Agannadkayo iti Panangipabasol iti Dakes a Motibo
KASTA unay ti panangkondenar ti maysa a nalatak nga ebanghelista iti telebision iti padana a manangaskasaba gapu iti pannakikamalala. Ngem iti makatawen laeng, nasalawan ti mamabpabasol nga ebanghelista nga adda kaduana a hostes.
Iti maysa pay a kaso, nangibaon kadagiti embahador ti maysa a nalatak a pannakabalin ti lubong tapno pagsasaritaan ti talna iti nagbabaetan dagiti aggugubat a grupo. Kabayatanna, daytoy met laeng a nasion sililimed a nangibaon kadagiti negosiantena iti armas kadagiti sabsabali a pagilian tapno aglako kadagiti armas nga aggatad iti binilbilion a doliar.
Yantangay pudpudno a kadawyan ti nabatad a panaginsisingpet, nakaskasdaaw kadi no apay a ti panagtalek nasuktanen iti panagduadua? Para iti adu, nakayugalianen ti panagsuspetsa kadagiti motibo ti sabsabali.
Kas Kristiano, agannadtayo koma a ditay ipalubos ti kakasta a kababalin a mangapektar iti relasiontayo kadagiti matalek a kapammatian. Nupay indagadag kadatayo ni Jesu-Kristo nga agbalin a “naannad a kas kadagiti serpiente” kabayatan nga adda iti tengnga dagiti kabusortayo, saanna a kinuna a rumbeng nga agbalintayo a managsuspetsa kadagiti pudno a pasurotna. (Mateo 10:16) No kasta, ngarud, ania dagiti peggad iti panangipabasol iti dakes a motibo iti sabsabali? Kadagiti ania a pamay-an nga agbalintayo a nangnangruna a naannad tapno maliklikan ti kasta a pagannayasan? Ken kasanotayo a masaluadan ti nagpateg a relasiontayo kadagiti pada a Kristiano?
Ti Maadal iti Napalabas
Ti panangipabasol iti dakes a motibo iti sabsabali nga awan nainkalintegan a rason ket maitupag iti panangukom kadakuada. Dayta arigna nga ikedkeddengtayon a ti sasawen wenno ar-aramidenda ket pangal-allilaw laeng tapno mailemmeng ti maysa a banag a nasikap ken dakes. Masansan a ti talaga a parikut isut’ biddut a panangmatmat iti bambanag, kas makita iti salaysay ti Biblia a masarakan iti Josue kapitulo 22.
Naan-anayen a sinakup dagiti Israelita ti Naikari a Daga ken kaaw-awatda laeng idi dagiti teritoria ti tribuda. Nangibangon ti tribu da Ruben ken Gad ken ti kagudua ti tribu ni Manases iti maysa nga altar a “dakkel ti buyana” iti abay ti Karayan Jordan. Biddut nga impapan ti sabsabali a tribu a daytoy ket panagapostasia. Naipapan nga usaren dagitoy tallo a tribu daytoy dakkel a patakder a pagidatonan imbes a mapanda iti tolda ti gimong nga adda idiay Silo, ti naituding a lugar a pagdaydayawan. Dagus, nagsagana dagiti mamabpabasol a tribu a makigubat.—Josue 22:10-12.
Pagsayaatanna kadakuada ta nakiumanda kadagiti kakabsatda nga Israelita babaen ti panangibaon iti pannakabagi nga opisial nga impanguluan ni Finees. Idi nangngegda dagiti pammabasol a di-kinamatalek, panagrebelde, ken apostasia maibusor ken Jehova, inlawlawag dagiti nasao a nagbasol a tribu ti panggepda iti daytoy nagdakkel nga altar. Imbes nga altar a pagidatonan, naaramid dayta kas “maysa a pammaneknek” iti panagkaykaysa dagiti tribu ti Israel iti panagdaydayaw ken Jehova. (Josue 22:26, 27) Nagsubli dagiti pannakabagi a napnek gapu ta awan aniaman a panagsalungasing kadagiti kakabsatda. Iti kasta naliklikan ti gerra sibil ken nakaam-ames a pannakaiparukpok ti dara.
Anian a leksion kadatayo a ditay pulos agdardarasudos a mangipabasol iti dakes a motibo iti sabsabali! Masansan a ti agparang a pudno iti parparawpaw a panangmatmat ket masarakan a naan-anay a naiduma no ad-adda pay a sukimaten. Pudno daytoy iti adu nga aspeto iti biag ti maysa a Kristiano.
Ti Panangmatmattayo Kadagiti Panglakayen
Iti panangitungpalda iti responsabilidadda a ‘mangipastor ti kongregasion ti Dios,’ no dadduma kasapulan a balakadan dagiti panglakayen ti nadumaduma nga indibidual iti kongregasion. (Aramid 20:28) Kas pagarigan, kasanot’ panagtignaytayo no kasaritanatayo ti maysa a panglakayen maipapan iti annaktayo mainaig kadagiti banag kas iti dakes a pannakitimtimpuyog wenno di umiso a kababalin iti kasungani a sekso? Ipapantay kadi nga adda nalmeng a motibona ken kunaentayo iti bagitayo, ‘Dina pulos nagustuan ti pamiliami’? No ipalubostayo a maimpluensiaantayo iti kakasta a rikna, amangan no pagbabawiantayto kamaudiananna. Mabalin nga agpegpeggad ti espiritualidad ti annaktayo, ket rumbeng nga apresiarentayo ti makatulong a balakad manipud iti Kasuratan.—Proverbio 12:15.
No balakadannatayo ti maysa a panglakayen iti kongregasion, ditay agbirok iti nalmeng a motibo. Imbes ketdi, imtuodentayo iti bagitayo no adda ngata pamay-an tapno magunggonaantayo iti naibatay-Biblia a balakadna. Insurat ni apostol Pablo: “Pudno, awan ti disiplina a kasla makaparag-o iti agdama, no di ket makapaladingit; ngem kalpasanna kadagidiay a nasanayen iti dayta ipaayna ti natalna a bunga, nga isu ti, kinalinteg.” (Hebreo 12:11) Gapuna agyamantayo ket sipupudno nga usigentayo ti bambanag. Laglagipenyo a masansan a narikut para kadagiti panglakayen ti panangbalakad kadatayo no kasano a narikut para kadatayo nga awaten dayta.
Rikna Kadagiti Nagannak
No naipasango kadagiti pananginget ti nagannak, pagduaduaan ti dadduma nga agtutubo ti motibo dagiti nagannakda. Nalabit kunaen ti sumagmamano nga agtutubo: ‘Apay nga agaramid dagiti nagannak kaniak iti nagadu a paglintegan? Dida la ket kayat nga agragsakak.’ Ngem, imbes a mangeddeng iti kasta, kasapulan a sukimaten a nasayaat dagiti agtutubo ti kasasaad.
Adu a tawen ti binusbos dagiti nagannak iti panangaywan kadagiti annakda. Gapuanan daytoy iti dakkel a sakripisio iti material ken iti dadduma a pamay-an. Adda ngata makagapu tapno panunoten a determinadoda itan a mamagbalin a nakaay-ay-ay ti biag dagiti tin-edyer nga annakda? Saan kadi nga ad-adda a nainkalintegan a panunoten nga ayat ti mangtigtignay kadagitoy a nagannak a mangsalaknib kadagiti annakda ken mangaywan kadakuada? Saan kadi a dayta met laeng nga ayat ti mangguyugoy kadakuada a mangikabil iti sumagmamano a pananginget kadagiti annakda, nga ita maipaspasangon kadagiti baro a karit iti biag? Anian a kinaawan-asi ken kinaawan-panagyaman ti mangipabasol iti dakes a motibo kadagiti naayat a nagannak!—Efeso 6:1-3.
Ti Kababalintayo Kadagiti Pada a Kristiano
Adu ti agannayas a mangukom kadagiti sabsabali ken mangusig kadakuada. Komusta no datayo a mismo ti addaan kasta a kababalin ken medio managsuspetsa iti sumagmamano a tattao? Mabalin ngata nga im-impluensiaannatayo ti lubong iti daytoy a banag?
Kas pagarigan, ipapantayon a maysa kadagiti naespirituan a kakabsattayo addaan nasayaat a pagtaengan ken nangina a lugan. Dagus kadi a panunotentayo nga isu ket materialistiko a dina ipangpangruna ti intereses ti Pagarian iti biagna? Adda sumagmamano a Kristiano a makabael kadagiti nasayaat banag, ngem dina kaipapanan nga addaanda iti dakes a motibo wenno saanda a ‘sapsapulen nga umuna ti pagarian.’ Mabalin nga okupadoda unay kadagiti naespirituan nga aktibidad, a sipaparabur nga us-usarenda dagiti material a kinabaknangda a mangitandudo iti intereses ti Pagarian, nalabit iti di madmadlaw a pamay-an.—Mateo 6:4, 33.
Ti kongregasion Kristiano idi umuna a siglo ket buklen ti nadumaduma a kita ti tattao—nabaknang ken napanglaw. (Aramid 17:34; 1 Timoteo 2:3, 4; 6:17; Santiago 2:5) Saan nga usigen ti Dios dagiti tao maibatay iti material a kasasaadda, ket ditay met rumbeng nga aramiden ti kasta. Rumbeng nga ayatentayo dagiti nasubok ken matalek a kapammatiantayo, a ‘di aramiden ti aniaman sigun iti adda dasdasiganna a pagannayasan.’—1 Timoteo 5:21.
Iti daytoy lubong nga adda iti babaen ti pannakabalin ni Satanas, adu a kita ti panagipapan ken panagsuspetsa. Kas pagarigan, ti maysa a tao mabalin a matmatan kas naranggas wenno materialistiko gapu laeng iti nalikudanna. Ngem, kas Kristiano, saan a masapul nga agbalintayo a biktima iti kakasta a kababalin. Ti organisasion ni Jehova ket saan a lugar para iti kinapanatiko ken panagsuspetsa. Kasapulan a tuladen amin a pudno a Kristiano ni Jehova a Dios, a kenkuana “awan ti kinadangkes wenno panangidaduma.”—2 Cronicas 19:7; Aramid 10:34, 35.
Matignaykayo Koma iti Ayat
Nalawag nga ibagbaga ti Kasuratan nga “amin nagbasol ken agkurang iti dayag ti Dios.” (Roma 3:23) Gapuna kasapulan a matmatantayo dagiti padatayo a managdaydayaw kas dagidiay naikaykaysa kadatayo iti panangikagumaan a mangipaay iti makaay-ayo a panagserbi ken Jehova. No impalubostayo ti panagsuspetsa wenno sabsabali pay a negatibo a rikrikna a mangapektar iti relasiontayo iti maysa a naespirituan a kabsat, agkararagtayo maipaay iti tulong ti Dios a mangparmek iti kasta a kababalin tapno ditay matnag iti silo ni Satanas. (Mateo 6:13) Kinombinsirna ni Eva a ni Jehova addaan dakes a motibo, a di maseknan iti pagsayaatanna, ken ipapaidamna ti wayawaya a pudpudno a mangparagsak kenkuana. (Genesis 3:1-5) Ti panangipabasoltayo iti dakes a motibo kadagiti kakabsattayo agserbi iti panggepna.—2 Corinto 2:11; 1 Pedro 5:8.
No masarakantayo nga addaantayo iti pagannayasan a mangipabasol iti dakes a motibo iti sabsabali, usigen ti ulidan ni Jesu-Kristo. Nupay isu ti perpekto nga Anak ti Dios, saanna a binirok ti dakes a motibo kadagiti adalanna. Imbes ketdi, binirok ni Jesus daydiay naimbag kadakuada. Idi nagsusupiat dagiti adalanna para iti maysa a prominente a posision, dina impapan nga adda dakes a motiboda ket iti kasta suktanna ida iti 12 a baro nga apostol. (Marcos 9:34, 35) Tangay imperpektoda, mabalin nga uray kaskasano naimpluensiaanda iti kaugalian ti apostata a Judaismo, a mangipagpaganetget iti kinapalangguad ken panangidumduma kadagiti grupo. Ammo ni Jesus a ti kangrunaan a mangtigtignay kadagiti pasurotna isu ti ayat ken Jehova. Gaput’ panangiparangarangda iti kasta nga ayat ken iti panagtalinaedda ken Jesus, dakkel ti nagunggonada.—Lucas 22:28-30.
No agsuspetsatayo kadagiti matalek a kapammatiantayo, mayasping daytoy iti panangkita kadagiti bambanag nga usaren ti depekto a sarming. Ditay makita ti pudno nga itsura ti aniaman a banag. Gapuna kumitatayo babaen kadagiti sarming ti ayat. Nawadwad ti pammaneknek nga ay-ayatendatayo dagiti nasungdo a pada a Kristiano ket maikarida iti naayat a konsiderasiontayo. (1 Corinto 13:4-8) Gapuna ipakitatay koma ti kasta nga ayat kadakuada ken agannadtayo iti panangipabasol iti dakes a motibo.
[Ladawan iti panid 26]
Kasano ti panangmatmatyo iti sabsabali a simamatalek nga agdaydayaw iti Dios?
[Ladawan iti panid 27]
Maysa a naragsak a pamilia dagiti Saksi ni Jehova gapu iti panagtalek ken panagraem