Ania ti Kangrunaan iti Biagyo?

“Ipakaammom kaniak ti dalan a rebbengko koma a pagnaan.”​—SALMO 143:8.

1. Ania ti kinuna ni Ari Solomon maipapan kadagiti aramid ken gapuanan ti tao?

NALABIT nga ammoyo a kas iti asinoman a ti biag ket napno kadagiti aramid ken pakaseknan. No pampanunotenyo dayta, mabigbigyo a napateg ti sumagmamano kadagita. Saan unay a napateg ti dadduma nga aramid ken pakaseknan wenno awan pay ketdi ti serserbida. Ti pannakabigbigyo iti dayta kayatna a sawen nga umanamongkayo iti daydiay maysa kadagiti kasisiriban pay laeng a tao, ni Ari Solomon. Kalpasan a sinukimatna a naan-anay dagiti aramid iti biag, naikunana: “Agbutengka iti Dios, ket salimetmetam dagiti bilbilinna; ta daytoy isu ti dagup ti rebbeng ti tao.” (Eclesiastes 2:4-9, 11; 12:13) Aniat’ kaipapanan daytoy kadatayo ita?

2. Ania a napateg a saludsod ti usigen koma dagiti tattao a managbuteng iti Dios, a mangiturong kadagiti ania a mainaig a saludsod?

² No kayatyo ti ‘agbuteng iti pudno a Dios ken salimetmetan dagiti bilbilinna,’ saludsodenyo iti bagiyo daytoy makatukay a saludsod, ‘Ania ti kapatgan iti biagko?’ Pudno, nalabit saanyo a pampanunoten iti inaldaw dayta a saludsod, ngem apay a diyo usigen itan? Kinapudnona, ipasimudaagna ti sumagmamano a mainaig a saludsod, kas iti, ‘Mabalin ngata a nalabes ti panangipategko iti trabahok wenno propesionko wenno kadagiti material a banag? Kasanot’ kapateg iti biagko ti pagtaengak, pamiliak, ken dagiti ay-ayatek?’ Mabalin nga isaludsod ti maysa nga agtutubo, ‘Kasano kadakkel ti atension ken panawen nga ipapaayko iti edukasion? Kinapudnona, ti kadi kangrunaan nga interesko ket paglinglingayan, isport, wenno sumagmamano a kita ti pagpalpaliwaan wenno teknolohia?’ Ket aniaman ti edad wenno kasasaadtayo, rumbeng a siuumiso nga isaludsodtayo, ‘Kasanot’ kapateg iti biagko ti panagserbi iti Dios?’ Nalabit umanamongkayo a kasapulan nga adda dagiti ipangpangruna. Ngem kasano ken sadinot’ gumun-odantayo iti tulong tapno nainsiriban a maikeddeng dagitoy?

3. Aniat’ ramanen ti panangikeddeng kadagiti ipangpangruna para kadagiti Kristiano?

³ Ti “kangrunaan” ipasimudaagna ti maysa a banag nga umun-una ngem iti amin a dadduma pay a banag wenno kasapulan nga umuna nga usigen. Maysakay man a Saksi ni Jehova wenno maysa kadagiti riniwriw a napasnek nga agad-adal iti Sao ti Dios a naitimpuyog kadakuada, usigenyo daytoy a kinapudno: “Maipaay iti tunggal banag adda nakedngan a tiempo, ket maysa a tiempo maipaay iti tunggal panggep iti baba ti langit.” (Eclesiastes 3:1) Siuumiso a ramanen dayta ti panangipakitayo iti naayat a pannakaseknan kadagiti kapamiliayo. (Colosas 3:18-21) Ramanenna ti napasnek a panangipaay iti kasapulan ti sangakabbalayanyo babaen ti sekular a trabaho. (2 Tesalonica 3:10-12; 1 Timoteo 5:8) Ken tapno maiduma met, mabalinyo nga iwayaan ti maysa nga apision wenno sagpaminsan a panaglinglingay wenno panagpalpaliwa. (Idiligyo ti Marcos 6:31.) Ngem, no panunotenyo a naimbag, diyo kadi makita nga awan kadagitoy ti kapatgan iti biag? Adda sabali pay a banag a napatpateg.

4. Kasano a mainaig ti Filipos 1:9, 10 iti panangikeddengtayo kadagiti ipangpangruna?

⁴ Nalabit a mabigbigyo a dagiti mangiwanwan a prinsipio iti Biblia ket napateg a tulong iti panangikeddeng kadagiti ipangpangruna ken panangaramid kadagiti nainsiriban a pangngeddeng. Kas pagarigan, iti Filipos 1:9, 10, maidagadag kadagiti Kristiano nga “umadu koma nga ad-adda pay buyogen ti umiso a pannakaammo ken naan-anay a panangilasin.” Iti ania a panggep? Innayon ni apostol Pablo: “Tapno mabalinyo a siguraduen dagiti napatpateg a bambanag.” Saan kadi a nainsiriban dayta? Maibatay iti umiso a pannakaammo, maikeddeng ti maysa nga addaan pannakaawat a Kristiano no aniat’ rebbeng nga iyun-unana​—ti kapatgan​—iti biag.

Pagwadan iti No Ania ti Kapatgan

5. Iti panangdeskribirna iti pagwadan nga agpaay kadagiti Kristiano, kasano nga ipakita ti Kasuratan no ania ti kapatgan iti biag ni Jesus?

⁵ Masarakantayo ti maysa a napateg a paset ti pannakaammo iti sasao ni apostol Pedro: “Naayabankayo iti daytoy a kurso, agsipud ta uray ni Kristo nagsagaba a maipaay kadakayo, a nangibati kadakayo iti maysa a pagwadan tapno surotenyo a sisisinged dagiti addangna.” (1 Pedro 2:21) Wen, maipaay kadagiti pangripiripan no ania ti kapatgan iti biag, mabalintay a sukimaten ti kapanunotan ni Jesu-Kristo maipapan iti dayta. Naimpadtuan a kinuna ti Salmo 40:8 maipapan kenkuana: “Pagragsakak nga aramiden ti pagayatam, O Diosko; wen, ti lintegmo adda iti uneg ti pusok.” Kastoy ti panangyebkasna iti isu met laeng a kapanunotan: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.”​—Juan 4:34; Hebreo 12:2.

6. Kasanotay a magun-od ti kas iti nagun-od ni Jesus iti panangyun-una iti pagayatan ti Dios?

⁶ Imutektekanyo dayta a kapatgan a banag​—ti panangaramid iti pagayatan ti Dios. Impaganetget ti ehemplo ni Jesus no ania ti maiparbeng a pagbalinen dagiti adalanna a kapatgan iti biagda, gapu ta kinunana a “tunggal maysa a naan-anay a nasursuruan agbalinto a kas iti mannursurona.” (Lucas 6:40) Ken no kasano a nagna ni Jesus iti dana a pinanggep ni Amana, impakitana nga adda “naan-anay a rag-o” iti panangyun-una iti pagayatan ti Dios. (Salmo 16:11; Aramid 2:28) Maawatanyo kadi ti ipaspasimudaag dayta? Bayat nga iyun-una dagiti pasurot ni Jesus iti biagda ti panangaramid iti pagayatan ti Dios, sagrapenda ti “naan-anay a rag-o” ken pudno a biag. (1 Timoteo 6:19) Gapuna saan a maymaysa ti makagapu nga iyun-una ti panangaramid iti pagayatan ti Dios iti biagtayo.

7, 8. Ania dagiti suot a nakaipasanguan ni Jesus, ken aniat’ masursurotayo iti daytoy?

⁷ Dagus kalpasan nga insimbolo ni Jesus ti panangidatagna iti bagina tapno aramiden ti pagayatan ti Dios, inkagumaan ti Diablo nga isiasi. Kasano? Babaen ti panangsulisog iti tallo a pamay-an. Iti tunggal gundaway Nainkasuratan, nabatad ti panangsungbat ni Jesus. (Mateo 4:1-10) Ngem adu pay a pannubok ti agur-uray idi kenkuana​—pannakaidadanes, pannakaumsi, panangliput ni Judas, ulbod a pammabasol, sa kalpasanna ipapatay iti kayo a pagtutuokan. Kaskasdi, awan kadagitoy a suot ti nakaisiasi iti nasungdo nga Anak ti Dios iti danana. Iti maysa a nainget a kasasaad, inkararag ni Jesus: “Saan a kas iti pagayatak, no di ket kas iti pagayatam. . . . Maaramid koma ti pagayatam.” (Mateo 26:39, 42) Saan kadi a rumbeng a tunggal maysa kadatayo ti matukay unay iti kastoy a pagwadan a naibati agpaay kadatayo, a mangtignay kadatayo a ‘mangitultuloy nga agregget iti panagkararag’?​—Roma 12:12.

⁸ Wen, no ikeddengtayo dagiti ipangpangrunatay iti biag, nangnangruna a makatulong ti panangiwanwan ti Dios, nangruna no maipasangotayo kadagiti kabusor ti kinapudno ken bumusbusor iti pagayatan ti Dios. Laglagipenyo ti panangidawat ni matalek nga Ari David iti panangiwanwan idi napasaranna ti pannakabusor. Matarusantayo daytoy bayat nga usigentayo ti dadduma a paset ti Salmo 143. Tulongannatay koma daytoy a mangtarus no kasano a mapatibkertayo ti personal a relasiontayo ken Jehova ken mapabileg nga agtultuloy a mangyun-una iti panangaramid iti pagayatan ti Dios iti biagtayo.

Denggen ken Sungbatan ni Jehova Dagiti Kararagtayo

9. (a) Nupay managbasol ni David, aniat’ ipalgak dagiti sao ken tignayna? (b) Apay a ditay koma mauma nga agaramid iti umiso?

⁹ Nupay managbasol a mortal, nagtalek ni David a denggen ni Jehova ti pakpakaasina. Sipapakumbaba nga indawatna: “Denggem ti kararagko; O Jehova, allingagem dagiti ar-ararawko; sungbatannak, ita kinamatalekmo ken ita kinalintegmo. Ket dika kadi ukomen toy adipenmo; ta ita sanguanam awan tao nga agbiag a sililinteg.” (Salmo 143:1, 2) Ammo ni David ti kinaimperpektona, nupay kasta sibubukel ti pusona iti Dios. Gapuna, nagtalek a maipangag buyogen ti kinalinteg. Saan kadi a makapabileg daytoy kadatayo? Uray no ditay maragpat ti kinalinteg ti Dios, makapagtalektayo nga ipangagnatayo no sibubukel ti pusotayo kenkuana. (Eclesiastes 7:20; 1 Juan 5:14) Bayat nga agreggettayo iti panagkararag, masapul a determinadotayo a ‘mangparmek iti dakes babaen ti naimbag’ kadagitoy dakes nga al-aldaw.​—Roma 12:20, 21; Santiago 4:7.

10. Apay nga adda dagiti panawen a nariribukan ni David?

¹⁰ Kas kadatayo, naaddaan ni David kadagiti kabusor. An-anupan man ni Saul, a napilitan a nagkamang kadagiti langalang, nasulinek a lugar, wenno kas maysa nga ari a burburiboren dagiti kabusor, addada panawen a nariribukan ni David. Inladawanna no kasano a naapektaran iti daytoy: “Ti kabusor indadanesda toy kararuak . . . Pinagnaednak kadagiti yan a nasipnget . . . Gapuna a toy kararuak naidalit itoy unegko; ti pusok itoy unegko sidadasay.” (Salmo 143:3, 4) Naaddaankay kadin iti makagapu a makarikna iti kasta?

11. Ania dagiti nariribuk a kanito a nakaipasanguan dagiti moderno-aldaw nga adipen ti Dios?

¹¹ Ti panangparigat ti kabusor, dagiti suot gapu iti nakaro a rigat ti panagbiag, nakaro a sakit, wenno dadduma pay a makariribuk a parikut ti namagpulkok iti dadduma iti ili ti Dios. No dadduma, ti pusoda arigna nabibinegen. Arigna tunggal indibidual umasugda: “Sika ti nangiparang kadagiti adu ken naut-ot a pakadanagan, pagbiagennakamto manen . . . Agsublika manen a mangliwliwa kaniak.” (Salmo 71:20, 21) Kasanoda a natulongan?

No Kasano a Sanguen ti Panaggandat ti Kabusor

12. Kasano a sinaranget ni Ari David dagiti peggad ken suot?

¹² Ipakita ti Salmo 143:5 no aniat’ inaramid ni David idi naipasango iti peggad ken nakaro a suot: “Malagipko dagiti aldaw iti ugma; pampanunotek amin dagiti ar-aramidmo; is-isipek ti aramid dagiti im-imam.” Linagip ni David ti pannakilangen ti Dios kadagiti adipenna ken no kasano a napasaranna a mismo ti pannakaisalakan. Minennamennana ti naaramidan ni Jehova maigapu iti natan-ok a naganna. Wen, adda iti panunot ni David dagiti aramid ti Dios.

13. No maipasangotayo kadagiti suot, kasano a ti pananglagiptayo kadagiti nagkauna ken moderno nga ehemplo dagiti matalek nga adipen makatulong kadatayo nga agibtur?

¹³ Saan kadi a masansan a malaglagiptayo ti pannakilangen ti Dios iti ilina? Di pagduaduaan! Ramanen daytoy ti pakasaritaan ti ‘dakkel nga ulep dagiti saksi’ idi kasakbayan ti panawen Kristiano. (Hebreo 11:32-38; 12:1) Naparegta met dagiti napulotan a Kristiano idi umuna a siglo nga ‘agtultuloy a manglagip kadagiti immun-una nga aldaw’ ken dagiti inib-ibturanda. (Hebreo 10:32-34) Dagiti ngay kapadasan dagiti adipen ti Dios iti moderno a panawen, kas kadagidiay naisalaysay iti Dagiti Saksi ni Jehova​—Manangiwaragawag iti Pagarian ti Dios?a Dagiti dokumentado a salaysay sadiay ken iti sabsabali pay ipalagipda kadatayo no kasano a tinulongan ni Jehova ti ilina nga agibtur kadagiti panangipawil, pannakaibalud, derraaw, ken kadagiti kampo konsentrasion ken inkapilitan a panagtrabaho. Adda pakasuotan kadagiti pagilian a nariribuk gapu iti gubat, kas idiay Burundi, Liberia, Rwanda, ken iti dati a Yugoslavia. Idi timmaud ti ibubusor, nakapagibtur dagiti adipen ti Dios gapu iti panangtaginayonda iti natibker a relasionda ken Jehova. Sinaranayna dagidiay nangyun-una iti biagda iti panangaramid iti pagayatanna.

14. (a) Ania ti maysa nga ehemplo ti panangandingay ti Dios iti maysa a tao nga adda iti kasasaad a mabalin nga umasping iti kasasaadtayo? (b) Aniat’ masursuroyo iti dayta nga ehemplo?

¹⁴ Nupay kasta, mabalin a kunayo a diyo napasaran ti kasta a naulpit a pannakaabuso, ken mabalin a mariknayo nga adayo a mapasaranyo dayta. Ngem, ti panangandingay ti Dios iti ilina saan a kanayon a kadagiti ibilang ti dadduma a makapikapik a kasasaad. Inandingayna ti adu a “gagangay” nga indibidual kadagiti “normal” a kasasaad. Adtoy ti maysa laeng kadagiti adu a pagarigan: Mailasinyo kadi ti ladawan iti ngato, ket matulongannakay kadi daytoy a manglagip iti pannakilangen ti Dios iti ilina? Nagparang daytoy iti Pagwanawanan a Disiembre 1, 1996. Binasayo kadi ti pakasaritaan nga insalaysay ni Penelope Makris? Anian a nakaskasdaaw nga ulidan iti Nakristianuan a kinatarnaw! Malagipyo kadi no ania ti inibturanna kadagiti kaarrubana, no kasano a nakidangadang iti nakaro a sakit, ken no ania a panagregget ti inaramidna tapno agtalinaed iti amin-tiempo a ministerio? Ti ngay makaay-ayo a kapadasanna idiay Mytilene? Ti punto ket, Ibilangyo kadi ti kakasta a pagarigan kas tulong agpaay kadatayo amin iti panangikeddeng kadagiti ipangpangruna, nga iyun-unatayo iti biagtayo ti panangaramid iti pagayatan ti Dios?

15. Ania ti sumagmamano kadagiti aramid ni Jehova nga utobentay koma?

¹⁵ Mapabilegtayo no utobentayo dagiti aramid ni Jehova, kas iti inaramid ni David. Iti panangtungpal iti panggepna, nangipaay ni Jehova iti probision a pakaisalakanan babaen ti ipapatay, panagungar, ken pannakaipadayag ti Anakna. (1 Timoteo 3:16) Impasdekna ti nailangitan a Pagarianna, pinaksiatna ni Satanas ken dagiti demoniona manipud langit, ken insublina ti pudno a panagdayaw ditoy daga. (Apocalipsis 12:7-12) Nangbangon iti naespirituan a paraiso ken binendisionanna ti ilina buyogen ti kinarang-ay. (Isaias 35:1-10; 60:22) Mangipapaay ti ilina ita iti maudi a panangsaksi sakbay ti ibebettak ti dakkel a rigat. (Apocalipsis 14:6, 7) Wen, adu ti mabalintay nga utoben.

16. Ania ti maiparegta a pakaseknantayo, ket ania ti ipaganetget daytoy kadatayo?

¹⁶ Ti panangpampanunot kadagiti gapuanan ti Dios imbes a makumikom kadagiti natauan a kalat ipaganetgetna kadatayo a di malapdan ti agtigtignay a pannakabalin ni Jehova. Nupay kasta, dagitoy nga aramid ket saan laeng a dagiti nakaskasdaaw a pisikal nga aramid ti panamarsua idiay langlangit ken ditoy rabaw ti daga. (Job 37:14; Salmo 19:1; 104:24) Mairaman kadagiti nakaskasdaaw nga aramidna ti panangisalakanna iti ilina kadagiti naulpit a kabusor, kas naipakita kadagiti kapadasan ti nagkauna nga ilina.​—Exodo 14:31; 15:6.

Panangammo iti Dalan a Rumbeng a Pagnaan

17. Kasano kapudno ni Jehova ken David, ket kasanotay a mapatibker iti daytoy?

¹⁷ Nagkararag ni David maipaay iti tulong di la ket ta mapukaw ti pigsana: “Itayak dagiti dakulapko kenka: toy kararuak mawaw kenka, a kas natikag a daga. Darasem kadi ti sumungbat kaniak O Jehova; toy kararuak agkapsut: dika ilinged ta rupam kaniak di la ket ta agbalinak a kas kadagiti agpababa iti abut.” (Salmo 143:6, 7) Tangay managbasol, ammo ni David a sipapanunot ti Dios iti kasasaadna. (Salmo 31:7) No dadduma mabalin a mariknatayo met nga agkapuytayo iti naespirituan. Ngem adda namnama ti kasasaad. Mabalin a papartaken ni Jehova, a dumngeg iti kararagtayo, ti iyuungartayo babaen ti panangpakired kadatayo dagiti naayat a panglakayen, dagiti artikulo Ti Pagwanawanan, wenno paspaset iti gimong a kasla nairanta nga agpaay kadatayo.​—Isaias 32:1, 2.

18, 19. (a) Ania koma ti sipapasnek nga ipakpakaasitayo ken Jehova? (b) Ania ti masiguradotayo?

¹⁸ Tignayennatayo ti panagtalektayo ken Jehova nga agpakpakaasi kenkuana: “Ipangngegmo kaniak ti kinamanagayatmo iti bigat; ta sika ti pagtalkak: ipakaammom kaniak ti dalan a rebbengko koma a pagnaan.” (Salmo 143:8) Pinaayna kadi ni Kabsat Makris, a naiputputong iti maysa a puro ti Grecia? Gapuna paayennakay ngata bayat nga iyun-unayo iti biagyo ti panangaramid iti pagayatanna? Kayat ti Diablo ken dagiti ahentena a lapdan wenno naan-anay a pasardengen ti trabahotayo a panangiwaragawag iti Pagarian ti Dios. Agserserbitay man kadagiti pagilian a mapalubosan ti pudno a panagdayaw wenno agserserbitayo iti lugar a maiparit dayta, ti nagkaykaysa a kararagtayo ket maitunos iti pakpakaasi ni David: “Ispalennak O Jehova kadagiti kabkabusorko. Tumarayak nga umay kenka tapno aglemmengak.” (Salmo 143:9) Ti kinatalgedtayo maibusor iti naespirituan a didigra agpannuray iti panagtalinaed iti nalmeng a yan ti Kangatuan.​—Salmo 91:1.

¹⁹ Natibker ti nakaibatayan ti pannakabigbigtayo no ania ti kapatgan. (Roma 12:1, 2) No kasta, sarangtenyo ti panangikagumaan ti lubong a mangipilit kadakayo iti ipagarupna a napateg iti panangaramid ti tao kadagiti bambanag. Itultuloyyo nga iyanninaw iti tunggal aspeto ti panagbiagyo ti ammoyo a kapatgan​—ti panangaramid iti pagayatan ti Dios.​—Mateo 6:10; 7:21.

20. (a) Aniat’ nasursurotayo maipapan ken David iti Salmo 143:1-9? (b) Kasano nga iyanninaw dagiti Kristiano ita ti espiritu ni David?

²⁰ Naipaganetget iti umuna a siam a bersikulo ti Salmo 143 ti nadekket a personal a relasion ni David ken Jehova. Idi inalikubkob dagiti kabusor, siwayawaya a nagkararag iti Dios a dimmawat iti panangiwanwan. Imbukbokna ti linaon ti pusona, a dimmawat iti tulong iti umiso a dana a pagnaan. Kasta met laeng ita ti natda kadagiti napulotan iti espiritu ditoy daga ken dagiti kakaduada. Ibilangda a nagpateg ti relasionda ken Jehova bayat nga agpakpakaasida kenkuana maipaay iti panangiwanwan. Iyun-unada ti panangaramid iti pagayatan ti Dios, iti laksid ti panangparigat ti Diablo ken ti lubong.

21. Apay a nasken nga ipakitatayo ti nasayaat nga ulidan no mangisursurotayo iti sabsabali maipapan iti no ania ti rumbeng a kapatgan koma iti biagda?

²¹ Kasapulan a bigbigen ti riniwriw a makipagad-adal iti Biblia kadagiti Saksi ni Jehova a ti panangaramid iti pagayatan ti Dios ti kapatgan. Matulongantay ida a mangtarus iti daytoy bayat ti panangusig iti kapitulo 13 ti libro a Pannakaammo a Mangiturong iti Biag nga Agnanayon, a mangipagpaganetget kadagiti prinsipio a nairaman iti panagbalin a managtungpal iti Sao.b Siempre, rumbeng a makitada nga iyap-aplikartayo ti isursurotayo kadakuada. Kalpasan ti medio napaut bassit a panawen, maammuandanto met ti dana a rumbeng a pagnaanda. Bayat a personal a mabigbig dagitoy a riniwriw no ania ti rumbeng a kapatgan iti biagda, adu ti matignay nga agdedikar ken agpabautisar. Kalpasanna, matulongan ida ti kongregasion nga agtultuloy a magna iti dana ti biag.

22. Ania dagiti saludsod a mausig iti sumaganad nga artikulo?

²² Adu ti madadaan a mangbigbig a ti pagayatan ti Dios ti rebbeng a kapatgan iti biagda. Ngem kasano a progresibo nga isursuro ni Jehova dagiti adipenna a mangaramid iti pagayatanna? Ania dagiti gunggona nga iyeg daytoy kadakuada? Mausig dagitoy a saludsod, agraman ti pannakasalaysay ti maysa a nagpateg a bersikulo, ti Salmo 143:10, iti sumaganad nga artikulo.

[Dagiti Footnote]

Aniat’ Sungbatyo?

◻ Babaen ti panangyaplikar iti Filipos 1:9, 10, kasanotay a maipasdek dagiti ipangpangruna?

◻ Kasano nga impakita ni Jesus no ania ti kapatgan iti biagna?

◻ Aniat’ masursurotayo kadagiti tignay ni David idi nasuot?

◻ Iti ania a pamay-an a matulongannatayo ita ti Salmo 143:1-9?

◻ Ania koma ti kapatgan iti biagtayo?

[Ladawan iti panid 10]

Napaneknekan kadagiti tignay ni David ti panagtalekna ken Jehova

[Credit Line]

Kopia manipud iti Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s