Report Dagiti Manangiwaragawag iti Pagarian
Nakasarak iti “Perlas a Nangato ti Pategna”
“TI PAGARIAN ti langlangit umasping iti maysa nga agdaldaliasat a komersiante nga agsapsapul kadagiti nasayaat a perlas. Idi masarakanna ti maysa a perlas a nangato ti pategna, napan ket dagus nga inlakona amin dagiti bambanag nga adda kenkuana ket ginatangna dayta.” Kadagitoy a sasao, inyilustrar ni Jesus ti dakkel a pateg ti Pagarian ti Dios. (Mateo 13:45, 46) Dagidiay mangbigbig iti pateg ti Pagarian masansan a dakkel a panagsakripisio ti aramidenda tapno magun-odda daytoy. Nayilustrar daytoy iti sumaganad a kapadasan manipud iti Probinsia ti Pingtung, Taiwan.
Idi 1991, rinugian da Mr. ken Mrs. Lin ti makipagadal iti Biblia kadagiti Saksi ni Jehova. Idi naammuan daytoy ti klero iti lugarda, inkagumaanna a guyugoyen ida a tumipon iti simbaanna. Tangay ti negosio ti pagassawaan a Lin ket panaglako iti dara ti baboy ken itik iti tiendaan iti lugarda, inkeddengda nga amaden ti kapanunotan ti klero iti daytoy a banag. “Amin a banag nga inaramid ti Dios agserbi kas taraon ti tao,” insungbatna. Iti sabali a bangir, pinaregta ida dagiti Saksi a mangusig iti ibagbaga ti Sao ti Dios. Naammuanda a sagrado ken Jehova a Dios ti dara, ta “ti biag ti maysa a parsua adda iti dara.” (Levitico 17:10, 11, The New English Bible) Gapuna dagiti pudno a Kristiano masapul nga “umadayoda . . . iti dara.” (Aramid 15:20) Kas resulta ti panagsukimatda iti Kasuratan iti daytoy a banag, inkeddeng dagiti agassawa a Lin nga isardengdan ti aglako iti dara, nupay daytoy ti kangrunaan a pagsapulanda. Nupay kasta, iti di unay nagbayag, naipasangoda iti dakdakkel pay a suot.
Sakbay a naammuanda ti kinapudno, adda mula ti pagassawaan a Lin a 1,300 a bua a palma iti dagada. Nupay urayenna ti lima a tawen sakbay a panguartaan dagiti mula, iti panawen nga agbunga iti husto dagitoy, mangnamnama ti pagassawaan a Lin a makaganarda iti $77,000 kada tawen. Idi umadanin ti damo a panagapit, kasapulan a mangaramid ti pagassawaan a Lin iti napateg a pangngeddeng. Naammuanda babaen ti panagadalda iti Biblia a dagiti Kristiano masapul a dalusanda ti bagida “iti tunggal pakatulawan ti lasag ken iti espiritu” babaen ti panangliklik iti panagusar, wenno panangitandudo, iti narugit nga aramid a kas iti panagsigarilio, panagabuso iti droga, ken panagmama. (2 Corinto 7:1) Aniat’ aramidenda?
Gapu ta makonsiensia, inkeddeng ni Mr. Lin nga isardeng ti panagadalna. Kabayatanna, inlako ni Mrs. Lin dagiti bua manipud iti sumagmamano kadagiti datin a mulada a palma ket nakaganar iti nasurok a $3,000. Pangramanan laeng daytoy iti asidegen a maganarda no pagtalinaedenda dagiti mulada. Nupay kasta, ni Mr. Lin ket sidsidiren latta ti konsiensiana.
Inut-utobna a naimbag daytoy a banag agingga a, maysa nga aldaw, indawatna kadagiti Saksi iti lugarda a pukanenda dagiti buana a palma. Inlawlawag dagiti Saksi nga isu ti agdesision iti dayta; kayatna a sawen, isu ti masapul a ‘mangawit iti bukodna nga awit’ ket isu a mismo ti mangpukan kadagiti mula. (Galacia 6:4, 5) Pinaregtada a laglagipenna ti kari iti 1 Corinto 10:13, a kunana: “Awan ti sulisog a dimteng kadakayo malaksid ti kadawyan kadagiti tattao. Ngem ti Dios matalek, ket dinanto palubosan a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.” Kasta met, nakirinnason kenkuana dagiti Saksi: “No dakami ti mangpukan kadagiti mulam, amangan no pagbabawyamto dayta ket pabasolennakami iti pannakalugim.” Di nagbayag kalpasanna, nariing ni Mrs. Lin iti ungor ti de-motor a ragadi. Pukpukanen ni lakayna ken ti annakna dagiti bua a palma!
Napaneknekan ni Mr. Lin a pudno ti kari ni Jehova. Nakagun-od iti trabaho a nangipaay kenkuana iti nadalus a konsiensia, a timmulong kenkuana nga agbalin a manangidaydayaw ken Jehova. Nabautisaran iti maysa nga asamblea sirkito dagiti Saksi ni Jehova idi Abril 1996.
Wen, no an-anagen, “inlako [ni Mr. Lin] amin dagiti bambanag nga adda kenkuana” ket ginatangna ti maysa a “perlas a nangato ti pategna.” Ita ik-ikutannan ti awan kapadana a pribilehio a pannakaadda ti personal a relasion ken Jehova a Dios ken panagserbi maipaay iti intereses ti Pagarianna.