“Saanak nga Agtagtagainep, Di Ngamin?”
Ti sumaganad a report naggapu idiay Malawi maipanggep iti maysa kadagiti nakallalagip a “Nararagsak a Managdaydayaw” a Kombension Distrito dagiti Saksi ni Jehova a naangay sadiay kabayatan ti kalgaw ti 1995.
“ITI kangrunaan a kalsada, agarup kagudua ti dalan nga agturong iti makinlaud nga igid ti Lake Malawi, maysa a karatula ti naipaskil iti umuna a gundaway iti las-ud ti 29 a tawen. Mabasa, ‘Kombension Distrito Dagiti Saksi ni Jehova.’
“Maysa a dakkel a trak ti nagparada iti abay ti karatula, ket manipud iti trailer-na rimmuar ti nasurok a 200 a delegado manipud iti ili ti Mzuzu. Nangitugotda kadagiti binugbugsong a kawes, ules, kaldero, timba, taraon, pagsungrod, ken Biblia tapno kaduaenda ti agarup 3,000 a kakabsatda manipud iti nadumaduma a lugar.
“Bayat nga ab-abrasaenmi dagiti kakabsat a bumabbaba iti trak, dimteng ni George Chikako, agtawen iti 63, a mangidurduron iti bisikletana iti kadaratan, kalpasan a nagbisikleta iti dua nga aldaw manipud idiay Nkhotakota. Kadagiti napalabas a tawen, namimpat a daras a naibalud ni Kabsat Chikako gapu iti panagkedkedna a mangikompromiso kadagiti prinsipio iti Biblia. Natay ti kasinsinna gapu iti pannakamalmalona kabayatan ti pannakaibaludna. ‘Saanak nga agtagtagainep, di ngamin?’ insaludsod ni Kabsat Chikako. ‘Maang-angay daytoy a kombension iti nawada a kainaran, ket sipipigsa nga agkankanta dagitoy a tattao kadagiti kanta ti Pagarian! Iti las-ud ti adu a tawen, kasapulan idi nga agtataripnongkami iti kasipngetan ti rabii, nga iyarasaasmi dagiti kanta ti Pagarian, ken pagririnnasrasenmi dagiti imami maipaay iti panagpalakpak. Ita siwayawayakamin a makapagtataripnong, ket masdaaw dagiti tao a makakita a nakaad-adukami idinto ta impagarupda a bassitkam laeng!’
“Naaladan ti lugar ti kombension iti ruruot ken nasapawan kadagiti ledda a paglinongan. Naipatakder ti babassit nga abong-abong a naaramid kadagiti ruot ken dagiti dormitorio nga awanan diding tapno pagyanan dagiti delegado. Napno ti pul-oy ti rabii kadagiti nadayag a makaay-ayo a boses a saanen malapdan gaput’ buteng iti pannakaidadanes.
“Anian a maitutop a ti kombension ket natemaan iti ‘Nararagsak a Managdaydayaw’!”
[Credit Line]
Mountain High Maps® Copyright © 1995 Digital Wisdom, Inc.