Panagbisita iti Tay-ak a Pagmisioneruan iti Lugarmi

KAYARIGANNA a binisitak ti grupo dagiti kongregasion Kristiano manipud Portugal agingga idiay China. Ngem, dikam pulos pimmanaw ken ni baketko nga Olive manipud Britania.

Bisbisitaenmi ti umad-adu a ganggannaet-pagsasaona a kongregasion dagiti Saksi ni Jehova a nagsaknap iti intero a pagilian. Makipagtartrabahokami iti dumurdur-as, narang-ay iti naespirituan, nagduduma ti lenguahena a tay-ak manipud iti puro ti Jersey, agarup 20 kilometro iti Normandy a kosta ti Francia, nga ayan ti maysa a grupomi a Portugues, agingga iti ili ti Sunderland iti amianan ti Inglatera, a pangbisitaanmi kadagiti interesado a tattao nga Insik ti pagsasaoda. Kasano a naipaayankami iti kastoy a naisangsangayan a trabaho? Ken ania ti mapaspasamak iti tay-ak a pagmisioneruan iti lugarmi? Palubosandak a mangilawlawag.

Nagserbikami ken ni Olive iti agarup 20 a tawen iti trabaho a panagdaliasat, a bisbisitaenmi ti nagduduma a kongregasion iti kada lawas. Agbiahekami manipud amianan agingga iti abagatan, manipud daya agingga iti laud, iti intero a Britania, ken idi agangay kadagiti Kristiano a kakabsatmi iti isla ti Malta idiay Mediteraneo, a nangsagrapanmi iti naisangsangayan a Nakristianuan a kinamanagpadagus. (Idiligyo ti Aramid 28:1, 2.) Kalpasan ti tallo a tawen idiay Malta, rinugianmi a pinampanunot no sadino ti sumaganad a destinomi. Napanunotmi a mabalin nga agbisitakami iti away nga ayan dagiti Ingles, ket rinugianmi nga ibagay ti panunotmi iti daytoy a posibilidad. Anian a siddaawmi idi naawatmi ti pakaidestinuanmi nga agserbi iti daytoy baro a sirkito a buklen dagiti grupo ken kongregasion nga agsasao iti 23 a nagduduma a lenguahe!

Pinampanunotmi no kasanokam a makapagballigi. Malaksid iti kapadasanmi idiay Malta, saankami pay a pulos a nakipulpulapol kadagiti tattao a nagduduma ti nalikudan ken kulturada. Maparegtami ngata dagidiay di unay makatarus iti Ingles? Kasano a makapagsasaritakami a dimi ammo ti sabsabali a lenguahe? Ti ngay taraon ken ti nagduduma a kustombre ti sabsabali? Kabaelanminto ngata ti makibagay? Napampanunotmi dagitoy a saludsod bayat nga inus-usigmi a buyogen ti kararag ti panangsungbatmi iti daytoy nga awis a mapan idiay Macedonia.​—Aramid 16:9, 10; 1 Corinto 9:19-22.

Panangparmek iti Parikut iti Lenguahe

“Idi damo mariknak a saanak a kualipikado gapu ta awan ammok maipapan kadagiti lenguahe,” ilawlawag ni Olive. “Parikutko no kasanok a matulongan dagiti kakabsat a babbai. Idi kuan nalagipko ti pammaregta dagiti agassawa nga immuna a nangyadal kadakami iti Biblia a dimi pulos pagkedkedan ti aniaman a pakaitudingan. Insuroda kadakami a di pulos ipaaramid ni Jehova kadatayo ti ditay kabaelan.” Gapuna situtulok nga inawatmi ti trabaho.

Iti panangut-utobmi, makitami a gapu ta awan ammomi a sabali a lenguahe, nakatulong daytoy iti panagbalinmi a di mangidumduma iti panangtratomi kadagiti isuamin. Kas pagarigan, ti linawas nga itatabuno kadagiti gimong iti nagduduma a pagsasao tinulongannakami a mangtarus iti rikrikna dagiti kakabsat kabayatan ti panagtugawda kadagiti intero a gimong iti Ingles nupay dida unay matartarusan ti maibagbaga. Masapul nga agsaganakami a naimbag para kadagiti gimong tapno matarusanmi ti kababagas ti maiparang. Kanayon nga adda maysa kadagiti saludsod a masungbatan ni Olive iti gimong. Isaganana ti sungbat iti Ingles sa ipatarus daytoy ti kabsat a babai, nga isuratna ti patarus sigun iti pannakaisaona. Bigbigenna a medio agalikaka nga agitayag no agkomento. No dadduma katawaanda ti panangikagumaanna. Ngem di naupay iti daytoy. “Ammok nga apresiaren dagiti kakabsat ti panangikagumaak,” kunana. “Kinapudnona, ti panagsungbatko paregtaenna dagidiay makaammo iti dayta a lenguahe a makiraman iti gimong.”

Para kaniak, naiduma met ti panagpalawag, gapu ta iwayaak ti agipatarus kalpasan ti tunggal sentensia. Nakalaklaka a maitawtaw ti panunotko. Masapul nga ipamaysak a naimbag ken paababaek ti materialko. Ngem maragsakanak iti dayta.

Ti Nadumaduma a Ministeriomi

Iti adu a siudad idiay Britania, nawaraswaras dagiti tattao a ganggannaet ti lenguaheda, a nalabit dua laeng ti agnanaed iti maysa a kalsada, sa kalpasanna makaadayoka pay sakbay a masarakam dagiti dadduma. Ngem, no kablaawam ida iti mismo a pagsasaoda ket makitam ti reaksionda, mariknam nga adda supapak ti bannogmo. No ti kakuyogko a kabsat iburayna ti mensahe ti Pagarian iti mismo a lenguahe ti bumalay, masansan a maragragsakan ti bumalay.

Wen, ti ministerio iti ganggannaet-pagsasaona a tay-ak isu ti maysa kadagiti kararagsakan a kapadasanmi kabayatan ti 40 a tawenmi iti serbisio ti Pagarian. Dakkel ti pangnamnamaan iti panagrang-ay. Di pagduaduaan nga al-alisto a makaadal ti adu a tattao ken naun-uneg ti panangapresiarda no mayadalanda iti mismo a pagsasaoda. (Aramid 2:8, 14, 41) Makaibuyog unay ti pannakakita kadagiti kakabsat a makalulua iti ragsakda kalpasan ti gimong, a kadagiti dadduma damoda a mangngegan ken matarusan ti intero a programa iti lenguaheda.

No mangaskasabakami iti binalaybalay, uray kaskasano ikagumaanmi ti mangaramid iti introduksion iti lenguahe ti bumalay, nupay pasaray marigatankami. Kas pagarigan, ti gagangay a kablaaw iti pamilia a Gujarati ket Kemcho, kayatna a sawen “Komusta.” Iti naminsan nagerrado ti panangibalikasko a kasla ketdin ipakpakaammok ti nagan ti maysa a nalatak a kape. Nupay kasta, iti maysa a pagtaengan immisem dagiti agassawa idi kinablaawak ida iti Gujarati. Dagus a pinastrekdakami ken siaayat a pinagkapedakami​—saan a gapu iti errado a panangibalikas. Naammuanmi a kabagianda ti dadduma kadagiti Saksi ni Jehova iti grupo a bisbisitaenmi, ket pudno nga interesadoda iti kinapudno.

Adda Ingles ti pagsasaona a kabsat a babai a masansan a makaipaima kadagiti magasin iti Insik ti pagsasaona a babai iti adun a tawen. Pasaray itukonna iti babai ti libre a panagadal iti Biblia iti pagtaengan, ngem napagkedkedan dayta. Maysa nga aldaw kinuyog ti kabsat a babai nga agad-adal iti Insik ket intukonna ti libro a Mabalinyo ti Agbiag nga Agnanayon iti Paraiso a Daga iti dayta a pagsasao, nga inawat a dagus ti interesado a bumalay.a Ita ta addaanen iti libro iti mismo a pagsasaona, immanamong nga agadal iti Biblia. Nasayaat ti epektona dagidiay a sumagmamano a sasao iti mismo a lenguahe ti babai.

Nagduduma a Kultura

Dimi ammo nga iti dadduma a kultura di kayat dagiti lallaki a rummuar nga agmaymaysa dagiti assawada iti rabii. Gapu iti daytoy, nakarigrigat ti itatabuno ti adu a kakabsat a babbai kadagiti gimong iti rabii. Patien ti dadduma a komunidad iti Asia a ti di pannakiasawa dagiti agkabannuag a babbai ken ti panagtalinaedda iti pagtaengan ibabainna ti pamilia. Ti ama ti maysa a kabsat a babai kayatnan ti agsabidong idi nagkedked ti kabsat a makiasawa iti lalaki a kayat ti pamiliana a pakiasawaanna. Wen, anian a nakaskasdaaw ti inibturan ti kakasta a kakabsat a babbai! Nupay kasta, pudno a nakaskasdaaw no kitaenyo ti epekto ti kinapudno iti biag ti pamilia ken no kasano a natignay dagiti nagannak gapu iti kinasungdo dagiti kakabsat a babbai.

Adda sumagmamano a panagbalbaliw a masapul nga aramidenmi iti panangawatmi iti daytoy a trabaho. Sakbay a nangrugikami iti trabaho a panagdaliasat, bin-ig a luto ti Inglatera ti kayatko a kanen, ngem ita nasaysayaat ti taraon no ad-adu ti rekadona. Sayangenmi ti adu a tawen a pinalabasmi sakbay a natagiragsakmi ti kakasta a nadumaduma a luto​—manipud iti kilawen nga ikan ken kadagiti narekaduan iti curry.

Narang-ay a Masanguanan

Iti adu a benneg kasla nabatad a daytoyen ti tiempo a panagrang-ay ti tay-ak nga addaan kadagiti ganggannaet a pagsasao. Umad-adu dagiti publikasion a magun-odan iti nagduduma a lenguahe. Makitayo ti pamendision ni Jehova bayat a maorganisar dagiti kabbaro a kongregasion. Manipud kadagiti adayo a kongregasion adda dagiti kakabsat a makapagsao iti sabsabali a lenguahe a nagdaliasat tapno tumulong.

Ti maysa a naisangsangayan a pagarigan ket ti panangikasaba iti naimbag a damag ti Pagarian iti Pranses. Kadagiti kallabes a tawen immay iti Britania ti adu a nagkamang a Pranses ti pagsasaoda manipud Zaire ken iti dadduma pay a pagilian ti Africa. Idi nabuangay idiay London ti umuna a kongregasion a Pranses ti pagsasaona, agarup 65 ti naitimpuyog nga agibumbunannag iti Pagarian. Makatawen kalpasanna immadu dayta agingga iti 117, ket kadagitoy, 48 ti nagserbi iti amin-tiempo kas regular pioneer. Di nagbayag nabuangay ti maikadua a kongregasion a mangtaming iti umad-adu nga interesado. Ita ad-adun ti atension a maipaay kadagiti interesado, a 345 kadakuada ti timmabuno iti panangrambak iti Memorial idi 1995. Dagiti nagturpos iti Gilead a nagserbi idiay Benin, Côte d’Ivoire, Morocco, ken Zaire us-usarenda itan ti kapadasanda tapno maasikasoda daytoy a dumakdakkel a tay-ak, ket nakaskasdaaw ti resultana.

Iti panagbisitami iti kongregasion a Pranses, nakikuyogak a nangyadal iti Biblia iti maysa nga agkabannuag nga Africana. Idi pumanawkamin, indawat ti babai: “Pangngaasiyo ta dikay pay mapmapan. Ditoy kay pay laeng.” Adu pay ti kayatna a maammuan. Impalagipna kaniak ti maipapan ken Lydia idi umuna a siglo.​—Aramid 16:14, 15.

Idi damo tumultulongkami iti panagbalin a kongregasion dagiti babassit a grupo a ganggannaet ti pagsasaoda. Kadagidiay kakabsat a mangang-angay iti linawas a Panagadal iti Libro ti Kongregasion, inrugimi kadakuada ti napaababa a Teokratiko nga Eskuelaan ti Panagministro iti maminsan iti makabulan. Daytoy ti tumulong kadakuada nga agbalin a nasigo nga agsao iti tay-ak ti ministerio. Kalpasanna in-inut nga angayenda amin ti lima a linawas a gimong iti kongregasion. Addaankamin kadagiti kabbaro a kongregasion nga agsasao iti Gujarati, Hapones, Insik (Cantonese), Portugues, Pranses, Punjabi, Tamil, ken Welsh.

Tinagiragsakmi met ti pribilehio a tumabuno kadagiti gimong dagiti kakabsat a tuleng. Makatukay rikna a buyaen ti panagkanta dagiti kakabsat babaen kadagiti imada. Iti panangpampanunotko a mangasabada iti ministerio babaen ti panagsenias, apresiarek ti nagsayaat a panagreggetda a makiraman iti pannakaikasaba ti Pagarian. Adda pay dagiti agipatarus para kadagidiay agpadpada a tuleng ken bulsek. Agparang a sigsiguraduen ni Jehova nga awan maikapis.

No adda partikular a kiddawenmi, umasping dayta iti kiniddaw ni Jesus: “Ipakaasiyo iti Apo ti panagani a mangibaon kadagiti managobra iti panaganina.” (Mateo 9:38) Kayat ti adu kadagiti kakabsattayo nga ibaklay ti karit nga agadal iti lenguahe dagiti etniko a grupo iti teritoria ti kongregasionda. Nupay saankami a naipaayan iti namilagruan a parabur a makapagsao iti nagduduma a lenguahe, talaga a luklukatan ni Jehova ti ministerio iti daytoy a tay-ak a pagmisioneruan​—tay-ak a natangkenanen a maani. (Juan 4:35, 36)​—Kas insalaysay ni Colin Seymour.

[Footnote]