagiti Footnote]

[Ladawan iti panid 23]

90 Sands St. • 1995

[Dagiti ladawan iti panid 24, 25]

Ti sumagmamano kadagiti kanayonan a pagtaengan a naidedikar

97 Columbia Hts. • 1986

Bossert Hotel, 98 Montague St. • 1983

34 Orange St. • 1945

Standish Hotel, 169 Columbia Hts. • 1981

67 Livingston St. • 1989

108 Joralemon St. • 1988

Towers Hotel, 79-99 Willow St. • 1975

[Dagiti ladawan iti panid 26]

175 Pearl St. • 1983

69 Adams St. • 1991

360 Furman St. • 1983