Natimbengkay Aya a Payunir?
RUMIMRIMAT dagiti mata ti ama bayat a nakaunnat ti takiagna a mangpadpadaan iti bassit pay nga anakna a babai kadagiti damo nga agsarisarimadeng a panagaddangna. Idi pagammuan ta matuang, pinaregtana a padasenna manen. Ammona a din agbayag kabaelannanton a timbengen ken tibkeran ti bagina.
Iti umasping a pamay-an, ti maysa a baro a ministro a payunir mabalin a kasapulanna ti panawen ken pammaregta sakbay a magun-odna ti kinatimbeng a kasapulan tapno agballigi kas maysa nga amin-tiempo a manangiwaragawag ti Pagarian. Nakapagtultuloy ti adu a payunir nga agserbi a siraragsak iti adu a dekada. Napukaw ti dadduma ti kinatimbengda gapu kadagiti di-ninamnama a panagbalbaliw iti kasasaadda. Napukaw pay ketdi ti dadduma ti rag-oda. Iti maysa a pagilian, 20 porsiento kadagidiay nagpayunir ti agsardeng iti las-ud ti immuna a dua a tawen a kaaddada iti amin-tiempo a serbisio. Ania ngatat’ makagapu iti panagikkat ti maysa a payunir manipud iti daytoy karagsakan a panagserbi? Adda kadi aniaman a maaramidan tapno maliklikan dagitoy a lapped?
Nupay ti nakapuy a salun-at, pinansial a kasapulan, ken dagiti rebbengen iti pamilia ti makagapu nga agikkat ti dadduma iti amin-tiempo a ministerio, ti makalapped kadagiti dadduma isut’ pannakapaayda a mangtaginayon iti nasayaat a kinatimbeng kadagiti nagduduma a Nakristianuan nga annongen. Ti kinatimbeng ipasimudaagna “ti kasasaad a sadiay awan maysa a paset, elemento, kasasaad, wenno impluensia a manglab-aw iti sabali wenno di tumunos iti dadduma.”
Impakita ni Jesu-Kristo kadagiti adalanna no kasano nga aramiden ti trabaho a panangasaba ken panagaramid iti adalan. Iti mismo a ministeriona, impakitana met no kasano a mataginayon ti kinatimbeng. Impakita ni Jesus a di natimbeng dagiti relihioso a papangulo a Judio, a kunana kadakuada: “Itedyo ti apagkapullo ti yerbabuena ken ti eneldo ken ti kumino, ngem dikay inkankano dagiti nadagdagsen a bambanag iti Linteg, nga awan sabali, ti kinahustisia ken asi ken kinamatalek. Dagitoy a bambanag rebbeng nga aramiden, kaskasdi a saan a di ikankano dagiti dadduma a bambanag.”—Mateo 23:23.
Agaplikar met unay daytoy a prinsipio ita, nangnangruna iti payunir a ministerio. Natignayda gapu iti panaggagar ken nasayaat a panggep, nagpayunir ti dadduma a dida naan-anay a nagsagana wenno inutob dagiti amin a nairaman. (Lucas 14:27, 28) Nakapaspasnek unay ti dadduma iti tay-ak ti ministerio ta naliwayandan ti dadduma a napapateg nga aspeto ti Kinakristiano. Kasanoda a magun-od ken mataginayon ti kinatimbeng?
Agtalinaed a Napigsa iti Naespirituan!
Pulos a di liniwayan ni Jesus ti espiritualidadna. Nupay nakumikom unay gapu iti iyaay kenkuana ti adu a tattao tapno agdengngeg ken agpaagas, nangyurnos iti panawen para iti napasnek a panagkararag. (Marcos 1:35; Lucas 6:12) Ti natimbeng a panagpayunir ita kalikagumanna met ti naan-anay a panangaramat ti payunir kadagiti amin a probision tapno makapagtalinaed a napigsa iti naespirituan. Inkalintegan ni Pablo: “Nupay kasta, sika a mangisursuro iti asinoman, dika aya isuro ta bagim?” (Roma 2:21) Talaga a maysa a biddut ti pannakakumikom ti maysa iti panangasaba kadagiti sabsabali bayat a liwayanna ti mangyurnos iti umdas a personal a panagadal ken regular a panagkararag.
Dua a dekadan a payunir ni Kumiko. Nupay addaan iti tallo nga annak ken di manamati nga asawa, naammuanna babaen ti kapadasan a ti kasayaatan a tiempo a panagbasa ken panagadalna iti Biblia ket sakbay la unay ti pannaturogna. Kabayatan ti panagadalna, inotarna dagiti punto a mausarna iti tay-ak ti ministerio tapno mataginayonna a kabbaro ken makapainteres ti inaldaw a ministeriona. Ti dadduma a naballigi a payunir isapsapada ti agriing ngem kadagiti dadduma iti pamilia tapno tagiragsakenda ti pannakapapigsa iti naespirituan iti naulimek nga agsapa. Mabalin a mangilasinkayo iti sabali pay a maikanatad a tiempo a mangisagana kadagiti gimong ken makidanggay kadagiti kaudian a Nakristianuan a publikasion. No tarigagayanyo a taginayonen ti rag-o iti ministerio, saan a rumbeng nga apuraen wenno liwayan ti personal a panagadal.
Panangtimbeng Kadagiti Rebbengen iti Pamilia
Masapul met a laglagipen dagiti payunir a nagannak a ti maysa a dakkel a paset “ti pagayatan ni Jehova” kadakuada iramanna ti panangaywan kadagiti pisikal, emosional, ken naespirituan a kasapulan ti bukodda a pamilia. (Efeso 5:17; 6:1-4; 1 Timoteo 5:8) No dadduma madanagan pay ti maysa a manamati nga asawa ken dagiti kameng ti pamilia a didan makagun-od iti nam-ay ken tulong manipud iti asawa a babai wenno ina iti kanito nga agpayunir. Dagiti kasta a rikrikna mangpakapuy iti tarigagayna nga agpayunir. Nupay kasta, buyogen ti nasayaat a panagplano ken nasakbay a panangutob, mataginayon ti kinatimbeng.
Ikagumaan ti adu a payunir nga aramiden amin ti panangasabada no makapanawen dagiti kameng ti pamilia. Ni Kumiko, a nadakamat itay, ti makipamigat a kaduana ti pamiliana, palubosanna ni lakayna ken dagiti annakna iti bigat, sa agsubli iti pagtaengan sakbay a makasangpetda. Agluto a nasaksakbay iti sumagmamano a taraon no iti Lunes tapno malag-anan ken makaduana ti pamiliana a mangan imbes nga okupado iti kosina. Makatulong met ti panangirapin iti dadduma pay a trabaho iti mammaminsan, kas iti dadduma pay a trabaho iti pagtaengan bayat nga agisagsagana iti taraon. Iti kasta a pamay-an adda pay tiempo ni Kumiko a mangawis kadagiti gagayyem dagiti annakna ken mangisagana iti sorpresa kadakuada.
Bayat a dumakdakkel dagiti ubbing iti panagbalin a tin-edyer, masansan a kasapulanda ti ad-adu nga atension manipud kadagiti dadakkelda iti panangsaranget kadagiti kabbaro nga emosion, tarigagay, panagduadua, ken pakadanagan a mangringrimbaw kadakuada. Kalikaguman daytoy ti kinasigo ken pannakabalbaliw ti eskediul ti maysa a naganak a payunir. Usigenyo ni Hisako, maysa a payunir nga ina nga addaan iti tallo nga annak. Aniat’ inaramidna idi mangrugi a mangipakita ti inauna a balasangna iti kinaawan rag-o ken gagar kadagiti Nakristianuan a gimong ken panagserbi iti tay-ak gapu iti impluensia dagiti nailubongan a gagayyem iti eskuelaan? Ti pudpudno a kasapulan isut’ panangtagikua ti balasangna iti kinapudno ken agbalin a naan-anay a kombinsido a ti pannakaisina iti lubong isut’ kasayaatan a dana.—Santiago 4:4.
Kuna ni Hisako: “Inkeddengko nga iyadal manen kenkuana dagiti pamunganayan a doktrina iti Agbiag nga Agnanayon a libro iti inaldaw. Idi damo makapagadalkami laeng iti sumagmamano a minuto, ta masansan nga agalen ti balasangko ti nakaro a sakit ti tian ken ulona no orasen ti panagadal. Ngem inaramidko a regular ti panagadal. Kalpasan ti sumagmamano a bulan, adut’ simmayaatan ti kababalinna, a nangiturong iti panagdedikar ken panagpabautisarna iti apagbiit laeng a panawen.” Tagtagiragsaken itan ni Hisako ti amin-tiempo a ministerio a kaduana ti balasangna.
Kasapulan met nga agannad dagiti payunir nga amma a dida ipamaysa unay ti panangaywan kadagiti interesado iti tay-ak ken kadagiti annongenda iti kongregasion a didan maipaayan dagiti dumakdakkel nga annakda iti nabileg nga emosional a tulong ken panangiwanwan a kasapulanda. Daytoy ti banag a saan koma nga ipabiang ti lalaki iti asawana. Maysa nga okupado a Kristiano a panglakayen a nabayagen a payunir ken mangimammanehar met iti bassit a negosio ti mangyur-urnos iti tiempo a panangyadalna iti tunggal maysa kadagiti uppat nga annakna. (Efeso 6:4) Mainayon pay, isaganana dagiti linawas a gimong a kaduana ti pamiliana. Saan a liwayan dagiti natimbeng a payunir ti pamiliada iti material wenno naespirituan a pamay-an.
Kinatimbeng iti Panagbiag
Ti umiso a panangmatmat kadagiti inaldaw a kasapulan isut’ sabali pay a paset a kasapulan nga ikagumaan dagiti payunir a pagtalinaeden ti nasayaat a kinatimbeng. Ditoy manen, adut’ maadaltayo manipud iti nasayaat nga ulidan ken pammagbaga ni Jesus. Namakdaar maibusor iti pannakariribuk unay kadagiti namaterialan a pakaseknan. Imbes ketdi, pinaregtana dagiti adalanna nga iyun-unada ti Pagarian, nga inkarina nga aywanan ida ti Dios a kas ti panangaywanna kadagiti sabsabali a parsuana. (Mateo 6:25-34) Babaen ti panangsurot iti daytoy nagsayaat a balakad, nakapagtalinaed ti adu a payunir iti amin-tiempo a serbisio iti adu a tawen, ket binendisionan ni Jehova ti panagreggetda a manggun-od iti ‘tinapay iti tunggal aldaw.’—Mateo 6:11.
Binalakadan ni apostol Pablo dagiti padana a Kristiano a ‘maammuan koma dagiti isuamin a tattao ti kina-nainkalinteganda.’ (Filipos 4:5) Di pagduaduaan, ti kina-nainkalintegan kalikagumanna nga aywanantay a naimbag ti salun-attayo. Dagiti natimbeng a payunir ikagumaanda a kanayon nga ipakita ti kina-nainkalintegan iti panagbiagda ken iti panangmatmatda kadagiti namaterialan a banag, nga ammoda a palpaliiwen ti sabsabali ti kababalinda.—Idiligyo ti 1 Corinto 4:9.
Dagiti agtutubo nga agserserbi kas payunir liklikanda koma ti di umiso a pananggundaway iti kinamanagparabur dagiti dadakkelda. No makikabkabbalayda kadagiti dadakkelda, panangipakita iti nasayaat a kinatimbeng ken panangapresiar ti pannakiraman kadagiti trabaho iti pagtaengan ken ti maaddaan iti paset-tiempo a trabaho tapno makatulongda kadagiti paggastuan iti pagtaengan.—2 Tesalonica 3:10.
Pudno a Bendision Dagiti Natimbeng a Payunir
Mabalin a maysakayo a payunir a mangikagkagumaan a mangtaginayon iti umiso a kinatimbeng. Agtalekkayo. Kas iti panagkasapulan ti bassit nga ubing iti tiempo tapno masursurona a timbengen ti bagina sa magna, kuna ti adu a nataenganen a payunir a kinasapulanda ti tiempo sada naragpat ti kinatimbeng iti panangaywan kadagiti amin nga annongenda.
Ti personal a panagadal, panangaywan kadagiti kameng ti pamilia, ken panangipaay kadagiti bukodda a namaterialan a kasapulan isudat’ sumagmamano kadagiti benneg a sadiay ikagumaan dagiti payunir ti agbalin a natimbeng. Ipakpakita dagiti report a maitungtungpal ti adu a payunir dagiti annongenda iti kasayaatan a pamay-an. Pudno a bendisionda iti komunidad ken pakaidayawan ni Jehova ken iti organisasionna.